News

POST TYPE

PERSPECTIVE

ဇွန်ပုလဲ ... ကဖျက်ယဖျက်နှင့် တကသ အဆောက်အအုံ (၂)
25-Jun-2018

ဇွန် ရန်ကုန်တက္ကသိုလ်ကျောင်းသားလှုပ်ရှားမှု ငွေရတုအကြို ၂၀၁၂ ခုနှစ်

“တို့လူလေးများဆိုသလို” တို့နှင့် ဇွန်ပွဲတွင် ထဲထဲဝင်ဝင်ပါဝင်ဆင်နွှဲခဲ့သည့် ကျောင်းသားဟောင်းများသည် ၂၀၁၂ ခုနှစ်တွင် ဆုံမိကြ၊ ပြောဆိုဆွေးနွေးကြပါလေပြီ။ ၁၉၈၈ ဇွန်ပွဲကို ပြန်လှန်ပြောဆိုကာ ကျောင်းသားအရေး၊ ဒီမိုကရေစီရေး၊ တစ်ပါတီစနစ်ဆန့်ကျင်ရေးများကို ပြန်လည်သုံးသပ်အပြီးမှာ...

- ၁၉၈၈ ဇွန်ပွဲ ၂၄ နှစ်မြောက် (ငွေရတုအကြို) အခမ်းအနားကျင်းပရေး

- ကျင်းပသည့်အခါမှာလည်း ပုံမှန်ရိုးစင်းသည့် အခမ်းအနားမဖြစ်စေဘဲ အဓိပ္ပာယ်ရှိရှိ ကျင်းပနိုင်ရေး

- အဓိပ္ပာယ်ရှိစေရန် လုပ်ငန်းအကောင်အထည်တစ်ခုခု ဖော်ဆောင်နိုင်ရေး

စသည်စသည်ဖြင့် ကိုညိုထွန်း၊ ကိုဆန်နီ၊ ကိုသော်တာ၊ ကိုအေးကျော်၊ ကိုကျော်စိုးလင်း (အကြီးကောင်)၊ ကိုထွားကြီး၊ ကိုမြင့်ဆွေ၊ ကိုကျော်ကျော်မင်း၊ ကိုအောင်ကြီး၊ ကိုကိုလတ် (ခရစ္စတိုဖာ)၊ ကိုအဂ္ဂ (အောင်မျိုးလွင်) တို့ ဦးဆောင်ပြီး ကျောင်းသားဟောင်း ၁၅ ဦးဝန်းကျင်တို့သည် အစည်းအဝေး အကြိမ်ကြိမ်ပြုလုပ်ကြပါသည်။ အစည်းအဝေး အများဆုံးပြုလုပ်သည့် အခန်းမှာ လွစ္စလမ်း (ဆိပ်ကမ်းသာလမ်း) ရှိ ကိုအဂ္ဂ (အောင်မျိုးလွင်) ၏ အခန်းမှာ ဖြစ်ပါသည်။ ငွေရတုအကြို နှစ်ပတ်လည်အခမ်းအနား ဖြစ်မြောက်ရေးကော်မတီဖွဲ့ကြပါသည်။ 

ထိုကော်မတီသည် “၁၉၈၈ (ဇွန်) တစ်ပါတီစနစ်ဆန့်ကျင်ရေး ရန်ကုန်တက္ကသိုလ် ကျောင်းသားလှုပ်ရှားမှု” ဟူ၍ အမည်ပေးပြီးနောက် ညီညွတ်ရေး၊ ငြိမ်းချမ်းရေး၊ ဒီမိုကရေစီရေးဟူသော အခြခံမူသုံးရပ်ကိုလည်း ချမှတ်ခဲ့ကြကာ ကျောင်းသားထု၏သင်္ကေတ ခွပ်ဒေါင်းပုံကိုလည်း ၁၉၅၀ ကျော်က အိုးဝေမဂ္ဂဇင်းတွင်ဖော်ပြခဲ့သည့် (ဦး) မောင်ငွေထွန်း၏ စကတ်ခ်ျခွပ်ဒေါင်းပုံကို သုံးစွဲရန် ဆုံးဖြတ်ခဲ့ကြပါသည်။ 

၁၉၈၈ ဇွန် ငွေရတုအကြိုအခမ်းအနား ဖြစ်မြောက်ရေးကော်မတီသည် အစည်းအဝေးများ အကြိမ်ကြိမ်ပြုလုပ်ခဲ့ပြီး အစည်းအဝေးတစ်ခုတွင် အေးကျော် (ခ) ဉာဏ်ကျယ်လေးက “ကျွန်တော်တို့ကျင်းပတဲ့ ဒီအခမ်းအနားမှာ အဓိပ္ပာယ်ရှိတဲ့လုပ်ငန်းတစ်ခုဖော်ဖို့ဆိုရင် တကသ အဆောက်အအုံ ပြန်ဆောက်ဖို့ ကြိုးစားကြရင် ကောင်းမယ်ထင်တယ်” အားလုံးသောမျက်လုံးများ လက်ခနဲဖြစ်သွားကြသည်။ သဘောတူကြသည်။ ဆုံးဖြတ်ကြသည်။ “တကသအဆောက်အအုံ ပြန်လည်တည်ဆောက်ရေး” ကြိုးစားကြရန်..။ အလုပ်ကားပေါ်လာချေပြီ။ 

တို့လူလေးများ အလုပ်ရှုပ်ကုန်ကြပါသည်။ အခမ်းအနားအောင်မြင်ရေးအတွက် ရန်ပုံငွေရှာသူကရှာ၊ ပို့စကတ်၊ ကီးချိန်းလုပ်သူများကလုပ်၊ နိုင်ငံတော်သမ္မတနှင့် ဒေါ်အောင်ဆန်းစုကြည်ထံပို့ရန်အတွက် စာကြမ်းရေးသူများကရေး။ ထပ်ခါထပ်ခါအစည်းအဝေးများပြုလုပ်ပြီး ၂၀၁၂ ခုနှစ် မေလ ၂၃ ရက်အစည်းအဝေးမှာတော့ အနည်းငယ်ပြုံးယောင်သန်းလာပါလေပြီ။ 

“ကျောင်းသားသမဂ္ဂများ ဥပဒေနှင့်အညီ တရားဝင်ပေါ်ပေါက်လာရေးနှင့် ကျောင်းသားသမဂ္ဂအဆောက်အအုံ ပြန်လည်တည်ဆောက်ရေးအတွက် မျိုးဆက်ဟောင်း၊ မျိုးဆက်သစ်ကျောင်းသားများသို့ ပန်ကြားလွှာ” ထွက်ပေါ်လာပါသည်။ ပန်ကြားလွှာထဲမှ အချို့အပိုဒ်များကို ပြန်လည်ဖော်ပြပါသည်။ 

(၄) အဆောင်စည်းကမ်းသစ်များ ဖျက်သိမ်းရေးကို ရန်ကုန်တက္ကသိုလ်ကျောင်းအတွင်း ငြိမ်းချမ်းစွာစုဝေးတောင်းဆိုခဲ့ကြသော တက္ကသိုလ်ကျောင်းသားများအား တော်လှန်ရေးကောင်စီမှ မောင်းပြန်သေနတ်များဖြင့် ပစ်ခတ်ခြင်း၊ ရိုက်နှက်ခြင်း၊ ကျောင်းသားသမဂ္ဂခေါင်းဆောင်များအား ဖမ်းဆီးခြင်းများ ပြုလုပ်ခဲ့ပြီး ဇူလိုင်လ ၈ ရက်နေ့ နံနက် ၅ နာရီခန့်တွင် တကသအဆောက်အုံကြီးကို တစ်စစီဖောက်ခွဲဖျက်ဆီးပစ်ခဲ့ပါသည်။ 

(၅) ထိုအချိန်မှစ၍ လွတ်လပ်ရေးကြိုးပမ်းမှုများတွင် သမိုင်းအစဉ် အလာကြီးမားခဲ့သော ဦးအောင်ဆန်းကဲ့သို့သော အမျိုးသားခေါင်းဆောင်ကြီးများကို မွေးထုတ်ပေးနိုင်ခဲ့သော ခေတ်အဆက်ဆက်ကျောင်းသားများအရေး ကိုယ်စားပြုဆောင်ရွက်ပေးနိုင်ခဲ့သော ကျောင်းသားသမဂ္ဂများ တရားဝင်ပျောက်ကွယ်သွားခဲ့ရသည်မှာ နှစ်ပေါင်း ၅၀ မျှ ရှိလာခဲ့ပြီဖြစ်ပါသည်။ 

(၆) ဒီမိုကရေဏီခေတ်ဦးကာလ ပွင့်လင်းလွတ်လပ်မှုရှိလာချိန်တွင် သမိုင်းတန်ဖိုးကြီးမားသော ကျောင်းသားသမဂ္ဂအဆောက်အအုံ ပြန်လည်တည်ဆောက်ရေးနှင့် မျိုးဆက်သစ်ကျောင်းသားများအတွက် ကျောင်းသားသမဂ္ဂအဖွဲ့အစည်းအဆင့်ဆင့်ကို ဥပဒေနှင့်အညီ တရားဝင်ပေါ်ပေါက်လာရေးအတွက် မျိုးဆက်ဟောင်း၊ မျိုးဆက်သစ်ကျောင်းသားများအားလုံး၌ တာဝန်ရှိသည်ဟု ကျွန်ုပ်တို့ ယုံကြည်ပါသည်။ 

(၇) ထို့ကြောင့် ကျောင်းသားသမဂ္ဂများ ဥပဒေနှင့်အညီ တရားဝင်ပေါ်ပေါက်လာရေးနှင့် ကျောင်းသားသမဂ္ဂအဆောက်အုံသစ်ကြီးကို မူလနေရာဟောင်း၌ ပြန်လည်တည်ဆောက်နိုင်ရေးအတွက် မျိုးဆက်ဟောင်း၊ မျိုးဆက်သစ်ကျောင်းသားများအားလုံး ညီညွတ်စွာ လက်တွဲပူးပေါင်းဆောင်ရွက်ကြပါရန် လေးစားစွာ မေတ္တာရပ်ခံအပ်ပါသည်။ 

ထို့ပြင် ၂၀၁၂ ခုနှစ် ဇွန်လ ၄ ရက်နေ့စွဲဖြင့် နိုင်ငံတော်သမ္မတကြီး ဦးသိန်းစိန်ထံသို့ အမြန်ချောဖြင့်ပေးပို့သောစာများထဲမှ အချို့အပိုဒ်များကို ပြန်လည်ဖော်ပြရသော်...

၎။ (င) သို့ဖြင့် ၁၉၂၆ ခုနှစ်တွင် တက္ကသိုလ်အဓိပတိ ဆာဟာကုတ်ဘတ်တလာ (Sir Harcourt Butler) ၏ မေတ္တာရပ်ခံချက်ဖြင့် ဆန်ကုန်သည်နှင့် ဆန်စက်ပိုင်ရှင်ကြီးဦးညိုက ငွေကျပ် ၁၇၀,၀၀၀ (တစ်သိန်းခုနစ်သောင်းကျပ်) လှူဒါန်း၍ စတင်တည်ဆောက်ခဲ့ပြီး ၁၉၃၀ ခုနှစ်တွင် ဆောက်လုပ်ပြီးစီးကာ ပါမောက္ခဦးဖေမောင်တင်က ကျောင်းသားသမဂ္ဂ ဥက္ကဋ္ဌကိုကျော်ခင်ကို လွှဲပြောင်းပေးအပ်ခဲ့သော ကျောင်းသားသမဂ္ဂ အဆောက်အအုံကြီးသည် အုတ်ပုံဘဝ ရောက်ခဲ့ရတော့သည်။ 

၇။ ယခုကဲ့သို့ ဒီမိုကရေစီနိုင်ငံတော်သစ်ကို ဦးတည်ချီတက်နေသော သမ္မတကြီးဦးဆောင်သည့် အစိုးရသစ်လက်ထက်တွင် အမျိုးသားပြန်လည်သင့်မြတ်ရေးလုပ်ငန်းစဉ်ကြီးအတွက် အလွန့်အလွန် အထောက်အကူပြုနိုင်မည်ဖြစ်သော ကျောင်းသားသမဂ္ဂများ ဥပဒေနှင့်အညီ တရားဝင်ပေါ်ပေါက်လာရေးနှင့် ကျောင်းသားသမဂ္ဂအဆောက်အအုံကြီး ပြန်လည်တည်ဆောက်နိုင်ရေး အမျိုးသားရေးလုပ်ငန်းစဉ်ကြီးကို ပြည်ထောင်စုသမ္မတမြန်မာနိုင်ငံတော်အစိုးရ၊ ပြည်သူ့လွှတ်တော်၊ အမျိုးသားလွှတ်တော်၊ နိုင်ငံရေးပါတီများ၊ အရပ်ဘက်အဖွဲ့အစည်းများ၊ ကျောင်းသားပြည်သူများ ပူးပေါင်းလျက် ဝိုင်းဝန်းဖော်ဆောင်နိုင်ရေးသည် အထူးအရေးကြီးသောလုပ်ငန်းစဉ်ကြီးဖြစ်မည်ဟု ဖြောင့်မတ်စွာ ယုံကြည်မိပါသည်။ 

၈။ သို့ဖြစ်ရာ မြန်မာ့လွတ်လပ်ရေးလှုပ်ရှားမှုသမိုင်း၏ အထိမ်းအမှတ်ဖြစ်သော သမိုင်းဝင်ကျောင်းသားသမဂ္ဂအဆောက်အအုံကြီး ဖြိုခွဲခံခဲ့ရသည့် နှစ် ၅၀ ပြည့်မြောက်သော ၂၀၁၂ ခုနှစ် ယခုနှစ်အတွင်းတွင် အမျိုးသားပြန်လည်သင့်မြတ်ရေး၏ မှတ်တိုင်တစ်ခုဖြစ်သော ကျောင်းသားသမဂ္ဂ အဆောက်အုံကြီးကို မူလနေရာဟောင်းတွင် ပြန်လည်အုတ်မြစ်ချတည် ဆောက်နိုင်ရေးနှင့် ကျောင်းသားသမဂ္ဂများ ဥပဒေနှင့်အညီ တရားဝင်ရပ်တည်ပေါ်ပေါက်လာနိုင်ရေးအတွက် ဒီမိုကရေစီနိုင်ငံတော်သစ်ဆီသို့ ဦးတည်ဖော်ဆောင်နေသည့် ပြည်ထောင်စုသမ္မတမြန်မာနိုင်ငံတော် အစိုးရအဖွဲ့ အကြီးအကဲဖြစ်သူ နိုင်ငံတော်သမ္မတကြီးမှ ခွင့်ပြုပေးပါရန် လေးစားစွာဖြင့် အဆိုပြုပန်ကြားအပ်ပါသည်။ 

ထိုစဉ်က ၎င်းစာကို ကိုညိုထွန်း၊ ကိုအေးကျော်၊ ကိုဆန်နီ၊ ကိုသော်တာ၊ ကိုမြင့်ဆွေ၊ ကိုကျော်စိုးလင်း၊ ကိုထွားကြီး၊ ကိုအဂ္ဂတို့ လက်မှတ်ထိုး၍ ကိုညိုထွန်းအိမ်လိပ်စာဖြင့် ပို့ခဲ့ခြင်းဖြစ်သလို မိတ္တူကိုလည်း သမ္မတများ၊ လွှတ်တော်များ၊ ပို့သင့်သည့်ဝန်ကြီးဌာနများနှင့်ဝန်ကြီးများ၊ ပါမောက္ခချုပ်များ၊ အမျိုးသားလူ့အခွင့်အရေးကော်မရှင်များသို့လည်း ဖြန့်ဝေခဲ့ပါသည်။ (သို့သော် မည်သို့မျှ ပြန်လည်အကြောင်းကြားသက်ရောက်ခြင်း မရှိခဲ့ပါ)

သို့နှင့် တို့လူလေးများသည် “၁၉၈၈ (ဇွန်) တစ်ပါတီစနစ်ဆန့်ကျင်ရေး၊ ရန်ကုန်တက္ကသိုလ်ကျောင်းသားလှုပ်ရှားမှု ငွေရတုအကြို နှစ်ပတ်လည်အခမ်းအနား” ကို ၂၀၁၂ ခုနှစ် ဇွန်လ ၁၇ ရက်နေ့တွင် တော်ဝင်နှင်းဆီ၊ သီရိရတနာခန်းမ (ရန်ကုန်မြို့) ၌ စည်ကားခမ်းနားစွာ ကျင်းပခဲ့ပါသည်။ “တကသအဆောက်အအုံ ပြန်လည်တည်ဆောက်ရေး” ကိုလည်း ဆွေးနွေးခဲ့ကြပါသည်။ အတည်ပြုခဲ့ကြပါသည်။ “တကသအဆောက်အအုံ ပြန်လည်တည်ဆောက်ရေးကော်မတီ (ယာယီ)” ကိုလည်း ၆၂ မျိုးဆက်များ၊ ၇၄၊ ၇၅၊ ၇၆ မျိုးဆက်များ၊ ၈၈ မျိုးဆက်များ၊ ၉၆ မျိုးဆက်များ၊ ၂၀၀၇ မျိုးဆက်များ ပါဝင်ခဲ့ကြပါသည်။ ထိုကော်မတီ၏ နာယကကြီးများမှာ ဆရာကြီးဒဂုန်တာရာ၊ ဦးတင်ထွန်း၊ ဦးကိုကိုကြီး (ဟန်ဂေရီ)၊ ဦးသာဘန်း၊ ဦးစောတင်အေး၊ ဦးသန်းတင်တို့ဖြစ်ကြပြီး အကြံပေးကော်မတီဝင်များမှာ ဦးလှရွှေ၊ ဦးတင်အောင်၊ ဦးအေးသာအောင်၊ ဦးတင်မောင် (ခ) ဒေါက်တာ မင်းသိန်း၊ ဦးလေးမြင့်တို့ဖြစ်ကြပြီး လုပ်ငန်းကော်မတီဝင်များမှာ မင်းကိုနိုင်၊ မင်းဇေယျ၊ ကိုကိုကြီး၊ ကိုဌေးကြွယ်၊ ကိုအောင်ထိုက်၊ ကိုစိုးဝင်း၊ ကိုရာကျော်၊ မနေရည်ဗဆွေ၊ ကိုညိုထွန်း၊ ကိုအေးကျာ်၊ ကိုဆန်နီတို့အပြင် ဗကသများ အဖွဲ့ချုပ် ဗဟိုလုပ်ငန်းကော်မတီမှ ၂ ဦးမှာ ကိုကျော်ကိုကို၊ မဖြိုးဖြိုးအောင်၊ ကျောင်းသားသမဂ္ဂများအဖွဲ့ချုပ် (ဖြစ်မြောက်ရေးကော်မတီ) မှ ၂ ဦး ကိုဒီငြိမ်းလင်း၊ ကိုစည်သူမောင်တို့ ဖြစ်ပါသည်။ 

ရန်ကုန်တက္ကသိုလ် ရှင်သန်ဖွံ့ဖြိုးရေးနှင့် တကသအဆောက်အအုံ ပြန်လည်တည်ဆောက်ရေးအဖွဲ့

“တကသအဆောက်အအုံ ပြန်လည်တည်ဆောက်ရေးကော်မတီ (ယာယီ) ၏ ပထမအကြိမ်အစည်းအဝေးကို ၂၀၁၂ ခုနှစ် ဇူလိုင် ၅ ရက်နေ့ M3 စားသောက်ဆိုင်တွင်ကျင်းပခဲ့ရာ ကော်မတီ၏အမည်ကို “ရန်ကုန်တက္ကသိုလ် ရှင်သန်ဖွံ့ဖြိုးရေးနှင့် တကသအဆောက်အအုံ ပြန်လည်တည်ဆောက်ရေးအဖွဲ့” ဟု အမည်ပြောင်းခဲ့သလို အဖွဲ့၏ရည်ရွယ်ချက်များမှာလည်း (၁) သမိုင်းအစဉ်အလာကြီးမားခဲ့သော ရန်ကုန်တက္ကသိုလ် ရှင်သန်ဖွံ့ဖြိုးရေး၊ (၂) ဒီမိုကရေစီနှင့်ကိုက်ညီသော တက္ကသိုလ်ပညာရေးစနစ်သို့ ပြုပြင်ပြောင်းလဲရေး၊ (၃) အစဉ်အလာကြီးမားခဲ့သော သမိုင်းဝင်တကသအဆောက်အအုံ ပြန်လည်တည်ဆောက်ရေးတို့ ဖြစ်ပါသည်။ ထို့ပြင် ကနဦး လုပ်ငန်းစဉ်များ အသေးစိတ်ကိုလည်း ချမှတ်ခဲ့ပါသည်။ ထို့အပြင် ဒုတိယအကြိမ်အစည်းအဝေး၊ တတိယအကြိမ်အစည်းအဝေးများနှင့် အစည်းအဝေးအကြိမ်ကြိမ်ကို စိတ်တိုင်းကျလက်ဖက်ရည်ဆိုင် (တောင်ဥက္ကလာ) တွင် ပြုလုပ်ခဲ့ရာ ကိုဝင်းဆွေ၊ ကိုမြင့်ဆန်း၊ ကိုစိုးမိုး၊ ကိုမင်းနိုင်စိုး၊ ကိုအာကာဗိုလ်၊ မမေသွယ်ဦး၊ ကိုပြုံးချိုတို့တက်ရောက်ခဲ့ကြသလို ဆရာကြီးဒဂုန်တာရာ၊ ဒေါ်အောင်ဆန်းစုကြည်တို့ထံသို့ အကြောင်းကြားဖိတ်မန္တကပြုရန်များ ဆုံးဖြတ်ခဲ့ကြရာ ဆရာကြီးဒဂုန်တာရာ၏ ပြန်စာလွှာမှာ...

“ရန်ကုန်တက္ကသိုလ်ကျောင်းသားသမဂ္ဂအဆောက်အအုံ ပြန်လည်တည်ဆောက်ရေးအတွက် ဆရာကြီးဒဂုန်တာရာ၏ ကျောင်းသားပြည်သူများသို့ ပန်ကြားလွှာ”

ကျွန်တော်တို့၏ မြန်မာနိုင်ငံရေးသမိုင်းနှင့်အတူ ယှဉ်တွဲပေါ်ပေါက်ခဲ့သော တက္ကသိုလ်သမဂ္ဂ၏အစဉ်အလာမှာ လွန်စွာကြီးမားခဲ့ပါသည်။ ကိုလိုနီခေတ်ကပေါ်ပေါက်ခဲ့သော မြန်မာ့နိုင်ငံရေးဖြစ်စဉ်များတွင် တက္ကသိုလ်သမဂ္ဂမှ ခေါင်းဆောင်များက ပါဝင်ဆောင်ရွက်ခဲ့ကြသည်။ ယင်းသမဂ္ဂမှ ခေါင်းဆောင်များက နယ်ချဲ့ဆန့်ကျင်ရေးနှင့် အမျိုးသားလွတ်လပ်ရေးအတွက် လုပ်ဆောင်ခဲ့ကြသည်။ ထို့နောက် တက္ကသိုလ်ကျောင်းသားများကပင် မျက်မှောက်ခေတ်ပြုပြင်ပြောင်းလဲရေးများအထိ ကြိုးစားအားထုတ်လာသည်ကို တွေ့ရပါသည်။ 

ကျွန်တော်တို့ဖြတ်သန်းခဲ့သည့် ကျောင်းသားဘဝနှင့်ဆက်နွှယ်နေသော သမဂ္ဂအဆောက်အအုံအတွင်း ကိုတက်တိုး၊ ဗိုလ်ဇေယျတို့လည်း နေထိုင်ခဲ့ဖူးသည်ကို သတိရမိသည်။ ကျွန်တော်တို့သမဂ္ဂ ဖြိုဖျက်ခြင်းခံရသောအခါ သမဂ္ဂနှင့်ဆက်နွှယ်နေသောလူများအားလုံး စိတ်မကောင်းဖြစ်ရသည်။ ထိုအချိန်ကပင် သမဂ္ဂအဆောက်အအုံကို ဖြိုခွင်းခဲ့သူများကပင် စိတ်မကောင်းဖြစ်ခဲ့ကြသည်ဟု ကြားရဖူးသည်။ 

မြန်မာ့နိုင်ငံရေးဖြစ်စဉ်များသည် ကျောင်းသားများနှင့်ဆက်စပ်နေသလို တက္ကသိုလ်သမဂ္ဂ၏ သမိုင်းသည်လည်းကောင်း၊ မြန်မာနိုင်ငံရေး၏သမိုင်းသည်လည်းကောင်း အသီးသီးဆက်စပ်နေသည်ကို တွေ့ရသည်။ သမိုင်းခေတ်အဆက်ဆက်တွင်လည်း ကျောင်းသားများက မြန်မာပြည်၏သမိုင်းကို လှုပ်ရှားပြောင်းလဲစေသည်ကို တွေ့ရပေသည်။ 

သမဂ္ဂအဆောက်အအုံသည် ကျောင်းသားများဆုံတွေ့ရာ၊ နားနေရာ၊ စုဝေးရာနေရာတစ်ခုလည်းဖြစ်သည်။ ထိုသို့သောသမိုင်းဝင်အဆောက် အအုံတစ်ခု ဆုံးရှုံးရသဖြင့် ယခုမျက်မှောက်ခေတ်တွင်လည်း ပေါ်ပေါက်စေရန် လိုအပ်သည်ဟု ထင်ပါသည်။ 

မျက်မှောက်ခေတ်တွင်လည်း သမိုင်းဝင်သမဂ္ဂအဆောက်အအုံတစ်ခုကို တည်ဆောက်ခွင့်ရရန် နိုင်ငံတော်အစိုးရကလည်းကောင်း၊ ပြည်သူများ၊ ကျောင်းသားများကလည်းကောင်း အားလုံးဝိုင်းဝန်းဆောင်ရွက်ကြရန် အထူးသင့်လျော်သည်ဟု ပြောရပေမည်။ 

ဒဂုန်တာရာ

သာမိုင်းခမ်း (၁၂.၆.၂၀၁၂)

(ယခုစာကို ရန်ကုန်မှ ကိုဆန်နီ၏ဆက်သွယ်မှုဖြင့် အောင်ပန်းမြို့ရှိ ၈၈ ကျောင်းသားခေါင်းဆောင် ကိုဘိုဘိုဟန်၏ကူညီမှုကြောင့် ရရှိခြင်းဖြစ်ပါသည်။)

တစ်ဖန် ငွေရတုအကြို နှစ်ပတ်လည်အခမ်းအနားဖြစ်မြောက်ရေး ကော်မတီမှ အမည်ပြောင်းခဲ့သည့် ရှင်သန်ရေးအဖွဲ့သည် အမျိုးသားဒီမို ကရေစီအဖွဲ့ချုပ်ဥက္ကဋ္ဌ၊ လူထုခေါင်းဆောင်ဒေါ်အောင်ဆန်းစုကြည်သို့ ဖိတ်မန္တကပြုပန်ကြားလွှာ၊ တကသအဆောက်အအုံကိစ္စအတွက် တွေ့ဆုံဆွေးနွေးခွင့်တောင်းခံလွှာများကို ပေးပို့ခဲ့ပါသည်။ သို့သော် ဒေါ်အောင်ဆန်းစုကြည် (ယခု နိုင်ငံတော်အတိုင်ပင်ခံပုဂ္ဂိုလ်) သည် ထိုစဉ်က အလုပ်အလွန်များနေသဖြင့် တွေ့ဆုံခွင့်မရခဲ့ပါ။ 

ဆက်လက်ဖော်ပြပါမည်။ 

ဗညိုထွန်း