News

POST TYPE

POLITICAL

သမ္မတနဲ့ လွှတ်တော်ဥက္ကဋ္ဌနေရာကို ဘယ်သူတွေကို ဘယ်လို ပြန်ရွေးချယ်ခန့်အပ်ကြမလဲ ဘာတွေ​ဖြစ်လာနိုင်သလဲ
22-Mar-2018

ကာလရှည်ကြာ ပြည်သူတွေ ထင်ကြေးနဲ့ပြောနေကြတဲ့ နိုင်ငံတော်သမ္မတ ဦးထင်ကျော်ဟာ ကျန်းမာရေး အခြေအနေအရ နုတ်ထွက်မယ်ဆိုတဲ့သတင်းဟာ မတ်လ ၂၁ အရောက်မှာတော့ သမ္မတရုံးရဲ့ အမိန့်ထုတ်ပြန်ချက်နဲ့ အဖြေထွက်သွားခဲ့ပါတယ်။ သူ့အနေနဲ့ လက်ရှိ အလုပ်တာဝန်များမှ အနားယူလိုသောကြောင့် ရာထူးကနေ နုတ်ထွက်သွားခဲ့တယ်ဆိုတာကို အဆိုပါ ထုတ်ပြန်ချက်မှာပါရှိခဲ့ပြီး လစ်လပ်သွားတဲ့ သမ္မတရာထူးကို အလုပ်လုပ်ရက် ခုနစ်ရက်အတွင်း ဖြည့်စွက်နိုင်ရေးအတွက် ဆက်လက် ဆောင်ရွက်သွားမယ်လို့လည်း ကြေညာထားခဲ့ပါတယ်။ ဒါနဲ့ တစ်ဆက်တည်းကျစွာ ထူးခြားတဲ့သတင်းတစ်ခုကလည်း တစ်ပြိုင်နက်တည်းဆိုသလို ထွက်ပေါ်လာခဲ့ပါတယ်။ ဒါကတော့ ပြည်သူ့လွှတ်တော်ဥက္ကဋ္ဌ ဦးဝင်းမြင့်အနေနဲ့ လွှတ်တော်ဥက္ကဋ္ဌနေရာက နုတ်ထွက်ကြောင်း မတ်လ ၂၁ ရက်နေ့ကပြုလုပ်တဲ့ ပြည်သူ့လွှတ်တော် အစည်းအဝေးမှာ ဒုတိယဥက္ကဋ္ဌ ဖြစ်သူ ဦးတီခွန်မြတ်က ကြေညာသွားတဲ့ကိစ္စပါ။

ဒီအကြောင်းတွေကိုလည်း အားလုံးသိကြပြီးဖြစ်မယ်ထင်ပါတယ်။ သမ္မတဦးထင်ကျော်အနေနဲ့ သူ့ရဲ့ကျန်းမာရေးကိစ္စအရ အခုလိုနုတ်ထွက်တယ်ဆိုတာ ထူးဆန်းတဲ့ကိစ္စတော့ မဟုတ်ပါဘူး။ ဒီလိုဘာ့ကြောင့်ပြောရသလဲဆိုရင် သူ့အနေနဲ့ အခုလို နုတ်ထွက်နိုင်ခြေ ရှိတယ်ဆိုတာကိုလည်း ယခင့်ယခင်ကာလများကတည်းက လူထုအတွင်းမှာလည်း ထင်ကြေးနဲ့ ပြောနေကြတာတွေ၊ ခန့်မှန်းထားကြတာတွေ ရှိနေလို့ပဲ ဖြစ်ပါတယ်။ ဒါပေမဲ့ အခုတော့ အမှန်တကယ် နုတ်ထွက်သွားချိန်မှာ သူ့ရဲ့ကျန်းမာရေး အခြေအနေအရ ထွက်သွားတာကို လူထုတွေအနေနဲ့ ဘာမှမပြောလိုပေမယ့်လည်း ဒီကိစ္စရဲ့ နောက်ဆက်တွဲ ဖြစ်ပေါ်လာမယ့် သမ္မတနဲ့ ပြည်သူ့လွှတ်တော်ဥက္ကဋ္ဌနေရာတွေကို ဘယ်လို ပြန်လည်ရွေးချယ်ကြရမှာလဲ၊ ဘယ်သူတွေများဖြစ်လာမလဲ ဆိုတာကိုတော့ အခုရက်ပိုင်းမှာ ပြည်သူတွေအတွင်း စိတ်ဝင်စားမှု မြင့်တက်လာကြဦးမှာ အမှန်ပဲဖြစ်ပါတယ်။ ပြည်သူ တွေစိတ်ဝင်စားမှုမြင့်တက်ခြင်းနဲ့အတူ ဒီကိစ္စတွေကို အဓိကတာဝန်ယူ ဆောင်ရွက်ကြရမယ့် ပြည်သူ့လွှတ်တော်နဲ့ ပြည်ထောင်စုလွှတ်တော်တို့ အတွင်းမှာလည်း ယခုရက်ပိုင်းတွေ အတွင်းမှာတော့ အစည်းအဝေးတွေ ခပ်စိပ်စိပ် လုပ်ကြခြင်းနှင့်အတူ မဲပေးတာတွေ၊ ရွေးချယ်တာတွေနဲ့ ကိုယ်စားလှယ်တွေ လှုပ်လှုပ်ရှားရှားဖြစ်နေဦးမယ့် သီတင်းပတ်လည်း ဖြစ်လာဦးမှာ ထင်မိပါတယ်။

ဒါဆိုရင် ပထမဦးစွာ လစ်လပ်သွားတဲ့ နိုင်ငံတော် သမ္မတနေရာကို ဘယ်လို ဘယ်ပုံ ရွေးချယ်ပေးရမယ်၊ သူနဲ့သက်ဆိုင်တဲ့ဥပဒေပါ ပြဋ္ဌာန်းချက်တွေက ဘယ်လိုရှိတယ်၊ ဘယ်လိုရက်တွေမှာ ရွေးချယ်ကြရနိုင်တယ်၊ ဘယ်သူဖြစ်လာနိုင်တယ် ဆိုတာတွေကို ကျွန်တော်တို့ ဆက်လက်ဆွေးနွေးကြည့်ကြရအောင်ပါ။

ပထမဦးဆုံးအနေနဲ့ အခုလို ရုတ်တရက် လစ်လပ်သွားတဲ့သမ္မတ နေရာရွေးချယ်တင်မြှောက်ခြင်းနဲ့ဆိုင်တဲ့ ဥပဒေပါ ပြဋ္ဌာန်းချက်တွေကို လေ့လာကြည့်တဲ့အခါ ဖွဲ့စည်းပုံ အခြေခံဥပဒေရဲ့ ပုဒ်မ ၇၃ ၊(က) (ခ) (ဂ)(ဃ) (င) (စ) နဲ့ (ဆ)တွေမှာ သမ္မတရုံးက လုပ်ရမယ့်ကိစ္စနဲ့ ပြည်ထောင်စု လွှတ်တော်က လုပ်ပေးရမယ့်ကိစ္စတွေ ပါထားသလို ပြည်ထောင်စုလွှတ်တော်ဆိုင်ရာ ဥပဒေ နည်းဥပဒေ၊ ၁၃၁၊ ၁၃၂ ပါ ပြဋ္ဌာန်းချက်တွေနဲ့ သူ့အတွက် သီးခြားပြဋ္ဌာန်းထားတဲ့ နိုင်ငံတော်သမ္မတနှင့် ဒုတိယသမ္မတများ ရွေးချယ်တင်မြှောက်ခြင်းဆိုင်ရာ ဥပဒေရဲ့ အခန်း (၄) နဲ့ နည်းဥပဒေအခန်း (၅)တွေမှာလည်း ပြည့်ပြည့်စုံစုံ ပြဋ္ဌာန်းထားပေးပါတယ်။ ဒီအတွက် ယခင်တုန်းက သမ္မတရွေးချယ်ခဲ့နည်းအတိုင်းသာ ရွေးကြရတော့မှာပဲ ဖြစ်ပါတယ်လို့သာ အကြမ်းဖျင်း ပြောလို့ရနိုင်ပါတယ်။

ဥပဒေပါပြဋ္ဌာန်းချက်တွေအရ ပြန်လည် ရွေးချယ်ပေးကြရမယ့်ရက်ဟာ ခုနစ်ရက်အတွင်းလို့ ပြောထားတာနဲ့အညီ ယခုလက်ရှိ အခြေအနေဟာ ဖွဲ့စည်းပုံ အခြေခံဥပဒေပုဒ်မ ၇၃(က)အရ ယခင်ရွေးချယ်ပွဲတုန်းက ဒုတိယ မဲအများဆုံးရရှိထားတဲ့ ဦးမြင့်ဆွေက ယာယီသမ္မတ ထမ်းဆောင်နေပြီး နိုင်ငံတော်သမ္မတရုံးကနေ ပြည်ထောင်စုလွှတ်တော်နာယကထံကို အကြောင်းကြားစာ ပေးပို့ထားပြီး ဖြစ်နေပါပြီ။ ပြည်ထောင်စုလွှတ်တော် နာယကကသာဆက်လက်ပြီး ဆိုင်ရာလွှတ်တော်အစုအဖွဲ့ထံကို ပြည်ထောင်စုလွှတ်တော် အစည်းအဝေးတွေကို ယခုရက်ပိုင်းပြုလုပ်ပြီး အကြောင်းကြားတာတွေ ဆက်လက် ဆောင်ရွက်ကြရတော့မှာ ဖြစ်ပါတယ်။ အခုလစ်လပ်သွားတဲ့ နိုင်ငံတော်သမ္မတဟာ ယခင်စတင်ရွေးချယ်ကြတုန်းက ပြည်သူ့လွှတ်တော်ကိုယ်စားလှယ်များ အစုအဖွဲ့က ဖြစ်နေတာနဲ့အညီ အခု သူ့လွှတ်တော်ကပဲ ပြန်လည် ရွေးချယ်ပေးကြပါတော့မယ်။ အခုဆိုရင်တော့ ပြည်သူ့လွှတ်တော် ဥက္ကဋ္ဌနေရာကိုပါ ပြန်လည် ရွေးချယ်ပေးကြရတော့မယ့် အခြေအနေနဲ့ တိုက်ဆိုင်နေခဲ့ပါတယ်။

ဒီနေရာတွေကိုတော့ ပြဋ္ဌာန်းဥပဒေတွေအရဆိုရင် ပြည်သူ့လွှတ်တော်အတွင်းမှာရှိတဲ့ ပါတီ ၁၁ ခုက သူတို့ ခန့်အပ်လိုတဲ့သူတွေကို အဆို တင်သွင်းလို့ရကြပါတယ်။ ဒါပေမဲ့လည်း အချိန်တန်လို့ မဲပေးရွေးချယ်ကြတဲ့အခါမှာတော့ အာဏာရပါတီကပဲ အသာစီး ဖြစ်သွားတတ်တာမို့ ကျန် တဲ့ပါတီတွေအနေနဲ့ကလည်း တင်သွင်းကြလိမ့်မယ်လို့ မထင်မိပါဘူး။ ဒီအတွက်ပဲ အာဏာရ NLD ပါတီကပဲ သူတို့ပါတီက တစ်ဦးက ဥက္ကဋ္ဌနေရာကိုရွေးချယ်ပြီး ခန့်အပ်ကြမှာ သေချာသလောက်ပါပဲ။ ဒါမှမဟုတ် လက်ရှိ တာဝန်ထမ်းဆောင်နေတဲ့ ယခင်ကြံ့ခိုင်ရေးပါတီကနေ တစ်သီးပုဂ္ဂလအမတ်အဖြစ် ပြောင်းထားတဲ့ ဒုတိယဥက္ကဋ္ဌ ဦးတီခွန်မြတ်ကိုပဲ ဥက္ကဋ္ဌနေရာမှာ ဆက်ထားမလားဆိုတာတော့ ကျွန်တော်တို့ ယခုလာမယ့်ရက်တွေနဲ့ သီတင်းပတ်အတွင်းမှာ စောင့်ကြည့်ကြရပါတော့မယ်။

လစ်လပ်သွားတဲ့ သမ္မတနေရာအတွက်ကိုလည်း အလားတူ ပြည်သူ့လွှတ်တော်ဘက်ကပဲ တစ်ဦးကို ဒုတိယသမ္မတအဖြစ် အဆိုတင်သွင်းပြီး မဲပေးရွေးချယ်ကြရပါဦးမယ်။ ဒါပြီးတော့မှ ပြည်ထောင်စုလွှတ်တော်ကို ပေးပို့ကြပြီး ပြည်ထောင်စုလွှတ်တော်ရောက်တဲ့အခါ ပြည်ထောင်စုလွှတ်တော်ကိုယ်စားလှယ်တွေက သမ္မတအရည်အချင်းနဲ့ကိုက်ညီမှုရှိ မရှိ စိစစ် တာတွေ စိစစ်ပြီးပြီဆိုရင်တော့ ယခင် ရှိပြီးသားဒုတိယသမ္မတ ၂ ဦးဖြစ်တဲ့ ဦးမြင့်ဆွေနဲ့ ဦးဟင်နရီဗန်ထီးယူတို့ ၃ ဦးနဲ့အတူ မဲပေးတဲ့စနစ်နဲ့ ပြန်လည်ရွေးချယ်ကြရမယ်လို့ ဥပဒေပါပြဋ္ဌာန်းချက်တွေမှာ တွေ့ရပါတယ်။

ပြည်ထောင်စုလွှတ်တော်အတွင်းမှာ လုပ်ကြရမယ့် မဲပေးရွေးချယ် ခြင်းလုပ်ငန်းတွေကတော့ ယခင်သက်တမ်းအစက သမ္မတရွေးကောက်တင်မြှောက်ခဲ့တဲ့ ပုံစံတွေအတိုင်းသာဖြစ်ပြီး နောက်ပိုင်းမှာတော့ ကျမ်းသစ္စာ ဆိုတာတွေ ဆက်လုပ်ကြရမှာပါ။

နောက်ဆက်လက် ဆွေးနွေးကြရမှာက သမ္မတ ဘယ်သူဖြစ်လာမလဲ ဆိုတဲ့ကိစ္စပါ။ ဒီကိစ္စကလည်း အခုလက်ရှိ ထွက်ပေါ်လာတဲ့သတင်းတွေ အရဆိုရင်လည်း ဘယ်သူဖြစ်လာနိုင်တယ်ဆိုတာ ခန့်မှန်းလို့ရကြပြီဆိုပေမယ့်လည်း အခြားမမြင်မသိနိုင်သေးတဲ့ အလှည့်အပြောင်းတွေအကြားမှာ ဘယ်လိုတွေ ပြောင်းလဲသွားဦးမလဲဆိုတာလည်း အလွန်စိတ်ဝင်စားဖွယ်ရာ ကောင်းလှပါတယ်။ ဦးဝင်းမြင့်သာ သမ္မတဖြစ်လာခဲ့ရင် သူဦးစီးကိုင်တွယ်ရမယ့် အစိုးရအုပ်ချုပ်ရေးဌာနတွေရဲ့ ဗျူရိုကရေစီ ယန္တရားဟာလည်း တစ်မျိုးတစ်ဖုံပြောင်းလဲသွားနိုင်တယ်လို့ ဆိုနေခဲ့ကြတဲ့သူတွေလည်း ရှိသလို တရားရေးမဏ္ဍိုင်အပေါ်ကိုလည်း ဩဇာအတော်ညောင်းမယ့်သူအဖြစ် ရှုမြင်လို့ရတယ်လို့ ပြောနေကြပါတယ်။ သူဟာ လွှတ်တော်ဥက္ကဋ္ဌ တာဝန်ထမ်းဆောင်ကတည်းကပဲ အစိုးရဌာနက ဝန်ကြီးတွေရဲ့ တင်ပြမှု နည်းလမ်းမကျမှုတွေ၊ ဖြေရှင်းနည်းမမှန်ပုံနဲ့ တရားရေးကဏ္ဍက အဂတိပျက်မှုတွေကို အမြဲတမ်း ဝေဖန်ထောက်ပြကာ မကွယ်မဝှက် တည့်တိုး ပြောတတ်တဲ့သူအဖြစ်လည်း မြင်ခဲ့ကြပါတယ်။ သူဟာ Hard Power နဲ့ ဥပဒေသမား ရှေ့နေဟောင်းတစ်ယောက်လုပ်ခဲ့သူပီပီ Soft Power ပါ ကောင်းသူတစ်ယောက်ဖြစ်တာကိုလည်း မြင်ကြရပြီးဖြစ်သလို သူ့ရဲ့ အားနည်းချက်ကတော့ သူဖြတ်သန်းခဲ့ရတဲ့ သူ့ဘဝအတွေ့အကြုံအရ စိတ်ဆိုး မြန် ဆတ်ဆတ်ထိမခံတဲ့စိတ် (Sensitive) ဖြစ်တာတော့ ရှိတယ်လို့ သုံးသပ်နေကြပါတယ်။

လက်ရှိကာလမှာ ဖြစ်ပေါ်နေတဲ့ နိုင်ငံရေး၊ စီးပွားရေး အခြေအနေတွေက လွတ်မြောက်အောင်ကြိုးစားဖို့ဆိုရင် NLD အစိုးရအနေနဲ့ အခုလို စိတ်ပိုင်းဆိုင်ရာနဲ့ လုပ်ရည်ကိုင်ရည်ပိုင်းဆိုင်ရာမှာ ပြတ်ပြတ်သားသား ဆောင်ရွက်နိုင်မယ့် သမ္မတလိုမျိုးကိုသာ ခန့်အပ်သင့်တယ်၊ ခန့်အပ်မယ့် သမ္မတအနေနဲ့လည်း အတိုင်ပင်ခံပုဂ္ဂိုလ်ရဲ့ ဦးဆောင်မှုကိုခံယူပြီး စွမ်းရည်ရှိတဲ့သူလည်းဖြစ်သင့်တယ်၊ သူကောင်းရင် ကောင်းသလောက် နိုင်ငံ့စီးပွားရေး အခြေအနေနဲ့ နိုင်ငံရေး အခြေအနေတွေ တိုးတက်လာနိုင်တယ်လို့ နိုင်ငံ့အရေး လေ့လာသူတွေက ဆိုနေကြပါတယ်။ ဒီအချက်တွေနဲ့ ကိုက်ညီဖို့ဆိုရင် လက်ရှိ ဦးဝင်းမြင့်အနေနဲ့သာ ဖြစ်သင့်တယ်လို့လည်း ထင်ကြေးပေးနေကြတာ ဖြစ်ပါတယ်။

နောက်ဆုံးတစ်ချက်ကတော့ ပြည်သူ့လွှတ်တော်ဥက္ကဋ္ဌ ဘယ်သူဖြစ်လာနိုင်သလဲဆိုတဲ့အပေါ် သုံးသပ်ချက်တွေအရဆိုရင်တော့ NLD ပါတီအတွင်းမှာ ဥပဒေအကြောင်းကိုနားလည်ပြီး အတွေ့အကြုံရှိသူ၊ ပါတီ ဗဟိုကော်မတီအတွင်းမှာ ဩဇာရှိသူဖြစ်ရမှာ ဖြစ်တဲ့အတွက် လက်ရှိ ပြည်သူ့လွှတ်တော်ဘက်က ဥပဒေကြမ်းကော်မတီဥက္ကဋ္ဌ တာဝန်ထမ်းဆောင်နေတဲ့ ဦးထွန်းထွန်းဟိန် ဖြစ်လာနိုင်တယ်လို့ ဆိုနေသံကြားမိသလို သူသာဖြစ်လာခဲ့ရင် သူတို့ကိုယ်စားလှယ်တွေကြီးစိုးတဲ့ လွှတ်တော်ကို ပါတီဩဇာနဲ့ တစ်သံတည်းထွက်ဖို့ ထိန်းထားနိုင်သလို အုပ်ချုပ်ရေးအဖွဲ့ရဲ့ လိုအင်တွေကိုလည်း အကောင်အထည်ဖော်နိုင်လိမ့်မယ်လို့ ထင်ကြေးပေးနေကြပါတယ်။

ဒီအတွက် နိဂုံးချုပ်အနေနဲ့ NLD အစိုးရရဲ့ သူ့ရဲ့ကာလအလယ် Mid-Game နိုင်ငံရေးကစားကွက်ဖြစ်တဲ့ နိုင်ငံ့ခေါင်းဆောင်တွေ အပြောင်းအလဲလုပ်ပြီး အသစ်ပြန်လည် ရွေးချယ်ခန့်အပ်ကြမယ့် ဒီသီတင်းပတ်ကိုတော့ နိုင်ငံသားတစ်ယောက်ဖြစ်တဲ့ ကျွန်တော်တို့အနေနဲ့ နိုင်ငံ့အရေးကို စိတ်ဝင်တစား စောင့်ကြည့်လေ့လာသင့်ပါကြောင်းနဲ့ ဒီသီတင်းပတ်အလွန် နောက်လတွေမှာ ဆက်လက် ဖြစ်ပေါ်လာနိုင်ခြေရှိတဲ့ အစိုးရဌာနတွေအတွင်းက ဝန်ကြီး ဝန်လေးတွေရဲ့ အပြောင်းအလဲ သတင်းများဖြစ် လာနိုင်ဦးမလား ဆိုတာတွေကိုလည်း စောင့်ကြည့်ကြရတော့မှာ အမှန်ပင် ဖြစ်ပါကြောင်း ရေးသားတင်ပြလိုက်ရပါတယ်။

အောင်ဇေယျ