News

POST TYPE

PERSPECTIVE

အဂတိလိုက်စားမှုကို ဘယ်လို နှိမ်နင်းကြမလဲ
28-Jul-2016
တစ်ပြည်လုံးက အားထားနေကြသော အစိုးရသစ် ဖြေရှင်းရမည့် ပြဿနာများအနက် အဂတိလိုက်စားမှု နှိမ်နင်းရေးမှာ ရှေ့တန်းက ပါဝင်နေကြောင်း အထူး ပြောနေစရာ မလိုပါ။ ယင်းပြဿနာကို ဘယ်လို ဖြေရှင်းကြမလဲ။

ပထမဆုံး အဂတိလိုက်စားမှု၏ အကြောင်းရင်းများကို စဉ်းစားသင့်ပါသည်။ အကြောင်းရင်းတွေက အတော် များ၏။ နံပါတ်တစ်မှာ ဝန်ထမ်း အများစု စားဝတ်နေရေး မလုံလောက်ကြခြင်းဖြစ်သည်။ မလောက်တော့ မိမိတို့ လုပ်ပိုင်ခွင့်များကို အသုံးချကာ လာဘ်စားကြ၏။ သို့ဖြစ်၍ ဝန်ထမ်းများ စားဝတ်နေရေး ဖူလုံမှုကို ဦးစားပေး ဆောင်ရွက်ရန် လို၏။ အခြေအနေ ပေးသလောက် တန်ဖိုးသက်သာသော ဝန်ထမ်းအိမ်ရာများ ဆောက်လုပ်ပြီး ဝန်ထမ်းများ လခ သက်သက်သာသာနှင့် နေထိုင်နိုင်ကြရန် စီစဉ်ပေးသင့်၏။ နှစ်ရှည်လများ အဂတိ လိုက်စားမှု ကင်းရှင်းသော ဝန်ထမ်းများကို ဦးစားပေး ချထားသင့်၏။ ဖြစ်နိုင်သမျှ ရုံး အသွားအပြန် ဘတ်စ်ကားများ စီစဉ် ပေးသင့်၏။ ပညာ ထူးချွန်သော ဝန်ထမ်း သားသမီးများကို ပညာသင်ဆုများ ချီးမြှင့်သင့်၏။ တိုတိုပြောရလျှင် ဝန်ထမ်းတန်ဖိုး မြင့်တက်လာအောင် လစာတိုးပေးရုံ သာမက အခြားအခွင့်အရေး အများအပြား ပေးသင့်၏။ ဦးစား ပေးသင့်၏။

နံပါတ်နှစ်မှာ ဝန်ထမ်းအများ ပုဒ်မလေးစိတ်ဓာတ် ဝင်နေကြခြင်း ဖြစ်၏။ တံစိုးလက်ဆောင် မရလျှင် ဘာမှ လုပ်မပေးချင်ကြတော့ချေ။ ထိုစိတ်ဓာတ်ကို အထက်တွင် ဖော်ပြခဲ့သည့်အတိုင်း လစာများ တိုးပေးခြင်း အပါအဝင် ခံစားခွင့် အမျိုးမျိုးပေးကာ ဝန်ထမ်းတန်ဖိုး တိုးမြှင့်ပေးခြင်း အားဖြင့်လည်းကောင်း၊ လိုအပ်သော စည်းမျဉ်းဥပဒေများ ရေးဆွဲ ချမှတ်ကာ ဖောက်ဖျက် ကျူးလွန်သူများကိုအဟန့်အတား ဖြစ်စေလောက် သည့်ပြစ်ဒဏ်(Deterrent Punishment) ချမှတ်၍ တိတိကျကျ အရေးယူခြင်းအားဖြင့်လည်းကောင်း တိုက်ဖျက်နှိမ်နင်း နိုင်ပေသည်။ အရေးယူရာတွင် ပြစ်မှုကိုလိုက်၍ ရာထူးလျှော့ရုံ၊ အလုပ်ဖြုတ်ရုံ သာမက ထောင် ဒဏ်အပြင် သိန်းသန်းချီသော ဒဏ်ငွေပါ ချမှတ်သင့်သည်။ မှတ်လောက်သားလောက် ပြစ်ဒဏ်ချမှတ်မှသာ စားနေကျ ကြောင်ဖားများ လက်ရွံ့ ကြမည်ဖြစ်သည်။

နံပါတ်သုံးမှာ ကြိုးနီစနစ် ဖြစ်သည်။ လုပ်ငန်း အများအပြားတွင် ခွင့်ပြုချက် တစ်ခုရရန်၊ အမိန့် တစ်ခုပေးရန် အောက်ခြေကနေ ထိပ်ဆုံးအထိ တက်နေရသောကြောင့် အထူး ကြန့်ကြာလေ့ ရှိသည်။ တင်ပြနေရသည့် အဆင့်တွေ များလွန်းသည်။ တစ်ဆင့်မှတစ်ဆင့် တက်ဖို့ ပေးပေရော့။ ဒီကြားထဲ ရုံးတစ်ရုံးနှင့် မပြီး၊ ဟိုရုံး ဒီရုံး သုံး လေးရုံး ကူး၍ တင်ပြဖြတ်သန်း ရသည့်အမှုတွေက ရှိသေးသည်။ သို့ဖြစ်၍ ကြိုးနီစနစ်ကို တိုက်ဖျက်ပစရန် လိုသည်။ တော်ရုံတန်ရုံ ကိစ္စကို အဆင့်ဆင့် တင်ပြအမိန့်ခံ နေစရာ မလိုဘဲ အောက်ခြေမှာတင် ပြီးပြတ်သွားအောင် စီစဉ် ပေးသင့်သည်၊ အာဏာ ပေးသင့်သည်။ လိုင်စင်များ၊ ခွင့်ပြုချက်များ၊ အမိန့်ချမှတ် ပေးမှုများ အများဆုံးကို တစ်ရုံးတည်း၊ တစ်နေရာတည်း ပြီးပြတ်သွားအောင် စီမံဆောင် ရွက်ပေးသင့်သည်။ လုပ်ငန်းများ မကြန့်ကြာအောင် မည်သည့် လုပ်ငန်းမျိုးကို မည်သည့် အချိန်အတွင်း၊ ရက်အတွင်း ပြီးစီးစေရမည်ဟု သတ်မှတ် ပေးသင့်သည်။ ယင်းသို့ သတ်မှတ်ပေးလျှင် သူ့အချိန်နှင့်သူ ပြီးသွားမည် ဖြစ်၍ သက်ဆိုင်သူတို့က လာဘ်ထိုးကြတော့မည် မဟုတ်ပေ။ ဘယ်သူ ပေးချင်ပါ့မလဲ။ ကိုယ့်ကိစ္စ မြန်မြန် ပြီးအောင်သာ ပေးနေကြရတာ၊ ထောက်ခံစာ အမျိုးမျိုး တောင်းနေခြင်းသည်လည်း ကြိုးနီစနစ်ကို ဖွံ့ဖြိုး စေပါသည်။ သို့ဖြစ်၍ မလိုအပ်ဘဲ ထောက်ခံစာတွေ တောင်းသည့်အကျင့်ကိုလည်း ရပ်ဆိုင်း သင့်ပါသည်။

လာဘ်ပေးလာဘ်ယူမှု အများစုမှာ ကိုယ့်ကိစ္စ မြန်မြန်ပြီးအောင် ပေးကြရခြင်း ဖြစ်ပါသည်။ ယင်းကိစ္စများတွင် ပေးသူကို အပြစ် မပြောလိုပါ။ မလွှဲသာ၍ ပေးကြရခြင်းဖြစ်သည်။ ပေးသူတွင် အပြစ်ရှိသည့် လာဘ်ပေးမှုမျိုးလည်း ရှိသည်။ မတရား လုပ်ထားသူက အမှုနိုင်အောင် တရားသူကြီးကို လာဘ်ထိုးခြင်းမျိုး ဖြစ်သည်။ မူးယစ်ဆေးဝါး ရောင်းဝယ်သည်ကို၊ သစ်မှောင်ခိုသည်ကို မဖမ်းအောင် တာဝန်ရှိသူများကို လာဘ်ထိုးခြင်းမျိုး ဖြစ်သည်။ ထိုအမှုမျိုးတွင်ကား လာဘ်ပေးသူကိုပါ အရေးယူ အပြစ်ပေးနိုင်အောင် ဥပဒေပြဋ္ဌာန်း အကောင်အထည် ဖော်သင့်ပါသည်။

ရိုးသားဖြောင့်မတ် အပြစ်ကင်းစင်ခြင်းကို တန်ဖိုးထား မြှောက်စားသည့် အလေ့အထကို ပြုစုပေးသင့်ပါသည်။ အဂတိ လိုက်စားမှု ကင်းစင်သူများကို အမျိုးမျိုး ဂုဏ်ပြုချီးမြှင့် သင့်ပါသည်။ ဥပဒေကို လေးစားမှု၊ ရိုးသား ဖြောင့်မတ်မှုတို့ကို ကျောင်းများတွင် သင်ပြပေးကာ ငယ်စဉ် ကာလမှစ၍ လူတော်လူကောင်း ပုံစံများ သွင်းပေးသင့်ပါကြောင်း။

မောင်ကြာညို



  • VIA