News

POST TYPE

PERSPECTIVE

မိတ်ဆွေတွေလား ရန်သူတွေလား ခွဲခြားသိရန်လို
11-Jul-2019
အမြင် မတူရုံမျှဖြင့် ရန်သူပမာသတ်မှတ်၍ သုံးနှုန်းတတ်ကြပါသော ခေတ်သစ်လူရွေးချယ်ပွဲများတွင် ကျွန်တော်တို့သည် မိမိကိုယ်ကိုယ် ပြန်လည်သုံးသပ်ကြဖို့ အထူးလိုအပ်လို့လာပေသည်။ ကျွန်တော်တို့၏ ရပ်တည်ချက်များကို ကျွန်တော်တို့ကိုယ်တိုင် ရှင်းရှင်းလင်းလင်းသိနိုင်ဖို့ လိုအပ်လာသောအချိန်အခါလည်း ဖြစ်သည်။ ကျွန်တော်တို့၏ စိတ်ရင်းခံနှင့် တွေ့ကြုံမှုများကို ပြန်လည်သုံးသပ်ကြပြီး ရှေ့ဆက်ကြဖို့ရန် လိုအပ်လို့လာပေသည်။ အထူးအားဖြင့် ကျွန်တော်တို့တစ်တွေ နေရာမမှားကြဖို့ လိုအပ်လှပါသည်။ နေရာမှားမပေးမိကြရန်လည်း အထူးလိုအပ်လို့လာပေသည်။

ကျွန်တော်တို့တစ်တွေ၏ ဘဝများသည်ကား အခါခါသေခဲ့ဖူးပြီးသားဖြစ်ပေသည်။ အကြိမ်ကြိမ် အသတ်ခံခဲ့ရပြီးသား ဖြစ်ပေသည်။ ကျွန်တော်တို့တစ်တွေ လျှောက်လှမ်းခဲ့ရသောလမ်းကြောင်းများကို ပြန်ကြည့်တတ်ဖို့ရန်နှင့် ပြန်ကြည့်ကြဖို့ရန်ကား အထူးလိုအပ်သောအချိန်အခါဟု ဆိုချင်မိပေသည်။

လျှောက်သောလမ်းမှာ တကွေ့ကွေ့တော့ တွေ့ရဆုံရဦ်းမှာပါဟု ကြိမ်းဝါးထားခဲ့မိသော ရင်ထဲကနာကြည်းချက်များကို အပြင်သို့မထွက်နိုင်အောင် ထိန်းချုပ်ကြရပေမည်။ လူလိမ္မာအမျက် အပြင်မထွက်ဟူသော ဆိုရိုးစကားလည်း ရှိပါပေသည်။ ပေဖြစ်တုန်း ခံနိုင်ရည်ရှိအောင် ကြိုးစားထား၍ တူဖြစ်ချိန်ကြလည်း မေတ္တာထားတတ်နိုင်လျှင် ကောင်းလှပေသည်။ လူမိုက်ကို ယှဉ်မိုက်ပြနေဖို့ထက် လူမိုက်ကို ဥပေက္ခာပြုနိုင်ဖို့ရန်က အရေးကြီးပေသည်။

ကျွန်တော်တို့တစ်တွေသည် လွတ်လပ်စွာ ယုံကြည်လို့ရပေသည်။လွတ်လပ်စွာ အားကိုးခွင့်ရှိကြပေသည်။ သို့သော် ငါနှင့်မတူ ငါ့ရန်သူဟူသော အမြင်မျိုးကိုကား ကျော်လွှားကြည့်စေချင်မိပေသည်။ လွတ်လပ်သောယုံကြည်မှုများနှင့် လွတ်လပ်စွာ အားကိုးခွင့်များကို တလွဲမသုံးမိရန်ကား အထူးဆင်ခြင်သင့်လှပေသည်။

မျက်စိရှိလို့ မြင်ရသောအရာများဖြစ်လင့်ကစား မြင်မိကြသူများကို အကောင်းဘက်ကမြင်နိုင်အောင် ကြိုးစားရပေမည်။ နားရှိကြလို့ ကြားရသောအသံများဖြစ်လင့်ကစား ကြားမိကြသူများကို အကောင်းဘက်က နားဆင်နိုင်အောင် ကြိုးစားသင့်ပေသည်။ ကျွန်တော်တို့ လျှောက်နေရသောလမ်းဟူသည် အသက်ရှည်သမျှကာလပတ်လုံး ရှည်လျားလွန်းလှပေသည်။ ထို့ထက်ပိုပြောရလျှင် သေဆုံးပြီးသည့်နောက်အထိ ကိုယ့်မျိုးဆက်အတွက်ပါ ထည့်စဉ်းစားကြည့်လျှင်ဖြင့် အင်မတန်ကို ရှည်လျားသောလမ်းပင်ဖြစ်သည်။

ထိုသို့ ရှည်လျားလွန်းလှပါသော ဘဝလမ်းကြောင်းများပေါ်တွင် ပွတ်တိုက်မိနိုင်သော ဆူးငြောင့်ခလုတ်များရှိနိုင်သည်မှာ မှန်ပေသည်။သို့သော် ကျွဲနှစ်ကောင်ကြားက မြေစာပင်ပမာ ကျွဲချင်းခတ်ကြလို့လည်း မကြေမွချင်ပါ။ ကျွဲနှစ်ကောင်၏ မျှစားဝေစားအောက်တွင်လည်း မဖြစ်ချင်လှပါ။ ခတ်ကွင်းထဲကဘဝများကိုကား ကျွန်တော်တို့တစ်တွေ မုန်းလှပေသည်။ ခတ်ကွင်းထဲတွင် ခံစားနာကြည်းခဲ့ရပါသော ဒဏ်ရာများမှာ လည်း ယခုအချိန်ထိပင် မပျောက်နိုင်ကြသေးပေ။

အတိုက်နှင့်အခံကြားတွင် ဖြစ်ပေါ်လာတတ်ကြပါသော လွန်ဆွဲသံများကိုလည်း အကောင်းဘက်ကသာ ကြားချင်မြင်ချင်လှပါသည်။ ကျွန်တော်တို့တစ်တွေသည် တစ်ဦး၏အမြင်ကို တစ်ဦးက လေးစားစွာ ဆက်ဆံတတ်ဖို့လိုပေသည်။ တစ်ဦး၏အမြင်ကို တစ်ဦးက နားဆင်ပေးခြင်းအားဖြင့်လည်း ပြေလည်မှုကို ရှာဖွေရပေမည်။ ဘက်မတူရုံမျှဖြင့် ရန်သူတွေပါဟု သမုတ်ကြရန်ကား လွဲမှားလွန်းလှပေသည်။

တစ်ပါးသူ၏ဆိုးကွက်များကို ရှာဖွေကြည့်ကြသလိုပဲ တစ်ပါးသူ၏ကောင်းကွက်များကိုလည်း ရှာဖွေကြရပေမည်။ ကျွန်တော်တို့တစ်တွေသည် စိတ်ကိုစိတ်နှင့် မျှားကြည့်ရပေမည်။ အမြင်ကို ပေါင်းသင်း၍  မျှားကြည့်နိုင်ရမည်ဖြစ်သည်။ အဆိုးကွက်များကိုသာ မြင်ယောင်၍ အဆိုးဘက်ကိုသာ တွေးနေကြမည်ဆိုလျှင် ကျွန်တော်တို့ ညံ့လွန်းရာ ကျသွားနိုင်ပါသည်။ တစ်ပါးသူ၏ကောင်းကွက်များကို ကြည့်ရှုရှာဖွေ၍ မိမိတို့အတွက်အား အဖြစ်အသုံးချနိုင်ရန်ကား အထူးကောင်းမွန်သောအရာဖြစ်ပေသည်။

သူ့ဘက်ကိုယ့်ဘက်ဟူ၍လည်းကောင်း၊ သူ့လူကိုယ့်လူဟူ၍လည်းကောင်း ခေတ်သစ်လူရွေးချယ်ပွဲများတွင် ကြောင်လက်သည်းမျိုးပမာ သိုဝှက်ထားတတ်ကြပါသော လူသားအချို့ကို ကျွန်တော်တို့ တွေ့မြင်နိုင်ကြပေသည်။ မိတ်ဆွေတွေလား၊ ရန်သူတွေလားဟု ခွဲခြားဖို့ရန်ခက်ခဲလွန်းသည့် ဟန်ဆောင်ကောင်းသောလူသားအချို့ကို ကျွန်တော်တို့တစ်တွေ တွေ့ကြုံနိုင်ကြပေသည်။

ကျွန်တော်တို့တစ်တွေသည် ဝမ်းနည်းမှုများနှင့် မည်မျှပင်ကြုံတွေ့ပါစေ ကျွန်တော်တို့ကိုယ်တိုင်သာလျှင် ခံစားကြရမည်ဖြစ်သည်။ ကျွန်တော်တို့ကိုယ်တိုင်သာလျှင် ဝမ်းနည်းပူဆွေးရမည်သာဖြစ်သည်။ ထပ်တူဝမ်းနည်း ရပါသည်ဆိုသော မိတ်ဆွေများလည်း ရှိနိုင်ပါသည်။ သို့သော် ကာယကံရှင်နီးပါးမျှ ခံစားဝမ်းနည်းနိုင်မှု မရှိနိုင်ကြပါချေ။ ကျွန်တော်တို့တစ်တွေသည် ဟန်ဆောင်အရောဝင် ပူးကပ်မှုများကိုတော့ ကြည့်တတ်မြင်တတ်ကြရပေမည်။

ကုတ်ခြစ်ကြမည့်လက်သည်းများကို သိုဝှက်ပြီး အပြုံးတုများကို ရှေ့တန်းတင်၍ နှုတ်ချိုချိုဆိုတတ်ကြပါသော အတ္တဘီလူးများအား သိရပေမည်။ မြင်နိုင်ရပေမည်။ သို့မှသာလျှင် မိတ်ဆွေတွေလား၊ ရန်သူတွေလား အနည်းငယ် ကွဲပြားခြားနားစွာ ထိတွေ့လို့ရပေမည်။ ဟန်ဆောင်မှုသည် ကြာရှည်မခံနိုင်သော်လည်း ဟန်ဆောင်မှုများကို မတွေ့နိုင်သေးသမျှ ကာလပတ်လုံး အလိမ်ခံနေရမည်မှာ အသေအချာပင်ဖြစ်သည်။

ယနေ့မျက်မှောက်ခေတ်တွင် မိတ်ဆွေများထက် ရန်သူများက ပို၍ပေါများသည်မှာ ပြောစရာမလိုပါပေ။ ကြားသိမြင်နေရပါသော သတင်းစကားများက သက်သေပင်ဖြစ်ပေသည်။ ရင်ဘတ်ချင်းနီးသော မိတ်ဆွေစစ်စစ်ဆိုသည်ကား အင်မတန်ရှားပါးလွန်းလှပေသည်။ ဒုက္ခများကို မျှဝေခံစားပေးမည့် မိတ်ဆွေများသည်ကား တွေ့ခွင့်ဆုံခွင့်ရရှိနိုင်ရန် ခက်ခဲလွန်းပေသည်။

ကျွန်တော်တို့တစ်တွေသည် မိတ်ဆွေတွေလား၊ ရန်သူတွေလား ခွဲခြားနိုင်စေဖို့ရန်အတွက် အသံကိုအသံဖြင့် မျှား၍လည်း ရှာဖွေရပေမည်။ အမြင်ကို ပေါင်းသင်းဆက်ဆံခြင်းမျိုးများဖြင့် မျှားကြည့်ရပေမည်။ ကြောင်လက်သည်းလို ကွယ်ဝှက်ထားတတ်ကြပါသော လူသားအချို့ကိုလည်း ရှာဖွေရပေမည်။ ထို့အပြင် မိတ်ဆွေအယောင်ဆောင် ရန်သူမျိုးများကို နေရာမပေးမိကြဖို့ အထူးလိုအပ်လှပါသည်။ ကျွန်တော်တို့ကိုယ်တိုင်ကပင် နေရာအရွေး မမှားရလေအောင် လေ့လာသင်ယူကြရပေမည်။

ကျွန်တော်တို့တစ်တွေသည် ဘက်မတူရုံမျှဖြင့် ရန်သူဟု မသတ်မှတ်သင့်ကြသလို၊ ဘက်တူသောလူတိုင်းကိုလည်း မိတ်ဆွေပါဟု မသတ်မှတ်သင့်ပါကြောင်း အနာဂတ်ကိုလောင်းကြေးမထပ်ကြဖို့ရန် ရေးသားလိုက်ရပါသည်။

ခိုင်မြင့်ဝေ