News

POST TYPE

PERSPECTIVE

ဗင်နီဇွဲလားနိုင်ငံ၏ ပေါ်လစီ အမှားတော်ပုံ
15-May-2017 tagged as

(၁)

ဗင်နီဇွဲလားနိုင်ငံသည် တစ်ချိန်က အပြည်ပြည်ဆိုင်ရာ ကုမ္ပဏီကြီးများအတွက် အမြတ်အစွန်း ရှာဖွေပေးရာ နိုင်ငံတစ်နိုင်ငံ ဖြစ်ခဲ့ပါသည်။ ကမ္ဘာပေါ်တွင် အကြီးဆုံး ရေနံသိုက်ကို ပိုင်ဆိုင်သည့်နိုင်ငံဟု အသိအမှတ်ပြုကြပြီး အလယ်အလတ်တန်းစား ချမ်းသာသူ အမြောက်အမြား နေထိုင်ရာနိုင်ငံ၊ စားသုံးသူပစ္စည်းများ ရောင်းဝယ်ဖောက်ကားရန် ကောင်းသည့် နိုင်ငံအဖြစ် လူသိများပါသည်။

(၂)

ဗင်နီဇွဲလားနိုင်ငံအတွက် ခေတ်ကောင်း အချိန်ကောင်းများမှာ ကုန်ဆုံးသွားကြပြီဟု သတင်းစာဆရာများက ရေးနေကြပါသည်။ ဧပြီလ အတွင်းက GM ခေါ် ဂျင်နရယ်မော်တာ ကုမ္ပဏီသည် နောက်ဆုံး ဖျက်သိမ်းလိုက်ရသော နိုင်ငံခြား ကုမ္ပဏီတစ်ခု ဖြစ်လာခဲ့ပါသည်။ စီးပွားရေး တွက်ခြေ မကိုက်တော့လျှင် ကုမ္ပဏီများ ထိုနိုင်ငံမှ ထွက်ခွာသွားရသည်မှာ မဆန်းပါ။ သို့သော် ဂျီအမ်ကုမ္ပဏီ ရုံးခန်းအလုပ်ရုံ နေရာတို့ကို အစိုးရက သိမ်းပိုက်လိုက်သောကြောင့် လုပ်ငန်းများ ရပ်စဲလိုက်ရခြင်းဖြစ်ပါသည်။ ဤသို့ဖြင့် စက်ရုံလုပ်သား ၂၇၀ဝ ကျော်မှာ အလုပ်လက်မဲ့ ဖြစ်ကုန်ကြရပါသည်။

သမ္မတဖြစ်သူ မစ္စတာမာဒူရို (Nicolas Maduro) လက်ထက် ရေနံဈေး ကျဆင်းချိန်နှင့် ဆက်တိုက် ဖြစ်လာခဲ့သော စီးပွားရေး အကျပ်အတည်းများကြောင့် လူအများ လမ်းပေါ်ထွက်၍ ဆန္ဒပြခဲ့ကြသည်။ နိုင်ငံခြား ကြွေးငွေများဖြင့် ပိနေသော အစိုးရက ပေါ်လစီ အမှားများကိုသာ တစ်ခုပြီးတစ်ခု ချခဲ့ပါသည်။

ပြည်သူတစ်ယောက်အဖို့ ပေါင်မုန့်နှင့် ဆေးဝါးများကို ဝယ်နိုင်ရန် လူတန်းရှည်ကြီး၏ နောက်တွင် တန်းစီကြရပါသည်။ အများစုမှာ အစာရေစာ ဝ၀လင်လင် မစားရဘဲ ရသင့်သည့် လခကိုလည်း မှန်မှန်မရကြပါ။ အစိုးရအနေနှင့် ဒေဝါလီ မခံရအောင် ရုန်းကန်နေကြချိန်တွင် နိုင်ငံခြား ကုမ္ပဏီများနှင့်အတူ ပြည်တွင်း ကုမ္ပဏီ အများစုမှာလည်း စီးပွားရေး လုပ်၍မရဘဲ ဖြစ်နေကြပါသည်။

နိုင်ငံရေး အခြေအနေ တင်းမာနေခြင်း၊ အကျင့်ပျက် ခြစားကြခြင်း၊ ရာဇဝတ်မှု ထူထပ်များပြားခြင်း၊ ရင်းနှီးမြှုပ်နှံမှု ဥပဒေက အကန့်အသတ် များလွန်းခြင်း၊ လျှပ်စစ်နှင့်ရေ ခဏခဏ ပြတ်တောက်နေခြင်းတို့ကြောင့် ဗင်နီဇွဲလားတွင် စီးပွားရေး လုပ်ကိုင်ရသည်မှာ မိမိကုမ္ပဏီကို ဒေဝါလီခံရအောင် လုပ်နေခြင်းနှင့်တူသည်ဟု ဥပမာ ပေးကြသည်။ ဗိုလီဗာ (Bolivar) ခေါ် ပြည်တွင်းသုံးငွေမှာ တန်ဖိုးဒလဟော ထိုးကျနေသည်။ ငွေကြေး လဲလှယ်မှုအတွက် ချမှတ်ထားသော စည်းကမ်းတွေက တင်းကျပ်လွန်းသည်။ နိုင်ငံခြားမှ ဝယ်ယူရသော စက်မှုကိရိယာများ တန်ဖိုးမှာ နေ့စဉ် ဈေးတက်၍သာ နေသည်။ ကုမ္ပဏီပိုင်ပစ္စည်းများ၏ တန်ဖိုးကမူ လျော့ကျသွားနေသည်။

နိုင်ငံပိုင် ကုမ္ပဏီများက မိမိ ဝယ်ယူထားသည့် ပြေစာများအတွက် ပေးချေရမည့်ငွေကို မပေးချေနိုင်၊ နေ့ရွှေ့၊ ညရွှေ့နှင့် အလုပ်ဆက်လုပ်ရန် ခက်ခဲနေကြပါသည်။ ၁၉၉၈ ခုနှစ်မှ စတင်၍ ရေတွက်လျှင် လုပ်ငန်းပေါင်း ၁၄၀ဝ ကို အစိုးရက လိုင်စင်တွေ ဖျက်သိမ်းခဲ့သည်။

PDVSA- Petroleos de Venezuelo ခေါ် နိုင်ငံပိုင်ရေနံ ကုမ္ပဏီကြီး၏ ဥက္ကဋ္ဌဖြစ်သူက ဗင်နီဇွဲလားနိုင်ငံသည် တောင်အမေရိကတွင် လုပ်ငန်း လုပ်ကိုင်ရန် အခက်ခဲဆုံးနိုင်ငံ ဖြစ်နေပါသည်ဟု ဝန်ခံခဲ့သည်။

တစ်ချိန်က ဗင်နီဇွဲလားနိုင်ငံတွင် လုပ်ငန်း အကြီးအကျယ်ဖြစ်ခဲ့သူ  ကိုကာကိုလာ Coca- cola ကုမ္ပဏီမှာ လွန်ခဲ့သော လအနည်းငယ်က သကြား ဝယ်မရသည့် ပြဿနာကြောင့် မိမိတို့ လုပ်ငန်းများကို ရပ်ဆိုင်းလိုက်ရသည်။ တစ်ချိန်ကမူ ဗင်နီဇွဲလားနိုင်ငံသည် ဒေသတွင်း၌ သကြား အများဆုံး ထုတ်လုပ်သည့်နိုင်ငံ ဖြစ်ခဲ့ပါသည်။

Bridgestone, Ford Motor, Procter & Gamble စသည့် ကမ္ဘာကျော် Brand တံဆိပ်များ ပိုင်ဆိုင်သည့် နိုင်ငံတကာ ကုမ္ပဏီပေါင်း များစွာတို့မှာလည်း နိုင်ငံရေး အခြေအနေနှင့်အတူ ကုန်ကြမ်း ဝယ်မရသည့် ပြဿနာများကြောင့် အလုပ်လုပ်ရန် ပိုမိုခက်ခဲလာသည်။

၁၉၉၈ ခုနှစ် သမ္မတ ဟူဂိုချာဗက် (Hugo Chavez) တက်လာချိ်န်တွင် ရေနံကုမ္ပဏီပေါင်း များစွာတို့မှာ နိုင်ငံမှ ထွက်ခွာရန် ပြင်ဆင်နေကြပါပြီ။ မစ္စတာ ချာဗက်လက်ထက် ၂၀ဝ၇ ခုနှစ်တွင် ငွေအရင်းအနှီး များလှသော ပရောဂျက်ကြီး ၄ ခုတွင် ရှယ်ယာ အများစုကို အစိုးရက ဝယ်ယူလိုက်သည်။ အကျိုးဆက်မှာ Exxon Mobile နှင့်  Conoco Phillips ကုမ္ပဏီကြီးနှစ်ခု အလုပ် ဆက်မလုပ်နိုင်ကြတော့။ ၂၀၁၃ ခုနှစ် သူ မကွယ်လွန်မီမှာပင် ရေနံထုတ်လုပ်ရန် ဓာတ်ငွေ့မောင်းသွင်းခြင်း (Injection) အလုပ်ကို လုပ်နေသော အိုကလာဟိုးမား အခြေစိုက် အမေရိကန် Tusla ကုမ္ပဏီကို အစိုးရက နိုင်ငံပိုင် လုပ်လိုက်သည်။ ရေနံတူးစင် (Rig) ၁၁ ခုကိုပါ သိမ်းဆည်းသည်။

မစ္စတာချာဗက်ကိုဆက်ခံသူ မစ္စတာမာဒူရို၏ လက်ထက်တွင်လည်း အခြေအနေမှာ ပို၍သာ ဆိုးရွားခဲ့သည်။ အလုပ် မဖြစ်ရခြင်းမှာ ၂၀၁၄ ခုနှစ်တွင် ရေနံဈေး ထိုးကျသွားမှုကြောင့်ဟုလည်း အပြစ်ဖို့ကြသည်။

သို့တစေ “တစ်ချိန်တွင် အခြေအနေ ပြန်ကောင်းလာကောင်းရဲ့” ဟူသော မျှော်လင့်ချက်ဖြင့် ကုမ္ပဏီ အများအပြားမှာ မိမိပိုင် ရုံးအမှုထမ်းနှင့် ရုံးနေရာများ၊ တွင်းတူးစက်များကို ထိန်းသိမ်းထားသူများလည်း ရှိသည်။

ရေနံတူးရာတွင် အထောက်အကူပြု လုပ်ငန်းများကို လုပ်သော ဘေကာဟူး၊ ဟယ်လီဘာတန်၊ ဆလန်ဘာဂျာနှင့် ဝဲသားဖို့ဒ် ကုမ္ပဏီများမှာ တစ်ချိန်တွင် PDVSA က ယခင်အတိုင်း ရေနံလုပ်ငန်းကို ပြန်လုပ်ကိုင်လျှင် အဆင်သင့် ဖြစ်နေစေရန်သာ ပြင်ဆင်ထားကြသည်။ ၎င်းတို့ကို ရုပ်သိမ်း မသွားကြစေရန် အစိုးရက Bond နှင့် ကြွေးရှိကြောင်းဝန်ခံလွှာ (Promissory Notes)တို့ကို ထုတ်ပေးထားသည်။ ဆလန်ဘာဂျာက အစိုးရထံမှ သူရရန်ကြွေးမှာ ဒေါ်လာ ၁ ဒသမ ၂ ဘီလီယံ ရှိသည်ဟုဆိုပြီး ဟယ်လီဘာတန်က ဒေါ်လာသန်း ၇၅၆ မျှရှိသည်ဟု ကြေညာထားကြသည်။

ထိုအခြေအနေများကြောင့် အမေရိကန်နိုင်ငံက “Deconsolidation Law” ခေါ် မိမိပိုင်ဆိုင်မှုများ ရှိနေပြီး ဆက်အလုပ်မလုပ်နိုင်သော အခြေအနေအတွက် ကုမ္ပဏီများအဖို့ အကောက်ခွန် ကင်းလွတ်ခွင့် ရရှိစေရန် ဖန်တီးပေးသော ဥပဒေကို ပြဋ္ဌာန်းပေးခဲ့သည်။ ကားတာယာ ကုမ္ပဏီများ ဖြစ်သော ဂွတ်ရီးယားက ၆၄၆ သန်း၊ ဘရစ်စတုံးနှင့် ပိုင်ရဲလီ (Pirelli) ကုမ္ပဏီတို့က သန်း ၃၆၀ နှင့် ၆၁၄ သန်း အသီးသီး သတ်မှတ်ကြသည်။

ကားကုမ္ပဏီများမှာ လွန်ခဲ့သော ငါးနှစ်က စီးရေ တစ်သိန်းကျော် ရောင်းကြရသည်။ ၂၀၁၅ ခုနှစ်က ကားအစီးရေ ၁၇၀ဝ၀ ကျော် ရောင်းချခဲ့ရာမှ ၂၀၁၆ တစ်နှစ်လုံးအတွက် ၃၂၀ဝ စီးသာ ရောင်းချရသည်။ အော်ဒါ မရှိသောကြောင့် အလုပ်ရုံများကို အကြိမ်ကြိမ် ပိတ်ထားခဲ့ကြရသည်။

(၃)

မေလ ၆ ရက်နေ့က ဖတ်လိုက်ရသော သတင်းတစ်ခုတွင် ဆန္ဒပြပွဲများမှာ မြို့ကြီးများစွာတို့တွင် နေ့စဉ် ဖြစ်ပွားလျက်ရှိသည်။ ပြည်သူလူထုက ဟူဂိုချာဗက်၏ရုပ်တုကို ဖျက်ဆီးပစ်ခဲ့ကြသောပုံကို ဖေ့စ်ဘွတ် စာမျက်နှာများမှာ တွေ့ရသည်။ ရဲက ပစ်ခတ်ဖြိုခွင်းမှုကြောင့် အနည်းဆုံး လူတစ်ဦး သေဆုံးခဲ့ရသည်။ ယနေ့အထိ ဆန္ဒပြမှုများကြောင့် သေဆုံးရသူ ၃၀ ခန့် ရှိနေပါပြီ။ အဖမ်းခံရသူမှာ ၁၂၀ဝ ကျော်ရှိသည်။ 

ဒီမိုကရေစီစနစ် ရှင်သန်စေရန် လေးစားမှုနှင့် နားလည်မှု ရှိရမည်။ သွေးထွက်သံယို ဖြစ်ရခြင်းကို လက်မခံနိုင်၊ အစိုးရတစ်ခု တည်မြဲရေးအတွက် လိုအပ်သမျှ ဖြည့်ဆည်းပေးရင်း ဒီမိုကရေစီကို မတည်ဆောက်နိုင်ဟု ဝေဖန်နေကြသည်။ အသက် ၆၀ အရွယ် အဘွားအိုတစ်ဦးက မျက်ရည်ယိုဗုံးဒဏ်ကို ကာကွယ်ရန် အိမ်ထဲဝင်လာဖို့ ဖိတ်ခေါ်သည်ကို “ဒီအစိုးရကို ဆန့်ကျင်ဖို့ လူတိုင်းဟာ လမ်းပေါ်မှာ ရှိနေရမယ်”ဟုဆိုကာ ဝင်လာရန် ငြင်းပယ်ခဲ့သည်၊

အတိုက်အခံ ပါတီများမှ တောင်းဆိုနေကြသည်မှာ အစားအစာနှင့် ဆေးဝါးများ ဝင်လာရာ လမ်းကြောင်းကို ဖွင့်ပေးရန်၊ ရွေးကောက်ခံ ကိုယ်စားလှယ်များဖြင့် ဖွဲ့စည်းထားသည့် လွှတ်တော်၏ အခန်းကဏ္ဍကို တရားဝင် အသိအမှတ်ပြုရန်၊ သမ္မတအာဏာကို ပိုမိုကျယ်ပြန့်စေမည့် ဖွဲ့စည်းပုံဥပဒေ ပြင်ဆင်ရေး ကြိုးပမ်းနေခြင်းကို စွန့်လွှတ်ရန်၊ ရွေးကောက်ပွဲကို အမြန်ဆုံး ကျင်းပပေးရန်တို့ ဖြစ်သည်။

လူဦးရေ ၃၁ သန်းရှိပြီး ဗင်နီဇွဲလား ကဲ့သို့သော ရေနံကြွယ်ဝ ချမ်းသာသည့် နိုင်ငံတစ်ခုတွင် အုပ်ချုပ်သ အစိုးရ၏ စီမံခန့်ခွဲမှု ညံ့ဖျင်းမှုကြောင့် အခြေအနေ ယိုယွင်း ပျက်စီးသည်ကို မြင်ရသည်မှာ ဝမ်းနည်း ကြေကွဲဖွယ် ဖြစ်သည်။ သမ္မတ မာဒူရိုက ရွေးကောက် တင်မြှောက်ထားသော လွှတ်တော်၏ ဆုံးဖြတ်ချက်များကို လျစ်လျူရှုပြီး မိမိတွင် ပိုမို၍ ဩဇာအာဏာ ရှိစေရန် ဖွဲ့စည်းပုံဥပဒေကို ပြင်ဆင်ရန် ကြိုးစားလျက်ရှိသည်။

ပြည်သူလူထု၏ဆန္ဒနှင့် ခံစားချက်များကို လျစ်လျူရှု၍ တိုင်းပြည်ကို ဆိုရှယ်လစ်ဝါဒ၏ စီးပွားရေး ပေါ်လစီများဖြင့် ဗဟိုမှ ချုပ်ကိုင်ရန် ကြိုးစားမှုများသည် ယနေ့ ၂၁ ရာစုတွင် အောင်မြင်ရန် မဖြစ်နိုင်တော့ပါ။ တရားဝင် စီးပွားရေး ကုမ္ပဏီကြီးများ၏ ပစ္စည်းများကို အစိုးရက သိမ်းယူခြင်းမှာ မှားယွင်းပါသည်။ ဗင်နီဇွဲလား ပြည်သူ အများစုကမူ အစိုးရ အပြောင်းအလဲဖြစ်ပြီး စီးပွားရေး ပေါ်လစီများ ကောင်းမွန်လာစေရန်ကို မျှော်လင့်လျက် ရှိကြပါသည်။

ကိုသန်းလွင်

Ref: Amid Venezuela Protests, G.M. Plant Is Seized, and Company Exits
By Clifford Krauss, New Yrok Times April 20, 2017

  • TAGS