News

POST TYPE

PERSPECTIVE

ဒီမိုကရေစီရေချိန် ကျဆင်းလာရခြင်း အကြောင်းအရင်းများ
06-Feb-2018

၂၀၁၅ ရွေးကာက်ပွဲနောက်ပိုင်း နိုင်ငံရေးနှေးကွေးမှုကြီးကို ရင်ဆိုင်ကြုံတွေ့နေရပြီလို့ဆိုရင် ထိတ်တလန့်ဖြစ်သွားမယ့်သူတွေ အမြောက်အမြားရှိနိုင်သော်လည်း သိပ်မအံ့ဩမယ့်သူတွေလည်း ဒုနဲ့ဒေး ရှိလာနေပါပြီ။ တကယ်ဖြေရှင်းဖို့ကောင်းတဲ့ မေးခွန်းကတော့ နှစ်ပေါင်းများစွာ ဒီမိုကရေစီပေါ်ထွန်းရေးအတွက် ရုန်းကန်လှုပ်ရှားလာခဲ့တဲ့ နိုင်ငံရေးပါတီကြီးနဲ့ ဒီမိုကရေစီခေါင်းဆောင်အဖြစ် ပြည်တွင်းပြည်ပက အသိအမှတ်ပြုထားတဲ့ ခေါင်းဆောင်ရဲ့ ပါဝါစီမံခန့်ခွဲမှုအောက်မှာမှ ဘာကြောင့် ဒီမိုကရေစီရေချိန်က ကျဆင်းလာနေရသလဲဆိုတာပဲ ဖြစ်ပါတယ်။

ပြည်သူလူထုနဲ့ နိုင်ငံတကာအသိုင်းအဝိုင်းတစ်ခုလုံးက အကြီးအကျယ် မျှော်လင့်ထားတဲ့ မျှော်လင့်ချက်များနဲ့ ဆန့်ကျင်စွာပဲ ဒီမိုကရေစီကို ဦးစားပေးဖော်ဆောင်မယ်ဆိုတဲ့ အစိုးရတစ်ရပ် တက်လာပြီးတော့ သက်တမ်းတစ်ဝက်လောက် ရှိလာတဲ့အခါမှာ မြန်မာနိုင်ငံရဲ့ နိုင်ငံရေး၊ စီးပွားရေးအပါအဝင် အခြေအနေအရပ်ရပ်တို့ဟာ သိသိသာသာ ယုတ်လျော့ကျဆင်းလာနေတယ်ဆိုတာကို ပကတိအရှိတရားတစ်ရပ်အနေနဲ့ လက်ခံရမယ့်အချိန် ဖြစ်လာခဲ့ပါပြီ။ လက်ညှိုးထိုးအပြစ်တင်တယ်လို့ မယူဆဘဲနဲ့ အရှိတရားကို အရှိတရားအတိုင်း လက်ခံပြီးတော့ အကောင်းဆုံးအဖြေရှာနိုင်ရေး သတိပေးတယ်လို့ ရှုမြင်ကြစေချင်ပါတယ်။

နှစ်ပေါင်း ငါးဆယ် ခြောက်ဆယ်လောက် ခေတ်ဆိုးစနစ်ဆိုးကြီးကို ဖြတ်သန်းလာခဲ့ရလို့ ပြဿနာပေါင်း သောင်းခြောက်ထောင်ပေါ်ခဲ့ရပြီးတော့ လက်ရှိအစိုးရက အဲဒီပြဿနာတွေကို ဒိုင်ခံရှင်းနေရတယ်လို့ပြောရင် တစ်စိတ်တစ်ပိုင်းအားဖြင့် မှန်ကန်ပါတယ်။ သို့သော် သက်တမ်းတစ်ဝက် ကျော်လာတဲ့အစိုးရတစ်ရပ်အနေနဲ့ ရှေ့ကအစိုးရတွေရဲ့ အပြစ်အနာအဆာများကိုပဲ ပြန်ပြောနေလို့ မဖြစ်နိုင်တော့ပါဘူး။

လက်ရှိ အစိုးရသက်တမ်းရဲ့ ကောင်းကျိုးဆိုးပြစ်မှန်သမျှကို လက်ရှိအစိုးရနဲ့ လက်ရှိအာဏာရပါတီကပဲ တာဝန်ခံရမှာဖြစ်ပါတယ်။ လက်ရှိအခြေအနေမှာ စီးပွားရေးလည်းမဖြစ် နိုင်ငံရေး (ဒီမိုကရေစီရေး) သည်လည်း ပေးထားသောကတိကဝတ်များနဲ့ လုံးလုံးကြီးဆန့်ကျင်ဘက်အခြေအနေများ ကြုံတွေ့နေရခြင်းက ဒီမိုကရေစီနည်းကျ ရွေးချယ်တင်မြှောက်ခံရသော လူထုက သဘောကျနှစ်သက်ယုံကြည်အားကိုးရသော အစိုးရတစ်ရပ်အနေနဲ့ တော်တော်တာဝန်ကြီးတဲ့ကိစ္စ တော်တော်လည်းပဲ စွမ်းဆောင်ရည်နဲ့ပတ်သက်ရင် မေးခွန်းထုတ်စရာကိစ္စ ဖြစ်လာနေပါတယ်။

ကြိုတင်ပြင်ဆင်မှု အားနည်းခြင်း

တစ်ချိန်ချိန် အာဏာရပါတီအဖြစ် လုပ်ကိုင်ခွင့်ရမယ်ဆိုတာ တွက်ဆထားပြီးသား ဖြစ်ပါလိမ့်မယ်။ (ဒီလိုတွက်ဆထားလို့ကလည်း ရွေးကောက်ပွဲမှာ သူတင်ကိုယ်တင် ယှဉ်ပြိုင်ခဲ့တာဖြစ်ပါတယ်။ သို့သော် အာဏာရတဲ့အခါ စီမံခန့်ခွဲရေးအတွက် ဘာမှ ဟုတ်တိပတ်တိ ကြိုတင်ပြင်ဆင်ထားမှုမရှိခြင်းက အခုအကျပ်အတည်းများရဲ့ အဓိကအကြောင်းတရားတစ်ရပ် ဖြစ်နေပါတယ်။ အခွင့်အလမ်းတွေ အခြေအနေတွေက ရေရှည်အတွက် ကြိုတင်ပြင်ဆင်နိုင်ရေး များစွာပံ့ပိုးခဲ့ပါတယ်။ ပြည်တွင်းပြည်ပက တစ်ခဲနက် ထောက်ခံခဲ့တဲ့ပါတီကြီးလည်း ဖြစ်ပါတယ်။ အာဏာရလာတဲ့အခါ ထူးထူးခြားခြား တိုးတက်ပြောင်းလဲလာပြီလို့ ပြောလို့ရတဲ့ကိစ္စ တစ်ခုတလေမှ လုပ်မပြနိုင်ခြင်းက ကြိုတင်ပြင်ဆင်မှု အားနည်းခြင်းကို သက်သေပြနေပါတယ်။ ဒါဟာ အာဏာရပါတီအတွက်တင် ဆိုးတာမဟုတ်ပါဘူး။ နိုင်ငံတော်နဲ့ ပြည်သူလူထုရဲ့ မျှော်လင့်ချက်၊ အနာဂတ်၊ လူနေမှုဘဝ စတာတွေအပေါ်မှာပါ ကြီးကြီးမားမား ရိုက်ခတ်သွားတာကြောင့် အာဏာရပါတီအနေနဲ့ ဒီကိစ္စ (စီမံခန့်ခွဲမှု  စွမ်းရည်မြင့်မားရေး) ကို ကျန်တဲ့အစိုးရသက်တမ်းအတွက် အလေးအနက် စဉ်းစားပြင်ဆင်လုပ်ကိုင်ဖို့ သင့်နေပြီဖြစ်ပါတယ်။

ပါတီတောင့်တင်းရေး တည်ဆောက်ပုံစနစ်မကျခြင်း

လက်ရှိ အာဏာရပါတီမှ မဟုတ်ပါဘူး မြန်မာနိုင်ငံက နိုင်ငံရေးပါတီများဟာ အရည်အသွေးထက် အရေအတွက်ကို ဦးစားပေးတည်ဆောက်လေ့ ရှိပါတယ်။ ဒီမူကြောင့်ပဲ လက်တွေ့လုပ်ကြကိုင်ကြပြီဆိုတာနဲ့ ကိုးရိုးကားရားတွေ ဖြစ်ကုန်ကြတော့တာပါပဲ။ အင်စတီကျူးရှင်းနယ်လိုက်ဇေးရှင်းလုပ်ဖို့ နည်းနာတွေ၊ သီအိုရီတွေ ရှိနေပြီးသားဖြစ်ပေမယ့် ဒါအရေးမကြီးပါဘူးဆိုတဲ့ တစ်ပွဲတိုးတွေးခေါ်စဉ်းစားပုံ လွှမ်းမိုးခြင်းနဲ့ တောင့်တင်းတဲ့ အင်စတီကျူးရှင်းဖြစ်ပေါ်ရေး ဘယ်လိုတည်ဆောက်ရမယ်ဆိုတဲ့ နည်းနာမသိခြင်းဆိုတဲ့ အမျိုးအစားနှစ်မျိုးပဲ တွေ့နေရပါတယ်။ ငါတို့ပါတီက လူပိုများတယ်ဆိုတာမျိုးကို စဉ်းစားမယ့်အစား ငါတို့ပါတီက အရည်အချင်းပိုရှိတယ်ဆိုတာမျိုးကို စဉ်းစားကြဖို့ ခုချိန်အထိ ပြင်ဆင်လုပ်ကိုင်တာ မတွေ့ရသေးပါဘူး။ ဒီတော့ ရှေ့လျှောက်လည်း မြန်မာနိုင်ငံရဲ့ ပါတီစုံစနစ်ဟာ နိုင်ငံတည်ဆောက်ရေးအတွက် ထိရောက်အောင် လုပ်ကိုင်ပေးနိုင်ဖို့ ခက်ခဲနေပါလိမ့်ဦးမယ်။

Capacity 

စွမ်းဆောင်ရည်နဲ့ပတ်သက်ရင် ပညာနဲ့အတွေ့အကြုံက အဓိကပါ။ ဒီနှစ်ခုလုံးကို ကျကျနန တန်ဖိုးထားဖြည့်ဆည်းမှုမရှိဘဲနဲ့ Capacity မြင့်လာဖို့ဆိုတာ ဘယ်လိုမှ ဖြစ်နိုင်တဲ့ကိစ္စမဟုတ်ပါဘူး။ စွမ်းဆောင်ရည် ဘယ်လောက်နိမ့်ကျသလဲဆိုတာ အထွေအထူး ပြောစရာမလိုတော့ပါဘူး။ လက်ရှိ ရလဒ်ဘယ်လောက်ထွက်တယ်ဆိုတာနဲ့ အလွယ်လေး တိုင်းတာကြည့်နိုင်ပါတယ်။ 

ရန် ငါအမြင် ပြင်းထန်ခြင်း

မြန်မာနိုင်ငံမှာ ခိုင်မာတဲ့ဒီမိုကရေစီ မပေါ်ပေါက်သေးပါဘူး။ တည်ဆောက်ဆဲကာလ ဖြစ်ပါတယ်။ ဒီမိုကရေစီကို နိုင်ငံသားအားလုံးရဲ့ ညီညွတ်မှုနဲ့မဟုတ်ရင် ဘယ်လိုမှ တည်ဆောက်လို့မရနိုင်ပါဘူး။ အမြင်မတူခြင်းနဲ့ ရန် ငါ စည်းခြား သဘောထားခြင်း လုံးဝမတူကြောင်း အလေးထားဖို့လိုပါတယ်။ ရွေးကောက်ပွဲငါနိုင်တယ် ငါလုပ်မယ်ဆိုတာမျိုးက ဒီမိုကရေစီ ထွန်းကားမှ လုပ်လို့ဖြစ်နိုင်တဲ့ကိစ္စပါ။

အကျိုးဆိုင်သူများ အမည်စုံလွန်းလှတဲ့ နိုင်ငံတစ်ခုမှာ နိုင်ငံတည်ဆောက်ရေးကို ဘယ်ပါတီက နိုင်သည်ဖြစ်စေ အားလုံးညီညွတ်စွာ ပူးပေါင်းဆောင်ရွက်မှသာ ဖြစ်နိုင်ပါလိမ့်မယ်။

လူထုကို စည်းရုံးဆွဲဆောင်နိုင်မှု အားနည်းခြင်း

ပြည်သူလူထုက အသိပညာရေချိန် အင်မတန်မှ နိမ့်ပါးနေပါသေးတယ်။ ခေါင်းဆောင်ကို အားကိုးလေ့ရှိပါတယ်။ ခေါင်းဆောင်ဖြစ်သူများက လူထုစိတ်ဓာတ်တက်ကြွလာအောင်၊ လုပ်ချင်ကိုင်ချင်စိတ်တွေ နိုးကြားလာအောင် စည်းရုံးနိုင် ဆွဲဆောင်နိုင် တွန်းအားပေးနိုင်ရပါမယ်။ ဒီမိုကရေစီစနစ်ဆိုတာ ဆိုရှယ်လစ်စနစ်မဟုတ်ပါဘူး။ ပြည်သူလူထုက ကြိုးစားလုပ်ကိုင်ကြမှ တိုးတက်ဖြစ်ထွန်းနိုင်တဲ့စနစ် ဖြစ်ပါတယ်။ အစိုးရက စနစ်ကောင်းကို တည်ဆောက်ပေးရုံပါ။ လူထုက ကိုယ်တိုင်လုပ်ကိုင်ကြရမှာဖြစ်လို့ လူထုရဲ့ စိတ်ဓာတ်ခွန်အားတွေ ကျဆင်းနေတဲ့အခြေအနေမှာ ဘာမှ ဖြစ်ထွန်းလာဖို့မရှိပါ။

Leadership

ခေါင်းဆောင်မှုအခန်းကဏ္ဍ အင်မတန်အရေးကြီးပါတယ်။ စောစောကပြောသလို လူထုရဲ့အသိပညာရေချိန် နိမ့်ကျနေတဲ့အခြေအနေကို နေ့ချင်းညချင်း ပြုပြင်ပြောင်းလဲလို့မရပါဘူး။ လူထုရဲ့အသိပညာရေချိန်က ချက်ချင်းမြင့်တက်လာဖို့ နည်းလမ်းမရှိပါဘူး။ ဒီတော့ လူထု အသိပညာမြင့်မှ တိုင်းပြည်တိုးတက်အောင်လုပ်ဖို့ အချိန်ယူကြမှာလား။ နိမ့်ကျနေတဲ့ အသိပညာရေချိန်ကို တစ်ဖက်က မြှင့်တင်ပေးရင်း တစ်ဖက်က ထက်မြက်တဲ့ ခေါင်းဆောင်မှုနဲ့ လူ့အဖွဲ့အစည်းကို နိုးကြားတက်ကြွလာအောင် ဦးဆောင်မောင်းနှင်နိုင်ဖို့ အင်မတန်မှ အရေးကြီးပါတယ်။

နောက်တစ်ခါ ခေါင်းဆောင်မှုရဲ့ အရေးပါတဲ့ လက္ခဏာရပ်ဖြစ်တဲ့ အမြော်အမြင်ရှိမှု၊ သဘောထားကြီးမှုတို့အပြင် ထက်မြက်တဲ့လူတွေ ကိုရွေးချယ်ပြီး စုပေါင်းခေါင်းဆောင်မှုစနစ် Leadership ကို သေသေချာချာ တည်ဆောက်ပေးနိုင်တာနဲ့ နိုင်ငံတည်ဆောက်ရေးဟာ အရှိန်အဟုန်ပြင်းပြင်းနဲ့ ခရီးတွင်လာပါလိမ့်မယ်။

လက်ရှိအခြေအနေမှာတော့ ဖော်ပြပါ လိုအပ်ချက်များကြောင့် ဒီမိုကရေစီနိုင်ငံဖြစ်ပေါ်နိုင်ရေး မျှော်လင့်ချက်များ လျော့ပါးလာနေပါတယ်။ ဒီမိုကရေစီကို အဓိကဦးစားပေးတဲ့ ပါတီရဲ့ ဦးဆောင်မှုအောက်မှာ ဒီမိုကရေစီရေချိန် ကျဆင်းနေရခြင်းဟာ မြန်မာ့အနာဂတ်ရေးအတွက် ကြီးမားတဲ့ စိန်ခေါ်မှုကြီးဖြစ်တာမို့ ပေါ့ပေါ့ဆဆ သဘောမထားကြဖို့ပါ။

မင်းနွယ်