News

POST TYPE

PERSPECTIVE

၂၀၁၆ နိဂုံး ၂၀၁၇ နိဒါန်း (၁)
05-Jan-2017 tagged as NLD ANP SNLD

၂၀၁၅ ရွေးကောက်ပွဲမှ အရပ်သားအစိုးရသစ်သို့

အားလုံးသိကြသည့်အတိုင်း ၂၀၁၅ နိုဝင်ဘာ အထွေထွေရွေးကောက်ပွဲတွင် ‘အမျိုးသားဒီမိုကရေစီအဖွဲ့ချုပ်’ (NLD) ပါတီ သောင်ပြိုကမ်းပြို အနိုင်ရလိုက်သည်။ ဤတွင် ပြည်တွင်းပြည်ပ စောင့်ကြည့်လေ့လာသူများက ‘အေးအေးညောင်းညောင်း အာဏာလွှဲပြောင်းမှု ဖြစ်မှဖြစ်ပါ့မလား’ ဆိုသော စိုးရိမ်သောကဖြင့် ရင်တမမ စောင့်ကြည့်နေကြရသည်။ သို့နှင့်တိုင် သူတို့စိုးရိမ်သလို မဖြစ်ခဲ့ပါ။ နှစ်ဖက်အမြော်အမြင်ကြီးမှု (အထူးသဖြင့် သမ္မတ ဦးသိန်းစိန် ဦးဆောင်သော ယခင်အစိုးရ၏ အမြော်အမြင်) ကြောင့် အာဏာလွှဲပြောင်းမှု ဖြစ်စဉ်မှာ အံ့သြဖွယ်ရာ ကောင်းလောက်အောင် အဆင်ပြေ ချောမွေ့ခဲ့ပါသည်။ 

(က) အရေးကြီးသည့် တွေ့ဆုံမှုများ

အမှန်စင်စစ် ဦးသိန်းစိန်ရော၊ ဒေါ်အောင်ဆန်းစုကြည်ကပါ ၂၀၁၅ ခုနှစ် ဒီဇင်ဘာ ၂ ရက်ကပင် အဆင်ပြေ ချောမွေ့စွာ အာဏာလွှဲပြောင်းပေးနိုင်ရန် ကူးပြောင်းရေးအဖွဲ့ အသီးသီး ဖွဲ့စည်းပေးခဲ့ပြီး ဖြစ်ပါသည်။ ထိုစဉ်က အစိုးရ ဖွဲ့စည်းပေးသောအဖွဲ့ကို သမ္မတရုံးဝန်ကြီး ဦးလှထွန်းက ခေါင်းဆောင်ခဲ့ပြီး NLD အဖွဲ့ကိုမူ ဝါရင့်ပါတီဝင် ဦးဝင်းထိန်က ဦးဆောင်ခဲ့သည်။ 

ဤကာလအတွင်းမှာပင် အနိုင်ရပါတီ ဥက္ကဋ္ဌ ဒေါ်အောင်ဆန်းစုကြည်နှင့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တို့ သုံးကြိမ်မျှ တွေ့ဆုံခဲ့ကြသည်။ ဒီဇင်ဘာ ၂ ရက်တွင် ပထမဆုံးအကြိမ် တွေ့ဆုံခဲ့ကြပြီး အစည်းအဝေးအပြီးတွင် အပြုံးကိုယ်စီဖြင့် ဓာတ်ပုံ အရိုက်ခံခဲ့ကြသည်။ မည်သည့်အကြောင်းအရာများကို ဆွေးနွေးကြသည် ဆိုသည်ကိုမူ ထုတ်ဖော်ပြောဆိုခြင်း မရှိခဲ့ကြသော်လည်း နောက်ဆက်တွဲ အစည်းအဝေးများကိုမူ ၂၀၁၆ ခုနှစ် ဇန်နဝါရီ ၂၅ ရက်နှင့် ဖေဖော်ဝါရီ ၁၇ တို့တွင် ဆက်လက်ကျင်းပနိုင်ခဲ့သည်။ 

ဤကာလအတွင်း အံ့သြဖွယ်ရာ အကောင်းဆုံး တွေ့ဆုံမှုမှာကား ၂၀၁၅ ခုနှစ် ဒီဇင်ဘာ ၄ ရက်နေ့က ဆွေးနွေးပွဲပင် ဖြစ်သည်။ ယခင်တပ်မတော် အကြီးအကဲဟောင်း ဦးသန်းရွှေနှင့် ဒေါ်အောင်ဆန်းစုကြည်တို့၏ တွေ့ဆုံမှုပင် ဖြစ်သည်။ ဤသို့တွေ့ဆုံနိုင်ရန် ဦးသန်းရွှေ၏ မြေးဖြစ်သူက စီစဉ်ပေးသည်ဟုလည်း သိရသည်။ သူတို့ ဘာတွေဆွေးနွေးကြသည် ဆိုသည်ကိုမူ ထုတ်ဖော်ပြောဆိုခြင်း မရှိခဲ့သော်လည်း မြေးဖြစ်သူကမူ ယခုလို သတင်းပေးသည်။ ‘ဒေါ်အောင်ဆန်းစုကြည်မှာ တိုင်းပြည်၏ အနာဂတ်ခေါင်းဆောင်’ ဟု ဦးသန်းရွှေက အတည်ပြုပေးသည်ဟု ဆိုပါသည်။ လက်ရှိတပ်မတော်အပေါ် ယခုထက်တိုင် သြဇာကြီးဆဲ ဖြစ်သည့် ယခင်ဗိုလ်ချုပ်မှူးကြီးဟောင်း ဦးသန်းရွှေကိုယ်တိုင်က ဒေါ်အောင်ဆန်းစုကြည်၏ ဦးဆောင်မှုကို အတည်ပြု ထောက်ခံပေးလိုက်သည့် သဘော ဖြစ်နိုင်ပါသည်။ 

(ခ) အစိုးရသစ် ဖွဲ့စည်းခြင်း

၂၀၁၆ ခုနှစ် မတ်လ ၃၀ ရက်နေ့တွင် တရားဝင် လွှဲပြောင်းပေးသည့် အခမ်းအနားဖြင့် အစိုးရသစ် အာဏာရလာခဲ့ပါသည်။ (ရွေးကောက်တင်မြှောက် ခံရသော ဥပဒေပြု အမတ်များမှာမူ ၂၀၁၆ ခုနှစ် ဖေဖော်ဝါရီ ၁ ရက်နေ့ကပင် အမတ်နေရာများကို ရယူခဲ့ကြပြီး ဖြစ်သည်) မတ်လ ၁၀ ရက်မှ ၁၅ ရက်အထိ ကျင်းပခဲ့သော လွှတ်တော်အစည်းအဝေးတွင် သမ္မတသစ်ကို ရွေးချယ်ခဲ့ကြပါသည်။ NLD အမတ်အများစုက ဦးထင်ကျော်ကို သမ္မတအဖြစ် ရွေးချယ်ခဲ့ကြသည်။ တပ်မတော် လွှတ်တော်ကိုယ်စားလှယ် အစုအဖွဲ့မှ ရွေးချယ်လိုက်သော အငြိမ်းစားဗိုလ်ချုပ်ကြီး ဦးမြင့်ဆွေမှာ ဒုတိယသမ္မတ (၁) ဖြစ်လာသည်။ NLD ပါတီဝင် ဥပဒေပြုအမတ် ဟင်နရီဗန်ထီးယူမှာ ဒုတိယသမ္မတ (၂) ဖြစ်လာသည်။ သမ္မတ ဦးထင်ကျော်မှာ နိုင်ငံရေးအရ လူသိနည်းသူ ဖြစ်သည့်တိုင် NLD အသိုင်းအဝိုင်းတွင်မူ ကျယ်ကျယ်ပြန့်ပြန့် လေးစားခံရသူ ဖြစ်သည်။ ဟင်နရီဗန်ထီးယူမှာကား လူမျိုးစု နိုင်ငံရေးနှင့် အဆက်အစပ် ရှိလှသူ မဟုတ်ပါချေ။ ယခင် ရန်ကုန်တိုင်း ဝန်ကြီးချုပ် လုပ်ခဲ့ဖူးသော ဦးမြင့်ဆွေကိုလည်း သဘောထား တင်းမာသူဟု ယူဆကြသူတွေ ရှိသလောက် ရှိသည်။ 

မတ်လ ၁၇ ရက်တွင် အရွေးချယ်ခံ သမ္မတ (ဦးထင်ကျော်) က ဝန်ကြီးဌာန ၂၁ ခုကို အမည်စာရင်း တင်သွင်းခဲ့သည်။ မတ်လ ၂၂ ရက်တွင် အဆိုပြုဝန်ကြီး ၁၈ ဦး၏ အမည်ကို ဆက်လက်တင်သွင်းခဲ့သည်။ ယခင်အစိုးရ လက်ထက်က ဝန်ကြီးဌာန ၃၆ ခု ရှိခဲ့ရာမှ ယခု ၂၂ ခုသို့ လျှော့ချလိုက်ခြင်းပင် ဖြစ်သည်။ ‘တိုင်းရင်းသားရေး ဝန်ကြီးဌာန’ နှင့် ‘နိုင်ငံတော်အတိုင်ပင်ခံရုံး ဝန်ကြီးဌာန’ တို့ကိုမူ ထပ်မံဖွဲ့စည်းခဲ့သည်။ ဝန်ကြီးဌာနများနှင့် ဒုတိယဝန်ကြီးများ လျှော့ချလိုက်သဖြင့် ဘတ်ဂျက် ကျပ်သိန်းထောင်ချီ သက်သာသွားသည် ဆိုသော်လည်း ဝန်ကြီးဌာနအလိုက် ရှိနေသော အင်စတီကျူးရှင်းများကိုပါ ဖျက်သိမ်းလိုက်ရာ ရောက်သွားသည်။ မူလကတည်းက အင်စတီကျူးရှင်း စွမ်းဆောင်ရည် နိမ့်ပါးနေသော မြန်မာနိုင်ငံအတွက် မမျှော်လင့်သော ထိုးနှက်ချက် ဖြစ်သွားနိုင်သည်။ (နောက်ပိုင်းတွင်တော့ ဒုတိယဝန်ကြီးအချို့ ပြန်ခန့်သည်ကို တွေ့ရသည်။) ဝန်ကြီးအဖွဲ့ စာရင်းကိုမူ အဆင့်မြင့် NLD အဖွဲ့ဝင်အချို့နှင့် လွတ်လပ်သော တက္ခနိုခရက်များဖြင့် စုပေါင်းဖွဲ့စည်းထားသည်ဟု ဆိုသည်။ သို့တစေ ဒေါ်အောင်ဆန်းစုကြည်နှင့် NLD ပါတီအပေါ် သစ္စာခံမှုကိုသာ အထူးပြု ရွေးချယ်ထားသည့် သဘော ဖြစ်သည်ဟု ‘အိုင်စီဂျီ’ (International Crisis Group) အဖွဲ့ကြီးက ထောက်ပြသည်။ 
ထို့နောက် သမ္မတကပင် ပြည်နယ်နှင့် တိုင်းဒေသကြီး ၁၄ ခု၏ ဝန်ကြီးချုပ်များကို ဆက်လက်ခန့်ထားသည်။ အဆိုပါ ဝန်ကြီးချုပ် အများစုမှာမူ NLD ပါတီ နိမ့်ပါးစဉ်က နှစ်ရှည်ထောင်ဒဏ်ကျခံခဲ့ရသူတွေများရာ ပြည်ထောင်စုအစိုးရနှင့် နှိုင်းယှဉ်လိုက်လျှင် ပို၍ကျေနပ်အားရစရာ ကောင်းသည်ဟု မှတ်ချက်ပေးကြသူများ ရှိသည်။ (အထူးသဖြင့် နိုင်ငံရေး အသိုင်းအဝိုင်းမှ ဤအတိုင်း မှတ်ချက်ပြုကြသည်) NLD ပါတီကိုယ်တိုင် အတိုက်အခံဘဝက အကြီးအကျယ် ဝေဖန်ခဲ့သော အခြားဒီမိုကရက်တစ် အင်အားစုများကလည်း ဘဝင်မကျခဲ့ကြသော အခြေခံဥပဒေ ပုဒ်မ ၂၆၁ ကို အသုံးပြုပြီး ပြည်နယ်နှင့် တိုင်းဒေသကြီး ၁၄ ခုလုံး၏ ဝန်ကြီးချုပ်များကို NLD ပါတီဝင်များနှင့်သာ ခန့်ထားခဲ့ရာ NLD နှင့် လူမျိုးစု ပါတီများကြား သဘောကွဲလွဲစရာ ဖြစ်လာခဲ့ရသည်။ အထူးသဖြင့် ‘ရခိုင်အမျိုးသားပါတီ’ (ANP) နှင့် ‘ရှမ်းတိုင်းရင်းသားများ ဒီမိုကရေစီအဖွဲ့ချုပ်’ (SNLD) တို့ဖြစ်သည်။ ANP ရော SNLD ကပါ အစိုးရအဖွဲ့တွင် နေရာမယူရန် ငြင်းပယ်ခဲ့ကြသည်။ (ရခိုင်ပြည်နယ်တွင် ANP မှာ အများစုရပြီး ရှမ်းပြည်နယ်တွင် SNLD မှာ ဒုတိယအများဆုံး ဖြစ်သည်) NLD ပါတီကမူ ‘တည်ဆဲဥပဒေအတိုင်း’ ဆောင်ရွက်သည်ဟု ဆိုသော်လည်း အမှန်စင်စစ် အဆိုပါပုဒ်မ ၂၆၁ ပုဒ်မခွဲ (က) မှ (င) အထိ တွင် ‘မိမိပါတီမှ လူကိုသာ ခန့်ထားရမည်’ ဆိုသော ပြဋ္ဌာန်းချက် ပါဝင်သည်တော့ မဟုတ်ပါချေ။ 

၂၀၁၆ နိဂုံး

၂၀၁၆ ခုနှစ် ဧပြီ ၁၈ ရက် (မြန်မာနှစ်ဆန်း ၂ ရက်နေ့) တွင် ပြောကြားခဲ့သော နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ‘နှစ်သစ်ကူးမိန့်ခွန်း’ မှာ NLD အာဏာရပြီးနောက်ပိုင်း ပထမဆုံး ပြောခဲ့သော ပေါ်လစီ မိန့်ခွန်းပင် ဖြစ်သည်။ အဆိုပါ မိန့်ခွန်းတွင် ဒေါ်အောင်ဆန်းစုကြည်က ဦးစားပေးလုပ်ငန်း ၅ ရပ်ကို ယခုလို ထုတ်ဖော်ပြောဆိုခဲ့ပါသည်။ အမျိုးသားပြန်လည်သင့်မြတ်ရေး၊ ပြည်တွင်းငြိမ်းချမ်းရေး၊ တရားဥပဒေစိုးမိုးရေး၊ အခြေခံဥပေဒ ပြင်ဆင်ရေးနှင့် ဒီမိုကရေစီစနစ် ရှင်သန်အမြစ်တွယ်ရေးတို့ ဖြစ်သည်။ ဆိုခဲ့ပါ ဦးစားပေး လုပ်ငန်းများထဲတွင်မှ ‘အမျိုးသား ပြန်လည်သင့်မြတ်ရေး’ မှာ အရေးအကြီးဆုံးဟု ဆိုပါသည်။ 

ဆက်လက်ဖော်ပြပါမည်။ 
ကျော်ဝင်း

ABOUT AUTHOR

(ကျော်ဝင်း)