News

POST TYPE

PERSPECTIVE

ဖောက်ထွက်တွေးခြင်း
06-Dec-2018

မကြာမီ ၂၀၁၈ ကုန်ဆုံးတော့မည်။ နှစ်သစ်တစ်ခုကို ပျော်ရွှင်ချမ်းမြေ့မှုများ၊ မျှော်လင့်ချက်အသစ်များနှင့် ကြိုဆိုချင်သကဲ့သို့ နှစ်ဟောင်းကိုလည်း ပျော်ရွှင်ဖွယ်သတိတရများ၊ အတုယူစရာများဖြင့် အဆုံးသတ်လိုသည်။ တစ်နှစ်ပြီးတစ်နှစ် နောင်တများနှင့် အဆုံးမသတ်လိုပါ။ ထိုသို့ဆိုလျှင် ကိုယ်တိုင်က နှစ်ဟောင်းရေစီးတွင် မည်သည့်ပုံစံ၊ မည်သည့်အတိုင်းအတာဖြင့် စီးမျှောပါဝင်ခဲ့ပါသလဲ။ မကြာမီစတင်တော့မည့် နှစ်သစ်တွင်လည်း မည်သည့်ပုံစံဖြင့် ဆက်လျှောက်သွားမည်လဲဆိုသည်မှာ အားလုံး၏အနာဂတ်၊ ကိုယ်တိုင်၏အနာဂတ်ခရီးနှင့် သက်ဆိုင်နေပါလိမ့်မည်။ လှပသောအနာဂတ်ကို မြင်တွေ့လိုသည့် ဆန္ဒပြင်းပြမှုများဖြင့် နှစ်သစ်ကို မျှော်ကြည့်မိသည်။

မြန်မာ့နွေဦး

မိမိတို့အားလုံးသည် စနစ်ပြောင်း၊ ခေတ်ပြောင်းများကို လိုလားခဲ့ကြသည်။ ထို့အတူ အပြောင်းအလဲများကို အားပေးခဲ့ကြသည်။ ထိုဆန္ဒများ၊ အားထုတ်မှုများအပါအဝင် တောင်းဆိုလာသည့် နိုင်ငံ့အခြေအနေအရပ်ရပ်ကြောင့် မြန်မာ့နိုင်ငံရေးအပြောင်းအလဲသည် ၂၀၁၁ တွင် ကမ္ဘာသိစတင်ခဲ့သည်။ ထိုအချိန်က ကမ္ဘာတွင်ပြောင်းလဲနေသည့် ပုံစံများနှင့်မတူသည့် ပြောင်းလဲမှုတစ်ရပ်အဖြစ် ရှုမြင်သုံးသပ်ခဲ့ကြသည်။ မြန်မာ့နွေဦးဟု ကင်ပွန်းတပ်ခဲ့ကြသည်။ ပြည်တွင်း၊ ပြည်ပအားပေးထောက်ခံမှုများခဲ့၍လည်း မြန်မာ့နွေဦးအပေါ် အားလုံးကမျှော်လင့်ချက် မြင့်မားခဲ့ကြသည်။ ထိုအပြောင်းအလဲသည် ယခုဆိုလျှင် ၈ နှစ်ပြည့်ပါတော့မည်။ ထိုမျှော်လင့်ချက်များ ရှင်သန်ဆဲ၊ ကြိုးစားနေဆဲဟု မြင်သည်။ ယင်းကြိုးစားအားထုတ်မှုများနှင့်အတူ ယနေ့ရင်ဆိုင်နေရသည့် စိန်ခေါ်မှုများသည်လည်း များပြားလွန်းလှသည်။ တိုင်းပြည်ကနုနု မုန်တိုင်းကထန်ထန်ဟုလည်း ဆိုကြသည်။ 

နိုင်ငံရေးစနစ်အပြောင်းအလဲကို နိုင်ငံရေးသိပ္ပံပညာရှင်တို့က သီအိုရီသဘော၊ လက်တွေ့သဘောများဖြင့် ချဉ်းကပ်သုံးသပ်ကြသည်။ အထက်မှစတင်ပြောင်းလဲခြင်း၊ အောက်မှစတင်ပြောင်းလဲခြင်း၊ ဘေးတိုက်ပြောင်းလဲခြင်း စသည်ဖြင့် ပြောင်းလဲခြင်းအမျိုးအစားများစွာကို အနက်အဓိပ္ပာယ်ဖွင့်ဆိုကြသည်။ ထို့နောက် ပြောင်းလဲခြင်း အဆင့်များကိုလည်း ဖော်ပြခဲ့ကြသည်။ ယင်းတို့နှင့်အတူ ပြောင်းလဲမှုအောင်မြင်ခြင်း၊ ကျဆုံးခြင်းများကိုလည်း နှိုင်းယှဉ်သုံးသပ်ခဲ့ကြသည်။ ကမ္ဘာတစ်ဝန်း ဒီမိုကရေစီ အပြောင်းအလဲအခြေအနေများတွင် ပြောင်းလဲမှုအောင်မြင်သောနိုင်ငံများ၊ ကျဆုံးသောနိုင်ငံများ၊ တစ်ဝက်တစ်ပျက်ဖြစ်နေသည့် နိုင်ငံများအခြေ အနေကိုလည်း အလေးထား သုံးသပ်ပြခဲ့ကြသည်။ ယင်းသို့ဖော်ပြနေခြင်းများသည် မိမိတို့နိုင်ငံ၏အခြေအနေနှင့် နှိုင်းယှဉ်သုံးသပ် သင်ခန်းစာယူနိုင်ရန်ဟု မြင်သည်။

ယင်းသင်ခန်းစာများထဲတွင် မြန်မာ့နွေဦး၏ မှန်းဆရန်ခက်ခဲသည့် စိန်ခေါ်မှုတစ်ခုမှာ မပြောင်းလဲနိုင်သေးသည့် အယူအဆ၊ သဘောထား များဖြစ်သည်။ သမားရိုးကျရထားသံလမ်းပေါ် မြန်နှုန်းမြင့်ရထား မောင်းနေရသည်နှင့်တူသည်။ ခရီးမတွင်လှ။

အပြောင်းအလဲ မြန်ဆန်ဖို့ဆိုပါလျှင်

မြန်မာ့နိုင်ငံရေး နောက်ခံအခြေအနေသည် အသွင်ကူးပြောင်းသည့် အခြားနိုင်ငံများ၏ အခြေအနေနှင့်မတူ။ ကွာခြားလှသည်။ တိုင်းရင်းသားများပြားခြင်း၊ ပြည်တွင်းစစ်၊ ရခိုင်ဒေသအရေး၊ ပညာရေး၊ စီးပွားရေး နိမ့်ကျနေမှု၊ ဗျူရိုကရေစီစနစ်ပျက်ယွင်းနေမှု၊ အသွင်ကူးပြောင်းရေး အတွက် လူထု၏နိုင်ငံရေးရေချိန်အသင့်ဖြစ်မှု စသည့် မိမိတို့နိုင်ငံ၏ နိုင်ငံရေးနောက်ခံအခြေအနေသည် ပြင်ဆင်ရန်များပြားလွန်းသည်။ နိုင်ငံ၏အသွင်ကူးပြောင်းမှုသည် နိုင်ငံရေးစနစ်၊ စီးပွားရေးစနစ်၊ လူမှုရေးစနစ် ကူးပြောင်းရေးသာမက အလုံးစုံပြောင်းလဲရခြင်းဖြစ်၍ ရုပ်ပိုင်းဆိုင်ရာ ပြောင်းလဲမှုထက် အယူအဆပိုင်း၊ အတွေးအခေါ်ပိုင်းဆိုင်ရာ ပြောင်းလဲမှုက အခရာကြနေသည်ဟု မြင်မိသည်။

ထိုသို့ဆိုပါလျှင် စိန်ခေါ်မှုများစွာနှင့် မြန်မာ့အပြောင်းအလဲ ၈ နှစ်တာခရီးသည် မည်မျှခရီးပေါက်၍ မည်မျှခရီးရောက်ခဲ့ပါသနည်း။ ထိုခရီးကာလအတွင်း ကိုယ်စီကိုယ်စီ လိုက်ပါပြောင်းလဲနိုင်ခဲ့ကြပါသလား။ ထို ၈ နှစ်တာခရီးတွင် နိုင်ငံ့အပြောင်းအလဲကိုသာ လိုလားနေကြ၍ မိမိတို့ တစ်ဦးချင်းစီ ကိုယ်တိုင်ကရော ပြောင်းလဲကြပြီလား ဆိုသည်မှာလည်း စိတ်ဝင်စားဖွယ် မေးခွန်းတစ်ခုအဖြစ် မြင်မိပါသည်။ အခြေမခိုင်သေးသည့် အဖွဲ့အစည်းတစ်ခုတွင် အစွန်းရောက်အယူအဆများ စွဲကိုင်ထားကြမည်ဆိုပါလျှင် ထိုထိုသောအဖွဲ့အစည်းနှင့် စနစ်များမှာ ရေရှည်တည်တံ့ရေး၊ တိုးတက်ရေးသည် စိုးရိမ်ဖွယ်ဟု ဆိုရပါမည်။

ထို့ကြောင့် အပြောင်းအလဲမြန်ဆန်ကြဖို့၊ တိုးတက်ကြဖို့ဆိုပါက သူတစ်ပါး၏ပြာင်းလဲခြင်းကိုသာ မျှော်လင့်နေခြင်းထက် ကိုယ်ကိုယ်တိုင် ပြောင်းလဲရန် ကြိုးစားကြဖို့ အထူးလိုအပ်ပါလိမ့်မည်။ ကိုယ်ကိုယ်တိုင် ပြောင်းလဲဖို့ဆိုရာတွင် အရိုးစွဲနေသည့် Zero-sum အယူအဆများ ပြောင်းလဲရေးဖြစ်သည်။ မတူညီမှုအားလက်ခံနိုင်ခြင်း၊ စေ့စပ်ညှိနှိုင်းတတ်ခြင်း၊ သမားရိုးကျ အယူအဆများမှ ဖောက်ထွက်တွေးခြင်း စသည့် ယဉ်ကျေးမှုအသစ်များနှင့်ခရီးဆက်ရန် လိုအပ်နေပါပြီ။ အတ္တစွဲများ၊ ငါနဲ့မတူ ငါ့ရန်သူ၊ အပြုတ်တိုက်ရေးဆိုသည့် အယူအဆများသည် ယနေ့လျှောက်လှမ်းနေသည့် ရည်မှန်းချက်အား ပျက်စီးစေသလား၊ အဟန့်အတားဖြစ်စေသလား၊ အထောက်အကူဖြစ်စေသလား ဆိုသည်မှာ အတိတ်သမိုင်းကြောင်းတွင် သင်ခန်းစာများရှိခဲ့သလို ယနေ့လည်း ရင်ဆိုင်နေရဆဲပင်။ လွတ်လပ်ရေးကြိုးပမ်းစဉ် ကာလအတွင်းပင် သူတစ်လူငါတစ်မင်း၊ အုပ်စုကွဲ၊ ဂိုဏ်းကွဲ၊ အပုပ်ချရေး၊ အပြုတ်တိုက်ရေး အယူအဆများကြောင့် မြန်မာ့လွတ်လပ်ရေးသည် လိုသည်ထက်ပို၍ အရင်းအနှီးကြီးမားခဲ့သည်။

ပြောင်းလဲသည်ဆိုရာတွင် လူတိုင်းပြောင်းလဲရန်ဆိုသည်မှာ ဖြစ်နိုင်ရန် ခက်ခဲသော်လည်း အများစုက အတွေးအခေါ်ဟောင်းများမှ ဖောက်ထွက်လာကြမည်ဆိုပါက အတွေးအခေါ်အယူအဆပြောင်းလဲမှု ဝန်းကျင်ကောင်း ဖန်တီးနိုင်ပေလိမ့်မယ်။ ဦးစွာမဖြစ်မနေ ပြောင်းလဲရမှာကတော့ နိုင်ငံအတွက်၊ အဖွဲ့အစည်းအတွက် ဦးဆောင်နေသူများဟု ဆိုချင်ပါသည်။ ထို့အတူ ဖောက်ထွက်တွေးခေါ် စဉ်းစားသူများကို နေရာပေးရန်လည်း လိုအပ်မည်ဖြစ်သည်။ လက်ရှိနိုင်ငံရေးစနစ် အပြောင်းအလဲကို ထိရောက် မြန်ဆန်ဖို့ဆိုပါက ဗောင်းတော်ညိတ် စိတ်တော်သိသည့် အတွေးအခေါ်ဟောင်းများနှင့် အလုပ်မဖြစ်နိုင်သည်ကတော့ သေချာသည်။

 
ဖောက်ထွက်တွေးခြင်း

မြန်မာ့နိုင်ငံရေးသမိုင်းတွင် တည်ငြိမ်သောနိုင်ငံရေးစနစ်ကို ခိုင်မာစွာတည်ဆောက်ရန် အခြေအနေမရှိခဲ့။ အကွဲအပြဲများ၊ အတ္တနိုင်ငံရေးများ၊ အစွန်းရောက်အယူအဆများ၏ လွှမ်းမိုးမှုဖြင့် နောက်ပြန်ဆုတ်သွားခဲ့ရသည့် နိုင်ငံရေးသမိုင်းကြောင်းကို သင်ခန်းစာယူကြရပါမည်။ ကုန်းဘောင်ခေတ်နှောင်းပိုင်းမှစ၍ လွတ်လပ်ရေးကြိုးပမ်းမှုကာလ၊ ပါလီမန်ဒီမိုကရေစီ ခေတ်အထိ အယူအဆအကွဲတွေ များပြားလွန်းလှသည်။ ထို့အတွက်လည်း မြန်မာ့နိုင်ငံရေးသမိုင်းကို လေ့လာသူများက မြန်မာနိုင်ငံရဲ့အပြောင်းအလဲတွေဟာ ကြာကြာမခံဘူးလို့ မှတ်ချက်ပြုခဲ့ကြခြင်းဖြစ်သည်။ ယင်း ကောက်ချက်ချမှုများကို အပြည့်အဝအမှန်အဖြစ် မယူဆနိုင်သော်လည်း ရာခိုင်နှုန်းအတော်များများ မှန်နိုင်ကြောင်း သမိုင်းအထောက်အထားများအရ ကောက်ချက်ချနိုင်ပါသည်။

အတွေးအခေါ် အယူအဆပြောင်းလဲနေရေးနှင့်ပတ်သက်၍ စင်ကာပူတွင် အလုပ်လုပ်နေသည့် မိတ်ဆွေတစ်ဦးနှင့် စကားပြောဖြစ်ခဲ့သည်။ မိတ်ဆွေက စင်ကာပူမရောက်မီက မြန်မာနိုင်ငံ အစိုးရလုပ်ငန်းတစ်ခုတွင် အလုပ်လုပ်ခဲ့သူဖြစ်သည်။ ယင်းအလုပ်မှာပင် ဌာနအထက်လူကြီးနှင့် သဘောထားမတိုက်ဆိုင်၍ အလုပ်ထွက်ပြီး စင်ကာပူသို့ အလုပ်သွား ရောက်လုပ်ကိုင်ခဲ့သည်။ ယခုအခါ စင်ကာပူတွင် မိသားစုနှင့်အတူ အနှစ် ၂၀ ကျော်ရှိနေပြီး လုပ်ငန်းလည်း အောင်မြင်နေသူတစ်ဦး ဖြစ်နေသည်။ မိတ်ဆွေက အစိုးရအလုပ်မှထွက်ရလို့သာ စင်ကာပူကိုရောက်ခဲ့ရပြီး ယခုလို အောင်မြင်ရခြင်းဖြစ်ကြောင်း၊ သို့အတွက် အလုပ်ထွက်ခဲ့ရသည့် ယင်းဌာနနှင့် ဌာနလူကြီးကို ကျေးဇူးတင်မိကြောင်း၊ သို့မဟုတ်ပါက မိမိအတွက် ကြိုးစားချင်စိတ်နှင့် အောင်မြင်ရန်လမ်းစတွေ့မည် မထင်ကြောင်း ပြောပါတယ်။ ဒါ့အပြင် ယနေ့အချိန် မိမိတို့နိုင်ငံ၊ လူမျိုး တိုးတက်ဖို့ဆိုပါက Out of the box thinking ဖြစ်ရန်လိုအပ်ကြောင်း သူ၏ အတွေ့အကြုံနှင့် အမြင်သဘောထားကို ပြောပြသည်။

Out of  the box thinking, alternative thinking နှင့် ပတ်သက်၍ မြန်မာစာရေးဆရာကြီးများက ၂၀၁၁ မတိုင်မီကပင် ပြန်ဆိုရေးသားခဲ့ကြပြီးဖြစ်သည်။ အများနှင့်စိမ်းလှသည့် နည်းစနစ်တစ်ခုတော့မဟုတ်။ လက်တွေ့ကျင့်သုံးကြရန်၊ ပြောင်းလဲကြရန်သာ လိုအပ်နေသည်ဟု မြင်သည်။

ယနေ့ချိန်ခါမျိုးတွင် တိုးတက်မှုကို အားလုံးလိုချင်နေသည်မှာ သေချာသည်။ ယနေ့ဘေးကျပ်နံကျပ်ဖြစ်နေသည့် ငြိမ်းချမ်းရေး၊ ရခိုင်ဒေသအရေး၊ စီးပွားရေး စတဲ့အခက်အခဲများကို ကျော်လွှားရန်သည် အတ္တစွဲများ၊ အတိတ်၏လောင်းရိပ်များအောက်မှ ထွက်ကြရန် လိုအပ်ပေလိမ့်မည်။ အပျက်သဘောအယူအဆသက်သက်ဖြင့် တိုးတက်အောင် ဆောင်ရွက်နိုင်ပါသလား။ ဆောင်ရွက်နိုင်မည်ဟု မယုံကြည်ပါ။ သို့ဆိုပါလျှင် မိမိတို့၏စနစ်အပြောင်းအလဲ မြန်ဆန်ဖို့၊ တိုးတက်ဖို့ဆိုပါလျှင် အတွေးအခေါ်အယူ အဆဟောင်း နှောင်ကြိုးများမှရုန်းထွက်ဖို့ လိုအပ်မည်ဖြစ်ပြီး စနစ်သစ်တွင် အတွေးအမြင်သစ်များဖြင့်သာ ခရီးတွင်နိုင်မည်ဖြစ်ပါကြောင်း တိုက်တွန်းရေးသားလိုက်ရပါသည်။

သိန်းထွန်း (IR)