News

POST TYPE

PERSPECTIVE

မြင့်တက်နေတဲ့ ဒေါ်လာဈေးနဲ့ နိမ့်ကျနေတဲ့ ပြည်တွင်းထုတ်ကုန်
28-Jul-2018 tagged as ဒေါ်လာဈေး

ဒေါ်လာဈေးများ တရိပ်ရိပ်တက်လာနေသည်မှာ ယခုရက်ပိုင်းတွင် ၁၄၃၀ ကျပ်နားအထိသို့ပင် ဆိုက်ရောက်လာနေခဲ့သည်။ ဗဟိုဘဏ်၏ ရည်ညွှန်းပေါက်ဈေးမှာ ၁၄၂၄ ကျပ်ဖြစ်သည်။ သို့ဖြစ်၍ ငွေကြေးလဲလှယ်နှုန်း မြင့်တက်လာခြင်းနှင့်အတူ မြန်မာကျပ်တန်ဖိုးကျကာ ငွေကြေးဖောင်းပွမှုနှုန်း မြင့်လာသည်။ ဤနည်းအားဖြင့် သွင်းကုန်ပစ္စည်းများအားလုံး ကုန်ဈေးနှုန်းကြီးမြင့်လာနေသည်။ ကုန်ဈေးနှုန်းကြီးမြင့်လာခြင်းဒဏ်ကို အခြေခံလူတန်းစားများဖြစ်သည့် နိုင်ငံ၏ ၇၀ ရာခိုင်နှုန်းသောအလုပ်သမား၊ လယ်သမားများနှင့် လခစားနိုင်ငံ့ဝန်ထမ်းများ အများဆုံးခံစားရသည်။ လက်ရှိအခြေအနေတွင် အမေရိကန်နှင့် တရုတ်တို့အကြားဖြစ်ပွားနေသည့် ကုန်သွယ်ရေးစစ်ပွဲကြောင့် ဒေါ်လာဈေးမှာ ကျရိပ်မရှိနိုင်။ တရုတ်ယွမ်ဈေးမှာမူ ယခုရက်ပိုင်း အနည်းငယ်ကျဆင်းသွားသည်ဟုဆိုသည်။ ယခင်နှစ် သမ္မတအသစ်ထရမ့် စတက်လာချိန် စီးပွားရေးမူဝါဒသစ်အရ အခွန်နှုန်းထားများကို လျှော့မည်ဆိုသဖြင့် အတိုးနှုန်းများတိုးမြှင့်လာခြင်းကြောင့် ဒေါ်လာဈေးနှုန်းမှာ ကျရိပ်မရှိ၊ ထပ်တက်လာဖို့ပင်ရှိသည်ဟု ကမ္ဘာ့သတင်းများက ခန့်မှန်းထားခဲ့သည်မှာ မှန်နေခဲ့သည်။ ကမ္ဘာ့နိုင်ငံများတွင် ဒေါ်လာဈေးကျနေချိန်တွင်လည်း မြန်မာကျပ်ငွေ၏တန်ဖိုးမှာ ဆိုသလောက်တက်လာခြင်းမရှိ။ ယနေ့အချိန်ကာလတွင် အမေရိကန်နှင့်တရုတ်တို့အကြား စီးပွားရေးအားပြိုင်မှုဖြစ်နေချိန်၊ ကမ္ဘာ့နိုင်ငံများ၌ ဒေါ်လာဈေးတက်နေချိန်တွင်မူ ပို၍သာဆိုးနေလေတော့သည်။ ဤသို့ဖြင့် ဒေါ်လာဈေးတက်နေခြင်းကို မည်သို့ဖြေရှင်းကြမည်ဟူသော အထူးကိစ္စတစ်ရပ်ကို အစိုးရနှင့် စီးပွားရေးလုပ်ငန်းရှင်များအကြား၊ ဌာနဆိုင်ရာများနှင့်ပြည်သူများအကြား၊ ဗဟိုဘဏ်နှင့် ပုဂ္ဂလိကဘဏ်လုပ်ငန်းရှင်များအကြား စဉ်းစားကာ အတွေးပွားလျက် ခေါင်းခဲစရာပြဿနာဘက်သို့ ချဉ်းကပ်လာလျက် ရှိနေလေတော့သည်။

ထိုသို့သောအခြေအနေများတွင် မြင့်တက်လာနေသည့် ဒေါ်လာဈေးများ ကျဆင်းရေးမှာ ပြည်ပမှဒေါ်လာဝင်ငွေများများ ရရှိဝင်ရောက်လာနိုင်သည့် လမ်းကြောင်းများအပေါ် စဉ်းစားကြည့်ကြသည့်အခါ နယ်စပ်ကုန်သွယ်ရေးလမ်းကြောင်း (Border Trade) နှင့် ပင်လယ်ရေကြောင်းကုန်သွယ်မှုလမ်းကြောင်း (Normal Trade) နှစ်ခုရှိသည်။ ထိုလမ်းကြောင်းအနက် ပထမလမ်းကြောင်းဖြစ်သည့် နယ်စပ်ကုန်သွယ်ရေးလမ်းကြောင်းတွင် အဓိကကျသည့် ပြည်တွင်းထွက်ကုန်ပစ္စည်း (ဆန်၊ သကြား၊ ပြောင်း) အများဆုံးမှာ တရုတ်နိုင်ငံသို့ တင်ပို့နေကြရသဖြင့် ယွမ်ငွေဖြင့်သာ ရရှိနေကြသည်။ ထိုရရှိသည့်ယွမ်များကိုလည်း တရားဝင်ဘဏ်စနစ်ဖြင့် ချိတ်ဆက်ထားခြင်းမှာ နည်းပါးလှသည်။ ဒေါ်လာလိုချင်လျှင် စင်ကာပူမှ ကုန်သည်များထံ အပူကပ်ကာ အောက်ဈေးဖြင့် တစ်ဖန်ညှိနှိုင်းကာ လဲလှယ်ကြရမည်ဟု ကြားရသည်။ သည့်အတွက် Export လုပ်ငန်းအများစုမှ ဒေါ်လာဝင်ရောက်လာနိုင်ခြေရာခိုင်နှုန်းမှာ နည်းပါးလှချေသည်။ တစ်ဖန် သင်္ဘောတစ်စင်းလျှင် ဒေါ်လာ ၇ သန်း၊ ၈ သန်းခန့် တင်ဆောင်ပြီး အတော်အတန်ရင်းနှီးမြှုပ်နှံကြသည့် ပင်လယ်ရေကြောင်းကုန်သွယ်မှုလမ်းကြောင်းသည်လည်း ၃၊ ၄ လမှသာ တစ်ကြိမ်ကူးသန်းသွားလာနေကြရသဖြင့်လည်း နယ်စပ်ကုန်သွယ်ရေးကဲ့သို့ အရမ်းကြီးအလုပ်မဖြစ်ဟုဆိုသည်။ တစ်ဖန် နယ်စပ်ကုန်သွယ်ရေးဘက်တွင် ဆန်တစ်တန်လျှင် ဒေါ်လာ ၄၀၀ ခန့် ဈေးရရှိနေချိန်တွင် ပင်လယ်ရေကြောင်းဘက်တွင်မူ ၃၀၀ ခန့်သာ ရရှိနေကြသဖြင့်လည်း ဒေါ်လာဝင်ရောက်လာနိုင်သည့်ဘက်သို့ ထုတ်ကုန်များသွားဖို့အရေး ဝေးနေကြခြင်းလည်းဖြစ်နိုင်သည်။ သို့ဖြင့် ပြည်ပမှ နိုင်ငံခြားငွေ (ဒေါ်လာ) ရှာဖွေရရှိနိုင်မည့်အရေးမှာ ဝေးသထက်ဝေးနေသည်။ ကိုယ့်ပြည်တွင်းသို့သာ Import သွင်းကုန်ပစ္စည်းများ များများစားစား ဝင်ရောက်လာနေသည်။ ပြည်တွင်းတွင် ပြည်သူအများစားသုံးနေကြသည့် စားသုံးဆီနှင့် မော်တော်ယာဉ်အများအပြားအားထားသုံးစွဲနေကြရသည့် စက်သုံးဆီများ၏ ၈၀ ရာခိုင်နှုန်းမှာ ပြည်ပမှ ဒေါ်လာဖြင့်မှာယူတင်သွင်းနေကြရခြင်းဖြစ်သည်။ ဒီအတွက် ပြည်တွင်းမှဒေါ်လာများသာ ပြည်ပသို့ထွက်ဖို့ရှိသည်။ ဝင်လာနိုင်ဖွယ်ရာမရှိ။ ဤသို့ဖြင့် ဒေါ်လာဈေးမှာ အကျဘက်သို့ဦးတည်မလာနိုင်ဟု စီးပွားရေးဆိုင်ရာ ကျွမ်းကျင်သူများက ထောက်ပြကြသည်။

တစ်ဖန် ထုတ်ကုန်များကို ပြည်ပနိုင်ငံများရှိဈေးကွက်သို့ မိတ်ဆက်ခြင်း (Export Promotion)၊ နောက် သွင်းကုန်အစားထိုးကုန်များ ထုတ်လုပ်ဖြန့်ဖြူးခြင်း (Import Substitute)  ဆိုသည်မှာလည်း ရေပေါ်အရုပ်ရေးမိသလိုပင် ယနေ့အချိန်အထိတော့ မည်သည့်အရာမျှ မထင်လာသေးချေ။ ဆိုလိုသည်မှာ မိမိပြည်တွင်းမှထုတ်လုပ်သည့်ပစ္စည်းများ၏ အရည်အသွေး၊ ဝယ်လိုအားအပေါ် ဖြန့်ဖြူးနိုင်သည့်ပမာဏ၊ ထုပ်ပိုးမှု၊ ဈေးကွက်ယှဉ်ပြိုင်နိုင်မှုတို့မှာ အခြားနိုင်ငံများနှင့်ယှဉ်လျှင် အတော်အတန် ခေတ်နောက်ကျလျက်ရှိနေသည့်အတွက်ဖြစ်သည်။ ပြည်တွင်းထွက်ကုန်များတွင် အများဆုံးဖြစ်သည့် ဆန်၊ ပဲများသည်လည်း ယခင်နှစ်များထက် ကျဈေးမိနေကြသည်။ ထုတ်လုပ်မှုမှာလည်း တိုးတက်မှုနည်းပါးသည်ဟု ကုန်သည်များအသိုင်းအဝိုင်းက ဆိုကြသည်။ တောင်သူများအတွက် စိုက်ပျိုးရေးသွင်းအားစုများဖြစ်သည့် ဓာတ်မြေဩဇာနှင့် စိုက်ပျိုးဆေးများမှာ ပြည်ပမှ အများဆုံးဝင်ရောက်လာသဖြင့် ဒေါ်လာဈေးတက်ခြင်းနှင့်အတူ လိုက်ပါကြီးမြှင့်လျက်ရှိသည်။ ဒီအတွက် မူလထုတ်လုပ်သူများ (Primary Producer) များမှာ နာတာရှည်ရောဂါသည် နာလန်မထူနိုင်သကဲ့သို့သာ ဖြစ်နေကြရရှာသည်။ ၎င်းတို့အတွက် လုံလောက်သည့်ချေးငွေနှင့် ခေတ်မီနည်းပညာများ ရရှိဖို့သည်ဝေးစွ၊ ၎င်းတို့ထုတ်လုပ်ကြသည့် ထုတ်ကုန်များပင်လျှင် ဈေးကွက်မဝင်ကြဟု ဆိုကြသည်။ ပြည်တွင်းမှ အသေးစားအလတ်စား စက်မှုလုပ်ငန်းများ (SME) အနေနှင့်လည်း ပြည်ပသို့ ပို့ကုန်အတွက် လမ်းစမမြင်၊ နိုင်ငံတော်မှကူပေးမည့် အတိုးနှုန်းသက်သာသည့်ချေးငွေမှာလည်း ဝေးနေဆဲပင် ရှိနေသေးသည်။ ကူကယ်သူဝေးသမို့ သူတို့ပင် မနည်းကျားကန်ထားကြရသည်ဟု ပြောကြပြန်သည်။ ပြည်ပမှ ဒေါ်လာများများ ရရှိနိုင်မည့် မီးခိုးမထွက်သည့်စက်ရုံများအဖြစ် ထင်ပေါ်ကျော်ကြားသည့် ကမ္ဘာလှည့်ခရီးသွားများ များများစားစား ဝင်ရောက်လာရေးဆိုသည်မှာလည်း ယခုရက်ပိုင်းထွက်ပေါ်လာသည့် သတင်းများအရဆိုလျှင် ယခင်နှစ်ထက် ပိုမိုလျော့ကျသွားသည်ဟု ဆိုနေကြပြီး ဟိုတယ်များပင် အချို့က ပိတ်သိမ်းထားလာကြရသည်အထိ ဖြစ်နေသဖြင့် ဒေါ်လာရရှိရေးအိပ်မက်မှာ မှေးမှိန်ကြရပြန်သည်။

တစ်ဖန် မွေးမြူရေးဘက်ခြေဦးလှည့်ကာ ရေထွက်ငါး၊ ပုစွန်ဘက်လှည့်ပြီး ပြည်ပပို့ကုန်အတွက် တွေးကြည့်ကြလျှင်လည်း ထိုသူတို့သည်လည်း ထိုနည်း၎င်းဟုဆိုရမလိုပင်၊ အားတက်စရာလမ်းစနှင့် ဝေးကွာလျက်ရှိကြသည်။ နိုင်ငံ့သယံဇာတများဖြစ်သည့် သတ္တု၊ သစ်၊ ကျောက်မျက် တို့ဆိုသည်မှာလည်း မှောင်ခိုလမ်းကြောင်းဖြင့်သာ အလုပ်ဖြစ်နေသည်က များသယောင်ဖြစ်ပြီး တရားဝင်ကုန်သွယ်ရေးလမ်းကြောင်းပေါ် တက်မလာ။ ဤသို့ဖြင့် ယနေ့ကာလတွင် အလွန်ရှားပါးလာလျက်ရှိရာ ပြည်ပသို့ပို့ပြီး ဒေါ်လာရှာကြရမည်ဆိုသည့်အရေးမှာ အတော်ပင်တွေးယူရမည့် အခြေအနေဖြစ်နေသဖြင့် ဒေါ်လာရရှိရေးလမ်းစများ ပျောက်ချင်းမလှ ပျောက်ကြရသည်။ ဒီအတွက်ပင် ဒေါ်လာဈေးများသည် ကျရိပ်မရှိ။ တက်ဖို့သာရှိသည်ဟု လုပ်ငန်းရှင်များက ဆိုကြပြန်သည်။

ဒေါ်လာဈေးတက်နေခြင်းမှာ အမေရိကန်သမ္မတအပြောင်းအလဲနှင့် အခြားကမ္ဘာ့နိုင်ငံများတွင် ဖြစ်ပျက်နေသည့် နိုင်ငံရေးမတည်ငြိမ်မှုများ၊ စီးပွားရေးပျက်ကပ်များကြောင့် ကမ္ဘာနှင့်အဝန်းဖြစ်နေသဖြင့် မိမိတို့နိုင်ငံအတွင်း၌လည်း လိုက်ပါတက်နေသည်မှာ သမားရိုးကျဖြစ်စဉ်အနေဖြင့် လက်ခံနိုင်စရာရှိသည်။ သို့သော်လည်း အခြားနည်းလမ်းအရ စိုးရိမ်ကြောင့်ကြမှုများကြောင့် ပြည်တွင်းကဒေါ်လာများကို ဗဟိုဘဏ်ပေါက်ဈေးထက် ၄၀-၅၀ ဈေးအပိုပေးပြီး ဝယ်ယူသိုလှောင်နေသည့် စီးပွားရေးလုပ်ငန်းရှင်များရှိနေနိုင်သကဲ့သို့ နိုင်ငံရေးခြေထိုးမှုများကြောင့် နိုင်ငံရေးအရ မတည်မငြိမ်ဖြစ်စေရန် နိုင်ငံရေးထိုးနှက်ချက်တစ်ရပ်အနေနှင့် တမင် ငွေပင်ငွေရင်းများများစိုက်ထုတ်ပြီး ရသမျှ ခြစ်ကုပ်ဝယ်ယူသိုလှောင်ထားသဖြင့်လည်း ဖြစ်နိုင်သည်။

သို့သော်လည်း ထိုနည်းများမှာ ဖြစ်နိုင်ခြေရာခိုင်နှုန်း အနည်းအကျဉ်းသာပါဝင်ပြီး အထက်တွင်တင်ပြခဲ့သည့် မိမိနိုင်ငံအတွင်းမှ ထုတ်ကုန်များကို ပြည်ပသို့တင်ပို့ပြီး နိုင်ငံခြားငွေမရှာနိုင်ကြဘဲ ပြည်ပမှသာ မိမိပြည်တွင်းအတွက် ပြန်လည်မှာယူသုံးစွဲနေကြရသည့် ပမာဏများခြင်းကြောင့်သည်ပင်လျှင် အဓိကအကြောင်းခြင်းအရာတစ်ရပ် ဖြစ်နိုင်ခြေများလှသည်။ ဤတင်ပြချက်များမှာ စီးပွားရေးဆိုင်ရာတိုးတက်မှု (Economic Growth) များ စံနှုန်းဖြင့် သီအိုရီများချကာ တွက်ချက်ယူကြခြင်းထက် မှန်နိုင်သည်။

ဥပဒေပိုင်းဆိုင်ရာသို့ လှည့်တွေးယူကြလျှင်လည်း နောက်ဆုံးအဆင့်အနေနှင့် ထုတ်ပြန်ခဲ့သည့် မြန်မာနိုင်ငံရင်းနှီးမြှုပ်နှံမှုဥပဒေအသစ်နှင့် ကုမ္ပဏီဥပဒေအသစ်တို့အရ ဖြေလျှော့မှုများအကြားတွင် နိုင်ငံခြားရင်းနှီးမြှုပ်နှံမှုများ ဝင်ရောက်လာလျှင်လည်း ဒေါ်လာဈေးများ ကျသွားနိုင်သည်ဟု အချို့ကထင်ကြသည်။ သို့သော် ပြည်တွင်းတွင် လျှပ်စစ်မီးလိုသလောက် မရရှိမှု၊ မြေဈေးကြီးမြင့်မှု၊ ငွေကြေးမတည်ငြိမ်မှု၊ ငွေလဲလှယ်မှုနှုန်းမြှင့်တက်မှု၊ နိုင်ငံခြားသားများအတွက် လဝကဥပဒေများပါပြဋ္ဌာန်းချက်အချို့ တင်းကျပ်ထားမှု၊ တရားဥပဒေစိုးမိုးမှုအပြင် ထုတ်ကုန်များအပေါ် မူပိုင်ခွင့်ပြဿနာများရှိနေမှုနှင့် အခွန်အခစနစ် မမှန်ကန် မသင့်မြတ်သေးမှု စသည် စသည်တို့အကြားတွင် ၎င်းတို့အတွက် တုံ့နှေးတုံ့နှေးဖြစ်နေကြဦးမည်ဖြစ်သည်။ နိုင်ငံတော်ငွေကြေးစီးဆင်းမှုများအတွက် အဓိကဦးနှောက်သဖွယ်ဖြစ်နေသည့် ဗဟိုဘဏ်အနေနှင့်လည်း ဗဟိုဘဏ်ဥပဒေပါ ပြဋ္ဌာန်းချက်များအားလုံးကိုပါ အကောင်အထည်ဖော်နိုင်ရေးအခြေအနေနှင့် သူ့ထံတွင်ထားရမည့် အရန်နိုင်ငံခြားငွေဆိုသည်မှာလည်း ကမ္ဘာတွင် အနည်းဆုံးဖြစ်နေသည်မှာ သေချာသလောက်ပင် ရှိနေဦးမည်ဖြစ်သည်။ အခြားငွေကြေးနှင့်ဆိုင်သည့် ဥပဒေများဖြစ်သည့် ယခင်အစိုးရလက်ထက်တွင် ပြဋ္ဌာန်းခဲ့သည့် ဘဏ်နှင့် ငွေရေးကြေးရေးဥပဒေ၊ နိုင်ငံခြားသုံးငွေစီမံခန့်ခွဲ မှုဥပဒေနှင့် ယှဉ်ပြိုင်မှုဥပဒေတို့ပါ ပြဋ္ဌာန်းချက်များမှာလည်း မြေပြင်တွင် တိတိပပ အကောင်အထည်ဖော်ကြဖို့လမ်းစနှင့် ဝေးကွာနေကြသည်မှာ ခေတ်စနစ်နှင့်မညီ၍လည်း ဖြစ်နိုင်သည်။ လက်တွေ့အခြေအနေတွင် ကျင့်သုံး၍မရနိုင်၍လည်း ဖြစ်နိုင်သည်။ ဒီအတွက် ထိုဥပဒေများကိုလည်း ပြန်လည်စိစစ်ကြရမည်။ ပြင်ဆင်သင့်လျှင် ပြင်ဆင်ကြရဦးမည်ဖြစ်သည်။

Primary Producer များဖြစ်သည့် တောင်သူလယ်သမား၊ စက်မှုလုပ်ငန်းရှင်များအရေးအတွက် နိုင်ငံတော်အစိုးရမှ ကူညီထောက်ပံ့ရန်၊ ဆောင်ရွက်ပေးရန် ပြဋ္ဌာန်းထားပေးခဲ့ဖူးသည့် တောင်သူလယ်သမားများ၏ အကျိုးစီးပွားကာကွယ်မြှင့်တင် စောင့်ရှောက်ရေးဥပဒေနှင့် အသေးစားအလတ်စား စက်မှုလုပ်ငန်းများဥပဒေဆိုသည်မှာလည်း ယနေ့အချိန်တွင် တိမ်မြုပ်ပျောက်ကွယ်လုနီးပါးဖြစ်နေသည်။ ဥပဒေအရ ဖွဲ့စည်းထားသည့် ဦးဆောင်အဖွဲ့ဆိုသည်မှာလည်း ဦးမဆောင်နိုင်ကြသေးပေ။ ဒေါ်လာဈေးတက်ပြီး ကုန်ဈေးနှုန်းကြီးမြင့်ကာ ပြည်တွင်းထုတ်ကုန်များ ယုတ်လျော့နေမှုအပေါ် ဥပဒေပြုရေးမဏ္ဍိုင်မှာလည်း ဤအတိုင်းကြည့်နေကြဖို့မသင့်တော့ချေ။ အချုပ်အားဖြင့်တင်ပြရလျှင် ယနေ့အချိန်အခါသည် ခေတ်ဟောင်းမှ နည်းဟောင်းများအတိုင်း စနစ်များမပြောင်းဘဲ လုပ်နည်းလုပ်ဟန်လေးသာပြောင်းပြီး လုပ်နေကြရုံ၊ အပြောသန်နေကြရုံမျှဖြင့်လည်း အလုပ်မဖြစ်ကြတော့ပေ။ ခေတ်ဟောင်းတွင် စကားလုံးများစွာဖြင့် ပြည်သူများ မစားရဝခမန်း အာဘောင်အာရင်းသန်သန်ဖြင့် ပြောဆိုခဲ့ကြဖူးပြီးဖြစ်သည်။ သို့သော် ယနေ့လက်ရှိအဖြေ (Result Page) မှာ မြင်ကြ၊ ကြားကြသည့်အတိုင်းပင်ဖြစ်သည်။ တွန်းကားတွန်း၏ မရွေ့လျှင် အလုပ်မဖြစ်နိုင်။ အလုပ်ဆိုသည်မှာ ပြီးမြောက်မှုအရွေ့နှင့် ထွက်ပေါ်လာသည့်ရလဒ်အပေါ်မှာသာ တိုင်းတာယူကြလေ့သဘောရှိသည်။ ဤသဘောများကို ကျေညက်ကြရန် အထူးလိုအပ်လာနေပြီဖြစ်သည်။ ပြည်သူများအနေဖြင့်လည်း ရှင်ကြီးဝမ်းထဲလည်း ဝင်ခဲ့ကြဖူးသည်။ ရှင်ငယ်ဝမ်းထဲသို့လည်း ဝင်ခဲ့ကြဖူးပြီ။ သူတို့ ပြောကြသည်မှာ ချေးစော်အတော်နံလှသည်ဟုသာ ဆိုကြသည်။ သို့ဖြစ်၍ ယနေ့အချိန်အခါတွင် ဖြစ်ပေါ်နေသည့် ဒေါ်လာဈေးမြင့်တက်ခြင်းကြောင့် ငွေကြေးလဲလှယ်မှုနှုန်းများကာ ကုန်ဈေးနှုန်းကြီးမြင့်မှုဒဏ်ကို အထူးသဖြင့် ခံစားနေကြရသည့် အခြေခံလူတန်းစား တောင်သူလယ်သမားများ၊ နိုင်ငံ့ဝန်ထမ်းများ၊ အလုပ်သမားထုများအတွက် စေတနာထားပြီး အုပ်ချုပ်ရေးအာဏာရှိသူများ၊ စီမံဖန်တီးနိုင်ခွင့်ကို ပြည်သူများက ပေးအပ်ထားသူများက အထူးကိစ္စတစ်ရပ်အနေနှင့် အချိန်မဆွဲဘဲ မနှေးအမြန် စီးပွားရေးတိုးတက်ကောင်းမွန်အောင် ဆောင်ရွက်နိုင်ရေးမှာ အချိန်တန်နေပြီဖြစ်ပါကြောင်း တိုက်တွန်းရေးသားတင်ပြလိုက်ရပါသည်။

သန်းဖြိုးနိုင်