News

POST TYPE

POLITICAL

နှစ်ဦးမှာ သမ္မတသစ်နဲ့ ထူးကဲစွာ ဆုံမယ့်အဖွဲ့က ဘယ်ဌာနတွေ ဖြစ်မလဲ
21-Apr-2018

သမ္မတသစ် ဦးဝင်းမြင့်ဟာ နိုင်ငံ့တာဝန်စယူပြီး နှစ်ပတ်အတွင်းမှာ ပထမဦးဆုံးတွေ့ဆုံမှုအနေနဲ့ အဂတိလိုက်စားမှုတိုက်ဖျက်ရေးကော်မရှင်၊ ပြည်ထောင်စုတရားလွှတ်တော်ချုပ်တို့နဲ့ တွေ့ဆုံခဲ့ပါတယ်။ နောက်ရက်မှာတော့ မြန်မာနိုင်ငံ လူ့အခွင့်အရေးကော်မရှင်အဖွဲ့နဲ့ ဆက်လက်တွေ့ဆုံခဲ့တာကိုလည်း သိကြပြီးဖြစ်မှာပါ။ ဒီလိုတွေ့ဆုံခြင်းဟာ မတ်လ ၃၀ ရက်နေ့က သူပြည်ထောင်စုလွှတ်တော်မှာ ပြောကြားခဲ့တဲ့ နိုင်ငံတော်အခြေပြမိန့်ခွန်းထဲမှာပါတဲ့ သူအဓိကဆောင်ရွက်မယ့်လုပ်ငန်းတွေရဲ့ ပထမဦးဆုံးခြေလှမ်းတွေလို့ လေ့လာမိကြမှာပါ။ ဒါပေမဲ့ အခြားတစ်ဖက်မှာတော့ ဒီလိုတွေ့ဆုံခြင်းဟာ သူကျွမ်းကျင်ပိုင်နိုင်ရာ တရားဥပဒေပိုင်းဆိုင်ရာနဲ့ လူ့အခွင့်အရေးပိုင်းဆိုင်ရာတွေဘက်ကို အလေးပေးဆောင်ရွက်လာခြင်းလည်း ဖြစ်နိုင်တယ်လို့ သုံးသပ်နေတဲ့သူတွေ ရှိပါတယ်။

ဒါပေမဲ့လည်း အခြားတစ်ဖက်ကကြည့်ရင်တော့ နိုင်ငံအတွင်းမှာ ယနေ့ဖြစ်ပေါ်နေတဲ့အခြေအနေတွေအရ ဆိုရင်တော့ သူ့အနေနဲ့ ဒီအဖွဲ့ ၃ ဖွဲ့ကို အဦးဆုံးတွေ့ဆုံပြီး သတိပေးပြောကြားခြင်းဟာ အသင့်တော်ဆုံး လုပ်ရပ်ဖြစ်တယ်လို့ ပြောကြတဲ့သူတွေလည်းရှိပါတယ်။ ဘာဖြစ်လို့လဲဆိုတော့ ယနေ့လက်ရှိအနေအထားကို လက်တွေ့ကျကျ လေ့လာကြည့်တဲ့အခါ ပထမဦးဆုံးအနေနဲ့ အဂတိလိုက်စားမှုကိစ္စတွေကို လေ့လာကြည့်ရင် မကြာသေးမီကမှ ကော်မရှင်ဥက္ကဋ္ဌနဲ့ အဖွဲ့ဝင်အသစ်တွေနဲ့ ပြန်လည်ဖွဲ့စည်းထားတဲ့ အဂတိလိုက်စားမှုတိုက်ဖျက်ရေးကော်မရှင်ထံကို တစ်လအတွင်းရောက်ရှိလာတဲ့တိုင်စာ အရေအတွက်ဟာ ကိန်းဂဏန်းအတော်များနေသလို အများဆုံးအတိုင်ခံထားရတဲ့ဌာနတွေက ဘာဆိုတာလည်းသူတို့က ထုတ်ပြောထားတာ ကြားမိကြမှာပါ။ ဒါ့အပြင် ကော်မရှင်ဥက္ကဋ္ဌဆိုသူရဲ့ စကားအရသုံးသပ်ကြည့်ရရင် အချို့သောအကျင့်ပျက်ခြစားမှုများအတွက် တိုင်ကြားလာတဲ့ဖြစ်စဉ်တွေဟာ မှန်ကန်နိုင်ပေမယ့်လည်း စုံစမ်းစစ်ဆေးအရေးယူကြရမယ့်အပိုင်းတွေမှာတော့ သူတို့ရဲ့ အခွင့်အာဏာလုပ်ပိုင်ခွင့်နဲ့ မရဘူးဖြစ်နေတာတွေ၊ သူတို့ကော်မရှင်အဖွဲ့ကို အထူးဥပဒေတစ်ရပ် (Special Law) နဲ့တာဝန်နဲ့ လုပ်ပိုင်ခွင့်တွေ၊ ဖွဲ့စည်းမှုတွေ၊ ဘဏ္ဍာငွေသုံးစွဲနိုင်မှုအပိုင်းတွေမှာ အားနည်းချက်တွေရှိနေတာတွေကြောင့် ဥပဒေအရ အကြံဉာဏ်ရယူတဲ့အခါမျိုး၊ မှန်မမှန်စုံစမ်းစစ်ဆေးဖို့လိုတဲ့အခါမျိုးတွေမှာ အုပ်ချုပ်ရေးဌာနတွေဘက်ကို ဖြစ်စဉ်ချပြပြီး အကူအညီ ရယူနေကြရတာတွေကြောင့် အချို့ကိစ္စတွေဟာ ထိထိရောက်ရောက် မဖြစ်ခဲ့ကြဘူးလို့ဘဲ သုံးသပ်မိကြမှာပါ။

ဒီအတွက်လည်း အဂတိလိုက်စားမှုဆိုတဲ့အကျင့်ပျက်ခြစားမှုတွေ ပပျောက်ဖို့ဆိုရင် ဒီကော်မရှင်ကိုလည်း လုပ်ပိုင်ခွင့်အာဏာကို ဒီထက်ချဲ့ထွင်အပ်နှင်းပေးတာအပြင် သူ့ကော်မရှင်အတွင်းမှာတင် သူ့ဥပဒေပညာရှင်နဲ့သူ ဥပဒေကြောင်းအရ သုံးသပ်တာ၊ သူ့ပညာရှင်နဲ့သူ့လူတွေနဲ့ သူတိုင်ကြားလာတဲ့တိုင်စာတွေအပေါ် စုံစမ်းစစ်ဆေးတာ၊ နောက်လိုအပ်တဲ့ ဘဏ္ဍာငွေတွေကိုလည်း အစိုးရကထောက်ပံ့ပေးတာတွေ ပြောင်းလဲကြရမယ့်အခြေအနေပါ။ ယခုလက်ရှိအခြေအနေမှာတော့ ဒီကော်မရှင်ရဲ့ဥပဒေကိုပြင်ဆင်ဖို့ လွှတ်တော်ကို တင်ထားဆဲ အနေအထားမှာရှိနေပြီး နောင်လာမယ့်အစည်းအဝေးတွေမှာတော့ ထုတ်ပြန်ပြဋ္ဌာန်းပေးနိုင်တော့မယ်ထင်ပါတယ်။ ဆိုလိုရင်းကတော့ ငါးကြီးကြီးတွေကို ကြော်ဖို့ဆီကို အစိုးရ ကတာဝန်ယူပြီး ထုတ်ပေးတော့မယ့်အခြေအနေပါပဲ။ ဒီအခြေအနေတွေကို နားလည်တဲ့ သမ္မတသစ်အနေနဲ့ သူ့ရဲ့တာဝန်စတင်ယူမှုကာလရဲ့ ပထမအစဆုံးတွေ့ဆုံမှုအဖြစ်နဲ့ ဒီကော်မရှင်ကိုသာ ရွေးချယ်တွေ့ဆုံခဲ့ပြီး ကော်မရှင်အနေနဲ့ လုပ်ငန်းတာဝန်တွေကို တိတိကျကျလုပ်ဖို့၊ လုပ်ငန်းကို ဝင်ရောက်စွက်ဖက်မှုများ၊ အကာအကွယ်ပေးမှုများရှိပါက ပွင့်ပွင့်လင်းလင်းတင်ပြဖို့၊ တိုင်းဒေသကြီးပြည်နယ်များထိ အဖွဲ့ခွဲများဖွဲ့ပြီး တိုးချဲ့ဆောင်ရွက်ဖို့၊ လုပ်ငန်းလုပ်ဆောင်တဲ့နေရာမှာ မျက်နှာကြီးငယ်မလိုက်ဘဲ ဆူကြုံနိမ့်မြှင့်မရွေး ပြတ်ပြတ်သားသားဆောင်ရွက်သွားဖို့ သူက လမ်းညွှန်မှာကြားခဲ့တာကိုလည်း လေ့လာမိကြမယ်ထင်ပါတယ်။ အမှန်တကယ်ဆိုရင် နိုင်ငံတော်မတိုးတက်မဖွံ့ဖြိုးရခြင်းရဲ့ ၉၉ ရာခိုင်နှုန်းဟာ ဒီအဂတိလိုက်စားမှုတွေကြောင့်လို့ပြောရင်ကို အမှန်ကန်ဆုံးဖြစ်နိုင်သလို ရှေးယခင်အဆက်ဆက် အစိုးရမင်းများလက်ထက်ကိုပြန်ကြည့်ရင် သူတို့ ဘာကြောင့် ချမ်းသာနေကြသလဲဆိုတဲ့မေးခွန်းကိုပဲ မေးကြည့်လိုက်ရင် သိသာလွန်းလှပါတယ်။ တိုင်းပြည်တိုးတက်ဖို့နဲ့ ပြည်သူတွေသက်သာချောင်ချိဖို့အတွက် သုံးစွဲကြရမယ့်ဘဏ္ဍာငွေတွေဟာ မသမာသူတွေရဲ့ကိုယ်ကျိုးရှာမှုအောက်မှာ ပျောက်ချင်းမလှ ပျောက်ကွယ်သွားခဲ့ကြရတာပါ။ 

မြေပေါ်မြေအောက် သယံဇာတပေါများလှတဲ့ နိုင်ငံတစ်ခုအတွက် ဘာ့ကြောင့်မချမ်းသာရသလဲမေးရင် အဖြေတွေက အသင့်ကိုရှိနေသလို အုပ်ချုပ်သူလူတန်းစားကသာ ချမ်းသာပြီး နိုင်ငံနဲ့လူမျိုးက ဆင်းရဲတွင်းထဲက ကျသထက်ကျပြီး ငွေတွင်းတွေ နက်သထက်နက်စေခဲ့တဲ့တရားခံကို ရှာဖွေကြည့်ရင် ဒီအကျင့်ပျက်လာဘ်စားမှု သန္ဓေဆိုးကြီးပဲဖြစ်တာ ငြင်းမရနိုင်ပါဘူး။ အခုထိလည်း အမြစ်တွယ်နေဆဲပဲလို့ ပြောနိုင်တဲ့အခြေအနေတွေပါ။ နိုင်ငံ့ဘဏ္ဍာငွေတွေကို ကိုင်တွယ်သုံးစွဲကြရတဲ့ အစိုးရဌာနတွေအထဲမှာရော ဘယ်လောက်အတွင်းလှိုက်စားနေပြီလဲ၊ တစ်ဗိုလ်တက်တစ်ဗိုလ်ဆင်းသွားတဲ့ကြားမှာ ယခင်ကထက်များပိုပြီး လုပ်စားလို့ကောင်းနေကြပြီလားဆိုတာလည်း စဉ်းစားစရာပါ။ ဌာနဆိုင်ရာတွေအတွင်းက မလိုအပ်ဘဲ အပိုတွက်ချက်တောင်းခံပြီး ရပိုင်ခွင့်လို ဖန်တီးယူနေကြတဲ့ အကျင့်တွေကိုရော ဘယ်လိုအမြစ်ပြုတ်အောင်လုပ်မလဲဆိုတာလည်း အလွန်စဉ်းစားဖွယ်ရာအချက်ပါပဲ။

သမ္မတသစ်ဦးဝင်းမြင့်ပထမဆုံးတွေ့ခဲ့တဲ့ ဒုတိယအဖွဲ့ကတော့ ပြည်ထောင်စုတရားသူကြီးချုပ်နဲ့ သူ့ရဲ့လက်အောက်က တရားသူကြီးတွေပါဝင်တဲ့ တရားရေးမဏ္ဍိုင်အဖွဲ့ကိုပါ။ ဒီကနေ့ အဂတိလိုက်စားမှုတိုက်ဖျက် ရေးကော်မရှင်ကို တိုင်ကြားလာတဲ့တိုင်စာတွေအထဲမှာ ဘာတွေအဓိကပါသလဲလို့သွားမေးကြည့်ရင် ဒီတရားရေးဆိုင်ရာက အကျင့်ပျက်လာဘ်စားမှု ကိစ္စတွေလည်း ရှေ့ဆုံးက ပါဝင်မှာပါလို့ သူတို့ဖြေကြားကြမှာပါပဲ။ ဒီအတွက်ပဲ ဦးဝင်းမြင့်က သူ့ရဲ့ပထမဆုံးမိန့်ခွန်းထဲမှာ ထည့်ပြောသွားခဲ့ပြီး အခုလို တွေ့ဆုံမှုမှာလည်း သူက တရားရေးမဏ္ဍိုင်တည့်မတ်ခိုင်မာဖို့ မည်သို့ကြပ်မတ်သွားမည်ဆိုသည်ကို စဉ်းစားဆောင်ရွက်သွားဖို့၊ တိုင်းဒေသကြီးပြည်နယ်တွေအထိ အဆင့်ဆင့်တာဝန်ယူ တာဝန်ခံမှုစနစ်နဲ့ ဆင့်ကဲကြပ်မတ်သွားဖို့၊ နိုင်ငံ့ဘဏ္ဍာကိုဆုံးရှုံးစေတဲ့ သက်သေခံပစ္စည်းဖျောက်ဖျက်မှုများကို ပြုပြင်ကြပ်မတ်ဖို့၊ တရားသူကြီးတွေအနေနဲ့ လက်စွဲလက်ကိုင်ပြုပြီး အားထားရတဲ့ဥပဒေများ၊ ကျင့်ထုံးများကို တိတိကျကျမှန်မှန်နဲ့ ဆောင်ရွက်ပြီး အဂတိကင်းကင်းနဲ့ ဆောင်ရွက်ဖို့၊ တရားရေးဆိုင်ရာဝန်ထမ်းများကို ရွှေ့ပြောင်းခြင်းနဲ့ ရာထူးတိုးမြှင့်ပေးတဲ့နေရာမှာ အမှန်အရည်အချင်းရှိ သူတွေကိုသာတိုးပေးဖို့ မှာကြားခဲ့တာကိုလည်း ကြားခဲ့ကြရပြီးဖြစ်မှာပါ။ အမှန်တကယ်ဆိုရင်လည်း အမှန်တကယ်ပါပဲလို့သာ ပြောရမယ့်အခြေအနေတွေပါပဲ။ ဒီအပေါ် အားလုံးလည်း သိကြားပြီးသားတွေမို့ ထပ်ပြီးတော့ မပြောတော့ပါဘူး။

သြင်္ကန်ရက်မတိုင်မီ သမ္မတသစ်တွေ့ခဲ့တဲ့ အဖွဲ့ကတော့ မြန်မာနိုင်ငံလူ့အခွင့်အရေးကော်မရှင်ဥက္ကဋ္ဌနဲ့ အဖွဲ့ဝင်တွေကိုပါ။ ဒီလိုတွေ့တယ်ဆိုတာကလည်း အပေါ်ကအဖွဲ့တွေနဲ့ ဒီအဖွဲ့နဲ့ကလည်း ဆက်စပ်နေသလို ဒီမိုကရေစီစနစ်ကို ခိုင်မာတောင့်တင်းအောင် ကျားကန်ထိန်းသိမ်းရမှာကလည်း ဒီအဖွဲ့တွေပါပဲ။ ဒီအဖွဲ့နဲ့ အဂတိတိုက်ဖျက်ရေးကော်မရှင်တို့ဟာဆိုရင် ပါတီစုံ ဒီမိုကရေစီစနစ်ကို ကျင့်သုံးခြင်းနဲ့အတူ ၂၀၀၈ အခြေခံဥပဒေအရ ပေါ်ပေါက်လာတဲ့ အစိုးရမဟုတ်တဲ့ လွတ်လပ်တဲ့အဖွဲ့အစည်းတွေလည်း ဖြစ်ပါတယ်။ ဒီမိုကရေစီရေးနဲ့ လူ့အခွင့်အရေးတွေကို ထိန်းကျောင်းဖို့နဲ့ အစိုးရအနေနဲ့ လူ့အခွင့်အရေးတွေချိုးဖောက်မှုရှိနေမယ်ဆိုရင်လည်း သမ္မတထံကို အထူးအစီရင်ခံစာတင်သွင်းပြီး ကန့်ကွက်ဖို့ သူ့မှာလုပ်ပိုင်ခွင့်တွေရှိနေတဲ့အဖွဲ့ပါ။ ဒီအဖွဲ့တွေ ဆောင်ရွက်ချက်ကောင်းရင် ကောင်းသလောက် အစိုးရအဖွဲ့နဲ့ သူ့ရဲ့ဌာနဆိုင်ရာတွေ အကျင့်ပျက်ခြစားတာ၊ တရားဥပဒေကို လက်တစ်လုံးခြားကျူးလွန်တာတွေကို ထိန်းကျောင်းတည့်မတ်လို့ရပါတယ်။ ဒီအတွက်ပဲ သူ့အနေနဲ့ ဒီအဖွဲ့တွေကို အဦးဆုံး တွေ့ဆုံခဲ့တာပဲ ဖြစ်နိုင်ပါတယ်။ 

သမ္မတရဲ့ ဒီလိုတွေ့ဆုံမှုအပေါ် လူထုကစိတ်ဝင်စားမှုပိုခဲ့ကြပြီး တွေ့ဆုံစဉ် သမ္မတက မှာကြားခဲ့တဲ့အချက်တွေအပေါ်လည်း ကြိုဆိုခဲ့ကြပါတယ်။ နောက်ပိုင်းမှာလည်း ဒီအဖွဲ့တွေအနေနဲ့ စွမ်းဆောင်ရည်တွေ ဘယ်လိုထုတ်ပြလာပြီး သမ္မတသစ်ရဲ့အကြိုက်ကို ဘယ်လိုပူးပေါင်းကြံ ဆောင်ကြမလဲဆိုတာကိုလည်း စောင့်ကြည့်သွားကြရတော့မှာပါ။ ဒီအဖွဲ့တွေနဲ့ သြင်္ကန်ကာလမတိုင်မီက တွေ့ဆုံမှာကြားခဲ့သလိုမျိုး အခုသြင်္ကန်ပြီးကာလ နှစ်ဦးအစမှာ သမ္မတအနေနဲ့ ကျန်တဲ့ဌာနတွေအထဲက ဘယ်သူတွေနဲ့ ဆက်လက်တွေ့ဆုံပြီး ဘယ်လိုတွေ မောင်းတင်မှာကြားဦးမလဲဆိုတာလည်း လူထုက စိတ်ဝင်စားမှုမြင့်တက်နေပါတယ်။ သမ္မတသစ်ပြောခဲ့တဲ့ မိန့်ခွန်းထဲက အကြောင်းအရာတွေအရဆိုရင်တော့ နှစ်ဦးမှာ သမ္မတနဲ့ ထူးကဲစွာတွေ့ဆုံနိုင်မယ့်အဖွဲ့ကတော့ ပြုပြင်ပြောင်းလဲမှုနှောင့်နှေးနေတဲ့ဌာနဆိုင်ရာတွေက ဝန်ကြီးဝန်လေးတွေနဲ့ အတွင်းဝန်တွေဖြစ်ဖို့များသလို နောက်အဖွဲ့ကတော့ သိမ်းဆည်းခံလယ်ယာမြေတွေအတွက် စီမံခန့်ခွဲနေတဲ့ လယ်ယာမြေများ စီမံခန့်ခွဲမှုဗဟိုအဖွဲ့ ဥက္ကဋ္ဌနဲ့အဖွဲ့ဝင်တွေ ဖြစ်ဖို့များပါတယ်။

ဒီအတွက် အပေါ်က ဆိုခဲ့သမျှအပေါ် ကောက်ချက်ဆွဲကြည့်လိုက်ရင် သမ္မတသစ်အနေနဲ့ သူတာဝန်ယူရမယ့် နောက်သုံးနှစ်ဆိုတဲ့ကာလမှာတော့ သူ့ရဲ့နောက်တစ်ကြိမ်သက်တမ်းအတွက် ပြည်သူ့ထောက်ခံမှုကို ပိုမိုရရှိဖို့နဲ့ သူ့မိန့်ခွန်းထဲကအတိုင်း တရားဥပဒေစိုးမိုးမှုရှိဖို့၊ မူးယစ်ကင်းစင်ဖို့၊ ဘဏ္ဍာငွေတွေဖိတ်စဉ်မှုမဖြစ်ဖို့၊ အဂတိလိုက်စားမှုတွေချုပ်ငြိမ်းပြီး တိုင်းပြည်စီးပွားရေးကို ဦးမော့ဖို့ဆိုရင် အကြံပေးလိုတာကတော့ သမ္မတသစ်ဦးဝင်းမြင့်အနေနဲ့ မိမိအားသန်တဲ့ဥပဒေရေးရာအပိုင်းတွေကိုတော့ ကိုယ်တိုင်ဦးစီးဦးဆောင်ပြုလုပ်သင့်ပြီး ကျန်တဲ့အပိုင်းတွေကိုတော့ နိုင်ငံအတွင်းက နိုင်ငံ့ကောင်းကျိုးကို လိုလားတဲ့ တတ်သိပညာရှင်တွေ၊ စီးပွားရေးလုပ်ငန်းရှင်တွေ၊ ဥပဒေပညာရှင်တွေ၊ နိုင်ငံတကာက နိုင်ငံသားစွန့်ဦးတီထွင်သမားတွေ၊ လူငယ်တွေကို ပွင့်ပွင့်လင်းလင်း ဖိတ်ခေါ်ပြီး ကော်မရှင်တွေဖွဲ့စေချင်ပါတယ်။ အဂတိလိုက်စားမှုတိုက်ဖျက် ရေးစောင့်ကြည့်မှုကော်မရှင်၊ စီးပွားရေးဖွံ့ဖြိုးတိုးတက်ရေးအကြံပေး ကော်မရှင်၊ တရားဥပဒေစိုးမိုးရေးနှင့် မူးယစ်ဆေးဝါးကင်းစင်ပပျောက်ရေး စောင့်ကြည့်လေ့လာသုံးသပ်ရေးကော်မရှင် စတဲ့စတဲ့ အဖွဲ့တွေကို ဥပဒေပါ အခွင့်အာဏာအရဖွဲ့စည်းပြီး သမ္မတသစ်ဘေးမှာ ဝန်းရံထားစေချင်ပါတယ်။

ဒီလိုသာ ဖိတ်ခေါ်လိုက်ရင် နိုင်ငံကိုစေတနာထားပြီး လာဘ်လာဘမမက်ဘဲ ပြည်သူ့အကျိုးကိုသာရှေးရှုပြီး မိမိစရိတ်နဲ့မိမိ သမ္မတအနားမှာ လာရောက်ခစားပြီး အလုပ်အကြွေးပြုမယ့်သူတွေ ဒုနဲ့ဒေးရှိနေမှာ အသေအချာပါပဲ။ အဓိကကတော့ သမ္မတသစ်အနေနဲ့သာ လွှတ်တော်အတွင်းမှာ ကော်မတီကော်မရှင်တွေ မှိုလိုပေါက်အောင်ဖွဲ့ကြသလိုမျိုး သမ္မတရုံးမှာလည်း လက်ရှိဝန်ထမ်းတွေကိုပဲ အားကိုးမနေဘဲ အခြားနိုင်ငံတွေကလိုမျိုး ဖွဲ့စည်းပြီး အကြံဉာဏ်ယူကာ ရရှိတဲ့အချိန်တိုအတွင်းမှာ အင်တိုက်အားတိုက်ဆောင်ရွက်သွားစေချင်ပါကြောင်း စိတ်ကောင်းစေတနာနဲ့ ရေးသားတင်ပြလိုက်ရပါတယ်။

အောင်ဇေယျ