News

POST TYPE

POLITICAL

ရခိုင်အမျိုးသားအဆင့် နိုင်ငံရေးဆွေးနွေးပွဲ ဖြစ်မြောက်ရေးကော်မတီ နှစ်ခု ဖျက်သိမ်း
21-Mar-2018
ရန်ကုန်၊ မတ် ၂၁

ရခိုင်အမျိုးသားအဆင့် နိုင်ငံရေး ဆွေးနွေးပွဲဖြစ်မြောက်ရေးအတွက် ဖွဲ့စည်းထားသည့် ဖြစ်မြောက်ရေးကော်မတီနှင့် လူထုတွေ့ဆုံပွဲ ကျင်းပရေးကော်မတီတို့ကို အပြီးဖျက်သိမ်းလိုက်ကြောင်း အဆိုပါကော်မတီက ထုတ်ပြန်ခဲ့သည်။

ရခိုင်အမျိုးသားအဆင့် နိုင်ငံရေးဆွေးနွေးပွဲ ဖြစ်မြောက်ရေး ကြိုးပမ်းရန် ရခိုင်အမျိုးသားအဆင့် နိုင်ငံရေးဆွေးနွေး ပွဲဖြစ်မြောက်ရေး ကော်မတီနှင့် ရခိုင်လူထု တွေ့ဆုံပွဲကျင်းပရေး ကော်မတီကို ၂၀၁၇ ခုနှစ်က ဖွဲ့စည်းခဲ့ခြင်းဖြစ်ပြီး အဆိုပါ ကော်မတီနှစ်ရပ်လုံးကို ဖျက်သိမ်းလိုက်ခြင်းဖြစ်သည်။

အဆိုပါ ကော်မတီနှစ်ရပ်ကို ရခိုင်ပြည် လွတ်မြောက်ရေးပါတီ (ALP)၊ ရခိုင်အမျိုးသားပါတီ (ANP) နှင့် ရခိုင်ပြည်နယ်ဆိုင်ရာ အရပ်ဘက် အဖွဲ့အစည်းများဖြင့် ဖွဲ့စည်းထားခြင်းဖြစ်သည်။

အဆိုပါကော်မတီနှစ်ရပ်သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ် (NCA) ကို လက်မှတ်ထိုးထားသည့် တိုင်းရင်းသား လက်နက်ကိုင်အဖွဲ့ဖြစ်သော ရခိုင်ပြည် လွတ်မြောက်ရေးပါတီ (ALP) နှင့် ပြည်နယ်အတွင်း အနိုင်ရပါတီဖြစ်သည့် ရခိုင်အမျိုးသားပါတီ (ANP) တို့ ပူးပေါင်းကာ အမျိုးသားအဆင့် နိုင်ငံရေး ဆွေးနွေးပွဲများ ကျင်းပနိုင်ရေး ဖွဲ့စည်းခဲ့သည့် ကော်မတီများဖြစ်သည်။

လက်ရှိတွင် ရခိုင်ပြည်နယ်အတွင်း အမျိုးသားအဆင့် နိုင်ငံရေးဆွေးနွေးပွဲများ ကျင်းပခွင့်ရရှိရေးကို နည်းလမ်းမျိုးစုံဖြင့် ညှိနှိုင်းခဲ့သော်လည်း ခွင့်ပြုချက် တစ်စုံတစ်ရာ မရရှိခဲ့ဘဲ မျှော်လင့်ချက် ကုန်ဆုံးသွားသည့် အခြေအနေသို့ ရောက်ရှိသွားပြီဖြစ်သောကြောင့် ကော်မတီနှစ်ခုကို အပြီးတိုင်ဖျက်လိုက်ခြင်းဖြစ်ကြောင်း ရခိုင်ပြည်လွတ်မြောက်ရေးပါတီ (ALP) အတွင်းရေးမှူး ဒေါ်စောမြရာဇာလင်းက ပြောကြားသည်။

အမျိုးသားအဆင့် နိုင်ငံရေးဆွေးနွေးပွဲများ ပြုလုပ်ရန် ၂၀၁၇ ခုနှစ်ကတည်းက ကြိုးပမ်းဆောင်ရွက်ခဲ့ခြင်းဖြစ်ပြီး အစိုးရနှင့် အကြိမ်ကြိမ် ချဉ်းကပ်၍ ကျင်းပခွင့်ပြုရေး တောင်းဆိုခဲ့သော်လည်း ရရှိခဲ့ခြင်း မရှိကြောင်း ဒေါ်စောမြရာဇာလင်းက ပြောဆိုသည်။

“ကျွန်မတို့ UPDJC မှာ ဆွေးနွေးတယ်။ JICM မှာ ဆွေးနွေးတယ်။ အခုဆွေးနွေးတဲ့ အနေအထား ကုန်သွားပြီ။ ရှေ့ဆက်ပြီးတော့လည်း မရနိုင်တော့ဘူးလို့ သုံးသပ်တယ်”ဟု ၎င်းကဆိုသည်။

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးဆိုင်ရာ သဘောတူစာချုပ် လက်မှတ်ထိုးထားသည့် တိုင်းရင်းသား လက်နက်ကိုင် နယ်မြေအသီးသီးတွင် ရခိုင်နှင့် ရှမ်းပြည်နယ် နှစ်ခုတွင် အမျိုးသားအဆင့် နိုင်ငံရေး ဆွေးနွေးပွဲများ ကျင်းပရေး ညှိနှိုင်းမှု အဆင်မပြေဖြစ်နေသည်။

လက်ရှိတွင် အမျိုးသားအဆင့် နိုင်ငံရေး ဆွေးနွေးပွဲကို ပအိုဝ်းလက်နက်ကိုင်အဖွဲ့နယ်မြေ၊ ချင်းအမျိုးသားတပ်ဦး (CNF) နယ်မြေ၊ ကရင်ပြည်နယ်တို့တွင် ကျင်းပပြုလုပ်ထားနိုင်ခဲ့သည်။

J-08