News

POST TYPE

PERSPECTIVE

စနစ်ဆိုတာကို နားလည်ကြည့်ခြင်း
27-Jun-2019


စနစ် ဆိုတာ မိမိတို့သွားလိုတဲ့လားရာကို ညွှန်ပြနေတဲ့ မူဝါဒတွေအတွက် အထောက်အပံ့ဖြစ်စေတဲ့ လမ်းသွယ်တွေလို့ဆိုကြပါရဲ့။ စနစ်တစ်ခုချမှတ်ဖို့အတွက် ရှုထောင့်ပေါင်းစုံကနေ သုံးသပ်ပြင်ဆင်၊ ရှိလာမယ့်အကျိုးအပြစ်တွေကို ဖော်ထုတ်လူ၊ အချိန်၊ ငွေအလုံးအရင်းနဲ့ ပုံဖော်တည်ဆောက် ကြရတယ်ဆိုတာ အားလုံးအသိပါ။ 

ချမှတ်ပြီးရင်လည်း သည်စနစ်နဲ့ပတ်သက်တဲ့ ပတ်ဝန်းကျင်တစ်ခုလုံးကို အသိပညာပေးရ၊ လိုက်နာမှုရှိအောင် စစ်ဆေးလမ်းညွှန်ပေးရ၊ စနစ်ကို မယိမ်းယိုင်အောင် ပြုပြင်ထိန်းသိမ်းရနဲ့ အတော်ကို အားစိုက်ထုတ်ကြရပါတယ်။

ဘောင်ခတ်တာ မကြိုက်တတ်တဲ့ လူ့သဘာဝအရ စနစ်တစ်ခုနဲ့ အံဝင်ဖို့ အသိပညာပေးရတဲ့ကာလတွေဟာ သိပ်ခက်ခဲတတ်ပါတယ်။ 

လက်ခံတတ်လာအောင်၊ လက်ခံလိုက်သလောက်လည်း တကယ်နားလည်လာအောင် နည်းမျိုးစုံနဲ့ ရှင်းပြစည်းရုံးကြရပါတယ်။ စနစ်ကို လိုက်နာဆောင်ရွက်လို့ ရလာမယ့်အကျိုးနဲ့ မလိုက်နာလို့ဖြစ်လာမယ့် အပြစ်တွေကို စွဲစွဲမြဲမြဲ မြင်သာထင်သာအောင် တင်ပြစည်းရုံးရတာပါ။ 

ဆန့်ကျင်တွန်းလှန်တဲ့ တုံ့ပြန်ချက်တွေအတွက်လည်း ကြံ့ကြံ့ခံပြီး ကိုယ့်ဘက်ပါစေဖို့ အသိပေးသူတွေက ကိုယ့်စနစ်အကြောင်း ကိုယ် ခရေစေ့တွင်းကျသိဖို့၊ ယုံကြည်ချက်ပြည့်ဖို့လည်း လိုပါလိမ့်မယ်။ 

အသိ၊ အတွေးမတူကြတဲ့ လူပေါင်းစုံကို တညီတညွတ်တည်း လက်ခံနိုင်အောင် ပညာပေးစည်းရုံးဖို့ ဘယ်လောက်ခက်တယ်ဆိုတာ ကြုံဖူးသူတိုင်းသိကြမှာပါ။ 

တကယ်နားလည် လက်ခံလိုက်ပြီးတဲ့အခါမှာလည်း အမှန်တကယ် လိုက်နာကျင့်သုံးလိမ့်မယ်လို့ ယုံကြည်ပြီးလွှတ်ထားလို့ မဖြစ်နိုင်ပြန်ပါဘူး။ 

တချို့ နားလည်သယောင်ယောင်နဲ့ တကယ်နားမလည်ဘဲ အမှားလုပ်မိသူတွေကို တည့်မတ်ပေးဖို့၊ နားလည်ပါသော်လည်း ဖောက်ဖျက်ချင် သူတွေကို ထိုက်သင့်သလို ပညာပေးအရေးယူဖို့ စောင့်ကြည့်စစ်ဆေးမှုတွေ မပြတ်ဆောင်ရွက်ကြရပါတယ်။

ရှိနေတဲ့စနစ်ကို မူရင်းရည်ရွယ်ချက်နဲ့အညီ မတိမ်းမညွတ်အောင်၊ ခေတ်နဲ့အညီ လိုက်ဖက်အောင် မပြတ်ပြုပြင်ထိန်းသိမ်းတတ်ဖို့လည်း အရေးကြီးပါတယ်။ မသိသေးသူတွေကို ရင်းနှီးအောင်၊ ရင်းနှီးပြီးသူတွေကို လိုက်နာတတ်အောင်၊ လိုက်နာဆောင်ရွက်နေသူတွေကို အဆင်ပြေချောမွေ့အောင် စနစ်တစ်ခုစီတိုင်းကို ထိန်းသိမ်းဖို့ စီမံခန့်ခွဲသူတိုင်းမှာ တာဝန်ရှိပါတယ်။ လုပ်ငန်းအဖွဲ့အစည်းတိုင်းမှာ မိမိတို့ အချိန်ယူပြင်ဆင်ချမှတ်ထားတဲ့စနစ်တွေအတွက် အသိပညာပေးရေး၊ လိုက်နာမှုရှိအောင် စစ်ဆေးလမ်းညွှန်ပေးရေး၊ စနစ်ကိုပြုပြင်ထိန်းသိမ်းရေးတွေဟာ မပြတ်ဆောင်ရွက်နေရပါမှ အသက်ဝင်ထိရောက်တဲ့စနစ်ကောင်းတွေအဖြစ် အသုံးဝင်ပါလိမ့်မယ်။

မြင်သာတဲ့ဥပမာတစ်ခုပေးရရင် လမ်းပေါ်မှာ မောင်းနှင်သွားလာမယ့် မော်တော်ယာဉ်မောင်းသူတွေတိုင်း သိရှိလိုက်နာရမယ့်အချက်ပြမီးပွိုင့်၊ လမ်းညွှန်ဆိုင်းဘုတ်၊ သတိပေးတားမြစ်ချက်နဲ့ အခြားသင်္ကေတတွေ ရင်းနှီးဖို့ နည်းအမျိုးမျိုးနဲ့ အသိပညာပေးကြရပါတယ်။ ဒါပေမဲ့ သိပြီးတဲ့ ယာဉ်မောင်းနေသူတိုင်း လိုက်နာကြသလားဆို ဟင့်အင်း မလိုက်နာပါဘူး။ တချို့က တကယ်မသိဘူး။ 

ကိုယ်သိထားတာကို အမှန်လို့ထင်ပြီး မဝင်ရနေရာ ဝင်မိမယ်။ မကွေ့ရ နေရာ ကွေ့မိမယ်။ တချို့ကျပြန်တော့ သိတယ်။ ဒါပေမဲ့ တဒင်္ဂဖြစ်ပေါ်လာတဲ့ စိတ်ခံစားမှုတစ်ခုခုကြောင့် ဖောက်ဖျက်တယ်။ တချို့ကျပြန်တော့ မရည်ရွယ်ပါဘဲ လုပ်မှား၊ ကိုင်မှား၊ လမ်းကြောင်းမှားပြီး ဖောက်ဖျက်ဖြစ်တယ်။ 

မည်သို့ပင်ဖြစ်စေ ဖောက်ဖျက်သူတိုင်းကို ညီမျှတဲ့ အရေးယူမှု၊ အသိပညာပေးမှုတွေအတွက် လုပ်ထုံးလုပ်နည်းတွေ ရှိရပါ့မယ်။ လမ်းကြောလွှဲ ထားတဲ့အခါမျိုး၊ မီးပွိုင့်ပျက်နေတဲ့အခါမျိုး တစ်စုံတစ်ရာကြောင့် မိမိ စနစ်ဘက်ကချို့ယွင်းခဲ့ရင် ယာဉ်ထိန်းရဲတွေချထားပြီး လမ်းရှင်းစေတာမျိုး စတဲ့ အရေးပေါ်အစားထိုးနိုင်တဲ့ ပြင်ဆင်မှုတွေလိုအပ်ပါတယ်။ 

ဒါတွေဟာ ယာဉ်လမ်းကြောင်းဆိုင်ရာစနစ် အသက်ဝင် ထိရောက်ဖို့အတွက် အမြဲမပြတ်လည်ပတ် ဆောင်ရွက်နေရတာမျိုးပါ။ လုပ်ငန်းအဖွဲ့အစည်းထဲက ဌာနအသီးသီးအတွက်လည်း ယင်းတို့ မောင်းနှင်သွားလာရမယ့် ဦးတည်ရာနေရာဆီကို အဆင်ပြေချောမွေ့စွာရောက်ဖို့ ဘယ်လမ်းကနေ ဘယ်လိုသွားရမယ်ဆိုတဲ့ လမ်းကြောင်းဆိုင်ရာညွှန်ကြားပြသချက်တွေကို နားလည်အောင် အသိပေးရပါလိမ့်မယ်။ အမှန်တကယ် လိုက်နာမောင်းနှင်ခြင်း ရှိ၊ မရှိဆိုတာကို မပြတ်စစ်ဆေးလမ်းညွှန်ပေးနေ ရပါလိမ့်မယ်။ 

အရေးပေါ်အခြေအနေတွေအတွက်လည်း အစားထိုးဆောင်ရွက်နိုင်မယ့် အစီအမံတွေကို ရင်းနှီးအောင် ဖန်တီးပေးထားဖို့လိုပါလိမ့်မယ်။ စနစ်တစ်ခုကို ဖော်ဆောင်ကြဖို့ ယင်းစနစ်နဲ့ ပတ်သက်နေတဲ့ မိမိလူတွေ အားလုံးကိုတော့ စနစ်အပေါ်ယုံကြည်မှုရှိအောင်၊ စနစ်ရဲ့အားသာချက်တွေကို အကျိုးရှိရှိသုံးတတ်အောင်၊ စနစ်ရဲ့လိုအပ်ချက်တွေကို ညှိနှိုင်းပြင်ဆင် တတ်အောင် စည်းရုံးလမ်းပြတတ်ဖို့ကတော့ အရေးအကြီးဆုံးလို့ပဲ ဆိုရမှာပါ။ 

Z မောင်

(ဆောင်းပါးရှင် Z မောင်သည် စီမံခန့်ခွဲရေးနှင့် ခေါင်းဆောင်မှုပညာပိုင်း ဆိုင်ရာဘာသာရပ်များကို သင်ကြားပို့ချနေသူတစ်ဦးဖြစ်သည်။)