News

POST TYPE

PERSPECTIVE

ရန်သူကို ရှာဖွေခြင်း
14-Mar-2019

ရန်သူဆိုသောအဓိပ္ပာယ်ကို မြန်မာအဘိဓာန်က “မိမိအား အန္တရာယ်ပြုသူ”ဟု တိုတိုပြတ်ပြတ် အနက်ကောက်ပြသည်။ အကျယ်ဖွင့်လျှင် မိမိ၏ အသက်အိုးအိမ်နှင့် မိမိ၏အကျိုးစီးပွားတို့ကို အန္တရာယ်ပြုတတ်သော အရာအားလုံးသည် မိမိ၏ရန်သူများသာဖြစ်သည်။ ရန်သူဟုဆိုရာတွင် လူပုဂ္ဂိုလ်ကိုသာ သတ်မှတ်ဖို့မဟုတ်။ လူပုဂ္ဂိုလ်မဟုတ်သည့် အခြားသော အကြောင်းခြင်းရာများစွာလည်း ပါဝင်သည်။ မိမိတို့၏ ဘဝရပ်တည်ရှင်သန်မှုနှင့် မိမိတို့၏အကျိုးစီးပွားများကို ပျက်စီးစေသော လူပုဂ္ဂိုလ်နှင့် အကြောင်းအရာ အားလုံးတို့သည် မိမိတို့၏ ရန်သူများသာဖြစ်ကြောင်း ဦးစွာနားလည်ဖို့လိုသည်။ ပျက်စီးစေသည်ဟုဆိုရာတွင် လတ်တလော ပျက်စီးစေခြင်းနှင့် အနာဂတ်မှာ ပျက်စီးစေခြင်းဟူ၍ နှစ်ပိုင်းရှိပြန်သည်။ သို့နှင့်တိုင် အများစုကတော့ လက်တွေ့ပျက်စီးမှုကိုသာ အာရုံထားတတ်ကြပြီး အနာဂတ်ပျက်စီးနိုင်မှုကို မျှော်ခေါ်ဆင်ခြင်သုံးသပ်နိုင်သူ ရှားပါသည်။

အတွင်းရန်နှင့် အပြင်ရန်

ရန်သူဆိုသည်ကို “အတွင်းရန်” နှင့် “အပြင်ရန်”ဟူ၍ ခွဲခြားနားလည်ဖို့ လိုအပ်သည်။ လူတစ်ယောက်အတွက် “အတွင်းရန်”ဆိုသည်မှာ မိမိကိုယ်တိုင်၏စိတ်ဓာတ်နှင့် အကျင့်စရိုက်များပင်ဖြစ်သည်။ မိမိ၏မကောင်းသော အကျင့်စရိုက်၊ မကောင်းသော စိတ်နေသဘောထားများနှင့် နိမ့်ကျသော အတွေးအခေါ်များသည် မိမိအတွက် အန္တရာယ်ရှိသော “အတွင်းရန်”များပင်ဖြစ်သည်။ တစ်ခါတလေတွင် အပြင်မှ လာရောက်ဖျက်ဆီးသောရန်သူ မရှိပါဘဲ မိမိ၏ဘဝရပ်တည်မှုများ ထိခိုက်ပျက်စီးကြရသည်မှာ အဆိုပါ အတွင်းရန်များကြောင့်ဖြစ်သည်။ “အပြင်ရန်”ဆိုသည်မှာ အပြင်ဘက်မှလာသောရန်သူဖြစ်သည်။ မိမိတို့၏အကျိုးစီးပွားများကို အပြင်မှ လာရောက်ဖျက်ဆီးသူဖြစ်သည်။ အတွင်းရန်ကိုဖြစ်စေ၊ အပြင်ရန်ကိုဖြစ်စေ လိုအပ်သော အကာအကွယ် အတားအဆီးများ ပြုလုပ်မထားနိုင်လျှင် ခံရမည်သာဖြစ်သည်။

လူတစ်ဦးချင်းမှာသာမက အဖွဲ့အစည်းများတွင်လည်း အတွင်းရန်နှင့် အပြင်ရန်ဟူ၍ရှိတတ်သည်။ အတွင်းရန်မှာ အဖွဲ့အစည်းအတွင်းမှလာသည်။ မညီညွတ်မှုမှာအခြေခံသည်။ ဦးတည်ချက်တူညီသည့်တိုင် ရှုမြင်ပုံကွဲပြားသည်။ ပန်းတိုင်တူကြသည့်တိုင် သွားရမည့်လမ်းရွေးချယ်မှုတွင် အငြင်းပွားသည်။ ယင်းနောက်မှာ အုပ်စုဖွဲ့လာသည်။ တူရာစုသည်။ အုပ်စုတွင်းနေရာအတွက် အပြိုင်ဖြစ်လာကြရာမှတစ်ဆင့် ခေါင်းစဉ်တစ်ခုတည်းအောက်မှာ အတူနေသူများကိုယ်တိုင် ထိုင်ခုံလုသည့်တိုက်ပွဲများ ဖြစ်ကုန်ကြတော့သည်။ ထို့အပြင် အဖွဲ့အစည်း၏ စွမ်းဆောင်ရည်ပိုင်းကလည်း အရေးကြီးပြန်သည်။ အရည်အချင်းမရှိဘဲ နေရာပေးခြင်းသည် ကိုယ့်အဖွဲ့အစည်း ကိုယ်ပြန်သတ်နေသော စရိုက်ဖြစ်သည်။ ထိုသို့ စွမ်းဆောင်ရည်ကင်းမဲ့မှုအပါအဝင် မတော်မတရားပြုကျင့်မှု၊ ကိုယ်ကျင့် သိက္ခာပျက်ယွင်းမှုနှင့် လုပ်ကိုင်ဆောင်ရွက်မှုအမှားများကို ကျူးလွန်နေသည့်အဖွဲ့ဝင်များအပေါ် အချိန်နှင့်တစ်ပြေးညီ စစ်ဆေးအရေးယူမှုမရှိခြင်းကလည်း အဖွဲ့အစည်းများ၏ ဂုဏ်သိက္ခာပိုင်းကို များစွာထိခိုက်စေသည်။ အဆိုးဆုံးကတော့ ကိုယ့်အဖွဲ့အစည်းလုပ်သမျှ ကိုယ့်ခေါင်းဆောင်လုပ်သမျှ ကိစ္စတိုင်းကို အဆိုးအကောင်း ဆင်ခြင်တွက်ဆနိုင်ခြင်းမရှိဘဲ မှားမှားမှန်မှန် ဇွတ်အတင်းထောက်ခံနေကြသော အညံ့စားလော်ဘီများပင်ဖြစ်သည်။ ၎င်းတို့သည် အဖွဲ့အစည်းအတွင်းမှာ ကြီးမားလှသော အတွင်းရန်သူများဖြစ်သည်ကို သိရှိနားလည်ကြဖို့လိုသည်။ သည်လို အတွင်းရန်တွေကြောင့် အဖွဲ့အစည်းများ ကျဆုံးခန်းသို့ ရောက်ကြရသည်ကို သတိချပ်သင့်သည်။

ရန်သူကို မြင်အောင်ကြည့်

စစ်ပွဲများတွင် ရန်သူ့သတင်းနှင့် ရန်သူ၏လှုပ်ရှားမှုများကို ကြိုတင်ထောက်လှမ်းသိရှိခြင်းသည် စစ်နိုင်စေသော အဓိကအကြောင်းအချက်ဖြစ်သည်။ တစ်နည်းအားဖြင့် ရန်သူကို မြင်အောင်ကြည့်တတ်ခြင်း ဖြစ်သည်။ ရန်သူကိုမြင်အောင်ကြည့်သည်ဟုဆိုရာတွင် တစ်ဖက်ရန်သူကို သာမက မိမိတို့၏အားနည်းချက် ပျော့ကွက်များကိုလည်း မြင်အောင်ကြည့်နိုင်ဖို့လိုပါသည်။ ဒါက အတွင်းရန်သူကိုကြည့်ခြင်းဖြစ်သည်။ အပြင်ရန်နှင့် အတွင်းရန် နှစ်ခုလုံးကို မြင်အောင်ကြည့်ပြီး နှိုင်းဆတွက်ချက်တတ်မှသာလျှင် လက်တွေ့ကျပြီး အောင်မြင်စေသော မဟာဗျူဟာများကို ချမှတ် ကျင့်သုံးနိုင်မည်ဖြစ်သည်။

ရန်သူသည် မိမိတို့ထံသို့ တိတ်တဆိတ်ချဉ်းကပ်ရောက်ရှိလာတတ်သည်။ များသောအားဖြင့် ရန်သူလာသည်ကို မမြင်ရတတ်။ ထို့ကြောင့် ရုပ်ဝတ္ထုတွေကို မြင်ကွင်းအဆချဲ့ပေးသော မှန်ပြောင်းလိုကိရိယာမျိုးသုံး၍ ရန်သူကိုမြင်အောင် ကြည့်ကြရသည်။ မိမိတို့၏ခန္ဓာကိုယ်မှာလည်း ကပ်ငြိနေသည့်ပိုးမွှားများကို ဓာတ်ခွဲခန်းသုံး မှန်ပြောင်းဖြင့် ကြည့်ရှု၍ ဖယ်ရှားကြရသည်။ ထို့ကြောင့် ရန်သူဆိုသည်မှာ သာမန်မျက်စိဖြင့် မြင်နိုင်သောအရာများရှိသလို အထူးပြုလုပ်ထားသော မှန်ပြောင်းများဖြင့် ကြည့်ရှုနိုင်မှသာ မြင်ရသောရန်သူဟူ၍လည်းရှိသည်။ သို့ဖြစ်၍ မည်သည့်ရန်သူကိုမဆို မြင်နိုင်စေဖို့အတွက် မှန်ပြောင်းနှင့်တူသော မိမိတို့၏ “အသိဉာဏ်ပညာ”ကို အဆချဲ့ပေးထားနိုင်ဖို့လိုသည်။

မိတ်ဆွေကို ရန်သူမလုပ်ဖို့

ရန်သူနှင့် မိတ်ဆွေကို ကွဲပြားစွာ နားလည်နိုင်ဖို့ အရေးကြီးသည်။ သို့မဟုတ်လျှင် ရန်သူကို မိတ်ဆွေထင်တတ်ကြပြီး မိတ်ဆွေကို ရန်သူ ထင်မှတ်တတ်ကြသည်။ တကယ်တမ်း မိတ်ဆွေစစ်စစ်နှင့် ရန်သူစစ်စစ် ကိုခွဲခြားမြင်တတ်ဖို့ကလည်း မလွယ်ကူလှပေ။ ဉာဏ်ပညာ အရေးကြီးသည်။ မိတ်ဆွေ အယောင်ဆောင်ပြီး ရောက်ရှိလာသော ရန်သူများရှိသလို၊ ရန်သူလို့ ထင်ရသောမိတ်ဆွေစစ်များလည်း ရှိတတ်သည်။ ဒါတွေကို မြင်တတ်ဖို့ဆိုလျှင် ပညာလိုသည်။

မိတ်ဆွေကို ရန်သူလို ထင်မိလို့ အကျိုးစီးပွားတွေ နစ်နာရတတ်သလို ရန်သူကို မိတ်ဆွေဖွဲ့မိလို့ အသက်အိုးအိမ်စည်းစိမ်ထိခိုက် ပျက်စီးရသည်မျိုးလည်း ရှိတတ်သည်။ အထူးသဖြင့် နိုင်ငံရေး၊ စီးပွားရေးတွင် ရန်သူ မိတ်ဆွေ အရွေးမမှားဖို့ အရေးကြီးသည်။ လက်တွဲသင့်သူနှင့် ရှောင်ရှားရမည့်သူကို တွက်ဆရွေးချယ်ရာတွင် လတ်တလော အကျိုးစီးပွားထက် ရေရှည်အကျိုးစီးပွားကို မျှော်ရည်ဆုံးဖြတ်သင့်သည်။

မိမိအကျိုးစီးပွားကို ဆောင်ရွက်လျှင် မိတ်ဆွေ၊ မိမိအကျိုးစီးပွားကို ပျက်စီးစေလျှင် ရန်သူဟူသော ရှေးထုံးသတ်မှတ်ချက်တို့ဖြင့် ခေတ်သစ်ကမ္ဘာမှာ ရန်သူ မိတ်ဆွေကို အလွယ်တကူခွဲခြားဖို့ မဖြစ်နိုင်တော့ပေ။ အချို့သော အခွင့်အလမ်းများသည် အခက်အခဲအသွင်မျိုးဖြင့် ရောက်ရှိလာတတ်သည်။ အခွင့်အလမ်းသည် မိတ်ဆွေဖြစ်သော်လည်း အခက်အခဲအသွင်မျိုးဖြင့် ရောက်လာသောကြောင့် ရန်သူဟုထင်မှတ်ပြီး ရှောင်သွားကြသူတွေရှိတတ်သည်။ တစ်ဖန် ဘေးဒုက္ခ အကျပ်အတည်းများသည် အခွင့်အလမ်းဟန်ဆောင်ပြီး ရောက်ရှိလာသည့်အခါ အများစုက မိတ်ဆွေအထင်ဖြင့် လက်တွဲတတ်ကြသည်။ ပြီးမှ ဒုက္ခရောက်ကြရသည်။ တစ်ခါတလေမှာ အပြင်မှလာသောရန်သူကို မြင်ကြသလောက် အတွင်းကလာသော ရန်သူကိုတော့ သတိမမူတတ်ကြပေ။ အမှန်တကယ်တမ်းမှာ အတွင်းရန်သူက ပို၍ကြောက်စရာကောင်းသည်။ အပြင်ရန်ထက် အတွင်းမှာလှိုက်၍ လောင်ကျွမ်းနေသော ရန်သူသည် အဖွဲ့အစည်းနှင့် လူတစ်ယောက်ချင်းစီတိုင်းကို ဒုက္ခပေးလေ့ရှိသည်။

နိုင်ငံရေးရှုထောင့်ကကြည့်လျှင် တပ်မတော်၊ NLD၊ ကြံ့ခိုင်ရေးပါတီ၊ တိုင်းရင်းသားပါတီများနှင့် ပြည်တွင်းမှ လက်နက်ကိုင်အဖွဲ့အစည်းများ အားလုံးတို့သည် ရန်သူများ မဟုတ်ကြပေ။ မိတ်ဆွေစစ်စစ်များသာဖြစ်သည်။ သို့သော် အတ္တတွေ အကျိုးစီးပွားတွေ ဖုံးကွယ်နေသည့်အတွက် မိတ်ဆွေစစ်စစ်တွေကို ရန်သူဟု ထင်မှတ်မှားနေကြခြင်းသာဖြစ်သည်။ တစ်မြေတည်းနေပြီး တစ်ရေတည်း သောက်နေကြရသည့် တစ်နိုင်ငံတည်း သား ညီအစ်ကိုတွေဖြစ်သည်။ ကျွန်တော်တို့ကိုဖျက်ဆီးမည့် အဓိကရန်သူတွေကို မြင်အောင်ကြည့်တတ်ကြဖို့ အရေးကြီးသည်။ ကျွန်တော်တို့၏ အတွင်းရန်သည် မညီညွတ်မှုဖြစ်သည်။ အတ္တလွန်ကဲခြင်း၊ အဖွဲ့အစည်းစွဲ၊ ပုဂ္ဂိုလ်စွဲ၊ ဝါဒစွဲ၊ လူမျိုးစွဲ၊ နယ်မြေစွဲနှင့် အမှတ်အသား သရုပ်အစွဲအလမ်းများကလည်း ကျွန်တော်တို့အားလုံး၏ အတွင်းရန်သူများပင် ဖြစ်ပါသည်။ အားလုံးက အတွင်းရန်သူကို တွေ့အောင်ရှာပြီး မနှိမ်နင်းနိုင်ခဲ့ကြသည့်အတွက် ယခုအခါ အပြင်ရန်သူကို ကာကွယ်ဖို့ ခက်ခဲနေခဲ့ပြီဖြစ်သည်။ ဆင်းရဲမွဲတေသော နိုင်ငံတစ်ခုအတွက် အပြင်ရန်သူတွေက ပေါလှပါပေသည်။ အိမ်နီးချင်းနိုင်ငံများ၏ အန္တရာယ်များ၊ အင်အားကြီးနိုင်ငံတို့၏ အန္တရာယ်များက အစဉ်သဖြင့် ခြိမ်းခြောက်လျက်ရှိသည်။ စီးပွားရေး၊ ပညာရေး အဘက်ဘက်က နိမ့်ကျနေသော နိုင်ငံတစ်ခုအတွက် အဓိကကျသော ရန်သူကို ရှာဖွေတတ်ဖို့ အရေးကြီးသည်။

အချုပ်ဆိုရလျှင် နိုင်ငံတည်ဆောက်ရေး ဆောင်ရွက်နေသူများအနေဖြင့် အတွင်းရန်သူနှင့် အပြင်ရန်သူကို တွေ့အောင်ရှာဖွေနိုင်ကြဖို့လိုသည်။ အရေးကြီးသည်မှာ အတွင်းရန်သူကို အရင်ဆုံး ရှင်းလင်းနိုင်ဖို့ ဖြစ်သည်။ ပြီးမှအပြင်ရန်သူကို ရှင်းနိုင်မည်ဖြစ်သည်။ ရန်သူကို တွေ့အောင်ရှာဖွေပြီး လက်ဦးမှု ရယူရှင်းလင်းနိုင်မည်ဆိုလျှင် ကမ္ဘာ့အလယ်မှာ ဂုဏ်ယူဝင့်ကြွားရသော အောင်မြင်တိုးတက်သည့်နိုင်ငံတစ်ခု ဖြစ်လာနိုင်ပါကြောင်း တင်ပြအပ်ပါသည်။

ဝင်းကို