POST TYPE

PERSPECTIVE

ဥပဒေဖြင့် ကာကွယ်ပေးသင့်သည့် အမျိုးသားခေါင်းဆောင်ကြီးများ
11-Feb-2019



ကမ္ဘာပေါ်ရှိ သက်ရှိသတ္တဝါများအားလုံးကို သဘာဝတရားက ကာကွယ်ပေးထားပါသည်။ ၎င်းတို့၏ အစွယ်များ၊ ဦးချိုများ၊ ဆူးတောင်များအပါအဝင် အမွေးအရောင်များ၊ အပြေးလျင်မြန်ခြင်းများသည်ပင် ၎င်းတို့အား သဘာဝကပေးထားသော အကာအကွယ်များဖြစ်ကြပါသည်။ လူသားတို့အား ဘေးရန်အန္တရာယ်မှ ကာကွယ်ရန်အတွက် သဘာဝကပေးထားသော အကာအကွယ်မှာ ၎င်းတို့၏ခြေလက်များသာလျှင် ဖြစ်ကြပါသည်။ သို့ရာတွင် လူသားတို့ အတွက် သဘာဝကပေးအပ်ထားသည့် (အခြား သောသတ္တဝါများနှင့်မတူသည့်) ထူးခြားသောအရည်အချင်းကား အသိဉာဏ်ပင်ဖြစ်ပါသည်။ လူသားတို့သည် မိမိတို့ရရှိထားသည့်ထူးခြားသော အသိဉာဏ်ကြောင့် မိမိ၏အသက်ဘေးရန်အန္တရာယ်မှ ကာကွယ်ရန်အတွက် လိုအပ်သော ဓား၊ လှံ၊ လေး၊ မြားမှသည် ခေတ်မီလက်နက်များအထိ တီထွင်ထုတ်လုပ်နိုင်ကြသည်။

သို့ရာတွင် မည်မျှပင်အသိဉာဏ်ပညာမြင့်မားသည်ဖြစ်စေ လူသားတစ်ယောက်သည် သူအသက်ရှင်နေစဉ်မှာပင် မိမိကိုယ်ကိုယ်ကာကွယ် နိုင်စွမ်းရှိမည်ဖြစ်ပြီး ကွယ်လွန်သောအခါတွင် မည်သည့်နည်းဖြင့်မျှ ကာကွယ်နိုင်စွမ်းမရှိတော့ပါချေ။ သေသောသူတစ်ယောက်အဖို့ ကာကွယ်ရန်ဆိုသည်မှာ မိမိ၏ခန္ဓာကိုယ်ရုပ်အလောင်းဆိုသည်ထက် မိမိ၏ပုံရိပ်များ၊ မိမိ၏ဂုဏ်သိက္ခာနှင့် ကျော်စောသတင်းများ၊ မိမိအသက်ရှင်စဉ်က ဆောင်ရွက်ခဲ့သည့် မိမိ၏ သမိုင်းမှတ်တမ်း စသည်တို့ကို ဆိုလိုရင်းဖြစ်ပေသည်။သာမန်လူတစ်ယောက်အတွက် သူ၏မိသားစုများက သူ၏ဓာတ်ပုံအပါ အဝင် မိသားစုအတွက်ဆောင်ရွက်ခဲ့သည့် အမှတ်တရမှတ်တမ်းများကိုသာ သိမ်းဆည်းမှတ်တမ်းပြုကြမည်ဖြစ်သော်လည်း အများနှင့်ဆိုင်သော လူပုဂ္ဂိုလ်၊ အများအကျိုးအတွက် စွမ်းစွမ်းတမံဆောင်ရွက်ခဲ့သူများနှင့် တိုင်းပြည်နှင့်လူမျိုးအတွက် သက်စွန့်ကြိုးပမ်းတာဝန်ထမ်းဆောင်ခဲ့သူ များကိုမူ တာဝန်ရှိသူများ၊ သက်ဆိုင်ရာပုဂ္ဂိုလ်များက ထိန်းသိမ်းစောင့် ရှောက်ကြရပါသည်။ ထိန်းသိမ်းစောင့်ရှောက်သည်ဟုဆိုရာတွင် ထိုပုဂ္ဂိုလ်၏ တိုင်းပြည်နှင့်လူမျိုးအပေါ်သစ္စာရှိပုံ၊ နိုင်ငံနှင့်လူမျိုးအတွက် ကိုယ်ကျိုးစွန့် အနစ်နာခံဆောင်ရွက်ခဲ့ပုံ စသည်တို့အပါအဝင် ၎င်းပုဂ္ဂိုလ်၏အတ္ထုပ္ပတ္တိကို နှောင်းလူတို့သိရှိကြစေရန် ဟောပြောခြင်း၊ ဆွေးနွေးခြင်း၊ စာအုပ်စာပေနှင့် ရုပ်တုများ ရေးသားပြုစု ထုတ်ဝေထုလုပ်ခြင်း စသည်တို့အပြင် အမျိုးသား ခေါင်းဆောင်ဟု တိုင်းပြည်က အသိအမှတ်ပြုသူတို့၏အကြောင်းကို ကျောင်းသင်ခန်းစာ စသည်တို့တွင် ထည့်သွင်းသင်ကြားစေခြင်းအထိ ပါဝင်ပါသည်။

မြန်မာနိုင်ငံ၏ သမိုင်းဝင်ပုဂ္ဂိုလ်များ 

ကမ္ဘာ့နိုင်ငံအသီးသီးတွင် သမိုင်းဝင်ပုဂ္ဂိုလ်များရှိကြသည်။ နိုင်ငံများသည် အဆိုပါပုဂ္ဂိုလ်များ၏သမိုင်းကို စာအုပ်စာပေများ၊ ရုပ်ရှင်များ ဖြင့်မှတ်တမ်းတင်ကြသလို နောင်သားစဉ်မြေးဆက်အထိ အရှည်တည်တံ့စေရန် ရုပ်တုများပြုလုပ်၍လည်း ထားရှိကြသည်။ မြန်မာနိုင်ငံတွင်လည်းသမိုင်းဝင်ပုဂ္ဂိုလ်များရှိကြသည်။ ဗိုလ်ချုပ်အောင်ဆန်းမှစ၍ ဆရာတော်ဦးဝိစာရ၊ ဆရာတော်ဦးဥတ္တမ၊ ဆရာစံ၊ သခင်ဖိုးလှကြီး၊ ဗိုလ်အောင်ကျော်အပါအဝင် သမိုင်းဝင်ပုဂ္ဂိလ် အများအပြားရှိကြသည်။ တိုင်းရင်းသားလူမျိုး အလိုက်လည်း သမိုင်းဝင်ပုဂ္ဂိုလ်များရှိကြသည်။ သမိုင်းဝင်ပုဂ္ဂိုလ်များကို သမိုင်းတင်ရန်မှာ သမိုင်းထဲတွင်ကျန်ရှိနေကြသော သက်ရှိလူသားများ၏တာဝန်ပင် ဖြစ်သည်။ သမိုင်းဝင်ပုဂ္ဂိုလ်များကို သမိုင်းတင်ရန် တာဝန်ရှိသလို သမိုင်းဝင်ပုဂ္ဂိုလ်များကို သမိုင်းမှမဖျောက်ဖျက်ရန်လည်း တာဝန်ရှိသည်။ ဖျောက်ဖျက်ရန်ကြိုးပမ်းမှုများကို ကာကွယ်ရန်လည်းတာဝန်ရှိသည်။ မြန်မာနိုင်ငံတွင် လွတ်လပ်ရေး၏ဖခင်ကြီး၊ အမျိုးသားခေါင်းဆောင်ကြီးဟု အများက အသိအမှတ်ပြုထားသည့် ဗိုလ်ချုပ်အောင်ဆန်းသည်ပင်လျှင် ၁၉၈၈ ခုနှစ်မှ ၂၀၁၀ ပြည့်နှစ်ကာလများအတွင်းက သမိုင်းမှဖျောက်ဖျက်ခြင်းခံခဲ့ရသည်။

သမိုင်းမှဖျောက်ဖျက်ခြင်းဆိုသည်မှာ ဗိုလ်ချုပ်အောင်ဆန်းနှင့် ပတ်သက်သောစာအုပ်၊ စာပေများ ရေးသားထုတ်ဝေ၊ ရောင်းချခြင်းမပြုရ၊ ဗိုလ်ချုပ်အောင်ဆန်းအကြောင်းနှင့်ပတ်သက်၍ ဟောပြောခြင်း၊ ဆွေးနွေးခြင်းမပြုရဟူ၍လည်းကောင်း၊ ယုတ်စွအဆုံး ဗိုလ်ချုပ်အောင်ဆန်းအကြောင်း ကဗျာရေးစပ်သူများ၊ ဗိုလ်ချုပ်အောင်ဆန်းရုပ်ပုံပါသော အင်္ကျီဝတ်ဆင်သူများကို အရေးယူထောင်ချသည်အထိလည်းကောင်း ဗိုလ်ချုပ်ကိုသမိုင်းမှ ဖျောက်ဖျက်ပစ်ကြသည်။ ထို့ကြောင့် အဆိုပါ အနှစ်နှစ်ဆယ်ကျော်ကာလအတွင်း မွေးဖွားကြီးပြင်းလာသူ လူငယ်များသည် ဗိုလ်ချုပ်အောင်ဆန်း၏ သမိုင်းကိုမသိကြ၊ နိုင်ငံနှင့်လူမျိုးအတွက် အသက်ကိုပင် စွန့်လွှတ်အနစ် နာခံ၍ လွတ်လပ်ရေးအတွက် ကြိုးပမ်းဆောင်ရွက်ခြင်းနှင့် ဗိုလ်ချုပ်၏ ရိုးသားဖြောင့်မတ်မှု၊ သတ္တိရှိမှု၊ ကတိတည်ကြည်မှု၊ စိတ်ဓာတ်ခိုင်မာမှုအပြင် ကမ္ဘာ့ရေးရာ၊ မြန်မာ့ရေးရာ စသည့် အထွေထွေဗဟုသုတနှင့် ပြည့်စုံကြွယ်ဝမှု စသည့် အရည်အချင်းများကို မသိကြတော့ပေ။

သမိုင်းဝင်များကို သမိုင်းတင်ဖို့လိုသည်

မြန်မာနိုင်ငံသည် နှစ်ပေါင်းထောင်ချီ၍ ကိုယ့်မင်းကိုယ့်ချင်းနှင့်နေ ထိုင်လာခဲ့ကြရာမှ နယ်ချဲ့လက်အောက်သို့ ကျရောက်ပြီးစကာလများအတွင်း သူ့ကျွန်မခံလိုသောစိတ်ဓာတ်ဖြင့် ရရာအင်အားကိုစုဆောင်း၍ နယ်ချဲ့ကိုဆန့်ကျင် တော်လှန်ခဲ့ကြသော တိုင်းရင်းသားခေါင်းဆောင်များ ရှိသည်။ ၎င်းတို့သည်လည်း သမိုင်းဝင်ပုဂ္ဂိုလ်များဖြစ်သည်။ တိုင်းရင်းသား တို့ရေးသားကြသော စာအုပ်စာပေများနှင့် သမိုင်းပညာရှင်တို့ရေးသား သောစာအုပ်အချို့တွင် အဆိုပါခေါင်းဆောင်တို့အကြောင်း တစ်စွန်းတစ်စ ပါသည်။ သို့သော် ပုဂ္ဂိုလ်တစ်ဦးချင်းအကြောင်း ရေးသားထားသော အတ္ထုပ္ပတ္တိ စာအုပ်များကား ရှားပါးသည်။ ယခုအခါ လုံးဝမတွေ့သလောက်ဖြစ်သည်။ ကျွန်တော်တို့ငယ်စဉ်က ကျောင်းသုံးစာအုပ်များတွင် အနည်းအကျဉ်းဖော်ပြသည်များရှိသည်။ သို့သော် တစ်ကြောင်းစ၊ နှစ်ကြောင်းစ အမည် နာမဖော်ပြရုံမျှလောက်သာဖြစ်သည်။ မြန်မာတို့အမျိုးသားရေးနိုးကြား လာသောကာလတွင်လည်း သမိုင်းဝင်ပုဂ္ဂိုလ်အများအပြားပေါ်ပေါက်ခဲ့သည်။ သို့ရာတွင် အထက်တွင်ဖော်ပြခဲ့သလို လူပုဂ္ဂိုလ်တစ်ဦးတစ်ယောက် အကြောင်း ရေးသားဖော်ပြသောစာအုပ်များ ရှားပါးပြီး အကြောင်းအရာ၊ အဖြစ်အပျက်တစ်ခုအတွင်း ၎င်းပါဝင်ခဲ့သည့် အခန်းကဏ္ဍလောက်ကိုသာ ဖော်ပြသည်က များပါသည်။ ထို့ကြောင့် မြန်မာ့သမိုင်းတွင် ထင်ရှား ကျော်ကြားခဲ့သည့် သမိုင်းဝင်ပုဂ္ဂိုလ်များ၏ အတ္ထုပ္ပတ္တိများကို ပြန်လည် ဖော်ထုတ်ရေးသားခြင်း၊ တိုင်းရင်းသားခေါင်းဆောင်များ၏ အတ္ထုပ္ပတ္တိများကိုလည်း သက်ဆိုင်ရာ ပြည်နယ်များရှိ တိုင်းရင်းသားလူငယ်များသိရှိစေရန် သက်ဆိုင်ရာတိုင်းရင်းသားတို့၏ နေ့ထူးနေ့မြတ်များတွင် ဟောပြောစေခြင်း စသည်တို့ကို ဆောင်ရွက်ပေးသင့်ပါသည်။

သမိုင်းဝင်ပုဂ္ဂိုလ်မှသည် အမျိုးသားခေါင်းဆောင်သို့

အထက်တွင် ရေးသားဖော်ပြခဲ့သည့်အတိုင်း သမိုင်းဝင်ပုဂ္ဂိုလ်ဆိုသည်မှာ (ပဒေသရာဇ်ခေတ်မှ သူရဲကောင်းများကို သီးခြားကဏ္ဍထား၍) သူ့ကျွန်ဘဝရောက်ပြီးနောက် နယ်ချဲ့ကိုဆန့်ကျင်ပုန်ကန် တော်လှန်ခဲ့သူများ၊ မြန်မာ့လွတ်လပ်ရေးကြိုးပမ်းမှုသမိုင်းတွင် တစ်ခန်း၊ တစ်ကဏ္ဍပါဝင်ခဲ့သူများကို ဆိုလိုခြင်း ဖြစ်ပါသည်။ အဆိုပါပုဂ္ဂိုလ်များအနက် အချို့သည် တစ်မျိုးသားလုံးကိုဦးဆောင်ဦးရွက်ပြု၍ နိုင်ငံနှင့်လူမျိုးအတွက် အသက်ကိုပင် စွန့်လွှတ်စွန့်စားကာ မြန်မာ့လွတ်လပ်ရေးကို အရယူပေးသည့် အမျိုးသား ခေါင်းဆောင်များဖြစ်လာကြပါသည်။ ထို့ကြောင့် အမျိုးသားခေါင်းဆောင်တစ်ဦးတွင် ရှိသင့်ရှိအပ်သည့်အရည်အချင်းများ၊ မည်သူတို့သည် မြန်မာနိုင်ငံ၏ အမျိုးသားခေါင်းဆောင်များ ဖြစ်သည့်အကြောင်းကို ဥပဒေတစ်ရပ်ပြဋ္ဌာန်း၍ သတ်မှတ်ပေးသင့်သည်ဟု ထင်မြင်ယူဆပါသည်။

တစ်ကျောင်းတစ်ဂါထာ တစ်မြို့တစ်ပုံဆန်း 

ယခုအခါ လွတ်လပ်ရေး၏ဖခင်ကြီး၊ အမျိုးသားခေါင်းဆောင်ကြီးဟူ၍ အများကအသိအမှတ်ပြုထားသော ဗိုလ်ချုပ်အောင်ဆန်း၏ ရုပ်တုများကို မြန်မာနိုင်ငံအနှံ့အပြားတွင် ထုလုပ်ထားရှိနေကြပါသည်။ ထိုသို့ ဆောင်ရွက်ရာတွင် ရုပ်တုသယ်ဆောင်ရာလမ်းတစ်လျှောက် သောင်းသောင်းဖြဖြကြိုဆိုနှုတ်ဆက်ကြပြီး ဖွင့်ပွဲအခမ်းအနားကြီးများ ကျင်းပကြသောမြို့နယ်များရှိသကဲ့သို့ သယ်ဆောင်ရာလမ်းခရီးတွင် ဟန့်တားနှောင့်ယှက်ကြသလို ထားရှိခြင်းမပြုရန် ကန့်ကွက်ဆန္ဒပြသည့်မြို့နယ်များလည်းရှိသည်ကို တွေ့မြင်ကြားသိနေရပါသည်။

အချို့ဒေသများတွင်မူ ပန်းခြံတစ်ခုတည်း၌ ရုပ်တုနှစ်ခုထားရှိသည်များလည်း ရှိကြပါသည်။ ထိုကဲ့သို့ ရုပ်တုများ အပြိုင်အဆိုင်ထုလုပ်ကြရာတွင် အချို့သောရုပ်တုများမှာ ဗိုလ်ချုပ်အောင်ဆန်းနှင့်မတူသည်ကိုလည်း တွေ့ရှိရပါသည်။ (ထိုကိစ္စနှင့်ပတ်သက်၍ “ဗိုလ်ချုပ်အောင်ဆန်းဆိုတာ တစ်ယောက်တည်း ရှိတယ်”​ဟူသော ဆောင်းပါးတစ်ပုဒ်ကို ကျွန်တော် ရေးသားခဲ့ပါသေးသည်)။ ဆိုလိုသည်မှာ “တစ်ကျောင်းတစ်ဂါထာ တစ်ရွာ တစ်ပုဒ်ဆန်း” ဆိုသကဲ့သို့ ဗိုလ်ချုပ်ကြေးရုပ်များမှာ “တစ်မြို့ တစ်ပုံဆန်း” ဖြစ်နေကြပါသည်။

ပြဋ္ဌာန်းပေးသင့်သည့်ဥပဒေ

အမျိုးသားခေါင်းဆောင်များကို အကာအကွယ်ပေးသည့်ဥပဒေ တစ်ရပ်ကို လွှတ်တော်မှအတည်ပြုပြဋ္ဌာန်းနိုင်ရန် ပြည်ထောင်စုသမ္မတမြန်မာနိုင်ငံတော်၊ ပြည်ထောင်စုအစိုးရ၊ ယဉ်ကျေးမှုဝန်ကြီးဌာနက စတင်ရေးဆွဲသင့်ပါသည်။ အဆိုပါဥပဒေတွင် အောက်ပါအချက်များပါဝင်သင့်ကြောင်း အကြံပြုအပ်ပါသည် -

(က) အမျိုးသားခေါင်းဆောင်၏ အဓိပ္ပာယ်သတ်မှတ်ချက်။

(ခ) မြန်မာနိုင်ငံ၏ အမျိုးသားခေါင်းဆောင်အဖြစ် သတ်မှတ်သင့်သည့် ပုဂ္ဂိုလ်များ။

(ဂ) အမျိုးသားခေါင်းဆောင်များ၏ အကြောင်းအရာ၊ အတ္ထုပ္ပတ္တိဆိုင်ရာဟောပြောခြင်း၊ စာပေရေးသား ထုတ်ဝေခြင်း၊ ရုပ်ရှင်ရိုက်ကူးထုတ် လုပ်ခြင်းဆိုင်ရာ ပြဋ္ဌာန်းချက်များ။

(ဃ) အများပြည်သူဆိုင်ရာနေရာများတွင် အမျိုးသားခေါင်းဆောင်များ၏ ပုံတူပန်းချီကား၊ ရုပ်တုများပြုလုပ်ထားရှိခြင်းဆိုင်ရာ ပြဋ္ဌာန်းချက်များ။

(င) အမျိုးသားခေါင်းဆောင်၏ အတ္ထုပ္ပတ္တိဆိုင်ရာ စာအုပ်စာပေများ၊ ရုပ်ရှင်များ၊ ပန်းချီကားနှင့် ရုပ်တုများကို ကာကွယ်၊ စောင့်ရှောက်ထိန်းသိမ်းခြင်းဆိုင်ရာ ပြဋ္ဌာန်းချက်များ။

(စ) ယင်းပစ္စည်းများကို ပြုလုပ်၊ သယ်ဆောင်၊ ထားရှိရာတွင် ဟန့်တားခြင်း၊ ဖျက်ဆီးခြင်းနှင့်ပတ်သက်၍ တားမြစ်ခြင်းနှင့် ကျူးလွန်ပါက

ချမှတ်မည့်ပြစ်ဒဏ်များ။

(ဆ) အများပြည်သူဆိုင်ရာနေရာများတွင် ထားရှိမည့် ရုပ်တုများထုလုပ်ရာတွင် စိစစ်ခြင်း၊ အတည်ပြုခြင်း၊ ခွင့်ပြုခြင်း စသည်တို့ဆောင်ရွက်ရန်အတွက် အမျိုးသားကော်မတီတစ်ရပ်ဖွဲ့စည်း၍ ယင်းကော်မတီ၏ တာဝန်နှင့်လုပ်ပိုင်ခွင့်များသတ်မှတ်ပေးခြင်း စသည့်အချက်များကို ပါဝင်စေလိုပါသည်။

နိဂုံး

ဤကဲ့သို့ အမျိုးသားခေါင်းဆောင်ကြီးများအား အကာအကွယ်ပေးသည့်ဥပဒေတစ်ရပ်ကို ပြဋ္ဌာန်းပေးခြင်းအားဖြင့် ခေါင်းဆောင်ကြီးများ၏ နိုင်ငံနှင့်လူမျိုးအတွက် သက်စွန့်ဆံဖျားတာဝန်ထမ်းဆောင်ခဲ့ခြင်းကို အသိအမှတ်ပြုရာရောက်သလို ဂုဏ်ပြုခြင်းလည်းမည်ပါသည်။ ထို့အပြင် ခေါင်းဆောင်ကြီးများ၏ကျေးဇူးကို မိမိတို့ခေတ်လူကြီးများမှသည် ခေတ်အဆက်ဆက် မျိုးဆက်များအထိတိုင် ကျေးဇူးဆပ်ခြင်းပြုရာရောက်မည် ဖြစ်ပါသည်။

သိန်းထက်အောင်