News

POST TYPE

PERSPECTIVE

နီးလျက်နှင့် ဝေးနေသော ခြေဥပြင်ဆင်ရေးခရီး
24-Jul-2019


ဖွဲ့စည်းပုံအခြေခံဥပဒေ (၂၀၀၈ ခုနှစ်) ပြင်ဆင်ရေးပူးပေါင်း ကော်မတီ၏ အစီရင်ခံစာကို ဇူလိုင်လ ၁၅ ရက်နေ့က လွှတ်တော်သို့တင်သွင်းခဲ့ကြပြီး ထိုအစီရင်ခံစာအပေါ် ဆွေးနွေးကြမည့် လွှတ်တော်ကိုယ်စားလှယ်များအမည်စာရင်းကိုမူ ဇူလိုင်လ ၂၂ ရက်နေ့က အပြီးသတ်ပေးခဲ့ကြရာ စုစုပေါင်း (၁၂၅) ဦးရှိကြောင်း သိရသည်။ ဆွေးနွေးမည့်ရက်ကိုမူ ထုတ်ပြန်ကြေညာခြင်းမပြုသေးပေ။

ထိုအစီရင်ခံစာပါ အချက်များနှင့်ပတ်သက်၍ တပ်မတော်သားလွှတ်တော်ကိုယ်စားလှယ် ဗိုလ်မှူးချုပ်မောင်မောင်က “တပ်မတော် အနေနဲ့က ယခင်ကတည်းက ဖွဲ့စည်းပုံအခြေခံဥပဒေနှင့်မညီ၍ ကန့်ကွက်ခဲ့ကြောင်း၊ သို့သော်လည်း ယခုကဲ့သို့ ဖွင့်ပေးလိုက်တဲ့အခါမှာတော့ သိတဲ့အတိုင်းပဲ ၃၇၆၅ ချက်ပေါ့၊ နည်းတဲ့အချက်တွေ မဟုတ်ဘူး၊ ဒါတွေကြည့်လိုက်မယ်ဆိုရင် ကျွန်တော်တို့နိုင်ငံရဲ့ ဖွဲ့စည်းပုံအခြေခံဥပဒေမှာ ဘယ်လောက်အန္တရာယ်ရှိလာလဲ မြင်ရမှာပါ”ဟု အဆိုပါ အစီရင်ခံစာတင်သွင်းသည့်နေ့တွင် မီဒီယာအားပြောကြားခဲ့သည်။ ၎င်းအနေနှင့် ဘယ်လိုအန္တရာယ်ရှိလာနိုင်တာလဲဟူသည့်အပေါ်တွင်မူ ပြန်လည်ဖြေကြားခြင်းမရှိကြောင်းလည်း တွေ့ရသည်။

အစီရင်ခံစာပါအချက်များအပေါ် အာဏာရပါတီ NLD ဘက်က အမျိုးသားလွှတ်တော်ကိုယ်စားလှယ် ဦးအောင်ကြည်ညွှန့် ခြေဥပြင်ဆင်ရေး ပူးပေါင်းကော်မတီအဖွဲ့ဝင်ကဖြင့်မူ “အခုအချက်တွေက ဖြစ်ချင်တာတွေကို စုထားတဲ့အချက်တွေပဲ ရှိသေးတာမို့ စိုးရိမ်ဖွယ်ရာမရှိပါဘူး၊ ဖြစ်သင့်တာတွေကို နိုင်ငံအတွက် ကြိုးစားရပါမယ်၊ ဒီလောက်တောင်များနေလို့ ဆက်လုပ်စရာမရှိဘူးဆိုရင် နိုင်ငံအတွက် ဆက်လုပ်ဖို့ရပ်တန့်သွားမှာ၊ အဲဒီကမှ တစ်ဆင့်တက်ပြီး လွှတ်တော်ထဲကို ဥပဒေကြမ်းတင် သွင်းလိုက်နိုင်ပြီဆိုရင်တော့ ဖြစ်နိုင်တာကဘယ်အရာတွေလဲဆိုတာ ပေါ်လာမှာပါ။ အဲဒါက နိုင်ငံတော်နဲ့ပြည်သူတွေ လိုလားတောင့်တနေတဲ့ ဖွဲ့စည်းပုံအခြေခံဥပဒေကို ပြင်ဆင်တဲ့ပုံစံဖြစ်လာမှာပါ။ အခုအနေနဲ့ကတော့ တစ်လှမ်းချင်း၊ တစ်လှမ်းချင်း ရွှေ့တဲ့အခါမှာပေါ်လာတဲ့ အခက်အခဲတွေကို ပူးပေါင်းပြီး ဖြစ်သင့်တာတွေဖြစ်အောင် ဆက်ကြိုးစားသွားရမယ်”ဟု ဆိုထားခဲ့သည်။

ထိုအစီရင်ခံစာအပေါ် ဆွေးနွေးကြမည့် လွှတ်တော်ကိုယ်စားလှယ်များအနေနှင့် အစီရင်ခံစာ အပေါ်ဆွေးနွေးကြသည့်အခါတွင် ပူးပေါင်းကော်မတီ၏ သဘောထားမှတ်ချက်ကို သတိမူပြီးဆွေနွေးကြဖို့ နာယက က တိုက်တွန်းထားခဲ့သည်ကိုလည်း သတိထားမိသည်။ သို့အတွက် လာမည့်ရက်များတွင် လွှတ်တော်အစည်းအဝေးများ ဆက်လက်ကျင်းပသည့်အခါ မည်သို့မည်ပုံ ဆွေးနွေးကြမည်ဆိုသည်မှာလည်း စိတ်ဝင်စားဖွယ်ရှိလာသည်။

အမှန်ဆိုလျှင် လွှတ်တော်အတွင်း အစီရင်ခံစာတင်သွင်းခြင်းဆိုသည့် ယခုအဆင့်သည် လွှတ်တော်အတွင်းရှိ နိုင်ငံရေးပါတီ ၁၄ ခုနှင့် တပ်မတော်သား ကိုယ်စားလှယ်သားများအစုအဖွဲ့တို့ အားလုံးပါဝင်သည့် ပူးပေါင်းအဖွဲ့ဖြင့် ဆောင်ရွက်ကြသည့် ခြေဥကို ပြင်ဆင်လိုကြသည့်အချက်များကို ကနဦး စုစည်းပြီးတွေ့ရှိချက်ကို လွှတ်တော်သို့တင်ပြခြင်းသာဖြစ်သည်ကို တွေ့ရသည်။ မည်သူက မည်သို့ပြင်မည်၊ မည်သို့သော သဘောထားရှိကြသည်ကိုသာ အသီးသီးက အချက်အလက်နှင့် အခန်းလိုက်တင်ပြကြခြင်းအဆင့်သာ မြင်ရသေးသည်။ ပူးပေါင်းကော်မတီဟု ဆိုသော်ငြားလည်း ထိုကော်မတီအတွင်း ယခုတင်ပြလာသည့် အချက်များအပေါ် အကြိတ်အနယ်ဆွေးနွေးငြင်းခုံပြီး ဆုံးဖြတ်အတည်ပြုကြရသည့်အဆင့်ထိ ဖြစ်မလာသေးဟုထင်သည်။ 

အကြောင်းမှာ လွှတ်တော်အတွင်းဖွဲ့စည်းကြသည့် ကော်မတီများအတွင်း ဆောင်ရွက်ကြသည့်လုပ်ငန်းအဆင့်ဆင့်မှာလည်း ယခု ကျင်းပနေကြသည့် လွှတ်တော်အစည်းအဝေးများနည်းတူဖြစ်သည်။ ကော်မတီဝင်တစ်ဦးဦးက အဆိုတင်သွင်းလျှင် ဝိုင်းဝန်းဆွေးနွေး၊ ထောက်ခံ၊ ကန့်ကွက်ကြပြီးလျှင် ပြီးသည့်အခါ မဲခွဲဆုံးဖြတ်အတည်ပြုရသည်။ နောက်ဆုံးအဖြေကို ကော်မတီ၏ သဘောထားမှတ်ချက်ဟုဆိုတာ လွှတ်တော်ကြီးအတွင်းသို့ တင်သွင်းကြရသည်။ သို့သော်ယခုအစီရင်ခံ စာပါတွေ့ရှိချက်အရမူ ၎င်းတို့ ကော်မတီအနေနှင့် ကနဦးတွေ့ရှိချက် သဘောသာ တင်ပြလာသေးသည်ကိုတွေ့ရသည်။

ပြင်ဆင်ရေးအတွက် ပထမခြေလှမ်းဟုသာပြော၍ ရသေးသည်။ အစီရင်ခံစာပါ အချက်များအားလုံးကို ပြင်ကြမည်ဟု မဆိုလိုသေး။ အမှန်ဆိုလျှင်ယခုကဲ့သို့ ကော်မတီဖွဲ့စည်းခြင်း၊ ပြင်ဆင်လိုသည့်အချက်များကို စုစည်းတင်ပြခြင်းသည် ဖွဲ့စည်းပုံအခြေခံဥပဒေအခန်း (၁၂) ပါ ပြင်ဆင်ခြင်းအပိုင်းကို မရောက်လာသေးပေ။ ဤကော်မတီအပေါ် မူလဖွဲ့စည်းမိန့်အရ ပေးအပ်ထားသည့်တာဝန်အရ ဆက်လက်ဆောင်ရွက်ကြမည့် ဥပဒေမူကြမ်းတစ်ရပ် ရေးဆွဲတင်သွင်းရန်ကိစ္စပြီးမြောက်မှသာ ထိုခြေဥပါပြဋ္ဌာန်းချက်အတိုင်း ဆောင်ရွက်၍ ရနိုင်မည်ဖြစ်သည်။ ယခု အစီရင်ခံစာပါ ပြင်ဆင်လိုသည့်အချက်များအပေါ် လွှတ်တော်အတွင်း ဆွေးနွေးပြီးကြသည့်အခါ လွှတ်တော်က ထိုအစီရင်ခံစာပါကော်မတီ၏ သဘောထားမှတ်ချက်ဖြစ်သည့် ဥပဒေမူကြမ်းတစ်ရပ် ဆက်လက်ရေးဆွဲနိုင်ရေးဟူသော ကိစ္စကို အတည်ပြုဆုံးဖြတ်ကြရမည်။

ထိုအဆင့်ပြီးလျှင် ထိုကော်မတီအနေနှင့် အစည်းအဝေးများ ဆက်လက်ကျင်းပကာ ယခု တင်ပြထားသည့်အစီရင်ခံစာပါ ပါတီအသီးသီး၏ တင်ပြချက်များအပေါ် အခန်းအလိုက်တစ်ခန်းချင်း ပြန်လည်စိစစ်ပြီး မည်သည့်အချက်ကဖြင့် သင့်၏၊ တပ်မတော်ဘက်ကလည်း ထောက်ခံ၏၊ မည်သည့်အချက်ကတော့ဖြင့် မသင့်၊ စသည်ဖြင့် အခန်း ၁၅ ခန်းလုံးကို တစ်ဆင့်ချင်းပြင်ဆင်ရေးအတွက် ကော်မတီဝင်များနှင့် အစီရင်ခံစာတွင် ဖော်ပြထားသည့် ပြင်ပမှဥပဒေပညာရှင်များ၊ တိုင်းဒေသကြီးပြည်နယ်အစိုးရ၊ လွှတ်တော်များမှ ကိုယ်စားလှယ်များ၊ ဌာနဆိုင်ရာများ အားလုံးကိုပါ ဖိတ်ခေါ်ဆွေးနွေးအကြံဉာဏ်များရယူကြပြီး နောက်ဆုံးတွင် ကော်မတီဝင်များက ပြန်လည်ဆုံးဖြတ်အတည်ပြုကြတာ ဥပဒေမူကြမ်းတစ်ရပ် ဖြစ်မြောက်အောင် ဝိုင်းဝန်းပုံဖော်ရေးဆွဲကြရမည့် လုပ်ငန်းစဉ်ဖြစ်သည်။ ထိုအဆင့်သည်သာ အခက်ခဲဆုံးအပိုင်းဖြစ်လာနိုင်ပြီး အချိန်အားဖြင့် အတော်ယူရဦးမည်ဟုလည်း သုံးသပ်ကြည့်၍ရသည်။ ယခင်ကာလ ပြင်ဆင်ရန်အကြံပြုချက်များ အသီးသီးတင်ကြသည့် ကာလသည်ပင်လျှင် ၅ လခန့်အချိန်ယူခဲ့ရပြီး ယခုဥပဒေမူကြမ်းတစ်ရပ်ကို အားလုံးသဘောတူ ကြည်ဖြူစွာပါဝင် ရေးဆွဲနိုင်ကြရေးအတွက်ဆိုလျှင် အချိန်ကြာနိုင်ဦး မည့်အပြင်လွှတ်တော်အတွင်းရှိ ယခုတင်ပြထားဆဲ လုပ်ငန်းအစီအစဉ်များကို လေ့လာကြည့်သည့်အခါ ယခုကာလသည် ဘတ်ဂျက်စီမံကိန်း၊ အခွန်ဆိုင်ရာဥပဒေများ တင်သွင်းဆွေးနွေးနေကြသည့်ကာလနှင့်လည်း တိုက်ဆိုင်လျက်ရှိနေခြင်း၊ ၎င်းတို့ ဖိတ်ကြားဆွေးနွေးအကြံဉာဏ်ရယူကြရမည့် ဌာနဆိုင်ရာအဖွဲ့အစည်းပုဂ္ဂိုလ်များ များပြားနိုင်ခြင်းများအရ သုံးသပ်ကြည့်ရခြင်းလည်းဖြစ်သည်။

၎င်းကော်မတီအပေါ် ပြည်ထောင်စုလွှတ်တော်က ဖွဲ့စည်းတာဝန်ပေးအပ်ထားသည့်အမိန့်အရ လေ့လာကြည့်လျှင် ထို ပူးပေါင်းကော်မတီအနေနှင့် ဥပဒေမူကြမ်းတစ်ရပ်ရေးဆွဲပြီး လွှတ်တော်ကို တင်သွင်းပြီးလျှင် သက်တမ်းကုန်ဆုံးပြီး တာဝန်ပြီးမြောက်ပြီဖြစ်သည်ကို တွေ့ရသည်။ ထိုကော်မတီမှ တင်သွင်းကြမည့် အဆိုပါဥပဒေမူကြမ်းကို လွှတ်တော်ကို စတင်တင်သွင်းလာကြသည့်အခါတွင်မူ ပြဋ္ဌာန်းချက်များအရ လွှတ်တော်အတွင်းရှိ ကိုယ်စားလှယ် ၂၀ ရာခိုင်နှုန်းက လက်မှတ်ရေးထိုးတင်ပြကြရမည်ဖြစ်ရာ ထို ၂၀ ရာခိုင်နှုန်းဆိုသည်မှာလည်း ယခုလွှတ်တော်အတွင်းရှိ ကိုယ်စားလှယ် ၆၆၀ ဦးခန့်ထဲမှ ကိုယ်စားလှယ်ပေါင်း ၁၃၀ ကျော်က လက်မှတ်ရေးထိုးတင်ကြရမည်ဖြစ်ရာ ယခုပူးပေါင်းကော်မတီထဲတွင် ပါဝင်ကြပြီး အစီရင်ခံစာတွင် ပြင်ဆင်ရန် အသီးသီးအကြံပြုကြသည့် NLD မှ ၁၈ ဦး၊ တပ်မတော်သားကိုယ်စားလှယ် ၈ ဦး၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ၂ ဦး၊ ရခိုင်အမျိုးသားပါတီ ၂ ဦး၊ ရှမ်းတိုင်း ရင်းသားများဒီမိုကရေစီအဖွဲ့ချုပ်မှ ၂ ဦးနှင့် ကျန်တိုင်းရင်းသားပါတီများမှ ကိုယ်စားလှယ်တစ်ဦးစီ ပါဝင်ကြရာ ထိုကော်မတီဝင်များမှပင် စုပေါင်းလက်မှတ်ထိုးပြီး ကျန်ရှိသည့် လက်မှတ် ၁၀၀ ခန့်ကိုလည်း ပါတီအသီးသီးက အချိုးကျတွက်ပြီး လက်မှတ်ရေးထိုးတင်ကြရန် မျှော်မှန်းထားကြပုံပေါ်သည်။

ထိုပြင်ဆင်ရေးပူးပေါင်းကော်မတီက ဖွဲ့စည်းပုံအခြေခံဥပဒေအခန်း ၁၂ ပါနည်းလမ်းအတိုင်း ထိုအခါတွင်မှ စတင်တင်သွင်းလာသည့် ဥပဒေမူကြမ်းကို ပြည်ထောင်စုလွှတ်တော်ကလည်း ပြဋ္ဌာန်းချက်များပါအတိုင်း လွှတ်တော်ကို အသိပေးခြင်း၊ လွှတ်တော်ကိုယ်စားလှယ်များအားလုံးကို ဖြန့်ဝေခြင်း၊ ဆွေနွေးမည့် လွှတ်တော်ကိုယ်စားလှယ်အစုအဖွဲ့စာရင်း များတောင်းခံခြင်း၊ ဆွေးနွေးဆုံးဖြတ်အတည်ပြုခြင်းအဆင့်တို့ကို ဖွဲ့စည်းပုံအခြေခံဥပဒေနှင့် ပြည်ထောင်စုလွှတ်တော်ဆိုင်ရာဥပဒေ၊ နည်းဥပဒေပါ ပြဋ္ဌာန်းချက်များအတိုင်း ဆက်လက်ဆောင်ရွက်ကြရမည်သာဖြစ်သည်။ ဤသည်မှာ ဤပြင်ဆင်ရေးပူးပေါင်းကော်မတီ ဆက်လက်လျှောက်လှမ်းကြရမည့် လုပ်ငန်းကို အကျဉ်းမျှဆွေးနွေးခြင်းသာဖြစ်သည်။

ယခုရက်ပိုင်းတွင် အမျိုးသားဒီမိုကရေစီအဖွဲ့ချုပ်၏ ပြောခွင့်ရ ပုဂ္ဂိုလ် ဒေါက်တာမျိုးညွှန့်က ၎င်းတို့ပါတီ၏ ပြင်ဆင်ရန်အကြံပြုချက် ၁၁၄ ချက်ကို လေ့လာကြည့်လျှင် လတ်တလောဖြစ်ပေါ်နေသည့် ပစ္စက္ခနိုင်ငံရေးအခြေအနေများ၊ ငြိမ်းချမ်းရေးလုပ်ငန်းစဉ်များအပေါ်အခြေခံပြီးမှ တပ်မတော်က ခွင့်ပြုလိုက်လျောနိုင်သည့် ပြင်ဆင်ရန် အကြံပြုချက်များကို သာတင်သွင်းထားခြင်းဖြစ်သည်ဟုဆိုထားရာ ၎င်းတို့ပါတီမှ တင်ထားသည့်အချက်များကို လေ့လာကြည့်လျှင်လည်း ထိုအတိုင်းပင်တွေ့ရသည်။ 

ဥပမာအားဖြင့် လွှတ်တော်အတွင်းရှိ တပ်မတော်သားလွှတ်တော် ကိုယ်စားလှယ်များ၏ အရေအတွက်ကိစ္စကိုပင် နှစ်အပိုင်းအခြား အလိုက်သာ တဖြည်းဖြည်းလျှော့ချရန် အကြံပြုထားသည်ကို မြင်ရနိုင်သည်။ အခြားသောအကြံပြုချက်များကို လေ့လာကြည့်လျှင်လည်း ထိုနည်းအတိုင်းပင် တပ်မတော်ဘက်မှ လိုက်လျောနိုင်သည့်အချက်၊ နိုင်ငံအတွင်း လတ်တလောပေါ်ပေါက်ဖြစ်ပေါ်နေသည့် အခြေအနေများကို ရုတ်ခြည်းပြောင်းလဲပစ်ရန်မလိုဘဲ တဖြည်းဖြည်းညင်သာစွာ ပြောင်းလဲ ရေးကိုသာ ဇောင်းပေးထားသည်ကိုလည်း အကြံပြုချက်များတွင်တွေ့ ရသည်။ 

ထို့အတွက် နိဂုံးချုပ်အားဖြင့် ဤသည်ကိုကြည့်ခြင်းအားဖြင့် အာဏာရပါတီအနေနှင့် ဖွဲ့စည်းပုံအခြေခံပြင်ဆင်ရေးကိစ္စကို တပ်မတော်နှင့်ပူးပေါင်းပြီး ၎င်းတို့အလိုကျသာ လိုက်လျောကာ ပြင်ဆင်လိုသည့် သဘောထားကိုလည်းတွေ့ရသည်။ သို့အတွက် ယခု အစီရင်ခံစာအပေါ် ဆွေးနွေးကြမည့် ကိုယ်စားလှယ်များအနေနှင့် မည်သို့ပင် ဆွေးနွေးကြစေကာမူ အမှန်တကယ် အရေးကြီးသည်မှာ ဆက်လက်ဆောင်ရွက်ကြမည့် ပြင်ဆင်ရေးပူးပေါင်းကော်မတီ၏ ဥပဒေမူကြမ်းတစ်ခု ဆက်လက်ရေးဆွဲရေးကိစ္စဖြစ်ရာ ပြင်ဆင်ရေးပူးပေါင်းကော်မတီ၌် ပါဝင်သည့် ရာခိုင်နှုန်းအရဆိုလျှင်လည်း အဖွဲ့ဝင် ၄၅ ဦးထဲတွင် NLD နှင့်တပ်မတော် သားလွှတ်တော်ကိုယ်စားလှယ်တို့ပေါင်းလျှင် ဆန္ဒမဲအရ အနိုင်ရနိုင်သည့် အားလျော်စွာ ပူးပေါင်းပြီး သင့်တော်သည့်ပြင်ဆင်ချက်များပါဝင်သည့် ဥပဒေမူကြမ်းတစ်ရပ်ကိုရေးဆွဲနိုင်ရေးသည်သာ အခရာကျသည်ဟု မြင်သည်။ 

ထိုမှတစ်ဆင့်တက်ပြီး အဆိုပါ ဥပဒေမူကြမ်းကို NLD၊ တပ်မတော်နဲ့ အခြားပါတီများစုပေါင်း၍ ၂၀ ရာခိုင်နှုန်း လက်မှတ်ဝိုင်းထိုးပြီး လွှတ်တော်သို့ တင်သွင်းလိုက်လျှင်ပင် အားလုံးက သဘောတူပြီး သားရွှေအိုးထမ်း ကိန်းဆိုက်သည့် ဖွဲ့စည်းပုံအခြေခံဥပဒေကို ပြင်ဆင်သည့်ဥပဒေတစ်ရပ် ပေါ်ထွက်လာနိုင်သည်။ တပ်မတော်အနေဘက်က ကြည့်လျှင်လည်း ထိုသို့ ဆောင်ရွက်နိုင်ရေးမှာ မခက်ဟုထင်သည်။ အကြောင်းမှာ ၎င်းတို့ထဲမှာ တပ်မတော်သားလွှတ်တော်ကိုယ်စားလှယ်သားပေါင်း ၁၀၀ ကျော် ပါဝင်ကာ လက်မှတ်ရေးထိုးတင်ပြထားပြီးဖြစ်သည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ဦးဆောင်ကာ ယခင်လွှတ်တော်ကို တင်သွင်းထားသည့် ဥပဒေမူကြမ်းပါ အချက် ၁၀ ချက်ကလည်း အသင့်ရှိနေ၍ဖြစ်သည်။ ထိုအချက် ၁၀ ချက်အပြင် နောက်ထပ် NLD ပါတီနှင့် တိုင်းရင်းသားပါတီများမှ ပြင်ဆင်ရန်အကြံပြုချက်များ ၃၇၆၆ ချက်ထဲမှ သင့်လျော်သည့် အချက် ၂၀ လောက်ကိုယူပြီး ပထမအဆင့် အချက် ၃၀ လောက်ကို ၄၃၆ (က) နှင့် ၄၃၆(ခ) ဟူ၍ ခွဲပြီး ဝိုင်းဝန်းညီညာစွာ လွှတ်တော်ကို တစ်စိတ်တစ်ဝမ်းတည်း တင်ပေးလိုက်လျှင်ပင် နတ်လှူသာဓုခေါ်ကာ တပ်မတော်ကိုလည်း ပြည်သူအများက ပို၍ပို၍ကြည်ညိုလာနိုင်မည်ဟု ထင်သည်။ ယခုမှာ နီးလျက်နှင့် ဝေးနေသယောင်ဖြစ်နေသည့်အတွက် စာရေးသူအနေနှင့် အကောင်းဘက်ကို ရှုမြင်သည့် အကြံပေးခြင်း သက်သက်သာ ရေးသားတင်ပြခြင်းဖြစ်ပါကြောင်း သုံးသပ်ရေးသား တင်ပြလိုက်ရပါသည်။

သန်းဖြိုးနိုင်