News

POST TYPE

POLITICAL

စားသုံးသူနစ်နာမှု တစ်နှစ်အတွင်း ၅၃ ကြိမ် တိုင်ကြား
14-May-2018
မန္တလေး၊ မေ ၁၃

စားသုံးသူ သတင်းပြန်ကြားရေးနှင့် တိုင်ကြားမှုလက်ခံဆောင်ရွက် ရေးစင်တာ (CICC) ဖွင့်လှစ်ခဲ့သည့် တစ်နှစ်တာကာလအတွင်း တိုင်ကြားသည့် အမှု ၅၃ ခုရှိကြောင်း မန္တလေးတိုင်း စားသုံးသူရေးရာဦးစီးဌာနထံမှ သိရသည်။ 

စားသုံးသူ သတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာကို မန္တလေးမြို့ ၃၅ လမ်းတွင် ၂၀၁၇ ခုနှစ် ဇွန်လ ၉ ရက်က စတင်ဖွင့်လှစ်ခဲ့ပြီး ယင်းနှစ်က တိုင်ကြားမှု ၃၈ ကြိမ်ရှိခဲ့ကာ ဖြေရှင်းဆဲအမှု သုံးခုရှိနေသေးကြောင်း၊ ယခုခြောက်လဘတ်ဂျက်ကာလအတွင်း လက်ရှိအချိန်ထိ တိုင်ကြားမှု ၁၅ ခုအနက် ရှစ်မှုကို ဖြေရှင်းပေးနိုင်ခဲ့ကြောင်း စားသုံးသူရေးရာဦးစီးဌာန (မန္တလေး) ဒုတိယညွှန်ကြားရေးမှူး ဦးကျော်ဦးက ပြောကြားသည်။

“ချက်ချင်းဖြေရှင်းပေးတယ်။ စင်တာနဲ့မသက်ဆိုင်တဲ့အမှုဆိုလည်း သက်ဆိုင်တဲ့ဌာနကိုလွှဲပေးတယ်။ အဓိကကတော့ စားသုံးသူနဲ့ဝန်ဆောင်မှုပေးသူကြား ပြေလည်အောင် ကျွန်တော်တို့က ညှိနှိုင်းပေးရတာပေါ့” ဟု ၎င်းက ပြောဆိုသည်။ 

CICC အနေနှင့် စားသုံးသူများကို အပြည့်အဝအကာအကွယ်ပေးနိုင်ရန် အသိပညာပေးလုပ်ငန်းများကိုလည်း ကွင်းဆင်းဆောင်ရွက်ပေးလျက်ရှိသည်။ 

စားသုံးသူနစ်နာမှု တိုင်ကြားသည့် အမှုများသည် မိုဘိုင်းလ်ဖုန်းအရောင်းဆိုင်၊ ဆက်သွယ်ရေးကုမ္ပဏီ၊ ခရီးသွားဝန်ဆောင်မှုလုပ်ငန်းများ၊ စားသောက်ကုန် လုပ်ငန်းများ၊ 4tv (Canal+)၊ စားသောက်ဆိုင်များကိုတိုင်ကြားသည့် အမှုများဖြစ်ကြောင်း မန္တလေးမြို့ CICC စင်တာ၏ စာရင်းများအရ သိရသည်။

“စားသုံးသူတွေဘက်ကနေ အပြည့်အဝ ကာကွယ်ပေးပါတယ်” ဟု ချမ်းအေးသာစံမြို့နယ်တွင်နေထိုင်ပြီး လက်ကိုင်ဖုန်းဝယ်ယူအသုံးပြုရာတွင် အဆင်မပြေမှုများနှင့် ပတ်သက်၍ တိုင်ကြားခဲ့သူ ဦးကြည်လွင်က ပြောကြားသည်။ 

ယင်းစင်တာအနေနှင့် ကြားဝင်ညှိနှိုင်းပေးမှုကြောင့် ဖုန်းအသစ်တစ်လုံး ပြန်လည်လဲလှယ်ခွင့်ရရှိခဲ့သည်ဟု ၎င်းက ပြောဆိုသည်။ 

စားသုံးသူများအတွက် သတင်းပြန်ကြားရေးနှင့် တိုင်ကြားမှုလက်ခံ ဆောင်ရွက်ရေးစင်တာ (Consumer Information Complain Center) များကို မန္တလေးခရိုင်၊ မြင်းခြံခရိုင်၊ မိတ္ထီလာခရိုင်နှင့် ကျောက်ဆည်ခရိုင်တို့တွင် ဖွင့်လှစ်ထားသည်။

M-08