News

POST TYPE

PERSPECTIVE

မတရားမှု၌ ချိုမြိန်နေသူများ
19-Jun-2017 tagged as

တရားမျှတခြင်း၊ မှန်ကန်ခြင်းအကြောင်းများကို ပြောကြသည့်အခါ တရားမျှတမှု ကင်းမဲ့ခြင်း (မတရားခြင်း)၊ မမှန်ကန်ခြင်းတို့သည် အငြင်းအခုံတစ်ရပ် အနေနှင့် အမြဲဒွန်တွဲနေလေ့ရှိသည်။ အခြားသော တစ်ဖက်က ထိုဖြစ်ရပ်ကို တရားသည်၊ မှန်ကန်သည်ဟု ယုံကြည်နေချိန်တွင် အခြား တစ်ဖက်ကမူ မတရားခြင်း၊ မမှန်ကန်ခြင်းဟု ရှုမြင်ယုံကြည်သည့် သဘာဝတွေ ရှိသည်။ သို့သော် ပကတိအမှန်တရား (Universal Truth) အဖြစ် မငြင်းပယ်နိုင်သော အမှန်တရားတွေလည်း လောကမှာရှိသည်။ လောက ဓမ္မတာအရ အမှန်-အမှား၊ တရား-မတရား အတွက် အဆုံးအဖြတ်ပေးဖို့ တရားစီရင်ရေးစနစ်တွေ သတ်မှတ်ပေးထားပြီး လူအများ သဘောတူညီမှုဖြင့် ပြဋ္ဌာန်းထားသည့် ဥပဒေများအတိုင်း တရားသူကြီးများက အမှန် အမှား၊ တရား မတရားကို ဆုံးဖြတ်ပေးလေ့ ရှိကြသည်။ နိုင်ငံအချို့တွင် တစ်ယောက်မကသော ခုံသမာဓိ တရားသူကြီးများက စီရင် ဆုံးဖြတ်သော်လည်း နိုင်ငံအချို့မှာမူ တရားသူကြီး တစ်ဦးတည်းက စီရင်ဆုံးဖြတ်သည်။

အမှန်တရားကို စီရင်ရသော တရားသူကြီးတစ်ဦး၏ တာဝန်မှာ အလွန် သိမ်မွေ့လေးနက်လှသည်။ ပြဋ္ဌာန်းဥပဒေများ၊ စီရင်ထုံးများကို ကျေညက်နေရုံမျှမက လောကပါလတရားများ၊ လူသားတို့၏ စိတ်ဆန္ဒ၊ အတွင်းသန္တာန်တို့ကို ထိုးထွင်းနားလည်လျက် ဆင်ခြင်တုံတရား၊ ကိုယ်ချင်းစာတရား လက်ကိုင်ထားလျက် အဂတိကင်းကင်း စီရင်ဆုံးဖြတ်မှသာလျှင် လူအများ လိုလားသည့် တရားမျှတမှု ဆိုသည်မှာ ပေါ်ထွန်းလာပေလိမ့်မည်။ “အပြစ်ရှိသူသည် ထိုက်သင့်သော အပြစ်ကိုရစေ၍ အပြစ်မဲ့သူသည် အပြစ်မဲ့သည့်အကျိုးကို ရရှိစေခြင်းဖြင့်” ထိုတရားသူကြီးသည် ကောင်းသော အိပ်စက်ခြင်းဖြင့် အကြောင့်အကြကင်းစွာ အိပ်စက်နိုင်မည်။ အကုသိုလ်၊ အဂတိကင်းစွာ လောကကောင်းကျိုး ဆောင်ကြဉ်းခဲ့သူအဖြစ် ဘဝကူးကောင်းကြမည်။ တကယ်တော့ အမှန်တရားကို စီရင်ပေးရသော ခုံသမာဓိ တရားသူကြီးတစ်ဦး၏ တာဝန်က နေ့စဉ် ကုသိုလ်ပြုနေသူတစ်ဦးပမာ လောကအကျိုး လူ့အကျိုးကို သယ်ပိုးပေးနေခြင်း ဖြစ်သည်။

မြန်မာနိုင်ငံ တရားစီရင်ရေးနှင့် ပတ်သက်ပြီး ပြောရလျှင် အကျယ်တဝင့် ရှင်းလင်းပြောပြစရာ မလိုအောင် လူတိုင်းက ခါးသီးနေခဲ့ပြီး အယုံအကြည် ကင်းမဲ့နေခဲ့သည်မှာ နှစ်ပေါင်း ကြာရှည်ခဲ့ပြီဖြစ်သည်။ တရားဥပဒေစိုးမိုးမှု ကင်းမဲ့ခြင်း အကြောင်းများကို ထပ်ခါတလဲလဲ ပြောဆို ဝေဖန်နေခဲ့သော်လည်း တရားရေးမဏ္ဍိုင်သည် ယိမ်းယိုင်မြဲ၊ ယိမ်းယိုင်ဆဲ။ မတရားမှုများသည် မြန်မာလူ့အဖွဲ့အစည်းထဲတွင် အသားကျ အနည်ထိုင်နေသည်။ နှစ်ပေါင်း ၅၀ ကျော် အာဏာရှင်စနစ်က မွေးဖွားပေးထားခဲ့သော အကြောက်တရား “ဘယာ”နှင့် မပြည့်စုံခြင်းကြောင့်ဖြစ်သော “လောဘ” ဂတိနှစ်ပါးက တရားစီရင်ရေး စနစ်ထဲမှာ အနက်ရှိုင်းဆုံး အမြစ် တွယ်နေခဲ့သည်။

ရိုးသားသော သာမန်ပြည်သူတို့ ရုံးပြင်ကနားကို ကြောက်ကြသည်။ ရဲစခန်း၊ တရားရုံးတို့ကို မပတ်သက်လိုကြ။ တကယ်စင်စစ် ထိုဌာနများသည် တရားဥပဒေ စိုးမိုးရေးအတွက် ပြည်သူကို ဝန်ဆောင်မှု ပေးနေသည့် ဌာနများဖြစ်သည်။ ပြည်သူတွေ အားကိုးအားထား ပြုရမည့် ဌာနများဖြစ်သည်။ သို့သော် ပြည်သူအများစုက ထိုနေရာများနှင့် ဖြစ်နိုင်လျှင် မပတ်သက်လိုကြ။

မကြာသေးမီက မန္တလေးတိုင်းဒေသကြီးထဲက မြို့နယ်တရားရုံးတစ်ခုမှာ တရားခွင်အတွင်း တရားသူကြီးကို ဖိနပ်ဖြင့် ပစ်ပေါက်ခဲ့သည့် ဗီဒီယိုဖိုင်တစ်ခု အင်တာနက် လူမှုကွန်ရက်ထဲမှာ အတော် ပျံ့နှံ့သွားခဲ့သည်။ ဒေါသထွက်နေသော တရားစွဲဆိုခံပုဂ္ဂိုလ် (လယ်သမားအရေး မြေယာ အမှုအခင်းအရေး ဆောင်ရွက်ပေးနေသော ရှေ့နေဟုသိရ) သည် မကျေနပ်ချက်များကို အော်ဟစ်ပြောဆိုရင်း တရားသူကြီး (အမျိုးသမီး) ကို ဖိနပ်ဖြင့် ပစ်ပေါက်ခဲ့သည်။ ထိုသို့ပြုမူလျှင် ပြစ်မှု ပိုကြီးသွားနိုင်ကြောင်း သိလျက်နှင့်ပြုလုပ်ပြီး ရဲအချုပ်ကားထဲ ရဲရဲဝံ့ဝံ့ ဝင်သွားခဲ့သည်။ သူက မြန်မာနိုင်ငံ တရားစီရင်ရေးစနစ် ဘယ်လောက်အထိ ယိုယွင်းနေပြီး တရားဥပဒေစိုးမိုးမှု ဘယ်လောက်အထိ ပျက်သုဉ်းနေပြီဆိုတာကို သိအောင် တမင်လုပ်ဆောင်ခဲ့ခြင်း ဖြစ်သည်ဟု ဆိုသည်။

မြန်မာ့တရားစီရင်ရေးစနစ်၏ အခြေအနေ အမှန်ကို ထဲထဲဝင်ဝင် အသိဆုံးသူတွေမှာ ဥပဒေ အကျိုးဆောင်တွေ၊ တရားရေး ဝန်ထမ်းတွေ၊  တရားသူကြီးတွေနှင့် ရဲအရာရှိတွေ ဖြစ်သည်။ တရားစီရင်ရေး ရပ်ဝန်းတွေမှာ လောကပါလတရား မထွန်းကား၊ ဗြဟ္မစိုရ်တရား မရှိ။ ထိုနေရာတွင် “တရားမျှတခြင်းနှင့် တရားမျှတမှု မရှိခြင်း”တို့ ရောပြွမ်းနေသည်။ “မတရားမှုများ တရား” ဖြစ်၍ “တရားမှုများ မတရား” ဖြစ်စဉ်များ ကြီးစိုးနေသည်။ မှန်ကန်သော တရားစီရင်ခြင်းတို့ ရှိသော်လည်း မှေးမှိန်နေသည်။ နှစ်ပေါင်း ၅၀ ကျော် အာဏာရှင်စနစ်နှင့်အတူ နိမ့်ကျသွားသော လူမှုဘဝများက လူများစွာတို့ကို အကျင့်ပျက်စေသည်။ အကျင့်ပျက်ခြင်းများ အရိုးစွဲလာသောအခါ အစဉ်အလာ ဓလေ့ထုံးတမ်း ဖြစ်သွားသည်။ မိမိ၏ သေးငယ်သော အကျင့်ပျက်မှုတစ်ခု၊ ဥပဒေစည်းကမ်း ချိုးဖောက်မှု တစ်ခုကို ရှက်ရွံ့စရာဟု မယူဆတော့။ ဒါက ယနေ့ မြန်မာလူ့အဖွဲ့အစည်းမှာပြင်ဖို့ အတော်ခက်နေသော (နယ်ပယ် အသီးသီးမှာ မြင်တွေ့နေရသော) အကျင့်ဆိုးတွေဖြစ်သည်။

စစ်အစိုးရလက်ထက်က စစ်ခုံရုံးများသည် ဥပဒေချိုးဖောက်သည်ဟု ယူဆခံရသူ အားလုံးကို ပုံမှန်မဟုတ်သည့် ကြီးလေးသော ပြစ်ဒဏ်များ တစ်ချက် လွှတ်ချမှတ်လေ့ ရှိသည်။ အယူခံပိုင်ခွင့်၊ ငြင်းဆိုခွင့်မရှိ။

ထိုမှ အရပ်သားတစ်ပိုင်း အစိုးရအဖြစ် အခေါ်အဝေါ် ပြောင်းလဲ အုပ်ချုပ်လာသည့်တိုင် တရားစီရင်ရေး တာဝန်ထမ်းဆောင်ကြသူတို့မှာ အကြောက်တရားတွေ လွှမ်းမိုးစီရင်ခဲ့ကြသည်။ လွတ်လပ်သည့် တရား စီရင်ရေးစနစ်ဟု ခေါ်ဆိုနေသည့်တိုင် လက်ငင်း အခြေအနေကို ထိုရပ်ဝန်းမှ ပုဂ္ဂိုလ်များ အသိဆုံး ဖြစ်လိမ့်မည်။

ပြည်သူလူထု ရွေးချယ် တင်မြှောက်မှုဖြင့် တက်လာသည့် ဒီမိုကရေစီ အစိုးရဟု ခေါ်ဆိုသည့် ယခုအစိုးရလက်ထက်မှာရော တရားစီရင်ရေးစနစ်က လွတ်လပ်ပါပြီလား။ အမှန်တကယ်ဆိုလျှင် ယနေ့ အချိန်အခါသည် (စစ်အာဏာရှင်ခေတ် မဟုတ်တော့သည့်အတွက်) တရားစီရင်ရေး တာဝန်ကို ထမ်းဆောင်နေကြသူများ (မည်သူ့ကိုမျှ ကြောက်စရာ မလိုဘဲ) ပြည်သူလူထုအတွက် မှန်ကန်မျှတသော တရားစီရင် ဆုံးဖြတ်ပေးရမည့် အချိန်အခါကို ကျရောက်နေပြီဖြစ်သည်။ တရားစီရင်ရေး ရပ်ဝန်းက ဝန်ထမ်းတွေ အဂတိတရား မကင်းစင်နိုင်သရွေ့တော့ တရားရေးမဏ္ဍိုင်က ဆက်ပြီးယိမ်းယိုင်လို့သာ နေပါဦးမည်။

(ဂျူရီစနစ် မဟုတ်ဘဲ) တရားသူကြီးတစ်ဦး၏ နောက်ဆုံး စီရင်ချက်ကိုသာ အတည်ပြု ဆုံးဖြတ်သည့် လက်ရှိ မြန်မာ့တရားစီရင်ရေးစနစ်မှာ တရားသူကြီးတစ်ဦး၏ ဥပဒေကျွမ်းကျင်နှံ့စပ်မှု၊ သိက္ခာသမာဓိရှိမှု၊ မှန်ကန်ဖြောင့်မတ်မှု၊ ရိုးသားမှု၊ ဆင်ခြင်တုံတရားရှိမှု၊ အတွေ့အကြုံ ရင့်ကျက်မှုတို့မှာ မှန်ကန်သော တရားစီရင်ရေးစနစ် ဖြစ်ထွန်းပေါ်ပေါက်လာရေးအတွက် အလွန် အရေးကြီးပါသည်။ လွန်ခဲ့သည့် ဆယ်စုနှစ်များအတွင်း မြန်မာ့ပညာရေးက များစွာ နိမ့်ကျသွားခဲ့သည်။ ဥပဒေဘာသာရပ်ဖြင့် ဘွဲ့ရလာကြသူတို့၏ ဥပဒေကျွမ်းကျင်နှံ့စပ်မှုမှာ မေးခွန်းထုတ်စရာ များစွာရှိသည်။ စာမေးပွဲတွေ ဖြေပြီး ရာထူးရလာကြသည့် ဥပဒေဝန်ထမ်း တွေ၊ တရားရေးဝန်ထမ်းတွေ၏ အရည်အချင်း အနိမ့်အမြင့်ကြောင့် တရားစီရင်ရေးစနစ်မှာ အတိမ်းအစောင်းတွေ ရှိလာသည်။ ဥပဒေပညာ၊ ရင့်ကျက်မှု၊ အတွေ့အကြုံနှင့် ဆင်ခြင်တုံတရား နည်းပါးသော ငယ်ရွယ်သည့် တရားသူကြီး အများအပြားက ယနေ့ မြန်မာ့တရားစီရင်ရေးနယ်ပယ်မှာ လွှမ်းမိုးနေသည်။ မြန်မာ့ပညာရေးနှင့် လူမှုဘဝ အခြေအနေကြောင့် ပညာရေးလောကမှာ ကျောင်းဆရာမတွေပဲ များပြားသလို ဥပဒေလောကမှာလည်း အမျိုးသမီးတွေကပဲ ပိုများနေတာ တွေ့ရသည်။

နိုင်ငံတစ်နိုင်ငံ၏ အုပ်ချုပ်ရေးစနစ်မှာ အဓိက မဏ္ဍိုင်ကြီးတစ်ရပ်အနေနှင့် ပါဝင်နေသော တရားရေးမဏ္ဍိုင် မှန်ကန်ဖြောင့်မတ်ဖို့ အရေးကြီးပါသည်။ ထိုမဏ္ဍိုင်ကြီး တိမ်းစောင်းနေသမျှ ဒီမိုကရေစီပါဟု ဘယ်လောက်ပဲအော်အော် ပြည်သူတွေက ဒီမိုကရေစီ အသီးအပွင့်ကို ခံစားရမည် မဟုတ်ပါ။ ဝမ်းနည်းဖွယ် ကောင်းသည်ကတော့ ယခုအချိန်အထိ တရားစီရင်ရေး ရပ်ဝန်းမှာ မတရားမှုတွေ အားကောင်းနေပြီး ထိုအပေါ် သာယာမိန်းမောနေကြသူများ ပေါများနေကြသေးခြင်းပင်။

ချစ်ဝင်းမောင်

  • TAGS