News

POST TYPE

PERSPECTIVE

ဒေါ်အောင်ဆန်းစုကြည် မိန့်ခွန်းမှ ကြားသောစကား
08-Apr-2017
နိုင်ငံတော်၏ ထိပ်ဆုံးပုဂ္ဂိုလ် ဒေါ်အောင်ဆန်းစုကြည်က မတ်လ ၃၀ ရက်နေ့တွင် ပြောကြားသည့် မိန့်ခွန်းသည် တာဝန်ယူပြီး တစ်နှစ်ပြည့် နိုင်ငံ၏ အခြေအနေကို ပြည်သူများထံ အစိုးရက အစီရင်ခံသည့်မိန့်ခွန်း ဖြစ်သလို နိုင်ငံအပေါ် သူ့အမြင်နှင့် သူ့အခြေအနေတို့ကိုလည်း အကဲခတ်နိုင်သည့် မိန့်ခွန်းဖြစ်သည်။

နိုင်ငံတော် အခြေပြမိန့်ခွန်း State of The Union Speech ဟု ဆိုသော်လည်း ကြားဖြတ် ရွေးကောက်ပွဲနှင့်ကပ်ပြီး တိုက်တိုက်ဆိုင်ဆိုင်  ပြောကြား ထုတ်လွှင့်ခဲ့သည့်အတွက် ရွေးကောက်ပွဲ မဲဆွယ်မိန့်ခွန်းနှင့် နိုင်ငံတော် အခြေပြမိန့်ခွန်းတို့ နှစ်ခုပေါင်းနေသည်ဟု ဆိုရမည်သာ။ NLD တွင် အရေးကြီးဆုံး ပုဂ္ဂိုလ်မှာ ဒေါ်အောင်ဆန်းစုကြည်၊ ပြည်သူ အလေးစားဆုံးမှာ ဒေါ်အောင်ဆန်းစုကြည်ဖြစ်သဖြင့် ယခုမိန့်ခွန်းသည် ကြားဖြတ်ရွေးကောက်ပွဲအပေါ် တစ်စုံတစ်ရာ သက်ရောက်နိုင်သည်ကို ယုံမှားသံသယရှိရန်မလို။ “ကျွန်မတို့ အမျိုးသား ဒီမိုကရေစီအဖွဲ့ချုပ် အစိုးရ”ဟု သတိထားမိလောက်အောင် သုံးနှုန်းသွားသည်များ ရှိသည်။ 

အချက်အလက်ထက် ယေဘုယျဘက်သို့သွားသော မိန့်ခွန်းဖြစ်သည်။ အခြားနိုင်ငံခေါင်းဆောင်၊ အစိုးရခေါင်းဆောင် အများစု၏ နိုင်ငံတော် အခြေပြ မိန့်ခွန်းသည် သူတို့၏ ပြောဆိုချက်များကို အချက်အလက် ကိန်းဂဏန်းများနှင့် ပံ့ပိုးပြောဆိုကြရာ ဒေါ်အောင်ဆန်းစုကြည်၏ မိန့်ခွန်းမှာမူ ကိန်းဂဏန်းများအစား စကားလုံးများ ကြီးစိုးသော မိန့်ခွန်းဖြစ်သည်။

မြန်မာပြည်သူ အများစုထံသို့ အရောက်ပို့လိုလျှင် ကိန်းဂဏန်း နည်းရမည်၊ သို့မှသာ မြန်မာပြည်သူ အများစုနှင့် လိုက်ဖက်မည်ဟု ဒေါ်အောင်ဆန်းစုကြည်၏ မှတ်ယူချက်အတိုင်း ပြောသောမိန့်ခွန်းဟု ယူဆရသည်။

ကိစ္စကြီးသုံးရပ်

ဒေါ်အောင်ဆန်းစုကြည် အဓိကထား ပြောကြားသွားသော ကိစ္စကြီး သုံးရပ်မှာ အပြောင်းအလဲ ဘယ်လောက် ခရီးရောက်သလဲ၊ အမျိုးသား ရင်ကြားစေ့ရေးနှင့် ငြိမ်းချမ်းရေး၊ ပြည်သူအပေါ် မေတ္တာထားမည်၊ သစ္စာစောင့်မည်တို့ဖြစ်သည်။ 

အပြောင်းအလဲတွင် “စနစ်ပြောင်းလဲခြင်းနှင့် စိတ်ဓာတ်ပြောင်းလဲခြင်း” နှစ်ခုရှိသည်ဟု ဒေါ်အောင်ဆန်းစုကြည်က ဆိုသည်။ ထိုနှစ်ခုလုံးတွင် ပြည်သူရော၊ အစိုးရရော ပါဝင်ရမည်။ စနစ်ပြောင်းလဲခြင်းသည် အစိုးရက ဦးဆောင်ရမည်။ ပြည်သူများက အစိုးရကို ကြောက်ဖို့မလိုကြောင်း အများက သိလာခြင်းသည် တိုးတက်မှုဟု သူကမြင်သည်။

ဆန္ဒ၊ ဒေါသ၊ ဘယာ၊ မောဟ ဟူသော အဂတိတရား လေးပါးမှ ကင်းခြင်းသည် အစိုးရအဖွဲ့ဝင်များအတွက် စိတ်ဓာတ် ပြောင်းလဲခြင်းပင်ဟု  ဒေါ်အောင်ဆန်းစုကြည်က ဆိုသည်။ “ပြည်သူတွေကတော့ စိတ်ဓာတ်ကို ပြောင်းလဲလား၊ မပြောင်းလဲလား ဆိုတာဟာ ပြည်သူတွေ ကိုယ်တိုင် သိမှာပါပဲ”ဟု ပြည်သူများကို ဒေါ်အောင်ဆန်းစုကြည်က မေးခွန်း ထုတ်လိုက်သည်ကိုလည်း တွေ့ရသည်။

အမျိုးသား ရင်ကြားစေ့ရေးနှင့် ငြိမ်းချမ်းရေး

အမျိုးသား ရင်ကြားစေ့ရေးနှင့် ငြိမ်းချမ်းရေးသည် ဒေါ်အောင်ဆန်းစုကြည် အာဏာစယူကတည်းက အလေးပေးဆုံး အကြောင်းအရာဖြစ်ပြီး သေနတ်သံများ ပိုညံလာခြင်းအတွက် ပြည်တွင်းရော ပြည်ပမှပါ မေးခွန်းထုတ်နေကြရာ ယခုမိန့်ခွန်းတွင်လည်း ကိစ္စကြီးတစ်ရပ်အဖြစ် ပါဝင်လာသည်။ ငြိမ်းချမ်းရေးကိစ္စ ဒေါ်အောင်ဆန်းစုကြည် ဘာပြောမလဲကို အားလုံးက စောင့်မျှော်နေကြသော်လည်း ယေဘုယျသဘောသာ ပြောကြားသွားသည်။  

သို့သော် ငြိမ်းချမ်းရေးအပေါ် ဒေါ်အောင်ဆန်းစုကြည်၏ သဘောထားကို မိန့်ခွန်းအပြီးတွင်မှ ထင်ရှားစွာ သိရသည်။ မိန့်ခွန်းအပြီး နောက်ဆက်တွဲ သတင်းစကားကို ထပ်မံ ကြေညာလိုက်သည့်အတွက်။ တစ်နိုင်ငံလုံး ပစ်ခတ် တိုက်ခိုက်မှုရပ်စဲရေး သဘောတူစာချုပ် NCA ကို UNFC အဖွဲ့ဝင် ငါးဖွဲ့က လက်မှတ် ရေးထိုးတော့မည်ဖြစ်ကြောင်း သတင်းစကား ကြားရသည့်အတွက် အလွန် ဝမ်းမြောက်မိကြောင်း ဒေါ်အောင်ဆန်းစုကြည်၏ စကားကို မိန့်ခွန်းပြောအပြီးတွင် ထပ်မံ ထည့်သွင်း ဖော်ပြလိုက်ရာ ကမ္ဘာအရပ်ရပ် နိုင်ငံ့ခေါင်းဆောင်များ၏ နိုင်ငံအခြေပြ မိန့်ခွန်းများတွင် ဖြစ်တောင့်ဖြစ်ခဲဖြစ်ရပ်။

ထိုသို့ ပြောကြားအပြီးတွင် UNFC မှ တာဝန်ရှိပုဂ္ဂိုလ်အချို့က မဟုတ်ကြောင်း တုံ့ပြန်ပြောကြားလိုက်သည့်အတွက် မလိုအပ်ဘဲ ရှုပ်ထွေးမှု ဖြစ်ပေါ်ခဲ့ရသည်။ သတင်းမှားသည်ဖြစ်စေ၊ မှန်သည်ဖြစ်စေ ယခုကဲ့သို့ မိန့်ခွန်းပြောအပြီးတွင် ဆက်တိုက် နောက်ဆက်တွဲ မိန့်ခွန်း ထပ်ထုတ်ရခြင်းမှာ ငြိမ်းချမ်းရေး လက်မှတ် ရေးထိုးမှုကို ဒေါ်အောင်ဆန်းစုကြည် အစိုးရဘက်က မည်မျှ လိုအပ်နေကြောင်း မြင်သာသွားစေသည်။ ယင်းသို့ ငြိမ်းချမ်းရေး လက်မှတ်ရရန် အစိုးရဘက်က အလျင်စလို လိုအပ်နေခြင်းသည် ငြိမ်းချမ်းရေး ဈေးအလျှော့အတင်းကိစ္စ၊ ငြိမ်းချမ်းရေးဖြစ်စဉ်ကို များစွာသက်ရောက်စေမည်ဖြစ်သည်။

မေတ္တာနှင့် သစ္စာ

မေတ္တာနှင့် သစ္စာအပိုင်းတွင် အစိုးရ၏ အောင်မြင်မှုများဟု ဒေါ်အောင်ဆန်းစုကြည် ထင်မြင်သည့်အရာများကို တွေ့သည်။ ပြည်သူ့ ကျန်းမာရေး စောင့်ရှောက်မှု တိုးတက်ခြင်း၊ လမ်းပန်း ဆက်သွယ်ရေး အလွန် ကောင်းလာခြင်း၊ ပြည်သူ့ငွေကို တာဝန်ရှိစွာ သုံးခြင်းတို့ဖြစ်သည်။ လမ်းပန်း ဆက်သွယ်ရေးနှင့် ပတ်သက်သော ဒေါ်အောင်ဆန်းစုကြည်၏ မှတ်ချက်မှာ ထင်ရှား ပေါ်လွင်လွန်းသဖြင့် အရင်းအတိုင်း ဖော်ပြလိုက်ပါသည်။

“နောက်တစ်ခု ကျွန်မတို့ ကျေနပ်စရာတွေထဲမှာ ဘာရှိလဲဆိုတော့ ကျွန်မတို့ရဲ့ လမ်းပန်း ဆက်သွယ်ရေးတွေ အင်မတန်မှ ကောင်းလာပါတယ်”

အနာဂတ်အတွက် ဘာတွေထူးသလဲ

ဒေါ်အောင်ဆန်းစုကြည် မိန့်ခွန်းတွင် အနာဂတ်အတွက် သုံးချက်ထူးသည်။ လျှပ်စစ်မီးရရှိရေး အဓိကထားတော့မည်။ ဝန်ကြီးများ လူစား လဲချင်လဲမည်။ အကောင်းဆုံးလုပ်ပြီး ပြည်သူက မလုံလောက်ဟုထင်လျှင် နောက်ဆုတ်ပေးမည်။ 

“... အလုပ်အကိုင် ဖန်တီးရေးနဲ့ လမ်းပန်းဆက်သွယ်ရေးနဲ့ တန်းတူ လျှပ်စစ်မီးရရှိရေးကို ကျွန်မတို့ အဓိကထားပြီးတော့ လုပ်သွားမှာ ဖြစ်ပါတယ်”ဟု ပြောသွားရာ မြန်မာနိုင်ငံ တိုးတက်အောင် လျှပ်စစ်မီး ရရှိရေး အဓိကထားသင့်ကြောင်းကို  နိုင်ငံတော် တာဝန်ယူအပြီး တစ်နှစ်အကြာတွင် အစိုးရ သဘောပေါက်သွားပြီဖြစ်သည်။ 

ဒေါ်အောင်ဆန်းစုကြည် မိန့်ခွန်းအနက် ကျွန်တော် အကြိုက်ဆုံးအပိုင်းမှာ ဝန်ကြီးများကို လူစားလဲတန် လဲမည်ဟု အရိပ်အမြွက် ပြောသွားခြင်းဖြစ်သည်။ စင်စစ် ဒေါ်အောင်ဆန်းစုကြည် အစိုးရသည် ဝန်ကြီး၊ ဒုဝန်ကြီးများအပိုင်းတွင် လဲလိုက်ရုံ၊ ထပ်တိုးရုံဖြင့် စွမ်းဆောင်ရည် တက်သွားစရာ ရှိသည်။ 

“ကျွန်မ အကောင်းဆုံးလုပ်မယ်။ ကျွန်မ အကောင်းဆုံးထက်တော့ ပိုပြီးတော့ လုပ်လို့မရဘူး။ ကျွန်မအကောင်းဆုံးက နိုင်ငံအတွက်၊ ပြည်သူအတွက် မလုံလောက်ဘူးဆိုရင် ပိုပြီး လုံလုံလောက်လောက် ပြည့်ပြည့်စုံစုံ လုပ်ပေးမယ့် ပုဂ္ဂိုလ်၊ အဖွဲ့အစည်းတစ်ခုက တာဝန်ယူမယ် ဆိုလို့ရှိရင် ကျွန်မတို့ဟာ နောက်ဆုတ်ပေးဖို့ အဆင်သင့်ပါပဲ”

ယင်းသို့ပြောလိုက်ခြင်းသည် ပြိုင်ဘက် အဖွဲ့အစည်းများကို စိန်ခေါ်လိုက်ခြင်းဟု ယူဆနိုင်သည်။ ရွေးစရာမရှိဘဲ မဝေဖန်နှင့်ဟု ပြည်သူများထဲမှ ဝေဖန်သူများခြင်းကို ပြန်မေးခွန်းထုတ်ခြင်းဟု အဓိပ္ပာယ် ကောက်နိုင်သလို ဒီမိုကရေစီ သဘောအရ ပြည်သူ မကြိုက်လျှင် ပြန်ဆင်းမည်ဟု ပြောခြင်းဟုလည်း ဆိုနိုင်သည်။ 

ဒေါ်အောင်ဆန်းစုကြည်၏ ယခုမိန့်ခွန်းကို အစိုးရမဖွဲ့မီ မိန့်ခွန်းများနှင့် ယှဉ်လေ့လာကြည့်လျှင် သူ့စိတ်သဘောနှင့် မြန်မာ့ပြုပြင်ပြောင်းလဲရေး၏ သဘော သဘာဝနှင့် လက်ရှိအခြေအနေကို ပိုနားလည်မည်ဖြစ်သည်။ ယခုမိန့်ခွန်းသည် ဒေါ်အောင်ဆန်းစုကြည်၏ ယခင်မိန့်ခွန်း အချို့ကဲ့သို့ နားထောင်ပြီး ဖတ်ရှုအပြီး ကြက်သီးမွေးညင်း ထလာစေမည့် မိန့်ခွန်းမျိုးထဲတွင် မပါဝင်ပါ။ အစိုးရအဖွဲ့ခေါင်းဆောင် ဖြစ်ရခြင်းနှင့် အတိုက်အခံ ခေါင်းဆောင်ဖြစ်ရခြင်း ကွာခြားမှု၊ မြန်မာနိုင်ငံ၏ ပကတိ အခြေအနေတို့ကိုကား ယခုမိန့်ခွန်းတွင် မြင်နိုင်ပါသည်။

ဇေယျသူ


  • VIA