News

POST TYPE

PERSPECTIVE

ဗြိတိန်အထွက် မြန်မာ့စီးပွား ...
03-Jul-2016

ဥရောပသမဂ္ဂမှ ဗြိတိန်ထွက်ခွာရန် ပြည်သူလူထုက မဲပေးဆုံးဖြတ်ပြီးသည့် အခါတွင် ဗြိတိန်တွင်း၊ ဥရောပတွင်း သာမက တစ်ကမ္ဘာလုံး အံ့သြသွားသည့်နည်းတူ ကိုယ့်ဒေသ၊ ကိုယ့်နိုင်ငံ၊ ကိုယ့်ဘဝကို မည်သို့ ရိုက်ခတ်မည်နည်း ဟူသော မေးခွန်းများ မေးလာကြသည်။ ဗြိတိန် ကိုလိုနီဟောင်း မြန်မာနိုင်ငံကရော ဗြိတိန်ထွက်သည့်အတွက် စီးပွားရေးအရ မည်သို့ ခံစားရမည်လဲ။

ဗြိတိန် (Britain) ထွက်ခွာမည် (Exit) ဖြစ်သဖြင့် Br+Exit= BrExit ဟု အတိုကောက် ရေးသားကြသည်။ ယခုဖြစ်စဉ်သည် စက်တင်ဘာ ၁၁ ဖြစ်စဉ်ကဲ့သို့ ကမ္ဘာ့သမိုင်းတွင် အရေးပါသည့်ဖြစ်ရပ်အဖြစ် တင်ကျန်နေမည်ဖြစ်ပြီး တစ်ကမ္ဘာလုံးကို ရိုက်ခတ်မည် ဖြစ်သော်လည်း ရိုက်ခတ်ချက်မှာမူ နိုင်ငံအလိုက်၊ ဒေသအလိုက် ကွာမည်။ နိုင်ငံဒေသ အသီးသီး၏ တုံ့ပြန်နိုင်စွမ်းပေါ်လည်း မူတည်မည်။

ကနဦးသုံးချက်

မြန်မာအပေါ် BrExit ရိုက်ခတ်မှုကို မဆွေးနွေးမီ သုံးချက် ပြောပြလိုသည်။ တစ်။ ဗြိတိန်၏ စီးပွားရေး အရွယ်အစားသည် ဗြိတိသျှနေမဝင် အင်ပါယာ ခေတ်ကကဲ့သို့ မဟုတ်တော့ပါ။ ဗြိတိန်နေရာတွင် တရုတ်သာ ဆိုလျှင်မူ တစ်ကမ္ဘာလုံး ယခုထက် တုန်လှုပ်ကြရမည်။

နှစ်။ ဗြိတိန်က ဥရောပသမဂ္ဂမှ ထွက်ခွာသည့်ဖြစ်စဉ် ဝါ ကွာရှင်း လုပ်ထုံးလုပ်နည်းသည် အနည်းဆုံး ၂ နှစ် ကြာမြင့်မည် ဖြစ်သည်။ ထိုကာလအတွင်း အပြောင်းအလဲများစွာ ဖြစ်နိုင်သည်။ ထွက်ခွာအပြီး ဗြိတိန်နှင့် ဥရောပသမဂ္ဂ မည်သို့မည်ပုံ ဆက်ဆံမည်ကို စောင့်ရဦးမည်။ ကုန်သွယ်ရေး စာချုပ်များ မည်သို့ ပုံပေါ်လာမည်လဲ။ ယခုဥရောပသမဂ္ဂတွင်း အနေအထားနှင့် မနီးရိုးစွဲလေလား၊ လုံးဝတစိမ်းပြင်ပြင် ဖြစ်သွားလေမည်လား။

သုံး။ နံပါတ်သုံး အချက်သည် နံပါတ်နှစ်အချက်နှင့် ဆက်စပ်နေသည်။ BrExit ကြောင့် မည်သည့်နိုင်ငံကို မည်သို့ ရိုက်ခတ်နိုင်သည် ဆိုသော ပြောဆိုချက်များသည် ‘တကယ်မဖြစ်သေးဘဲ မှန်းဆပြောဆိုချက်များ’ Guesses သာ ဖြစ်သည်။

တိုက်ရိုက်နှင့် သွယ်ဝိုက်

BrExit ကြောင့် မြန်မာခံစားရမည်ဆိုလျှင် တိုက်ရိုက်နှင့် သွယ်ဝိုက် နှစ်မျိုးရှိပါသည်။

တိုက်ရိုက်။ BrExit တွင် ကာယကံရှင်မှာ ထွက်သူ ဗြိတိန်တင်မကဘဲ ကျန်ရစ်သူ ဥရောပသမဂ္ဂပါ ပါဝင်သည်။ ထိုနေရာနှစ်ခုနှင့် မြန်မာ့အကျိုးစီးပွား ဘယ်လောက်ချိတ်နေသနည်းက အရေးကြီးသည်။ များများချိတ်လျှင် များများသက်ရောက်မည်၊ နည်းနည်းချိတ်လျင် နည်းနည်းသာ သက်ရောက်မည်။

ဗြိတိန်နှင့် ဥရောပသမဂ္ဂသည် မြန်မာနိုင်ငံကို အကူအညီများစွာ ပေးနေသော အလှူရှင်နိုင်ငံ ဒေသများ ဖြစ်သည်။ လောလောဆယ်တွင် BrExit ကြောင့် လတ်တလော အလှူငွေများ ခန်းခြောက်ခြင်း ရုတ်တရက် တိုးလာခြင်းများ မရှိနိုင်သေးပါ။

ဗြိတိန်ပေါင်ငွေနှင့် ဥရောပသမဂ္ဂသုံး ယူရိုအပျော့အမာပေါ်တွင် မြန်မာနိုင်ငံသို့ လာရောက်သော ကမ္ဘာလှည့်ခရီးသွား အရေအတွက် အတိုးအဆုတ် ရှိနိုင်သည်။

အရေးယူပိတ်ဆို့မှုများ ရုပ်သိမ်းလိုက်သည့်အတွက် ကုန်သွယ်ခွင့် အခွင့်အရေး GSP ပြန်ရသောကြောင့် မြန်မာ့ပို့ကုန်များ ဥရောပဈေးကွက်သို့ ဝင်ရောက်စတွင်မှ BrExit နှင့် ကြုံရသည်။ သို့သော် ဗြိတိန်နှင့်ရော ဥရောပနှင့်ပါ မြန်မာ့ကုန်သွယ်မှုသည် နည်းပါးလှသည်။

သွယ်ဝိုက်။ BrExit ကြောင့် ကမ္ဘာ့အခြားဒေသများ ပြောင်းလဲသွားလျှင် မြန်မာနိုင်ငံအပေါ် မည်သို့ရိုက်ခတ်မည်လဲ။ ယင်းက သွယ်ဝိုက်ရိုက်ခတ်ချက်။

BrExit ကြောင့် ကမ္ဘာ့စီးပွားရေး ထိခိုက်လျှင် မြန်မာနိုင်ငံသို့ လာရောက်ရင်းနှီးမြှုပ်နှံမှုအပေါ် သက်ရောက်နိုင်သည်။ တစ်ကမ္ဘာလုံး ဒေါ်လာဈေး မငြိမ်လျှင် မြန်မာကျပ်ဒေါ်လာဈေးလည်း လှုပ်နေမည်။

မြန်မာနိုင်ငံအတွက် အရေးကြီးသည့် စီးပွားဖက်နိုင်ငံဖြစ်သော အဓိက ကုန်သွယ်ဖက်၊ အဓိကရင်းနှီးမြှုပ်နှံသူ တရုတ်အပေါ် BrExitက ပြင်းစွာရိုက်ခတ်လျှင် မြန်မာနိုင်ငံလည်း များများခံစားရမည်။ တရုတ်အပေါ် ချက်ချင်းလက်ငင်း ရိုက်ခတ်မှု မရှိ။

မြန်မာအများအပြား သွားရောက်လုပ်ကိုင်နေသော အိမ်ရှင်နိုင်ငံများဖြစ်သည့် ထိုင်း၊ မလေးရှား၊ စင်ကာပူတို့အပေါ် BrExit သက်ရောက်လျှင် ထိုနိုင်ငံတို့ရှိ မြန်မာတို့၊ ထိုမှတစ်ဆင့် မြန်မာနိုင်ငံရှိ မြန်မာတို့အပေါ် သက်ရောက်မည်။ ထိုင်း၊ မလေးရှား၊ စင်ကာပူ တာဝန်ရှိသူတို့က BrExit သည် သူတို့အပေါ် အနည်းငယ်သာ သက်ရောက်မည်ဟု ဆိုထားသည်။

၁၈၂၄ တွင် ပထမ အင်္ဂလိပ်မြန်မာ စစ်ဆင်နွှဲကာ မြန်မာ့စီးပွားရေး အပါအဝင် မြန်မာ့ကံကြမ္မာကို ကြီးမားစွာ ပြောင်းလဲခဲ့သာ ဗြိတိန်သည် ဥရောပသမဂ္ဂမှ ၂၀၁၆ တွင် ထွက်သောအခါတွင် မြန်မာ့စီးပွားရေးအပေါ် မသက်ရောက်လှပါ။ စိတ်ပူရန်မလို။

ဇေယျသူ


ABOUT AUTHOR

(ဇေယျသူ)