News

POST TYPE

PERSPECTIVE

ကံအကြောင်း နားမလည်တဲ့ မိုးပြာဦးဉာဏ (၂)
10-Jan-2017

ကံအကြောင်း နားမလည်တဲ့ မိုးပြာ ဦးဉာဏ (ယမန်နေ့မှအဆက်)

အဝိဇ္ဇာရှိနေတဲ့ ပုထုဇဉ်တွေက အဲဒါကို အယူအဆ လွဲပြီး ဒါန၊ သီလ အစရှိတဲ့ ကုသိုလ် အလုပ်တွေကို မလုပ်ဘဲ ပယ်ထားရင် အဲဒီလူတွေမှာ အချိန်ရှိသမျှ အကုသိုလ်တွေချည်း ဖြစ်နေလိမ့်မယ်။ အဲဒီလို အကုသိုလ်တွေချည်း ဖြစ်နေရင် အဲဒီလို လူတွေဟာ အပါယ် လေးပါးသွားဖို့ရာ လမ်းပွင့်နေတယ်လို့သာ မှတ်ကြပေတော့။ နောက်ပြီးတော့ ကုသိုလ်ကို ပြုချင်တဲ့စိတ် မရှိဘူးဆိုတာ အဝိဇ္ဇာနည်းတဲ့သဘော မဟုတ်ဘူး၊ အဝိဇ္ဇာ အားကြီးတဲ့ သဘောပဲ၊ အဝိဇ္ဇာ အားကြီးတော့ မဂ်ဖိုလ်နိဗ္ဗာန်နဲ့ ဝေးတယ်လို့လည်း မှတ်ကြရမယ်။


အဝိဇ္ဇာနည်းပါးလာရင် နည်းပါးသလောက် ကုသိုလ်အမှုတွေမှာ စိတ်က သာသာပြီး ညွတ်ကိုင်းလာတယ်။ ဒါကြောင့် သောတာပန်ဖြစ်လာရင် ပုထုဇဉ်တုန်းကထက် ကုသိုလ်ဘက်မှာသာပြီး စိတ်က ညွှတ်ကိုင်းလာတယ်။ တတ်နိုင်သမျှ ကုသိုလ်အလုပ်ကို သာပြီး စိတ်ပါဝင်စားစွာနဲ့ လုပ်တယ်၊ သကဒါဂါမ်လည်း ထို့အတူပဲ အနာဂါမ်လည်း ထို့အတူပဲ၊ ထူးတာကတော့ ပလိဗောဓတွေကို ဖြတ်တောက်ပြီး ဘာဝနာအလုပ်ကို တိုးတက် လုပ်လိုတဲ့ ဆန္ဒသာပြီး များလာတယ်။ ဒါကြောင့် အနာဂါမ်က အချိန်ရသလောက်သာ ဘာဝနာအလုပ်မှာ သာပြီး စိတ်ဝင်စားနေတတ်တယ်။ ရဟန္တာ ဆိုရင်တော့ အထူး ပြောစရာ မရှိဘူး၊ ဒါကြောင့် ကုသိုလ်အလုပ်တွေကို အကုသိုလ်လို သဘောထားပြီး တမင် မပယ်ကောင်းဘူး ဆိုတာကို သိနားလည်ထားကြရမယ်။ အဝိဇ္ဇာရှိနေရင် ကြံစည်သမျှ ပြုလုပ်သမျှ ပြောဆိုသမျှဟာ ကုသိုလ်ဖြစ်ရင်လည်း ဖြစ်မယ်၊ ကုသိုလ် မဖြစ်ရင် အကုသိုလ်ချည်း ဖြစ်နေမှာပဲ။ ဒါကြောင့် “အဝိဇ္ဇာပစ္စယာ၊ အဝိဇ္ဇာဟူသော အကြောင်းကြောင့်။ သင်္ခါရာ၊ ကောင်းကျိုး ဆိုးကျိုးကို ပေးတတ်သော ကုသိုလ်သင်္ခါရ အကုသိုလ် သင်္ခါရတိ့ုသည် သမ္ဘဝန္တိ၊ ဖြစ်ပေါ်ကုန်၏”လို့ ဟောထားပါတယ်။

ဒီလောက်ဆိုရင် မိုးပြာဦးဉာဏပြောတဲ့ ကုသိုလ် မလုပ်ရဘူးဆိုတဲ့ စကားနဲ့ ဘုရားရှင် ဟောကြားတော်မူထားတဲ့ ရဟန္တာ ပုဂ္ဂိုလ်များမှာ ကုသိုလ် မရှိဘူးဆိုတဲ့စကား ဘယ်လို ကွာခြားတယ် ဆိုတာကို နားလည်လောက်ပြီလို့ ယူဆမိပါတယ်။

၂။ ထေရဝါဒ ရဟန်းတော်များဟာ ဝိပါကဝဋ်ကို မှန်မှန်ကန်ကန် နားမလည်ကြဘူး။ အဓိပ္ပာယ် ကောက်ယူတာ မှားနေတယ်။ ကိုယ်လုပ်ပြီး ကိုယ်ပြန်ခံရမယ်ဆိုတာ မဟုတ်ဘူးဆိုတဲ့ မိုးပြာဦးဉာဏရဲ့ စကားကို ဆက် ရှင်းပြပေးပါမယ်။

ဒီစကားအရ မိုးပြာဦးဉာဏဟာ ဧဝံ မေ သုတံ အရင်းခံထားတဲ့ ပဋိစ္စသမုပ္ပာဒ်ကို လက်ခံထားတယ်ဆိုတာ သေချာပါတယ်။ သို့သော်လည်း ပဋိစ္စသမုပ္ပာဒ်မှာ ဘုရားရှင်က အတိတ်၊ ပစ္စုပ္ပန်၊ အနာဂတ်လို့ သုံးပိုင်း ဟောထားရာမှာ အတိတ်ပိုင်းနဲ့ အနာဂတ်ပိုင်းကို ပစ်ပယ်ပြီး ပစ္စုပ္ပန်ကိုပဲ လက်ခံထားပါတယ်။ ဒါကိုကြည့်သောအားဖြင့် မိုးပြာဦးဉာဏဟာ ဘုရားရှင် ဟောကြားတော်မူထားတဲ့ တရားတော်တွေကို လိုသလို ဖြတ်ညှပ်ကပ် လုပ်နေတယ် ဆိုတာ ထင်ရှားပါတယ်။ သူလုပ်တဲ့ ဖြတ်ညှပ်ကပ်က ကောင်းကောင်းမွန်မွန်လား ဆိုတော့လည်း မဟုတ်ပါဘူး။ ပရမ်းပတာ ထင်ရာမြင်ရာ လုပ်နေတာပါ။ 

ပဋိစ္စသမုပ္ပာဒ်မှာ ဘုရားရှင် ဟောကြားထားတဲ့ ဝဋ်သုံးပါးထဲက ဝိပါကဝဋ်ဆိုတာ ကောင်းတာလုပ်ရင် ကောင်းတာ ဖြစ်မယ်။ မကောင်းတာလုပ်ရင် မကောင်းတာ ဖြစ်မယ်ဆိုတဲ့ ကံရဲ့ ကောင်းကျိုး ဆိုးကျိုးမျှလောက်ကိုသာ ရည်ရွယ်ပြီးတော့ ဘုရားရှင်က ဟောကြားထားတာ မဟုတ်ပါဘူး။ ဘဝသစ် တစ်ခုကို ဖန်တီးပေးနိုင်တဲ့ စွမ်းအားမြင့်ကံရဲ့ အကျိုးဆက်ဖြစ်တဲ့ ဘဝသစ် ရုပ်နာမ်ခန္ဓာကို ရည်ရွယ်ပြီးတော့ ဟောကြားတော်မူခဲ့ခြင်း ဖြစ်ပါတယ်။ ပဋိစ္စသမုပ္ပာဒ်မှာ ဘုရားရှင် ဟောကြာထားတဲ့ ဝိပါကဝဋ်ဆိုတာ ကံကနေ ထုတ်လုပ်ပေးထားတဲ့ ဘဝသစ် ရုပ်နာမ်ခန္ဓာကို ဆိုလိုခြင်းသာ ဖြစ်ပါတယ်။

ဒါကို မိုးပြာဦးဉာဏက ကောင်းတာလုပ်ရင် ကောင်းတာ ဖြစ်မယ်၊ မကောင်းတာလုပ်ရင် မကောင်းတာ ဖြစ်မယ်ဆိုတဲ့ ကောင်းကျိုး ဆိုးကျိုးမျှကိုသာ ကောက်ယူ ဟောပြောနေပါတယ်။ ဘုရားရှင်ရဲ့ ဆိုလိုရင်း အမှန်ဖြစ်တဲ့ ဘဝသစ် ရုပ်နာမ်ခန္ဓာအထိ မကောက်ယူရဲပါဘူး။ အကြောင်းကတော့ သူက ဘဝသံသရာကို ပစ်ပယ်ထားတဲ့လူ ဖြစ်လို့ပါပဲ။ မိုးပြာဦးဉာဏဟာ ပဋိစ္စသမုပ္ပာဒ်ကို အတိတ်နဲ့ အနာဂတ်ကို ပစ်ပယ်ထားလို့ပါပဲ။ ဒါကြောင့် သူက အတိတ်ဖြစ်တဲ့ ကမ္မဝဋ်နဲ့ အနာဂတ်ဖြစ်တဲ့ ဝိပါကဝဋ်ကို ဇွတ်အတင်းကြီး မရမက ပစ္စုပ္ပန် လုပ်နေရတာ ဖြစ်ပါတယ်။ ဒါကို ထောက်ဆသောအားဖြင့် မိုးပြာဦးဉာဏနဲ့ ထေရဝါဒ ရဟန်းတော်များ ဘယ်သူက ဝိပါကဝဋ်ကို မှန်မှန်ကန်ကန် ကောက်ယူခြင်း မပြုနိုင်တာလဲ ဆိုတာ ထင်ရှားနေပါပြီ။

အပိုဒ်(ခ)မှာ မိုးပြာဦးဉာဏက “ကျုပ်တို့နဲ့ ထေရဝါဒ ဗုဒ္ဓဘာသာနဲ့ ကွဲတယ်ဆိုတာ ကျုပ်တို့ကနေ သာမန်ခါလေး ကွဲချင်လို့ ကွဲလိုက်တာ မဟုတ်ဘူး။ လူ့လောကကြီးရဲ့ မွဲတေနေတဲ့ဖြစ်ရပ်။ ဥပမာဗျာ အခုဆိုရင် လူတွေ မွဲနေတယ်။ ဘာဖြစ်လို့မွဲမှန်း ကျုပ်တို့ သိတယ်။ ခင်ဗျားတို့လို မီဒီယာတွေကနေ ပြောလို့သိတာ။ ဘယ်လို ပြောတုံးဆိုရင်ဟာ ခရိုနီတွေက ဘယ်လို လုပ်တယ်။ အာဏာရှင်တွေက ဘယ်လို လုပ်တယ်။ သူကလည်း အချက်နဲ့ လက်နဲ့ ကွက်ကွက်ကွင်းကွင်း ပြောတဲ့အခါကျ ဘယ်သူတွေက သစ်တောတွေလည်းတုံးကုန်ပြီ။ ရေထဲက ငါးတွေလည်း ကုန်လုနေပြီတဲ့ ဆိုတာမျိုးပေါ့ဗျာ။ ဘယ်သူတွေ ဘယ်လို လုပ်လိုက်တယ် ဆိုတာမျိုး။ ဘယ်သတ္တုတွေလည်း ကုန်လုနေပြီ။ သူတို့က လက်ညှိုးထိုးရောင်းတာနဲ့။ အဲတော့ ရောင်းတော့ သူတု့ိတော့ ချမ်းသာတာပေါ့။ ဟာ ဒီလိုဆိုရင် သူတို့ချမ်းသာ ပြီး တို့မွဲတယ်လို့ဆိုတာဟာ သူတို့ကြောင့် မွဲတာ။ သူတို့ကြောင့် မွဲတာလို့ဆိုတာ ဒီလိုဆိုရင် သူတို့ အခုမှလားလို့ မေးတော့ အရင်တုန်းက ရှင်ဘုရင်တွေဆိုတာ ဦးသန်းရွှေထက် အာဏာပိုရှိတယ်။ ဦးသန်းရွှေက ဒီတိုင်းပြည်ကြီး သူပိုင်တယ်လို့ မပြောဘူးလို့။ ရှင်ဘုရင်တွေက သူပိုင်တယ်လို့ ပြောတာလို့။ ဒီလိုဆိုရင် သူ့ထက် ဦးသန်းရွှေထက် အဆပေါင်း များစွာ ရှင်ဘုရင်ဆိုတာ ဆိုးရမယ်လို့။ အဲလိုရင် သူ့နားကပ်တဲ့လူတွေကိုလည်းပဲ သူ ဖေဘာ ပေးရမယ်လို့။ ဖေဘာ ပေးရင်လည်း အဲဒီသူတွေပဲ ရပြီးတော့ ကျန်တဲ့သူတွေကတော့ နင်းပြား ဖြစ်ရမယ်လို့ မွဲရမယ်လို့။ အဲတော့ အဲဒီလို မွဲတာကို ရှင်ဘုရင်နဲ့ ခုနတုန်းက ပစ္စည်းရှိတဲ့သူတွေက လုပ်လို့မွဲတယ်ဆိုရင် ဒါလေးလောက် မသိဘူးဆိုရင်ထား။ မသိတဲ့အတိုင်းနေ။ မဖိနဲ့။ အဲဒါကို ဘာသာရေးက ဖိပေးတယ်။ မင်းတို့မွဲတာ နောက်ဘဝက ကံကြောင့် မွဲတာလို့ ပြောတယ်။ ဒါဆိုရင် ဒီအာဏာရှင်ကြောင့် မွဲတယ်၊ ခရိုနီကြောင့် မွဲတယ်လို့ဆိုတဲ့အသိက ဒီလူတွေဆီ ဘယ်လိုလုပ်ဝင်တော့မလဲ။ မင်းတို့ ဒါ မင်းတို့ နောက်ဘဝက ကံကြောင့် မွဲတာလို့။ ဟိုလူတွေက အကြိုက်ပေါ့။ ဟာ တို့ သူတို့ကို ဖိပေမယ့် ဘယ်လောက်ဖိဖိ မဖိမိဘူးဟ။ သူတို့ ကံဆိုးလို့မွဲတာလို့  ဆိုတာမျိုးလို ထင်မှာလို့ ဆိုတော့ အဲဒီတော့ ဒီလူတွေ အမြီးစားဖက် ခေါင်း စားဖက် ဖြစ်တာကိုး။ ဒါ ငါတို့ ဘုရားကြောင့် မဟုတ်ဘူး”လို့ ပြောသွားပါတယ်။

အထက်ပါ စကားများကို မိုးပြာဦးဉာဏ အာရဲလျှာရဲ ပြောဆိုရဲတာဟာ ကံအကြောင်းကို သေသေချာချာ နားမလည်လို့၊ စာပေကျမ်းဂန်ကို ကောင်းကောင်းမွန်မွန် မသင်ယူခဲ့ဖူးလို့ဆိုတာ ထင်ရှားနေပါတယ်။ တကယ်တော့ ဒီပြဿနာရဲ့ အဖြေက သာမန် ဗုဒ္ဓစာပေ လိုက်စားတဲ့သူတောင်မှ သိနေကြပါတယ်။ ဗုဒ္ဓဘာသာဂိုဏ်းခွဲ တစ်ခု ထူထောင်ချင်သူက ဗုဒ္ဓ တရားတော်ကို သေသေချာချာ နားမလည်တာဟာ အလွန်အံ့သြစရာ ကောင်းလွန်းလှတဲ့ ဖြစ်ရပ်ပါ။

ကံအယူအဆနဲ့ ပတ်သက်လာရင် ဘုရားရှင် ပယ်ထားတဲ့ ပုဗ္ဗေကတ ဟေတုဒိဋ္ဌိကံ အယူအဆ၊ ဘုရားရှင် လက်ခံ ဟောကြားထားတဲ့ ကမ္မဿကတ သမ္မာဒိဋ္ဌိကံ အယူအဆဆိုပြီးတော့ ကံအယူအဆက နှစ်မျိုး ရှိပါတယ်။ 

လက်ရှိဘဝမှာ ဘာပဲဖြစ်ဖြစ် ဖြစ်လာသမျှဟာ ရှေးအတိတ်ကံကြောင့်ချည်းပဲ ဖြစ်တယ်လို့ လက်ခံယူဆတဲ့ ကံအယူဝါဒကို ပုဗ္ဗေကတဟေတုဒိဋ္ဌိ လို့ ခေါ်ပါတယ်။ အထက်မှာ ပြောခဲ့တဲ့ ကံလေးမျိုးမှာ အပရာ အပရိယ ဝေဒနီယကံ တစ်မျိုးတည်းကို လက်ခံပြီးတော့ ဒိဋ္ဌဓမ္မဝေဒနီယကံ ဥပပဇ္ဇ ဝေဒနီယကံ အဟောသိကံတို့ကို ပယ်ထားတဲ့ ကံအယူဆကို ပုဗ္ဗေကတ ဟေတုဒိဋ္ဌိလို့ ခေါ်ပါတယ်။ ပုဗ္ဗေကဟေတုဒိဋ္ဌိကို ဘုရားရှင်က မှားယွင်း သောကံ အယူအဆ၊ အစွန်းရောက် ကံအယူအဆဆိုပြီး ပယ်ထားပါတယ်။ ဒါကြောင့် ဘုရားရှင်က အင်္ဂုတ္တိုရ်ပါဠိတော် တိ ကနိပါတ် မဟာဝဂ် ဧဝံ မေ သုတံ အရင်းခံထားတဲ့ တိတ္ထာယတန သုတ်မှာ အောက်ပါအတိုင်း ဟောကြားထားပါတယ်။

“ရဟန်းတို့ ဤသတ္တဝါသည် အလုံးစုံသော ချမ်းသာမှု သုခကိုလည်းကောင်း၊ ဆင်းရဲမှုဒုက္ခကိုလည်းကောင်း၊ မဆင်းရဲ၊ မချမ်းသာ (လျစ်လျူရှုမှု) ဥပေက္ခာကိုလည်းကောင်း၊ ရှေးက ပြုခဲ့ဖူးသော အကြောင်းကြောင့်သာ ခံစားရ၏”ဟု ပြောလေ့ယူလေ့ ရှိကြကုန်သော သမဏ ဗြာဟ္မဏအချို့တို့ ရှိကြကုန်၏။ ထိုသမဏ ဗြာဟ္မဏတို့သို့ ချဉ်းကပ်၍ အရှင်တို့ “ဤသတ္တဝါသည် အလုံးစုံသော သုခ ဒုက္ခ ဥပေက္ခာကို ရှေးက ပြုခဲ့ဖူးသော အကြောင်းကြောင့်သာ ခံစားရ၏”ဟု သင်တို့ ပြောလေ့ယူလေ့ ရှိကြ၏ဟူသည် မှန်သလောဟု ငါမေး၏။ မှန်၏ဟု ထိုသူတို့ကလည်း ဝန်ခံကြ၏။ “အရှင်တို့ ထိုသို့ဖြစ်လျှင် သူ့အသက်ကို သတ်လေ့ ရှိသူတို့သည် ရှေးက ပြုခဲ့ဖူးသော အကြောင်းကြောင့်သာ ဖြစ်ကြရလိမ့်မည်။ မမြတ်သော အကျင့်ကို ကျင့်သူတို့သည် ရှေးက ပြုခဲ့ဖူးသော အကြောင်းကြောင့်သာ ဖြစ်ကြရလိမ့်မည်။ မုသား ပြောသူတို့သည် ရှေးက ပြုခဲ့ဖူးသော အကြောင်းကြောင့်သာ ဖြစ်ကြရလိမ့်မည်။ ကုန်းတိုက်စကား၊ ကြမ်းတမ်းသော စကား၊ ပြိန်ဖျင်းသော စကားကို ပြောသူတို့သည် ရှေးက ပြုခဲ့ဖူးသော အကြောင်းကြောင့်သာ ဖြစ်ကြရလိမ့်မည်။ သူတစ်ပါး စည်းစိမ်ကို မက်မောလေ့ရှိသူ၊ ပျက်စီးစေလို စိတ်ရှိသူ၊ မှားသော အယူရှိသူတို့သည် ရှေးက ပြုခဲ့ဖူးသော အကြောင်းကြောင့်သာ ဖြစ်ကြရလိမ့်မည်”ဟု ငါဆို၏။ 

ရဟန်းတို့ ရှေးကပြုခဲ့ဖူးသော အကြောင်းကိုသာလျှင် အမြတ်တနိုး ယုံကြည်စွဲလမ်းကြသူတို့အား ဤအမှုကိစ္စကို ပြုရန်၊ မပြုရန်၊ အလိုဆန္ဒ၊ အားထုတ်မှု ဝီရိယသည် မဖြစ်နိုင်တော့ချေ။ ဤသို့ပြုသင့်သည်၊ မပြုသင့်သည်ကို အမှန်အကန်၊ အခိုင်အမြဲ မရခဲ့သော် သတိလွတ်ကင်း စောင့်စည်းခြင်း မရှိဘဲ နေသူတို့အတွက် အသီးအခြား အကြောင်းနှင့်တကွ ဖြစ်သော သမဏဝါဒ မရှိနိုင်တော့ချေ။ ရဟန်းတို့ ဤသည်ကား ဤသို့ပြောလေ့ ယူလေ့ရှိသော သမဏဗြာဟ္မဏတို့၌ အကြောင်းနှင့်တကွ ငါ၏ ပထမ နှိပ်နင်းခြင်းပေတည်း။

အထက်ပါ ဟောကြားချက်အရ ဘုရားရှင်ဟာ လက်ရှိလူရဲ့ ဆန္ဒ ဝီရိယ သတိ ပညာ စောင့်စည်း အားထုတ်မှု တန်ဖိုးတွေကို ပယ်ထားတဲ့ ပုဗ္ဗေကတ ဟေတုဒိဋ္ဌိကို လက်မခံဘူးဆိုတာ ရှင်းရှင်းလင်းလင်း သိရှိနိုင်ပါတယ်။ ဒါကို မိုးပြာဦးဉာဏက မျက်ကွယ်ပြုပြီး မျက်နှာပြောင်ပြောင်နဲ့ အာရဲလျှာရဲ ပြောဆိုရဲတာ အံ့ဖို့ကောင်းပါပေစွ။ အခု ဘုရားရှင် လက်ခံထားတဲ့ ကမ္မဿကတ သမ္မာဒိဋ္ဌိကံအယူအဆကို ဆက်ပြီးရှင်းပြပေးပါမယ်။

အနာရောဂါဆိုတာ သည်းခြေကြောင့်ဖြစ်တဲ့ အနာရောဂါ၊ သလိပ်ကြောင့်ဖြစ်တဲ့ အနာရောဂါ၊ လေကြောင့်ဖြစ်တဲ့ အနာရောဂါ၊ ထိုသုံးမျိုး ပေါင်းစုံပြီးဖြစ်တဲ့ အနာရောဂါ၊ ဥတုဖောက်ပြန်လို့ ဖြစ်တဲ့ အနာရောဂါ ခန္ဓာကိုယ်ကို မညီမညွတ် မမျှမတ ဆောင်ရွက်ခြင်းကြောင့်ဖြစ်တဲ့ အနာရောဂါ၊ လုံ့လအားထုတ်ပြုလုပ်ခြင်းကြောင့်ဖြစ်တဲ့ အနာရောဂါ၊ ကံ၏အကျိုးဖြစ်တဲ့ အနာရောဂါ စသဖြင့် အနာရောဂါ အမျိုးမျိုး ရှိပါတယ်။
 
ထိုအနာရောဂါများဟာ သက်ဆိုင်ရာ အကြောင်းတရား အသီးသီးကြောင့် ဖြစ်တယ်လို့ နားလည်လက်ခံ ယုံကြည် သိမြင်တာကို ကမ္မဿကတ သမ္မာဒိဋ္ဌိကံအယူအဆလို့ ခေါ်ဆိုပါတယ်။ ထိုအနာရောဂါ မှန်သမျှဟာ ရှေးအတိတ်ကံကြောင့်ချည်း ဖြစ်တယ်လို့ ယုံကြည်လက်ခံ သိမြင်တာကို ပုဗ္ဗေကတဟေတုဒိဋ္ဌိလို့ ခေါ်ပါတယ်။ ဖြစ်ပေါ်နေတဲ့ ကိစ္စရပ် အားလုံးဟာ သူ့ရဲ့ ဆိုင်ရာဆိုင်ရာ အကြောင်းတရားတွေကြောင့် ဖြစ်ပေါ်လာခဲ့တာဖြစ်တယ်လို့ ယုံကြည် လက်ခံတာကိုမှ ထေရဝါဒ ဗုဒ္ဓဘာသာက လက်ခံထားတဲ့ ကမ္မဿကတသမ္မာဒိဋ္ဌိလို့ ခေါ်ပါတယ်။ ဖြစ်ပေါ်နေသမျှ ကိစ္စရပ်အားလုံးဟာ ရှေးအတိတ်ကံကြောင့်ချည်း ဖြစ်ပေါ်နေတာလို့ ယူဆတဲ့ ပုဗ္ဗေကတ ဟေတုဒိဋ္ဌိကို ထေရဝါဒ ဗုဒ္ဓဘာသာက လုံးဝ လက်မခံပါဘူး။

ထေရဝါဒ ဗုဒ္ဓဘာသာက လက်ခံ ယုံကြည်ထားတဲ့ ကမ္မဿကတ သမ္မာဒိဋ္ဌိကံအယူအဆက ဉာဏ်နဲ့ယှဉ်ပြီး ပုဗ္ဗေကတဟေတုဒိဋ္ဌိက ဉာဏ်နဲ့ မယှဉ်ပါဘူး။ ထေရဝါဒ ဗုဒ္ဓဘာသာက လက်ရှိလူရဲ့ ဆန္ဒ ဝီရိယ သတိ ပညာ စောင့်စည်းအားထုတ်မှု တန်ဖိုးတွေကို အသိအမှတ်ပြုတဲ့ ကမ္မဿကတ သမ္မာဒိဋ္ဌိ အယူအဆကိုသာ လက်ခံ ယုံကြည်ထားကြတာပါ။ လူရဲ့ ဆန္ဒ ဝီရိယ သတိ ပညာ စောင့်စည်းအားထုတ်မှု တန်ဖိုးတွေကို မျက်ကွယ်ပြု ပစ်ပယ်ထားတဲ့ ပုဗ္ဗေကတဟေတုဒိဋ္ဌိကို လက်မခံပါဘူး။ အားမပေးပါဘူး။ ဒါကြောင့် ထေရဝါဒ ဗုဒ္ဓဘာသာ ခရိုနီတွေ အာဏာရှင်တွေကို ကာကွယ်ပေးတယ်၊ ခရိုနီတွေ အာဏာရှင်တွေနဲ့ အမြီးစားဖက် ခေါင်းစားဖက်တွေ ဖြစ်တယ်ဆိုတဲ့ မိုးပြာဦးဉာဏရဲ့ စကားဟာ ငရဲက လာတဲ့လူ ပြာပူ မကြောက်လို့ ပြောတဲ့စကားပါ။ သူရူးသူနှမ်းစကားပါ။

အချုပ်အားဖြင့် သုံးသပ်ရမယ်ဆိုရင် မိုးပြာဦးဉာဏဟာ ဘုရားရှင်ရဲ့ တရားတော်များကို အမှန်တကယ် တတ်သိနားလည်ခြင်း မရှိတဲ့၊ ဘုရားရှင်ရဲ့ တရားတော်များကို အငြိုးအမျက်ကြီးကြီးနဲ့ ဖျက်ဆီးနေတဲ့၊ ဘုရားရှင် တည်ထောင်မူခဲ့တဲ့ သာသနာတော်ကို ပျက်စီးစေချင်တဲ့ လူပျက် လူရမ်းကား လူလိမ်လူညာ တစ်ဦးဆိုတာ သူ့ရဲ့ ပြောစကားများက သက်သေခံနေပါတော့တယ်။

ဝတ်ကောင်းစားလှ ဝတ်ဆင်ထားသော လူမိုက်သည် အဝေးမှ ကြည့်သော် တင့်တယ်သကဲ့သို့ ထင်ရ၏။ စကား ပြောလာသော အခါ၌ကား လူ့ဗာလဖြစ်သည်ကို သိရှိကြရလေတော့၏ ဆိုတဲ့ ဟိတောပဒေသနီတိ စကားကိုသာ အမှတ်ရနေမိပါတော့တယ်။

မိုးသု(မန္တလေး)

ကံအကြောင်း နားမလည်တဲ့ မိုးပြာ ဦးဉာဏ



  • VIA