News

POST TYPE

POLITICAL

ရှစ်လေးလုံးပါတီနာမည် ပြန်လည်သုံးသပ်မည်ဟု ဦးကိုကိုကြီး ပြောကြား
27-Mar-2018
နေပြည်တော်၊ မတ် ၂၆

ရှစ်လေးလုံးပါတီနာမည်ကို ပြောင်းသင့်မပြောင်းသင့်ကို ပြန်လည်သုံးသပ်မည်ဖြစ်ကြောင်း ယင်းပါတီတည်ထောင်ခွင့်လျှောက်ထားသူ ဦးကိုကိုကြီးက မီဒီယာများကို ပြောကြားသည်။

မတ်လ ၂၆ ရက်က နေပြည်တော်ရှိ ပြည်ထောင်စုရွေးကောက်ပွဲကော်မရှင်ရုံးတွင် ကော်မရှင်ဥက္ကဋ္ဌ ဦးလှသိန်းနှင့် တာဝန်ရှိသူများနှင့် ရှစ်လေးလုံးပါတီ ဦးဆောင်သူများ စာရင်းတွင်ပါဝင်သည့် ဦးကိုကိုကြီး၊ ဦးရဲနိုင်အောင်တို့ တွေ့ဆုံကြခြင်းဖြစ်သည်။

“ကျွန်တော်တို့ ပြန်သုံးသပ်ပါမယ်။ အားလုံးကလည်း နယ်အသီးသီးမှာ သူတို့ ကိုယ်၌က ပြောတာက သက်ဆိုင်ရာ ဒေသခံပြည်သူတွေ ကိုယ်၌က ဒီလူတွေဆိုရင် ရှစ်လေးလုံးကျောင်းသားတွေ၊ ၈၈ မျိုးဆက်တွေဆိုပြီး ဒီလိုတွဲပြီးသိထားပြီး ဖြစ်နေတယ်။ နောက် သူတို့ကိုယ်၌ကလည်း ဒီရှစ်လေးလုံးအရေးတော်ပုံကြီးကို အင်မတန်တန်ဖိုးထားတဲ့အတွက်ကြောင့်မို့ ဒီနာမည်ကို ပါစေချင်တယ်ဆိုတာက ဒေသခံတွေလှုပ်ရှားတဲ့ ရဲဘော်တွေကိုယ်၌က ဒါကိုအဆိုပြုထားပါတယ်”ဟု ဦးကိုကိုကြီးက ရှင်းပြသည်။

ပါတီနာမည် မှတ်ပုံတင်ခြင်းနှင့် ပတ်သက်၍ သက်ဆိုင်ရာမှစိစစ်မှုပြီး သွားပြီဖြစ်ပြီး ကော်မရှင်အနေနှင့် ကန့်ကွက်ချက်မရှိသော်လည်း အငြင်းပွားမှုများရှိနိုင်သောကြောင့် ကော်မရှင်အနေနှင့် အနည်းငယ်စိုးရိမ်မိသည်ဟု ပြောဆိုကြောင်း ၎င်းက ပြန်လည်ပြောကြားသည်။

“ကျွန်တော်တို့ကလည်း ဒီနာမည်ဖြစ်ပေါ်လာပုံနဲ့ပတ်သက်ပြီး အဆင့်ဆင့် ဆွေးနွေးခဲ့တယ်။ ကိုယ်စားပြုမှုနဲ့ ပတ်သက်တဲ့ အခြေအနေတွေကိုလည်း ကော်မရှင်ကို ရှင်းပြခဲ့ပါတယ်”ဟု ၎င်းက ထပ်လောင်းပြောသည်။

ရှစ်လေးလုံးပါတီကို တရားဝင်မှတ်ပုံတင်ရန် ၂၀၁၇ ခုနှစ် ဒီဇင်ဘာ ၁၉ ရက်က ဦးကိုကိုကြီးအပါအဝင် အဖွဲ့ဝင်များက နေပြည်တော်ရှိ ရွေးကောက်ပွဲကော်မရှင်ထံ လာရောက်တင်ပြခဲ့ခြင်းဖြစ်သည်။

ရွေးကောက်ပွဲကော်မရှင်အနေနှင့် ပါတီအမည်ပြောင်းရန် ဖိအားပေးခြင်းမဟုတ်ဘဲ သဘောထားကိုသာ ရှင်းပြခဲ့ခြင်းဖြစ်ပြီး မိမိတို့ဘက်မှလည်း ရှစ်လေးလုံးပါတီအမည် ပေါ်ပေါက်လာပုံနှင့် မြို့နယ်အဆင့်ဆင့်ပါတီအမည်ကို ရွေးချယ်သဘောတူထားခြင်းကြောင့် ပါတီတွင် ပါဝင်သူများ၏ သဘောထားများကို ပြန်လည်တောင်းခံရမည်ဟု ပြန်လည်ရှင်းပြခဲ့ကြောင်း ပါတီဦးဆောင်အဖွဲ့မှ ဦးရဲနိုင်အောင်က ပြောကြားသည်။

“ပြဿနာရှိတယ်လို့ ကျိန်းသေ ပေါက်ပြောတာမဟုတ်ဘူး။ သူတို့ရဲ့ ထင်မြင်ချက်တွေကိုချပြတယ်။ ကျွန်တော်တို့ကလည်း ပါတီရဲ့ ဒီနာမည် ဘာကြောင့်မှည့်ရလဲဆိုတာ ရှင်းပြတယ်။ နာမည်နဲ့ ပတ်သက်လို့ နှစ်ဖက်အမြင်ဖလှယ်ကြတယ်၊ တစ်စုံတစ်ရာ ပြဿနာတက်တဲ့သဘော၊ ငြင်းခုံတဲ့ သဘောတော့မဟုတ်ဘူး” ဟု ၎င်းက ဆိုသည်။

ပါတီအမည်နှင့်ပတ်သက်၍ ပါတီတည်ထောင်သည့်အဖွဲ့ဝင်များ၊ မြို့နယ်၊ တိုင်းအဆင့် အလုပ်အဖွဲ့များနှင့် ပြန်လည်တိုင်ပင်ဆွေးနွေးရမည်ဖြစ်ပြီး ပြည်ထောင်စုရွေးကောက်ပွဲကော်မရှင်နှင့် ဧပြီလ ၆ ရက်တွင် ထပ်မံတွေ့ဆုံသွားမည်ဖြစ်ကြောင်း သိရသည်။

အဆိုပါ တွေ့ဆုံမှုနှင့်ပတ်သက်၍ ပြည်ထောင်စုရွေးကောက်ပွဲကော်မရှင်ထံ ဆက်သွယ်မေးမြန်းရာ ဆွေးနွေးမှုအဆင်ပြေကြောင်းနှင့် အသေးစိတ်ကို ဦးကိုကိုကြီးတို့ထံ မေးမြန်းရန် ပြန်လည်ဖြေကြားခဲ့သည်။

ပါတီမှတ်ပုံတင်ရရှိမည်ဆိုပါက ယခုနှစ် (၂၀၁၈ အတွင်း) ကျင်းပမည့် ကြားဖြတ်ရွေးကောက်ပွဲကို ဝင်ရောက်ယှဉ်ပြိုင်သွားမည်ဖြစ်ကြောင်း ကြေညာထားသည်။

ရှစ်လေးလုံးအမည်သည် အများနှင့်သက်ဆိုင်သည့်ကိစ္စဖြစ်သောကြောင့် ကန့်ကွက်မှုနှင့် ဝေဖန်မှုများရှိခဲ့ခြင်းကြောင့် လူတစ်ဦးချင်း၏ဆန္ဒကို အလေးထားကြောင်း ဦးကိုကိုကြီးက ပြောသည်။

အဆိုပါ ရှစ်လေးလုံးပါတီကို ၈၈ မျိုးဆက် ကျောင်းသားခေါင်းဆောင်များ ဖြစ်ကြသည့် ဦးကိုကိုကြီး၊ ဦးမင်းဇေယျ၊ ဦးရဲနိုင်အောင်တို့ ဦးဆောင်ကာ ဖွဲ့စည်းတည်ထောင်ခဲ့ခြင်းဖြစ်သည်။

ယင်းပါတီဖြစ်မြောက်ရေးအတွက် နိုင်ငံရေးပါတီဖြစ်မြောက်ရေးကော်မတီ ရုံးခန်းများကို တိုင်းနှင့်ပြည်နယ်အချို့တွင် ဖွင့်လှစ်ထားပြီး ကျန်ရှိသည့်နေရာတွင်လည်း ဆက်လက်ဖွင့်လှစ်ရန် စီစဉ်နေကြောင်း ထုတ်ပြန်ပြောဆိုထားသည်။

S-01, J-08