News

POST TYPE

PERSPECTIVE

ကုန်ဈေးနှုန်း လေးချက်
19-Nov-2016
ဈေးနှုန်းကိစ္စကို ဖြေရှင်းနိုင်မည့် အရေးလေးချက် ပြောချင်ပါသည်။

(၁) အစားအသောက် ဦးစားပေးရေး

မြန်မာနိုင်ငံကဲ့သို့ ဖွံ့ဖြိုးဆဲနိုင်ငံများတွင် အစားအသောက်အတွက် ကုန်ကျစရိတ်သည် လူတစ်ဦး ကုန်ကျစရိတ် စုစုပေါင်း၏ အများဆုံးနေရာကို  ယူထားတတ်သည်။ မြန်မာတွင် အစားအသောက်အတွက် ကုန်ကျစရိတ်သည် စုစုပေါင်း၏ ၇၀ ရာခိုင်နှုန်းခန့် ရှိသည်ဟု မှတ်သားဖူးသည်။ ယခုလည်း ထိုပတ်ဝန်းကျင်တွင် ရှိပါလိမ့်မည်။ ထို့ကြောင့် အစားအသောက် အတွက် သုံးစွဲရသော လူတစ်ဦးချင်း ကုန်ကျစရိတ်ကို လျှော့ပေးနိုင်လျှင် ကုန်ဈေးနှုန်းကိစ္စ အစိတ်အပိုင်းကြီးကြီး တစ်ခု ပြေလည်မည်။ အစားအသောက်၏ အရည်အသွေးကို တင်ပေးနိုင်လျှင် အာဟာရတန်ဖိုး မပြည့်ခြင်း၊ အဆိပ်များ ပါဝင်နေခြင်းကြောင့် နောင်တစ်ချိန် ကျန်းမာရေး ထိခိုက်ခြင်းများကို ကာကွယ်နိုင်မည်။ ကျန်းမာရေးအတွက် ကုန်ကျစရိတ်သည် တစ်ချီဆို ဆိုသလောက် မြန်မာနိုင်ငံသားတို့၏ လူမှုစီးပွားဘဝကို ရိုက်ခတ်ပေသည်။ 

အစားအသောက် ထုတ်လုပ်သော စီးပွားရေး လုပ်ငန်းများကို  အားပေးလျှင် အစားအသောက် ထုတ်လုပ်စရိတ် လျော့ကျနိုင်သလို အစားအသောက် ဈေးနှုန်းများ ကျဆင်း၊ အရည်အသွေး မြင့်မားလာလိမ့်မည်။ လယ်ယာစိုက်ပျိုးရေး၊ မွေးမြူရေးနှင့် ရေလုပ်ငန်းတို့ကို အခွန်လျှော့ပေးခြင်း၊ ချေးငွေများ သက်သက်သာသာဖြင့် ရရှိအောင် စီမံပေးခြင်း စသည်တို့ ဆောင်ရွက်လျှင် မြန်မာ့အစားအသောက်နယ်ပယ် ဖွံ့ဖြိုးလာမည်။ ဝယ်ယူစားသုံးရသော တောနေမြို့နေ ပြည်သူတို့ အတွက်လည်း ဈေးနှုန်းသင့်တင့်သော၊ အရည်အသွေး ကောင်းမွန်သော အစားအသောက်များ သုံးဆောင်ရမည်။ စားသောက်ကုန်လုပ်ငန်း ဖွံ့ဖြိုးလာလျှင် နိုင်ငံရပ်ခြားသို့ တင်ပို့ရောင်းချခြင်းဖြင့် ပို့ကုန်ဝင်ငွေရမည်၊ ကုန်သွယ်ရေးလိုငွေ လျှော့ချနိုင်မည်၊ ပြည်ပဈေးကွက်ရမည်၊ မြန်မာပြည်သည် စားနပ်ရိက္ခာ ထုတ်လုပ်သော နိုင်ငံအဖြစ် နာမည်ရမည်။

(၂) ကုန်တို့ လူတို့ ရွှေ့ရလွယ်ရေး

ကုန်တို့ လူတို့ ရွှေ့ရလွယ်ရန် ဖန်တီးပေးခြင်း တစ်နည်းလမ်းပန်း ဆက်သွယ်ရေး တိုးတက်စေခြင်းသည် ကုန်ဈေးနှုန်းအပေါ် များစွာ သက်ရောက်သည်။ လူရွှေ့ရခက်ခြင်းသည် ကုန်ထုတ်လုပ်မှုတွင် စရိတ်ထောင်းသည်။ အလုပ်ခွင်သို့ သွားရချိန်၊ အလုပ်တစ်ခုမှ တစ်ခုသို့ ကူးရချိန်တို့ကြောင့် ကုန်၊ ဝန်ဆောင်မှုတို့၏ ထုတ်လုပ်မှု စရိတ်ကို မြင့်တက်စေသည်။  လမ်းပန်းဆက်သွယ်ရေး ညံ့လျှင် လူတစ်ဦးချင်း အတွက်လည်း စရိတ်ပိုသည်။ ထုတ်လုပ်သည့် နေရာတွင် ဈေးချိုသော ကုန်တို့သည် ကုန်ရွှေ့ရခက်ခြင်းကြောင့် ဈေးကြီးသွားတတ်သည်။ ထို့ကြောင့် လူကုန်၊ အချိန်ကုန်၊ ငွေကုန်နည်းအောင် လုပ်ပေးနိုင်လျှင် ကုန်များ ဝန်ဆောင်မှုများ ဈေးချို၊ ပိုအရည်အသွေးကောင်းမည်။ တစ်နယ်နှင့် တစ်နယ် သွားရလာရ လွယ်ရမည်။ တစ်နိုင်ငံလုံး၏ စီးပွားရေးအင်ဂျင် ဖြစ်သော ရန်ကုန်မြို့တွင် ယာဉ်ကြောပိတ်ဆို့မှု လျော့သွားရမည်။

လမ်းပန်းဆက်သွယ်ရေး အခြေခံအဆောက်အဦ ဖြစ်သော မြို့တွင်းမြို့ပြင် ရထားလမ်း၊ ကားလမ်းတို့တွင် ရင်းနှီးမြှုပ်နှံခြင်းသည် အလုပ်အကိုင် များစွာကို ဖန်တီးပေးနိုင်သည်။ တုံ့နှေးနေသော စီးပွားရေးကိုလည်း လှုပ်နှိုးနိုင်သည်။ ကုန်ဈေးနှုန်းကိစ္စတွင် တစ်ချက်ခုတ်ရုံဖြင့်  သုံးလေးငါးချက် ပြတ်သွားနိုင်သည်မှာ လမ်းပန်းဆက်သွယ်ရေး အခြေခံအဆောက်အဦများ အမြန်တိုးမြှင့် တည်ဆောက်ခြင်း ဖြစ်သည်။

(၃) စာရွက်စာတမ်း ဆုံးဖြတ်ချက်များ ရွှေ့ရလွယ်ရေး သို့မဟုတ် ကြိုးနီကိစ္စ

မော်တော်ယာဉ်များ၊ လူများ အပါအဝင် စာရွက်စာတမ်းများ၊ ခွင့်ပြုမိန့်များ မြန်မြန်ရွေ့ရန်သည်လည်း ကုန်ဈေးနှုန်း ကိစ္စတွင် အရေးကြီးသည်။ စီးပွားရေးလုပ်ခွင့် အပါအဝင် စာရွက်စာတမ်းများသည် စားပွဲတစ်ခုမှ တစ်ခု၊ ရုံးတစ်ခုမှ တစ်ခုသို့ အကူးအပြောင်းတွင် ကြာမြင့်ခက်ခဲလျှင် စရိတ်စက များစွာတက်လာပြီး ကုန်ဈေးနှုန်းကို မြင့်တက်စေသည်။ စီးပွားရေး လုပ်ရခက်သဖြင့် ကုန်ပစ္စည်း အရည်အသွေးနှင့် ဈေးနှုန်းပိုင်းတွင် အနုတ်လက္ခဏာ ဆောင်သည်။ အစိုးရယန္တရား ထိပ်ဆုံး သမ္မတမှသည် အောက်ခြေဝန်ထမ်းထိ သတင်းအချက်အလက် စီးဆင်းမှု၊ ဆုံးဖြတ်ချက် စီးဆင်းမှု မှန်ကန်မြန်ဆန်စေရန် လိုသည်။ ပြည်ထောင်စုဝန်ကြီးများ၊ ပြည်နယ်နှင့် တိုင်းဝန်ကြီးချုပ်များ၏ အချိန်များ၊ အာရုံများသည် တန်ဖိုး အလွန်ရှိသည့်အတွက် တိုင်းပြည်က လိုအပ်နေသော နယ်ပယ်များသို့ ယင်းတို့၏ အချိန်များ၊ အာရုံများ စီးဆင်းအောင် Time management အရေးကြီးသည်။

(၄) ဒေါ်လာဈေးငြိမ်ရေး

နိုင်ငံခြားငွေလဲလှယ်နှုန်း အလွယ်ခေါ် ဒေါ်လာဈေးသည် အခြားဈေးနှုန်းများကို လွှမ်းမိုးကြီးစိုးသော ဈေးနှုန်းဖြစ်ရာ ယင်းသည် နိုင်ငံ့စီးပွားရေးကို ပြသော ပြဒါးတိုင်ကြီး တစ်ချောင်းဖြစ်သည်။ မြန်မာနိုင်ငံ၏  ဒေါ်လာဈေးကိုကြည့်လျှင် မြန်မာ့စီးပွားရေးကို သဘောပေါက်နိုင်သည်။  ယေဘုယျအားဖြင့် ဒေါ်လာဈေးတက်လျှင် သွင်းကုန်ဈေးမြင့်ပြီး ဒေါ်လာဈေးကျလျှင် သွင်းကုန်ဈေးနိမ့်သည်။ ဒေါ်လာဈေးတက်လျှင် ပို့ကုန် ဈေးချိုသည့်အတွက် ပို့ကုန်တိုးမြှင့်ရေး အခွင့်အလမ်း ဖြစ်နိုင်သည်။ မြန်မာနိုင်ငံအတွက် ဒေါ်လာဈေး ဘယ်လောက်ဖြစ်သင့်ကြောင်း အချက်အလက် မရှိသဖြင့် စာရေးသူ မသိပါ။ သို့သော် ဒေါ်လာဈေးသည် တည်ငြိမ်သင့်သည်ကို စာရေးသူ သိပါသည်။ ဒေါ်လာဈေး မတည်ငြိမ်လျှင် ကုန်ကူးသန်းရောင်းဝယ်ရေး၊ ထုတ်လုပ်ရေးတို့တွင် မသေချာ မရေရာမှုများ ပိုများသည်။ မသေချာ မရေရာမှုများလျှင် စရိတ်ကြီးသည်။ ဒေါ်လာဈေးမငြိမ်လျှင် ကုန်ဈေးနှုန်း မငြိမ်၊ စီးပွားရေး တစ်ခုလုံးလည်း မငြိမ်။ ဒေါ်လာဈေး မငြိမ်လျှင် ကုန်ထုတ်လုပ်မှုအတွက် အဓိကသွင်းအားစု ဖြစ်သော ငွေအရင်းအနှီးကို ပြည်ပမှ ရယူရန်လည်း စွန့်စားရသဖြင့် စရိတ်ကြီးသွားသည်။ ဒေါ်လာဈေး အကြောင်းကို သီးသန့်ဆောင်းပါးအဖြစ် လည်းကောင်း၊ အခြားဆောင်းပါးများတွင် ထည့်သွင်းဆွေးနွေးခြင်းဖြင့် လည်းကောင်း စာရေးသူ မကြာခဏ ရေးသားလျက် ရှိသဖြင့် များများစားစား မရေးလိုတော့ပါ။ မြန်မာနိုင်ငံတွင်းသို့ ဝင်ရန် ကတိပြုပြီးဖြစ်သည့် ရင်းနှီးမြှုပ်နှံမှုများ၊ ချေးငွေထောက်ပံ့မှုများ အမြန်စီးဝင်နိုင်အောင် စီစဉ်ပေးလျှင် ရေတိုအားဖြင့် ဒေါ်လာဈေး တည်ငြိမ်စေမည် ဖြစ်သည်။ 
အထက်တွင် ဖော်ပြခဲ့ပြီး ဖြစ်သော စာရွက်စာတမ်း ဆုံးဖြတ်ချက်များ ရွှေ့ရလွယ်ရန်နှင့် နိုင်ငံခြားငွေများ စီးဝင်ရေးသည် ဆက်စပ်နေပါသည်။

ပြန်ချုပ်ပါမည်။ အစားအသောက် ဦးစားပေးရေး၊ ကုန်တို့လူတို့ ရွှေ့ရလွယ်ရေး၊ စာရွက်စာတမ်း ဆုံးဖြတ်ချက်များ ရွှေ့ရလွယ်ရေးနှင့်  ဒေါ်လာဈေး ငြိမ်ရေးတို့ ဖြစ်သည်။ 

ဇေယျသူ


ABOUT AUTHOR

(ဇေယျသူ)