News

POST TYPE

PERSPECTIVE

အရေအတွက်မှ အရည်အချင်းသို့ (Daily,Vol-5/No-44)
02-Jun-2017
မြန်မာနိုင်ငံ၏ နယ်ပယ်ကဏ္ဍစုံတွင် ယခင်အစိုးရများလက်ထက်က အရေအတွက်ကို အဓိကထားသော စီမံကိန်း၊ စီမံချက်များကြောင့် အဆိုပါ ကဏ္ဍနယ်ပယ် အသီးသီး၏ လက်ရှိ အခြေအနေနှင့် အဆင့်အတန်း မည်သို့ရှိသည်ကို အများသိပြီးဖြစ်ပေမည်။

ပညာရေးနယ်ပယ်တွင် အနယ်နယ် အရပ်ရပ်တွင် တက္ကသိုလ် အဆောက်အအုံများ အရေအတွက် ဦးစားပေး ဆောက်လုပ်ခဲ့သောကြောင့် ယင်းအရေအတွက်နှင့် ညီမျှသော ပါမောက္ခ၊ ဆရာ၊ သင်ထောက်ကူပစ္စည်း၊ သင်ရိုးညွှန်းတမ်း၊ ပြဋ္ဌာန်းချက်စာအုပ်တို့၏ အရည်အချင်းပိုင်း အားနည်းခဲ့ရသည်။

ထို့အတူ ဆောက်လုပ်ရေး ဝန်ကြီးဌာန အနေနှင့်လည်း နိုင်ငံနှင့်တစ်ဝန်း တစ်နှစ်အတွင်း တံတားအစင်းပေါင်း မည်မျှ ဆောက်လုပ်ပြီးစီးကြောင်း တဂုဏ်တယူ ထုတ်ပြန်လေ့ ရှိသော်လည်း ယင်းတံတားများနှင့် ပတ်သက်သော နည်းပညာ၊ အသုံးပြုထားသည့် ပစ္စည်းများ၊ အာမခံသက်တမ်း၊ စီးပွားရေးအရ တွက်ခြေကိုက်နိုင်ခြေ စသည့် အရည်အသွေး၊ အကျိုးအမြတ်နှင့် ပတ်သက်၍မူ ပွင့်လင်းစွာ ထုတ်ပြန်ခြင်း မရှိခဲ့ပေ။

ထို့အပြင် လယ်ယာ စိုက်ပျိုးရေးနှင့် ဆည်မြောင်း ဝန်ကြီးဌာနကလည်း နိုင်ငံတစ်ဝန်း ဆည်၊ မြောင်း၊ တာ၊ တမံ အရေအတွက် မည်မျှဆောက်လုပ်ခဲ့ကြောင်း ကြိမ်ဖန်များစွာ ထုတ်ပြန် ပြောဆိုခဲ့သော်လည်း ယင်း ဆည်၊ မြောင်း၊ တာ၊ တာမံများမှာ ကုန်ကျစရိတ်နှင့် အကျိုးပြုနိုင်ခြေ အချိုး၊ စီးပွားရေးအရ တွက်ခြေကိုက်မှု၊ ခံနိုင်ရည်အား၊ သက်တမ်း စသည့် ရေရှည် တည်တံ့နိုင်မှုဆိုင်ရာ အခြေအနေများကိုမူ ပြည်သူလူထုက သိရှိခွင့်မရခဲ့ပေ။

ယခင်အစိုးရ အဆက်ဆက်က ထိုကဲ့သို့ တည်ဆောက်ခဲ့သော အခြေခံ အဆောက်အဦများမှာ ရည်ရွယ်ချက်အားဖြင့် ကောင်းမွန်သော်လည်း အကောင်အထည်ဖော်မှု အပိုင်းတွင် အကျင့်ပျက် ခြစားမှုများနှင့် နည်းပညာ လိုအပ်ချက်များကြောင့် နိုင်ငံတော်ကို အကျိုးပြုရေးထက် နောက်ဆက်တွဲ ဘေးအကျိုးဆက်များကြောင့် ဆုံးရှုံးနိုင်ခြေ ပိုများနေကြောင်း တစ်နည်း ဆိုရသော် ဆေးအတွက် လေးနိုင်ကြောင်း လေ့လာဆန်းစစ်ချက်များက ဖော်ပြသည်။

ပြောရလျှင် အထက်ဆိုခဲ့ပါ စီမံကိန်း၊ စီမံချက်များ ရည်ရွယ်ချက် ကောင်းသော်လည်း အကောင်အထည်ဖော်မှု၊ စီမံခန့်ခွဲမှု အားနည်းချက်များကြောင့် နိုင်ငံတော်အတွက် မည်မျှ အကျိုးရှိနိုင်သည်၊ မရှိနိုင်သည် မသေချာလှသော်လည်း ယင်းစီမံကိန်း၊ စီမံချက်များစွာ၏ ဘတ်ဂျက်များ ကိုင်တွယ်သုံးစွဲခဲ့သူ အရာထမ်းများနှင့် ၎င်းတို့နှင့် ချိတ်ဆက်နေသော လုပ်ငန်းရှင်များ အကျိုးရှိ သွားခဲ့ကြောင်း ဝေဖန်သုံးသပ်မှုများလည်း ထွက်ပေါ်ခဲ့သည်။

စင်စစ်အားဖြင့် အထက်ဆိုခဲ့ပါ သင်ခန်းစာများ ရှိနေသည့်အတွက် ဒီမိုကရေစီနည်းကျ ရွေးကောက်တင်မြှောက်ခံရသော အစိုးရလက်ထက်တွင် အတိုင်းအတာတစ်ခုအထိ စရိုက်ဟောင်း၊ စနစ်ဟောင်း၊ ပုံစံဟောင်းများ ပြုပြင်နိုင်လိမ့်မည်ဟု မျှော်လင့်ထားကြသော်လည်း လက်တွေ့အားဖြင့် ယခင် လုပ်ပုံလုပ်နည်းဟောင်းများအတွင်းမှ ရုန်းမထွက်နိုင်သေးပေ။

နိုင်ငံပိုင်အစိုးရအာဘော် သတင်းမီဒီယာများမှတစ်ဆင့် ယခင် အစိုးရလက်ထက်ကဲ့သို့ “တည်ဆောက်ပြုပြင်၊ မြန်ပြည်တစ်ခွင်”၊  “ဖွံ့ဖြိုးဝေဆာ ပြည်မြန်မာ” ပုံစံတူ အရေအတွက်ကို ဦးစားပေးသော သတင်းများ၊ ဆောင်းပါးများ၊ အေးချမ်းသာယာလှပပြီး နိုင်ငံသားအားလုံး အလုပ်အကိုင် အဆင်ပြေ၊ အရောင်းအဝယ် ကောင်းကာ ပျော်ရွှင်ချမ်းမြေ့နေသည့် သတင်းများသာ အများစု နေရာယူထားပေသည်။

ဥပမာအားဖြင့် စစ်ကိုင်းတိုင်းဒေသကြီးတွင် တစ်နှစ်အတွင်း တံတား အစင်းပေါင်း ၄၉၁ စင်း တည်ဆောက်နိုင်ခဲ့သည်ဆိုသော ထုတ်ပြန်ချက်မျိုးမှာ ယခင်ပုံစံဟောင်းများနည်းတူ ဖြစ်နေသည့်အတွက် ပြည်သူလူထုအတွက် ထူးမခြားနား ခံစားချက်မျိုးသာ ရရှိနိုင်ပြီး ယင်းကဲ့သို့ အရေအတွက်ကို ဦးစားပေးသော ပုံစံမျိုးမှ အရည်အချင်းကို ပွင့်လင်းမြင်သာစွာ၊ စေတနာပါပါ ထုတ်ပြန် အသိပေးနိုင်သည့် အခြေအနေသို့ ပြောင်းလဲချိန်တန်ပြီဖြစ်ကြောင်း သိစေလိုရင်းဖြစ်သည်။

အယ်ဒီတာ (၁-၆-၂၀၁၇)


  • VIA