News

POST TYPE

PERSPECTIVE

၂၀၁၉ အခင်းအကျင်းမှ ၂၀၂၀ ကို မျှော်ကြည့်သောအခါ
26-Jun-2019


အချိန်နာရီများသည် ၂၀၂၀ သို့ တဖြည်းဖြည်း ရွေ့လျားလာနေသည်။ ရွေးကောက်ပွဲကို ပြည်သူတွေကြား ဟိုတစ်စ၊ သည်တစ်စ ဝေဖန်သုံးသပ်နေကြပြီ။ စာရေးသူနေသည့်ရပ်ကွက်က ဦးတုတ်ကြီးကတော့ ၂၀၂၀ တွင် NLD ဆက်နိုင်မည်ဟု သုံးသပ်နေသည်။ ခုရက်ပိုင်းများတွင် အစိုးရနှင့် အတိုက်အခံတို့၏ အားပြိုင်မှုအရိပ်အယောင်များကို စတင်တွေ့လာရသည်။

ဒီကြားထဲ သက်ဆိုင်ရာပါတီတွေအပေါ် ထောက်ခံသူများကလည်း ရုပ်လုံးပေါ်လာကြသလို ကန့်ကွက်လိုသူများကလည်း ကိုယ်ထင်ပြလာကြသည်။ အတိုဆုံးပြောရလျှင် လူထုထောက်ခံမှုရအောင် ၂၀၁၉ နှောင်းပိုင်း ကာလနှင့် ၂၀၂၀ အစောပိုင်းကာလတို့သည် နိုင်ငံရေးသမားတို့အတွက် လာမည့်ရွေးကောက်ပွဲကို ရည်စူး၍ နိုင်ငံရေးမိုးစာဖြည့်တင်းမည့်ကာလဟု ဆိုနိုင်သည်။

အမေ့မိုးစာ

မိုးစာဆို၍ ပြောရဦးမည်။ စာရေးသူတို့ ငယ်စဉ်တုန်းက အမေသည် မိုးတွင်းကာလမှာ အစားအစာ မပြတ်လပ်အောင် အခြေခံအစားအသောက်များကို နွေကတည်းက သိုလှောင်လေ့ရှိသည်။ ငရုတ်၊ အာလူး၊ ကြက်သွန်၊ ပဲ၊ ငါးပိ၊ ဆန် စသည်တို့ကို လုံလုံလောက်လောက် ကြိုတင်ဝယ်ထားသည်။ မိုးတွင်းကာလ အစားအစာပြတ်လပ်သည့်အခါ၊ မိုးကြီးရေလျှံသည့်အခါ မပူမပင် စားသုံးနိုင်ရန် ရည်ရွယ်ပုံရသည်။ အမေခမျာ တစ်နှစ်တစ်နှစ် မိုးစာ မရသေးလျှင် အတော်လေး စိုးရိမ်တတ်သည်။ ဝယ်စရာရှိတာ ဝယ်ယူသိုလှောင် ပြီးသောအခါမှသာ စိတ်ချမ်းသာသည်။

အမေ့မိုးစာက စာရေးသူတို့ မိသားစုအတွက် အကျိုးကြီးလှသည်။ မိုးကြီးရေလျှံဖြစ်သည့်အခါ မပူမပင်ဘဲ စားနိုင်သောက်နိုင်သည်။ မိုးစာ ကြိုမဝယ်ထားသူများလို ပူပင်ကြောင့်ကြမနေရဘဲ စိတ်ချလက်ချ နေနိုင်သည်။ ကျေးလက်ဒေသဆိုတော့ မြို့ပြလို ဈေးထွက်ဝယ်၍မရသော်လည်း အမေ၏ ကြိုတင်စီစဉ်ထားမှုက အိမ်တွင်းဈေးသဖွယ် လိုချင်တာရသည်။ သည်အကြောင်း ပြောရခြင်းမှာ အနာဂတ်ကို ကြိုတင်တွေးပူ၍ လိုအပ်သည်များကို ကြိုတင်ပြင်ဆင်ထားခြင်း၏ အကျိုးကျေးဇူးကို တင်ပြလိုရင်းသာ ဖြစ်ပါသည်။ 

ရွေးကောက်ပွဲသည် နိုင်ငံရေးမှတ်ကျောက်

နိုင်ငံရေးဘက်ပြန်ကောက်ရလျှင် ရွေးကောက်ပွဲဆိုသည်မှာ နိုင်ငံရေးသမားတို့၏ လူထုထောက်ခံမှုကို မှတ်ကျောက်တင်သောကာလဖြစ်သည်ကို ငြင်းဆိုစရာရှိမည်မထင်။ လူထုထောက်ခံသလား၊ မထောက်ခံသလားဆိုသည်ကို ရွေးကောက်ပွဲကတစ်ဆင့်သာ သိရှိနိုင်သည်မဟုတ်ပါလား။ လက်ရှိအာဏာရှိတုန်း မိမိကိုထောက်ခံသည်၊ ဝန်းရံသည်ဟု ဆိုစေကာမှု ရွေးကောက်ပွဲတွင် အရောင်ပြောင်းလဲသွားနိုင်ပေသည်။ မိမိကို မထောက်ခံသူများမှာလည်း မိမိဘက်ကို တိမ်းညွတ်လာနိုင်ပေသည်။

ရွေးကောက်ပွဲမပြီးမီအထိအဖြေကို ယတိပြတ်ပြောဆို၍မရဘဲ စိတ်လှုပ်ရှားဆုံးကာလလည်း ဖြစ်ပေသည်။ မှန်းချက်နှင့် နှမ်းထွက် ကိုက်ချင်မှကိုက်မည်။ မထင်မှတ်ဘဲ မဲအပြတ်အသတ်နှင့်နိုင်ချင်လည်း နိုင်မည်။ ရွေးကောက်ပွဲ နိုင်၊ မနိုင် ဗေဒင်မေး၍ရသည်လည်း မဟုတ်။ ယတြာချေ၍ ရသည်လည်း မဟုတ်။ မိမိ၏ နိုင်ငံရေးမိုးစာ မည်မျှဖြည့်ထားသနည်းဆိုသည့် အပေါ်မှာ ရလဒ်ထွက်လာမည်မှာ အသေအချာဆုံး ကိန်းသေတစ်ခုဖြစ်မည်ဟု ယုံကြည်မိပါသည်။

လူထုအပေါ် သစ္စာရှိခြင်း

ဒီတော့ နိုင်ငံရေးမိုးစာဆိုသည်မှာ အဘယ်နည်း။ လူပြိန်းတစ်ယောက်လို တွေးရလျှင် ပြည်သူအပေါ် စိတ်စေတနာ ဖြူစင်ရိုးသားမှုဟု အဓိပ္ပာယ်ဖွင့်ချင်ပါသည်။ လူထုအပေါ် မည်မျှစေတနာထားသနည်း။ လူထုအပေါ် မည်မျှရိုးသားသနည်း။ ဤစေတနာများမှာ နိုင်ငံရေးသမားတစ်ဦးကို အဆုံးအဖြတ်ပေးမည့် အဓိကပင်ရင်းအုတ်မြစ်များပင် ဖြစ်သည်။ လူထုက နိုင်ငံရေးသမားများအပေါ် မည်မျှထိ ယုံကြည်ကိုးစားသနည်း။ သူတို့ကရော အဘယ်မျှ ယုံကြည်ထိုက်သနည်း။

လူထု၏ယုံကြည်မှု တစ်နည်းအားဖြင့် မဲဆန္ဒရှင်ပြည်သူတို့၏ ထောက်ခံမှုကို ရမည်ဆိုသည်မှာ လွယ်ကူသောအလုပ်တစ်ခုတော့ မဟုတ်ပေ။ လူထုအပေါ် စေတနာထားမှု၊ လူထုအပေါ် ရိုးသားဖြူစင်မှုနှင့် လူထုအပေါ် သစ္စာရှိမှု တို့အပေါ် မိမိ၏ နိုင်ငံရေးသတ္တိက အရောင်လက်နေမည်သာ ဖြစ်သည်။ ယခင် ၂၀၁၀ တုန်းက၊ ၂၀၁၅ တုန်းက ပြည်သူတို့၏ နိုင်ငံရေးအတွေးအမြင်နှင့် လာမည့် ၂၀၂၀ ပြည်သူတို့၏ နိုင်ငံရေးအတွေးအမြင်တို့မှာ များစွာကွာခြားသွားမည်ဟု ယုံကြည်နေမိပါသည်။ 

၂၀၂၀ ရှေ့ပိုင်းကာလ

၂၀၁၀ ရွေးကောက်ပွဲမှာ ပြိုက်ဘက် အင်အားကြီးပါတီ ရွေးကောက်ပွဲ မဝင်၍ ပြည်သူတို့ ရွေးချယ်စရာမရှိခဲ့ဘဲ ပါတီတစ်ခုတည်းကို မဲပေးခဲ့ရာ ကနေ ၂၀၁၅ မှာတော့ ရွေးချယ်စရာ အဓိကပါတီကြီးနှစ်ခုအနက် ပွင့်ပွင့်လင်းလင်းပြောရလျှင် လူကိုမကြည့်ဘဲ ပါတီကိုကြည့်၍ မဲပေးခဲ့ကြသည်။ ပါတီတစ်ခုက မဲအပြတ်အသတ်နိုင်၍ ပြိုင်ဘက်အင်အားကြီးပါတီတစ်ခုက မဲအပြတ်အသတ်ရှုံးခဲ့ပြန်သည်။

ဒီမိုကရေစီကို အာသာငမ်းငမ်း တောင့်တနေခဲ့သည့် ပြည်သူတို့၏ တော်လှန်ရေးဆန်ဆန် မဲပေးခြင်းယဉ်ကျေးမှုကြောင့် သောင်ပြိုကမ်းပြို အနိုင်ရခဲ့သည့်ပါတီက အစိုးရဖွဲ့ခွင့်ရ၍ အုပ်ချုပ်ရေးတာဝန်ကို ယူနိုင်ခဲ့သည်။ ဒီမိုကရေစီဘက်တော်သားများအတွက် ဧရာမ အောင်မြင်မှုကြီး တစ်ခုဟု ဆိုနိုင်သည်။ အနှစ်နှစ် အလလ တောင့်တခဲ့သည့် ပြည်သူ့ဆန္ဒ ပြည့်ဝခဲ့သည်ဟု ဘာသာပြန်ရမည်ထင်သည်။ 

ပြည်သူ၏ ပကတိအမြင်

သို့သော် အစိုးရသက်တမ်း ၃ နှစ်ကျော်လာသောအခါ ပြည်သူတို့ မက်မောခဲ့သည့် ဒီမိုကရေစီတန်ဖိုးများ ခိုင်မာစွာ မဖြစ်ထွန်းရုံမက ယခင် အစိုးရကထက် စံချိန်စံညွှန်း ထိုးကျသွားသောအခါ မည်မျှပင် အသည်းလှိုက် အအူလှိုက် ထောက်ခံဝန်းရံခဲ့စေကာမှု ယခုအခါ အစိုးရ၏ ဆောင်ရွက်ချက်များကို တစ်နည်းတစ်ဖုံ ဝေဖန်နေသည်ကို တွေ့ရသည်။ သတင်းစာဆရာ များအပါအဝင် ပြည်သူများက လွတ်လပ်စွာ ရေးသားဖော်ပြခွင့်မရှိဟု ထောက်ပြသည်။ အချို့ကလည်း နိုင်ငံ့စီးပွားရေးမတိုးတက်ဟု သုံးသပ်ချင်သည်။ အဆိုးဆုံးမှာ လက်ရှိအစိုးရသည် စီမံခန့်ခွဲမှု ညံ့ဖျင်းသည်ဟု ကောက်ချက်ချကြသည်။ တိုင်းရင်းသားလက်နက်ကိုင်များကလည်း ငြိမ်းချမ်းရေးကို မဖော်ဆောင်နိုင်ဟု လက်ညှိုးထိုးကြသည်။

ဤအချက်များသည်ပင် လက်ရှိအစိုးရအဖွဲ့ကို ခုတ်မောင်းနေသည့် နိုင်ငံရေးသမားတို့၏ နိုင်ငံရေးမိုးစာများပင် ဖြစ်သည်။ ပြည်သူတွေက အစိုးရတစ်ရပ် စတင်တာဝန်ယူချိန်မှစ၍ စရန်မဲကို ရင်ထဲကပေးနေကြသည်။ သတင်းမီဒီယာများကလည်း ထိုအခင်းအကျင်းကို စောင့်ကြည့်မှတ်တမ်းတင်နေကြသည်။ ထို့ကြောင့် ပြည်သူတို့၏ စရန်မဲများသည် ၂၀၂၀ ရွေးကောက်ပွဲအတွက် ရှေ့ပြေးနိမိတ်များဖြစ်သည်ဟု ဆိုရပေမည်။ 

အတိုက်အခံအင်အား

အတိုက်အခံများကလည်း ဟာကွက်ပျော့ကွက်ကို စောင့်ကြည့်၍ နိုင်ငံရေးတိုက်ကွက်များကို ပုံဖော်နေကြသလား တွေးစရာဖြစ်သည်။ နိုင်ငံတစ်ခုတွင် အတိုက်အခံဆိုသည်မှာ အစိုးရဖွဲ့ခွင့်မရသော ပါတီများ ပင်ဖြစ်သည်။ ပါတီကြီးများပါသလို ဒေသကိုယ်စားပြု တိုင်းရင်းသားပါတီငယ်များလည်း အပါအဝင် ဖြစ်သည်။ သည်အခင်းအကျင်းမှာ ၂၀၁၅ ကာလက ဖြစ်သည်။ 

ယခုအခါ အတိုက်အခံပါတီကြီးများ တိုးလာနေသည်။ သိသလောက် ချရေးရလျှင် ပြည်သူ့ပါတီ၊ ပြည်ထောင်စုကောင်းကျိုးဆောင်ပါတီ စသည်ဖြင့်။ ထိုပါတီများမှာ ပြည်ထောင်စုတစ်ဝန်းလုံးသို့ ဖြန့်ကြက်နိုင်ရေး ပါတီအင်အား ချဲ့ထွင်နေသည်။ တစ်ဖက်၌ တိုင်းရင်းသားပါတီငယ်များမှာလည်း အလျှိုအလျှိုပေါ်ထွန်းလာကြသည်။ ဤအခြေအနေများကို ခြုံကြည့်ရလျှင် အစိုးရတစ်ရပ်အပေါ် အတိုက်အခံအင်အားစုက ပိုများလာနေသည်ကို သတိပြုဖွယ် တွေ့ရသည်။ 

အတိုက်အခံဆိုသော်လည်း နဂိုအရွယ်ရောက်ပြီး ပါတီကြီးတစ်ခု ကသာ ယှဉ်ပြိုင်နေသေးသည်။ မွေးဖွားစပါတီများကတော့ သူတို့၏ အရွယ်အစားကို အားကောင်းခိုင်မာဖို့ စုစည်းနေတုန်း တည်ဆောက်ရေးကာလ ဖြစ်နေသေးသည်။ သို့သော် ၂၀၂၀ ကာလတွင် ထိုထိုပါတီများမှာ လက်ရှိအနိုင်ရပါတီနှင့် ခြေရည်တူ ကစားရမည့် အသင်းကြီးတစ်သင်း ဖြစ်ချင်လည်း ဖြစ်နေနိုင်သည်။ 

နိုင်ငံရေးဇာတ်ပို့များ

တစ်ချိန်တည်းတွင် အဖွဲ့အစည်းတစ်ခုက ကျောထောက်နောက်ခံ ပြုထားသည်ဟု ယူဆရသူများက အသေအလဲ ဝင်ကန်မည့် စည်းရုံးရေး တိုက်စစ်မှူးကောင်းများကို လက်သပ်မွေးထားပုံလည်းပေါ်သည်။ သူတို့သည် အမျိုးသားရေးအလံကို ကိုင်ဆောင်ထားကြသည်။ ပိုရှုပ်ထွေးလာသည်မှာ နိုင်ငံရေးထဲသို့ ဘာသာရေးအရောင်များပါ တွေ့လာနေရသည်။ ထို့အပြင် အတိုက်အခံများက တိုင်းပြည်အဘက်ဘက်မှ ယိုယွင်းလာနေသည်ဟု သုံးသပ်နေကြပြန်သည်။ မည်သို့ဆိုစေကာမှု ထိုသို့သော အပြုအမူများကို ကျော်မြင်သူများကလည်း မြင်နေကြသည်။ ဤကာလတွင် တစ်ဖက်နှင့်တစ်ဖက် သံသယမျက်လုံးများဖြင့် အနာဂတ်ကို ကြည့်နေသူများကလည်းရှိသည်။

လက်ရှိအစိုးရကလည်း သူ့သက်တမ်းအတွင် နိုင်ငံတိုးတက်မှုကို ချပြနေသည်။ ၃ နှစ်တာကာလ လုပ်ငန်းဆောင်ရွက်ချက်များကို သတင်း မီဒီယာများမှတစ်ဆင့် ပြည်သူကို အစီရင်ခံတင်ပြနေသည်။ နှစ်ဖက် လော်ဘီများကလည်း ဒဏ်ရာဟောင်းများကို တူးဆွ၍ အွန်လိုင်းပေါ်မှာ စည်းရုံးရေးခေါင်းလောင်းထိုးနေကြသည်။ အမျိုးသားရေးအင်္ကျီထူထူ ဝတ်၍ ပါတီတစ်ခုကိုထောက်ခံမှု စည်းချက်ပျက်အောင် လမ်းလျှောက်သူက လျှောက်နေကြသည်။ ပွဲလန့်တုန်း ဖျာခင်းမယ့်သူများကိုလည်း အရိပ်အရောင်တွေ့ရသည်။ လတ်တလော လူအများ စိတ်ဝင်စားနေသည့်ကိစ္စ ရပ်များတွင် သူတို့၏သဘောထားများကို ကြားရတွေ့ရသည်။ ကျွန်တော်တို့ ရွေးကောက်ပွဲနိုင်လျှင် မည်သို့မည်ပုံဆောင်ရွက်ပေးမည်ဟု ကတိဆန်သော ဟောပြောမှုများကိုလည်း ကြားရသည်။ 

ပါတီလား၊ လူလား

ခုရက်ပိုင်းအတွင်း ထူးခြားသည်မှာ NLD ပါတီ၏ ပြောခွင့်ရပုဂ္ဂိုလ် ဒေါက်တာမျိုးညွန့်က သူတို့ပါတီအပေါ် မကောင်းသတင်း မည်မျှပြောပြော ပြည်သူတွေက ခွဲခြားသိသည်ဟုဆိုသည်။ ဆိုရလျှင် ပြည်သူတွေ၏ နိုင်ငံရေး အတွေးအမြင် ရင့်ကျက်လာမှုကို အခိုင်အမာ ယုံကြည်ထားပုံဟု ယူဆရသည်။

၂၀၂၀ ကာလတွင် ပါတီကိုအခြေခံ၍ မဲဆွယ်စည်းရုံးမှုများ ရှိနိုင်သော်လည်း ထိုပါတီအစုအဝေးတွင် အရည်အချင်းရှိသူများသာ စင်ပေါ် အကောက်ခံရမည့် ရွေးကောက်ပွဲဖြစ်မည်ဟု ယူဆမိသည်။ မိမိတို့ လိုလားချက်များကို အကောင်အထည်ဖော်ပေးမည့် လူတော်များကို ပြည်သူတွေ စိတ်ကြိုက်ရွေးချယ်မည့် အခင်းအကျင်းကို လှမ်းမြင်တွေ့နေရသည်။ မဲတစ်ပြား၏တန်ဖိုးကို ကောင်းစွာသိရှိ၍ လူတော်များ စင်ပေါ်တက်မည့်ကာလဖြစ်နေမလား၊ ပါတီကိုအခြေခံမလား၊ လူကိုအခြေခံမလားဆိုသည်မှာ မြို့ပြများတွင် သဲကွဲနိုင်သော်လည်း အချို့ကျေးလက်များမှာတော့ ပါတီကိုပဲ အခြေခံနေဦးမည်လား စဉ်းစားစရာ ဖြစ်နေသည်။ မြန်မာနိုင်ငံ၏ လူဦးရေ ၇၅ ရာခိုင်နှုန်းက ကျေးလက်နေလူထုဆိုတော့ သူတို့၏ထောက်ခံမှုက ရွေးကောက်ပွဲ၏ အဆုံးအဖြတ်ကို ဖြစ်စေနိုင်သည်။

အတွေ့အကြုံများသော မဲဆန္ဒရှင်

မည်သို့ဆိုစေကာမူ ရွေးကောက်ပွဲ နှစ်ကြိမ်တိုင် အတွေ့အကြုံရှိပြီး သား ပြည်သူများအဖို့ မဲပေးမည့်ပါတီများကို ရွေးချယ်ရာတွင် မည်သူကပဲ ကောင်းပါသည်၊ တော်ပါသည်ဟု စည်းရုံးစည်းရုံး မျက်စိမှိတ်ယုံကြည်ဖို့ ခက်ခဲနေပေလိမ့်မည်။ အဘယ်ကြောင့်ဆိုသော် ရှင်ကြီးဝမ်းလည်း ဝင်ဖူးသလို ရှင်ငယ်ဝမ်းလည်း ဝင်ဖူးပြီးသားဖြစ်သည်။ မည်သူ ကောင်း မကောင်း ဆိုး မဆိုး ချင့်ချိန်တတ်မည်ဟု ယူဆရသည်။ တစ်ခုတော့ ရှိပါသည်။ ပြည်သူထဲတွင် ဝေဖန်ပိုင်းခြားနိုင်သူ များဖို့လိုသည်။ နိုင်ငံရေးအတွေးအမြင် ကြွယ်ဝနေဖို့လည်း လိုပါမည်။ တိုင်းပြည်အနာဂတ်ကို လှမ်းမြင်နိုင်စွမ်း အားကောင်းဖို့လိုသည်။

၂၀၂၀ ကာလအလွန် အစိုးရသည် ပြည်သူများ၏ ရင်ထဲအသည်းထဲက တရားမျှတစွာ ရွေးချယ်ပေးသည့်အစိုးရပဲ ဖြစ်သင့်သည်ဟု ထင်မြင်ယူဆမိပါသည်။ ဒီမိုကရေစီစနစ်တွင် အစိုးရကို မှန်ကန်စွာ ရွေးချယ်နိုင်မှ မဲဆန္ဒရှင် ပြည်သူတို့၏တာဝန် ကျေပွန်ရာရောက်မည်။ သို့မဟုတ်လျှင် မိမိတို့ရွေးချယ်ပြီးသော အစိုးရကို ဝေဖန်ရသည်မှာ မိမိတို့ရွေးချယ်ခဲ့မှုကို ဝေဖန်နေသလို ဖြစ်နေပါလိမ့်မည်။

နိဂုံး

လက်ရှိဖြစ်ပျက်နေသည့် နိုင်ငံရေးအခင်းအကျင်းများကို လေ့လာသုံးသပ်ရလျှင် ၂၀၂၀ ရွေးကောက်ပွဲသည် အဓိကပါတီနှစ်ခုအပါအဝင် ပါတီအားလုံး ကျားကုတ်ကျားခဲ ကြိုးစားရမည့်အလားအလာ ဖြစ်နေသည်။ ဝင်အရွေးခံမည့် ကိုယ်စားလှယ်များကိုယ်တိုင် တစ်စုံတစ်ယောက်၏ နိုင်ငံရေး အရိပ်အာဝါသခိုကာ ထီးခိုးဆောင်း၍ ရချင်မှရမည်။ ထောက်ခံသည့်ပါတီထက် မဲပေးရမည့်လူ၏ အရည်အချင်းကို အကဲခတ်ဖို့ ပြည်သူ တို့၏ အတွေ့အကြုံက တွန်းအားပေးနေသည်ကို တွေ့ရသည်။ ရင်ထဲက ထောက်ခံအားပေးတာက ပါတီတစ်ခုဆိုသော်လည်း တကယ်နဖူးတွေ့ ဒူးတွေ့ မဲပေးသောအခါ မိမိထောက်ခံသည့်ပါတီမှ ကိုယ်စားလှယ်ထက် အခြားပါတီက ကိုယ်စားလှယ်က ပိုတော်နေလျှင် တော်တဲ့သူကို စွန့်စားပေးချင် ပေးနိုင်သည်။

သေချာတာတစ်ခုက NLD ၏ နောက်ကွယ်တွင် အသိပညာရှင်၊ အတတ်ပညာရှင် အများစုတို့ လူလုံးမပြဘဲ ဝန်းရံနေသည်ကို တွေ့နေရသည်။ ထိုသို့ ဝန်းရံကြခြင်းမှာလည်း ၂၀၁၀ မတိုင်မီ အုပ်ချုပ်မင်းလုပ်သူတို့ က အသိပညာရှင်၊ အတတ်ပညာရှင်တို့ကို နှိပ်ကွပ်ခဲ့မှုကြောင့်လားဟု မေးခွန်းထုတ်စရာဖြစ်သည်။ စာနယ်ဇင်းများ၏ အာဘော်များကို လေ့လာရသလောက် တိုင်းပြည်၌ ဒီမိုကရေစီ အမြစ်တွယ်ဖို့ ရွေးချယ်စရာသည် NLD မှအပ အခြားမရှိဟူသော သုံးသပ်ချက်များကို ခပ်သဲ့သဲ့ တွေ့ရသည်။ သို့သော် တိုင်းပြည်တိုးတက်ရေးအတွက်မူ NLD ကို အားမရဖြစ်ကြ သည်မှာတော့ ငြင်းဆိုစရာမရှိပေ။

စာရေးသူနေသည့်ရပ်ကွက်က ဦးတုတ်ကြီးကတော့ သူ့လက်ဖက် ရည်ဆိုင်ထဲတွင်ပင် ၂၀၂၀ ကာလမှာ NLD က နိုင်နေဦးမည်ဟု လက်သီး လက်မောင်းတန်း၍ အော်ကြီးဟစ်ကျယ် သုံးသပ်နေလေတော့သည်။

မည်သို့ဆိုစေကာမူ ၂၀၂၀ ရွေးကောက်ပွဲကို လူငယ်တစ်ဦးအနေနှင့် ကိုယ်စွမ်းဉာဏ်စွမ်းရှိသလောက် လှမ်းမျှော်ကြည့်ခြင်းသာ ဖြစ်ပါသည်။ ရွေးကောက်ပွဲတွင် ပြည်သူ့ဆန္ဒသည်သာ အဆုံးအဖြတ်ဖြစ်၍ ၂၀၂၀ ကို မျှော်နေမိပါသည်။

သားညိုထွေး