News

POST TYPE

PERSPECTIVE

တရားရုံးများ မထီမဲ့မြင်ပြုမှု ခံနေရကြပြီလား
07-Feb-2018 tagged as တရားဥပဒေ

ရန်ကုန်တိုင်းဒေသကြီး မြောက်ပိုင်းခရိုင်တရားရုံး၌ ၂၀၁၇ ခုနှစ် ဇန်နဝါရီလ ၂၉ ရက်နေ့က ရန်ကုန်အပြည်ပြည်ဆိုင်ရာ လေဆိပ်တွင် ဦးကိုနီနှင့် ဦးနေဝင်းတို့ သေနတ်ပစ်အသတ်ခံရမှုနှင့် ပတ်သက်၍ ကြည်လင်း (ခ) ဖိုးထူး၊ အောင်ဝင်းဇော်၊ ဇေယျာဖြိုး၊ အောင်ဝင်းထွန်းတို့ကို ရာဇသတ်ကြီး ပုဒ်မ ၃၀၂/ ၃၄/ ၁၁၄ ဖြင့် စစ်ဆေးနေသည်မှာ ယခုဆိုလျှင် တစ်နှစ်တင်းတင်း ပြည့်မြောက်ခဲ့ပြီဖြစ်သည်။ ထိုအမှုအတွက် တရားစွဲဆိုမှုရုံးချိန်း ၄၂ ချိန်းအပြီး ရုံးတော်က စွဲချက်တင်သင့်၊ မတင်သင့် အမိန့်ချရန်တစ်ပတ်အလိုတွင် အမျိုးသားလှုပ်ရှားသူ အမည်ခံ လေးဦးတို့က ဖေဖော်ဝါရီ ၂ ရက်နေ့တွင် တရားရုံးသို့လာရောက်ပြီး လက်ညှိုးထိုးနေပုံနှင့် “မင်းတို့ ထမင်းဝအောင်စားထား” စာတန်းပါအင်္ကျီ ဝတ်ဆင်ခြင်း၊ ကြည်လင်းနှင့်အပေါင်းအပါများကို အားပေးခြင်းပြုလုပ်ခဲ့ကြသည်။ ထိုကဲ့သို့ပြုလုပ်ခြင်းသည် လက်ရှိထိုအမှုကို တရားစီရင်နေသော တရားရုံးရှိ တရားရေးဝန်ထမ်းများနှင့် ဥပဒေကို လေးစားလိုက်နာကာ ဥပဒေဘောင်အတွင်း ငြိမ်းချမ်းစွာ နေထိုင်ချင်နေကြသော အများပြည်သူများကို စိတ်မသက်မသာစရာ ဖြစ်စေခဲ့ကြသည်ဟု လူမှုကွန်ရက် အင်တာနက်စာမျက်နှာများထက်တွင် တွေ့ရသည်။

အမှန်ဆိုလျှင် တရားရုံးများတွင် တရားစီရင်ရေးကိစ္စများနှင့် ပတ်သက်ပြီး ယခုလို ဆောင်ရွက်ချက်မျိုးများရှိလာပါက ပြုလုပ်လာသူများကို ထိထိရောက်ရောက် အရေးယူရန် ဥပဒေတစ်ရပ်ရှိသည်။ ထိုဥပဒေမှာ ယခင်အစိုးရလက်ထက် ပထမအကြိမ် လွှတ်တော်သက်တမ်းကာလ ၂၀၁၃ ခုနှစ် ဇန်နဝါရီလ ၂၉ ရက်နေ့တွင် နိုင်ငံတော်သမ္မတ ဦးသိန်းစိန်ကိုယ်တိုင် ပြည်ထောင်စုလွှတ်တော် ဥပဒေ အမှတ် (၁၇/၂၀၁၃) ဖြင့် လက်မှတ်ရေးထိုး ထုတ်ပြန်ထားသော “တရားရုံးများကို မထီမဲ့မြင်ပြုမှုဥပဒေ” ပင် ဖြစ်သည်။ ထိုဥပဒေ ထုတ်ပြန်ရခြင်းမှာ“တရားရုံးများ၏ မှန်ကန်လွတ်လပ်စွာ တရားစီရင်ရေး၊ တရားရုံးများ၏ ဂုဏ်သိက္ခာနှင့် အများပြည်သူ ယုံကြည်ကိုးစားမှုကို မထိခိုက်စေရေးတို့အတွက် အဆိုပါဥပဒေကို ရေးဆွဲပြဋ္ဌာန်းခဲ့ရခြင်းဖြစ်သည်ဟု ဥပဒေ၏ အစနိဒါန်းတွင်ပင် ဖော်ပြထားသည်။

ထို ဥပဒေ၏ ပုဒ်မ ၂၊ ပုဒ်မ (ဂ) တွင် တရားမဆိုင်ရာ မထီမဲ့မြင်ပြုမှုဆိုသည်ကို တရားရုံးကချမှတ်သော စီရင်ချက်၊ ဒီကရီ၊ အမိန့်၊ ညွှန်ကြားချက် သို့မဟုတ် ထုတ်ဆင့်သောဆင့်စာကို တမင်သက်သက် မလိုက်နာခြင်းကိုဆိုသည်ဟု ဖော်ပြထားသည်။ ထို့အပြင် အဓိကကျသည့် ပြစ်မှုဆိုင်ရာ မထီမဲ့မြင်ပြုမှုဆိုသည်ကို “အောက်ပါ အပြုအမူတစ်ခုခုအတွက် အကြောင်းအရာတစ်ရပ်ရပ်ကို နှုတ်ဖြင့်ဖြစ်စေ၊ ထင်ရှားသော ပုံသဏ္ဌာန်ဖြင့်ဖြစ်စေ၊ အခြားတစ်နည်းနည်းဖြင့်ဖြစ်စေ၊ တမင်ထုတ်ဖော်ကြေညာခြင်း၊ သတင်းအဖြစ် ရေးသားဖော်ပြခြင်း၊ ပုံနှိပ်ထုတ်ဝေခြင်း သို့မဟုတ် ဖြန့်ချိခြင်းကို ဆိုသည်-

(၁) တရားရုံး၏ ဥပဒေအရ အပ်နှင်းထားသော အခွင့်အာဏာကို သေးသိမ်စေခြင်း သို့မဟုတ် သေးသိမ်ရန်ဖြစ်စေခြင်း၊ (၂) တရားစီရင်သော မှုခင်းကိစ္စတွင် ဖြောင့်မတ်စွာဆောင်ရွက်မှုကို ထိခိုက်စေခြင်း၊ စွက်ဖက်ခြင်း သို့မဟုတ် နှောင့်ယှက်ခြင်း၊ (၃) မှန်ကန်လွတ်လပ်စွာ တရားစီရင်ရေးအပေါ် အများပြည်သူက ယုံကြည်ကိုးစားမှု လျော့နည်းစေရန် တစ်နည်းနည်းဖြင့်ပြုလုပ်ခြင်း၊ (၄) တရားရုံးက ဆုံးဖြတ်ရန်ရှိသော အချက်များကို တစ်စုံတစ်ရာ အဆုံးအဖြတ် မပေးရသေးမီ ကြိုတင်ဝေဖန်ပြောဆိုခြင်း၊ ရေးသားဖော်ပြခြင်း၊ ပုံနှိပ်ထုတ်ဝေခြင်း ဖြန့်ချိခြင်းတို့ ပါဝင်ကြောင်း ပုဒ်မခွဲ (ဃ) တွင် ဖော်ပြထားရှိသည်။

ထိုပုဒ်မ ၂၊ ပုဒ်မခွဲ (ဃ) တို့ပါ ပြစ်မှုကို ကျူးလွန်လာပါက အဆိုပါ ဥပဒေ၏ အခန်း (၄) ပြစ်မှုနှင့်ပြစ်ဒဏ်များ အခန်းတွင် ပုဒ်မ ၁၀ ဖြင့် “မည်သူမဆို တရားရုံးကို ပြစ်မှုဆိုင်ရာမထီမဲ့မြင် ပြုမှုကျူးလွန်ကြောင်း ပြစ်မှုထင်ရှား စီရင်ခြင်းခံရလျှင် ထိုသူအား ခြောက်လထက်မပိုသော အလုပ်မဲ့ ထောင်ဒဏ်ဖြစ်စေ၊ ကျပ်တစ်သိန်းထက်မပိုသော ငွေဒဏ်ဖြစ်စေ၊ ဒဏ်နှစ်ရပ်လုံးကိုဖြစ်စေ ချမှတ်ရမည်ဟု ဖော်ပြထားသည်။ ထို့အပြင် ရာဇသတ်ကြီး၏ အခန်း (၂၂)၊ ရာဇဝတ်မကင်းသော ခြောက်လှန့်မှု၊ စော်ကားမှုနှင့် စိတ်ငြိုငြင်စေမှု အခန်းပါ ပုဒ်မ ၅၀၅ နှင့် ပုဒ်မ ၅၀၆ တို့အရဆိုလျှင် ပြစ်မှုထင်ရှားစီရင်ခြင်း ခံရပါက နှစ်နှစ်အထိ ထောင်ဒဏ်ဖြစ်စေ၊ ငွေဒဏ်ဖြစ်စေ ဒဏ်နှစ်ရပ်လုံးဖြစ်စေ ချမှတ်ရမည်ဟုလည်း ပြဋ္ဌာန်းပါရှိသည်ကို တွေ့ရမည်ဖြစ်သည်။ ထိုပုဒ်မတွင် ဖော်ပြထားသည်မှာ “အများပြည်သူကို သော်လည်းကောင်း၊ အများပြည်သူ၏ သီးခြားလူစုကို သော်လည်းကောင်း ကြောက်ခြင်း၊ ထိတ်လန့်ခြင်း တစ်ခုခုဖြစ်စေရန် အကြံရှိလျှင် သို့တည်းမဟုတ် ထိုသို့ဖြစ်စေတန်ရာသည့် အကြောင်းရှိလျှင်၊ သို့တည်းမဟုတ် လူအမျိုးအစား အချင်းချင်းဖြစ်စေ၊ လူမျိုးစုအချင်းချင်းကိုဖြစ်စေ တစ်ဖက်နှင့်တစ်ဖက် ပြစ်မှုကျူးလွန်အောင် လှုံ့ဆော်ရန်အကြံရှိလျှင် သို့တည်းမဟုတ် အဆိုပါလှုံ့ဆော်ခြင်းကို ဖြစ်စေတန်ရာသည့် အကြောင်းရှိလျှင်”ဟု ဖော်ပြထားရှိသည်ကို တွေ့ရသည်။

တရားစီရင်ရေးလောကတွင် “ဥပဒေများဆိုသည်မှာ အကြောင်းမဲ့ ပြဋ္ဌာန်းခြင်းမဟုတ်သကဲ့သို့ အကြောင်းမဲ့လိုက်နာစေခြင်းလည်းမဟုတ် (The Law does nothing in vain  and commends nothing in vain) ဟူသော လက်ကိုင်ဆောင်ပုဒ် ရှိသကဲ့သို့ “အပြစ်ရှိသူကို ကင်းလွတ်ခွင့်ပြုပါက အပြစ်မဲ့သူကို အပြစ်ပေးရာရောက်သည် (A Person who spares the guilty punishes the innocent) ဟူသော ဆောင်ပုဒ်လည်းရှိသည်ကို သတိထားကြရမည်ဖြစ်သည်။

အမှန်ဆိုလျှင် ထိုသူများ လာရောက်ဝန်းရံအားပေးသူ အမှုမှာ ဘုရားခိုးမှုဖြင့် ထောင်နှစ်ရှည်ကျရာမှ နိုင်ငံတော်သမ္မတ၏ လွတ်ငြိမ်းခွင့်ဖြင့်လွတ်လာပြီး နိုင်ငံ့မျက်နှာစာဖြစ်သည့် ရန်ကုန်နိုင်ငံတကာလေဆိပ် လူမြင်ကွင်းတွင် လူသတ်မှုကိုထပ်မံကျူးလွန်သော ကြည်လင်းနှင့် အပေါင်းအပါ ဒုစရိုက်သမားများကို စစ်ဆေးစီရင်နေသည့် ကိစ္စဖြစ်သည်ကို အားလုံးသိပြီးဖြစ်ကြသည်။

ထို့အပြင် ထိုအမှုကို စစ်ဆေးစီရင်နေသော တရားရုံးရှေ့လာပြီး “ထမင်းဝအောင် စားထား”ဟု စာတန်းပါ အင်္ကျီဝတ်ဆင်လာသူများကို ဥပဒေအရ အရေးယူဆောင်ရွက်စေရန် ကြိုးပမ်းသွားမည်ဖြစ်ကြောင်း မြန်မာနိုင်ငံ ရှေ့နေများအသင်းဥက္ကဋ္ဌ ဦးစိန်ဝင်း (မြင်းခြံ) က ဆိုထားခဲ့သည်။

၎င်းတို့ဆိုလိုသည့် ထမင်းဝအောင်စားထားဆိုသည်မှာ ထိုအမှုကို စစ်ဆေးနေကြသည့် တရားသူကြီးများကိုပင် ဆိုလိုသည်လား၊ အစိုးရ ရှေ့နေများကိုပင် ဆိုလိုသည်လား၊ သို့တည်းမဟုတ် တရားလိုဘက်မှ လိုက်ပါအမှုလိုက်ပေးနေသည့် ရှေ့နေများကို ဆိုချင်နေသည်များလား၊ ဒါမှမဟုတ် ဥပဒေကိုလေးစားပြီး အမှန်ကိုအမှန်အတိုင်း ဖြစ်စေချင်ကြသည့် ပြည်သူများကို ပြောချင်သည်များဆိုသည်ကို တိတိကျကျ သေချာစွာ မပြောနိုင်သော်လည်း အဓိကအားဖြင့် ထိုအပြုအမူသည် တရားရုံးကို တိုက်ရိုက်ထိခိုက်စေကာ တရားစီရင်ရေးမဏ္ဍိုင်၏ ပုံရိပ်နှင့် တရားဥပဒေစိုးမိုးရေး ဆောင်ရွက်နေကြသည့် နိုင်ငံ့ဝန်ထမ်းများ၏ သိက္ခာတရားကို စွန်းထင်စေသည်တော့ အမှန်ပင်ဖြစ်သည်ဟု နိုင်ငံ့အရေး လေ့လာသူများက ဆိုခဲ့ကြသည်။

ထိုလူတစ်စု၏ အပြုအမူကို ဥပဒေကို လေးစားတန်ဖိုးထားပြီး ပြည်သူများအကျိုးအတွက် ဆောင်ရွက်နေကြသည့် မြန်မာမီဒီယာရှေ့နေများ ကွန်ရက်၊ ရန်ကုန်ရှေ့နေအသင်း၊ မြန်မာနိုင်ငံရှေ့နေများအသင်း၊ မြန်မာနိုင်ငံ လွတ်လပ်သော ရှေ့နေများအသင်းနှင့် မြန်မာနိုင်ငံ ဥပဒေဘွဲ့ရသူများအသင်းတို့က ကန့်ကွက်ကြောင်း ကြေညာချက်တစ်စောင်ကို ထုတ်ပြန်ခဲ့ကြောင်းလည်း မြင်ရပြန်သည်။ ထိုသို့ကန့်ကွက်ရခြင်းမှာ ထိုသို့ပြုလုပ်ကြခြင်းသည် လူသတ်မှုကျူးလွန်သူများကို အားပေးရာရောက်သည့်အပြင် လွတ်လပ်စွာစီရင်နေသည့် တရားစီရင်ရေးကို အနှောင့်အယှက် အဟန့်အတား ပြုရာရောက်သည့်အတွက် ကန့်ကွက်ရခြင်းဖြစ်ကြောင်း၊ ထိုပြုမူချက်သည် မှန်ကန်စွာစီရင်ရမည့် တရားဥပဒေလမ်းကြောင်းကို တိမ်းစောင်းစေခြင်း၊ တရားဥပဒေစိုးမိုးရေးကို ပျက်ပြားစေခြင်း၊ ပြည်သူလူထုကြား ပဋိပက္ခကိုဖော်ဆောင်ခြင်း၊ အမှုစစ်နေသူများအားလုံးကို မလျော်ဩဇာ အင်အားပြပြုလုပ်ရာရောက်ပြီး တိုင်းပြည် မငြိမ်မသက်ဖြစ်စေရန် အစီအစဉ်ရှိရှိ ကြံစည်လုပ်ဆောင်ခြင်းဖြစ်ကြောင်း ယင်းကြေညာချက်တွင် ဖော်ပြခဲ့သည်။

ထို့အပြင် ဒီလိုပြုမူမှုအပေါ် “ကိုယ်ပိုင်ယဉ်ကျေးမှု စံနှုန်းတွေ၊ ရင်းနှီးဖော်ရွေ၊ ခင်မင်နှစ်လိုဖွယ် လူမှုဆက်ဆံရေးတွေ၊ ရိုင်းပင်း၊ ကူညီ၊ စာနာ၊ ထောက်ထားတတ်တဲ့ စရိုက်သဘာဝတွေကို ကိုယ့်ဘာသာ ဂုဏ်ယူဝင့်ကြွား၊ တလေးတစားရှိလာခဲ့တဲ့ မြန်မာ့လူ့အဖွဲ့အစည်းမှာ ဒီလိုအဖြစ်အပျက်က သိပ်ကို အရုပ်ဆိုးလွန်းတယ်။ အင်မတန်ကို စစ်မှန်တဲ့ ထေရဝါဒဗုဒ္ဓဘာသာ အဆုံးအမတွေကို ဆက်ခံယုံကြည် ကိုးကွယ်လာခဲ့ကြတယ်လို့ ယုံကြည်နေကြတဲ့ မြန်မာလူ့အဖွဲ့အစည်းမှာ လူသိရှင်ကြား၊ နိုင်ငံသိ၊ ကမ္ဘာသိ တုန်လှုပ်ချောက်ချားဖွယ် သတ်ဖြတ်လုပ်ကြံထားတဲ့ သူတစ်ယောက်ကို ပေါ်ပေါ်တင်တင် ဝန်းရံထောက်ခံတယ်ဆိုတာ အံ့ဩတုန်လှုပ်စရာကောင်းတယ်။ ပိုဆိုးတာက ပြစ်မှုကျူးလွန်သူတွေကို စစ်ဆေး၊ စီရင်ချက်ချပေးတဲ့ တရားရုံးလိုနေရာမျိုးမှာ ဒီလို လူသတ်တရားခံတစ်ယောက်ကို မျက်နှာပြောင်ပြောင်နဲ့လာပြီး ဝန်းရံအားပေးတယ်ဆိုတာ တော်ရုံတန်ရုံမဟုတ်ဘူး။ ဒီလိုထောက်ခံသူတွေရဲ့ နောက်ကွယ်မှာ ဘယ်လောက် အင်အားကြီးတဲ့သူတွေ ရှိနေသလဲဆိုတာ စောကြောစရာဖြစ်နေတယ်”ဟုပင် ဖေဖော်ဝါရီ လ ၄ ရက်နေ့ထုတ် The Voice Daily သတင်းစာ အယ်ဒီတာ့အာဘော်တွင် ဖော်ပြထားသည်ကို ဖတ်ရသည်။

သို့အတွက် အချုပ်အားဖြင့်တင်ပြရလျှင် ယနေ့အချိန်အခါသည် ၂၀၀၈ ခုနှစ် ဖွဲ့စည်းပုံအခြေခံဥပဒေအရ ပေါ်ပေါက်လာသည့် ပါတီစုံ ဒီမိုကရေစီစနစ်နှင့်အညီ နိုင်ငံ့ရေးရာအဖြာဖြာနှင့် အခြားသော ကိစ္စရပ်တိုင်းသည် ဥပဒေ၊ နည်းဥပဒေ၊ အမိန့်ညွှန်ကြားချက်၊ လုပ်ထုံးထုပ်နည်းနှင့် စည်းမျဉ်းစည်းကမ်းများအတိုင်းသာ သွားလာလုပ်ကိုင်နေကြရသည်ဖြစ်ရာ ယခုလို ဥပဒေကို ကျော်လွန်သည့်လုပ်ရပ်မျိုးကိုလည်း ပြည်သူအများစုက လက်မခံနိုင်ကြတော့ပေ။ ထိုသို့ လုပ်ကိုင်ဆောင်ရွက်ကြသည့် လူများကိုလည်း ဥပဒေပါပြဋ္ဌာန်းချက်များအတိုင်း ထိထိရောက်ရောက် အရေးယူ အပြစ်ပေးကြရန်လည်း ပြည်သူအများစုက လိုလားနေကြပြီး ခေတ်ကာလ အဆက်ဆက် ကြုံခဲ့ရသည့်သူများဖြစ်၍လည်း ငြိမ်းငြိမ်းချမ်းချမ်း နေချင်ကြသည်က များကြသည်။ သို့အတွက် ယခုလို ခြိမ်းခြောက်မှု အသုံးအနှုန်းပါသော အပြုအမူ ဖော်ပြချက်များဖြင့် တရားရုံးသို့တိုင် လာရောက်ကြခြင်းသည် ဥပဒေပါ ပြဋ္ဌာန်းချက်များအရဆိုလျှင် တရားရုံးများကို ပြစ်မှုပိုင်းဆိုင်ရာ မထီမဲ့မြင်ပြုမှု ကျူးလွန်ရာရောက်ခြင်း ဖြစ်သည့်အတွက် ပြဋ္ဌာန်းဥပဒေအတိုင်းသာ အစိုးရတာဝန်ရှိသူများက အရေးယူဆောင်ရွက်ကြရေး ပြည်သူအများက လိုလားလျက်ရှိနေပါကြောင်း ရေးသားလိုက်ရပါသည်။
 
အောင်ဇေယျ