News

POST TYPE

PERSPECTIVE

စနစ်နှင့် ခေါင်းဆောင်မှု အခန်းကဏ္ဍ
06-Dec-2017 tagged as

မြန်မာနိုင်ငံတော်သစ် တည်ဆောက်ရေး လုပ်ငန်းစဉ်ကြီးကို ဘက်စုံပြုပြင်ပြောင်းလဲရေး လုပ်ငန်းစဉ်လို့ သိကြပါတယ်။ ပညာရပ်ဆန်ဆန်နဲ့ ပိုပြီး ထိထိရောက်ရောက် ပြောလို့ရတဲ့ စကားတစ်ခွန်းကတော့ စနစ်ကောင်းတစ်ခု တည်ဆောက်နေသော လုပ်ငန်းစဉ်ဖြစ်ပါတယ်။ အခြေခံဥပဒေတစ်ရပ်နဲ့ အစပျိုးခဲ့ပြီး အစိုးရနှစ်ဆက် (ရွေးကောက်ပွဲ နှစ်ကြိမ်) ရှိလာခဲ့ပါပြီ။ စီးပွားရေး၊ နိုင်ငံရေး၊ ပညာရေး စသဖြင့် ကဏ္ဍစုံကို အဆင့်မြင့်လာအောင် တည်ဆောက်ဖို့ ကြိုးပမ်းနေကြခြင်းပါပဲ။

စနစ်ကောင်းတစ်ခုကို တည်ဆောက်ရတယ်ဆိုတာ ပြောသလောက် လွယ်ကူတဲ့ ကိစ္စရပ်တစ်ခုတော့ မဟုတ်ပါ။ အခုဆိုရင် အတွေ့အကြုံတော်တော်လေး ရင့်ကျက်လာကြပြီဖြစ်တဲ့အလျောက် အားလုံးဟာ ဒီအချက်ကို  အငြင်းပွားကြတော့မယ် မဟုတ်ပါဘူး။ ဒီကြားထဲမှာ သီအိုရီများနဲ့ အလုံးစုံ ကိုက်ညီမှုမရှိတဲ့ မြန်မာ့ရေခံမြေခံက ပိုပြီးတော့ လုပ်ရကိုင်ရခက်ခဲစေမယ့် အတားအဆီး၊ အခက်အခဲတွေ တစ်ခုပြီးတစ်ခု ပေါ်ပေါက်စေတာ ဖြစ်လေတော့ ဒီခရီးနီးပါ့မလားလို့ သံသယဝင်စရာ၊ စိတ်ဓာတ်ကျချင်စရာ အခြေအနေတွေကို မကြာခဏ ကြုံတွေ့နေကြရတာ အားလုံးအသိပါပဲ။ သို့သော် အကျိုးဆိုင်သူများရဲ့ အမြော်အမြင်နဲ့ Vision ကောင်းမယ်ဆိုရင် မြန်မာ့အနာဂတ်သည် အရောင်တလက်လက် ဖြစ်လာမှာ မုချပါပဲ။

စနစ်တစ်ခုကို ကောင်းအောင် တည်ဆောက်ရတာ ခက်ခဲလေ ခေါင်းဆောင်မှု အခန်းကဏ္ဍသည် ပိုမိုအရေးပါလေ ဖြစ်ပါတယ်။ စနစ်ကောင်းတစ်ရပ် အခိုင်အမာ မပေါ်ထွန်းမချင်း တောင့်တင်းတဲ့ ခေါင်းဆောင်မှု အခန်းကဏ္ဍ (Leadership) က အရေးပါပါတယ်။ စနစ်ကောင်းတစ်ရပ် ပေါ်ထွန်းဖို့ခက်ခဲလေ ခေါင်းဆောင်မှုက ပိုအရေးကြီးလေ ဖြစ်ပါတယ်။ စနစ်က မကောင်းနိုင်သေးတဲ့အခါမှ အစစအရာရာ အားနည်းချက်၊ လိုအပ်ချက်များ များပြားလှသလို နိုင်ငံတော်တည်ဆောက်ရေးဖြစ်စဉ်ကြီး လမ်းချော်သွားလေမလားဆိုတဲ့ ရတက်မအေးစရာ အခြေအနေတွေကိုလည်း မကြာခဏ ရင်ဆိုင်ရနိုင်တာကြောင့် စနစ်မကောင်းနိုင်သေးခင် စပ်ကြားခေါင်းဆောင်မှုကဏ္ဍကို အလေးအနက်စဉ်းစားကြဖို့ ဖြစ်ပါတယ်။

စနစ်တစ်ခုကောင်းဖို့ဆိုတာ တစ်နည်းပြောရရင် အင်စတီကျူးရှင်းများ ခိုင်မာတောင့်တင်းဖို့ ဖြစ်ပါတယ်။ အားနည်းနေတဲ့ အင်စတီကျူးရှင်းများကို နေ့ချင်းညချင်း ခိုင်မာအောင် ပြန်လည်တည်ဆောက်ဖို့ ဆိုတာက မဖြစ်နိုင်တဲ့ကိစ္စပါ။ အစိုးရ တစ်ဆက် နှစ်ဆက်နဲ့လည်း ဖြစ်နိုင်တဲ့ကိစ္စမဟုတ်ပါဘူး။ ဒီတော့ အင်စတီကျူးရှင်းများ မခိုင်မာလို့ နိုင်ငံတော် တည်ဆောက်ရေးဖြစ်စဉ်ကြီး ယိုင်လဲမသွားရလေအောင် ခေါင်းဆောင်မှုအခန်းကဏ္ဍကို ခိုင်မာအောင် စဉ်းစားမြှင့်တင်ပြီးတော့ ခရီးဆက်ကြဖို့ပါ။

နောက်တစ်ခါ ဘက်စုံနိမ့်ကျနေတဲ့ လူ့အဖွဲ့အစည်းတစ်ခုကို အဆင့်မြင့်လာအောင် (စနစ်တစ်ရပ်ပြည့်စုံအောင် မထူထောင်နိုင်သေးခင်မှာ) ခေါင်းဆောင်မှုကောင်းကောင်းနဲ့ အပါ ဆွဲခေါ် ဆွဲတင်ဖို့ မဖြစ်မနေ လိုအပ်ပါတယ်။ ရဲရင့်သော၊ ပြတ်သားသော၊ ဆုံးဖြတ်ချက်များ မှန်မှန်ကန်ကန် ခိုင်ခိုင်မာမာ ချမှတ်နိုင်သော၊ ဥဏ်ပညာအမြော်အမြင်နဲ့ ပြည့်စုံသော ခေါင်းဆောင်မှုသည်သာ လူ့အဖွဲ့အစည်းတစ်ရပ် လူလူသူသူဖြစ်လာဖို့အတွက် အဖြေဖြစ်ပါတယ်။ ခေါင်းဆောင်မှုကောင်းကသာ စနစ်ကောင်းကို (အင်စတီကျူးရှင်းများ ခိုင်မာရေးကို) ဦးဆောင်ဦးရွက်ပြုပြီး တည်ဆောက်ပေးနိုင်ပါတယ်။

မြန်မာနိုင်ငံရေး ယဉ်ကျေးမှု ရေချိန်က အလွန်တရာ နိမ့်ပါးနေပါသေးတယ်။ လူမှန်နေရာမှန်ဖြစ်ဖို့ အင်မတန်မှ ခက်ခဲပါသေးတယ်။ အရည်အချင်းများဖြည့်ဆည်းဖို့ လိုအပ်နေပါသေးတယ်။ နေရာသာလိုချင်ပြီး တာဝန်မယူ တာဝန်မခံချင်လို့ မရသလို နေရာနဲ့ထိုက်တန်တဲ့ လုပ်ကိုင်နိုင်စွမ်း (Performent or Efficiency) ပြည့်ဝဖို့လည်း မဖြစ်မနေ လိုအပ်ပါတယ်။ ယေဘုယျအားဖြင့် အဲသလိုအခြေအနေကောင်း မရှိသေးပါဘူး။ နေရာလိုချင်ဖို့ထက် ထိုက်တန်တဲ့သူကို နေရာပေးချင်စိတ်ရှိဖို့ အင်မတန်မှ အရေးကြီးပါတယ်။ ကိုယ်ခေါင်းဆောင်လုပ်ဖို့ထက် ခေါင်းဆောင်လုပ်ထိုက်သူ အရည်အချင်းပြည့်ဝသူကို ခေါင်းဆောင်ခွင့်ပေးဖို့ဆိုတာဟာ နိုင်ငံတစ်ခုကို ထူထောင်ဖို့အတွက် စနစ်ကောင်းတစ်ရပ် မပေါ်ပေါက်သေးခင်မှာ သေရေးရှင်ရေးလောက် အရေးကြီးပါတယ်။

အရည်အသွေးပြည့်ဝသူတွေက ယေဘုယျအားဖြင့် နေရာမက်လေ့ မရှိပါဘူး။ နေရာကို အတင်းအဓမ္မလိုချင်သူတွေနဲ့ သူတင်ကိုယ်တင် အပြိုင်ကြဲပြီးတော့ နေရာရဖို့လည်း ဘယ်တော့မှ ကြိုးစားမှာမဟုတ်ပါဘူး။ အဲဒီအခါမှာ နေရာငမ်းတဲ့ ယဉ်ကျေးမှုထွန်းကားတဲ့ တိုင်းပြည်မှာ ခပ်ညံ့ညံ့များ ခေါင်းဆောင်တွေ ဖြစ်လာလေ့ရှိပြီး လူ့အဖွဲ့အစည်းက ဒုက္ခရောက်ရတတ်ပါတယ်။ 

ခေါင်းဆောင်မှုအခန်းကဏ္ဍကို မြှင့်တင်မှသာ လူထုကို နိုးကြားလာအောင် တွန်းနိုင် ဆွဲနိုင်ပါလိမ့်မယ်။ စည်းကမ်းရှိတဲ့ လူ့အဖွဲ့အစည်းဖြစ်အောင် ချော့တစ်ခါ ခြောက်တစ်လှည်နဲ့ တွန်းတင်နိုင်ပါလိမ့်မယ်။ တိုင်းပြည်အကျိုး ဖြစ်ထွန်းမယ့် ဆုံးဖြတ်ချက်များကို ရဲရဲပြတ်ပြတ် ချမှတ် အကောင်အထည်ဖော်နိုင်ပါလိမ့်မယ်။ နိုင်ငံတည်ဆောက်ရေးလုပ်ငန်း အောင်မြင်ရေးအတွက် နံပါတ်တစ် အရေးကြီးဆုံးကိစ္စကို ပြောပါဆိုရင် ခေါင်းဆောင်မှု အခန်းကဏ္ဍကို ပြောရပါမယ်။ ခေါင်းဆောင်ကောင်းက ဦးဆောင်ပြီးတော့ လူ့အဖွဲ့အစည်းတစ်ရပ်လုံးကို ပန်းတိုင်အရောက် ခေါ်ဆောင်သွားနိုင်ပါတယ်။ ခေါင်းဆောင်မှု အခန်းကဏ္ဍမြင့်မားမယ် အဆင့်မီမယ်ဆိုရင် စနစ်ကောင်းတစ်ရပ် ပေါ်ထွန်းဖို့ သေချာပေါက် အာမခံချက်ရှိမှာဖြစ်သလို အလျင်အမြန် ပန်းတိုင်ရောက်ဖို့လည်း သေချာပါတယ်။

အသွင်ကူးပြောင်းရေးကာလမှာ စင်ကာပူရဲ့ လီကွမ်ယူးလို ခေါင်းဆောင်များ ပေါ်ပေါက်ဖို့ လိုအပ်ပါတယ်။ အမြော်အမြင်သိပ်ကြီးတဲ့ တိန့်ရှောင်ဖိန်လိုခေါင်းဆောင်မျိုး လိုအပ်ပါတယ်။ လင်ကွန်းလိုခေါင်းဆောင်မျိုး လိုအပ်ပါတယ်။ ရှေ့ကနေ အားသွန်ခွန်စိုက်အလုပ်လုပ်သလို နောက်ကလူထုကိုလည်း အနု အကြမ်း နည်းစုံ လမ်းကုန်နဲ့ အပါခေါ်မယ့် ခေါင်းဆောင်များ နေရာရဖို့ လိုအပ်ပါတယ်။ ခေါင်းဆောင်ဖြစ်ရမှဆိုတဲ့ ခေါင်းဆောင်ဖြစ်ဖို့ ရည်မှန်းချက်ကြီးကြီးထားကြသူတွေကလည်း ဒီအချက်ကို နှလုံးသွင်းကြဖို့ပါ။ လီကွမ်ယူးဟာ စင်ကာပူကိုဦးဆောင်ပြီး စနစ်ကောင်းတစ်ခုကို အပြင်းအထန် အားထုတ်ကြိုးပမ်း တည်ထောင်ပေးခဲ့ပါတယ်။စနစ်ကောင်းတစ်ရပ် ပေါ်ထွန်းလာတဲ့အခါမှာ စနစ်က အရာရာကို ပြဋ္ဌာန်းပါတော့တယ်။ 

မြန်မာ့ယဉ်ကျေးမှု ရေခံမြေခံကလည်း ခေါင်းဆောင်ကို အလွန်မတန်မှ အားကိုးတဲ့ဓလေ့ ဖြစ်ပါတယ်။ ခေါင်းဆောင်ကို ဘုရားတစ်ဆူ ဂူတစ်လုံးလို ကိုးကွယ်တဲ့ယဉ်ကျေးမှုပါ။ ခေါင်းဆောင်ကို အင်မတန် အထင်ကြီးလေးစားတတ်ပြီးတော့ ခေါင်းဆောင်က ဦးဆောင်ခေါ်တဲ့နောက်ကိုပဲ တစိုက်မတ်မတ် လိုက်ပါလိုကြတဲ့သဘောက တခြားလူ့အဖွဲ့အစည်းတွေထက် နည်းနည်းပိုပါတယ်။ ဒီသဘောတရားကို အပြုသဘောဖြစ်အောင် ချဉ်းကပ်ဆောင်ရွက်နိုင်မှ တော်ကာကျပါလိမ့်မယ်။ ဆိုလိုတာက ခေါင်းဆောင်က အမြော်အမြင်ကြီးကြီး ထက်ထက်မြက်မြက် ပြတ်ပြတ်သားသား ရှိဖို့ပါ။ လူထုကို ဆွဲခေါ်နိုင်ကြဖို့ လိုပါတယ်။ မြန်မာတို့အနေနဲ့က ဒီမိုကရေစီဆိုရင် တက်လာတဲ့အစိုးရတွေက အရာခပ်သိမ်းဖန်တီးပေးမှာ၊ အားလုံး နေ့ချင်းညချင်းပြန်လည်သွားမှာ ပြည့်စုံသွားမှာဆိုတဲ့ လွဲမှားတဲ့စိတ်အခံ (အများစုမှာ) ရှိနေတာပါ။ ခေါင်းဆောင်ကောင်းတို့က ဒါကို မှန်မှန်ကန်ကန်ဖြစ်အောင် တည့်မတ်ပေးဖို့ ၊ နိုးနိုးကြားကြားဖြစ်လာဖို့ ၊ စည်းကမ်းတွေ တိုးတက်လာဖို့၊ အလုပ်ကြိုးစားလာကြဖို့၊ ရှေ့ကနေ ပိုင်ပိုင်နိုင်နိုင် ဦးဆောင်လမ်းပြနိုင်ကြဖို့ မဖြစ်မနေ လိုအပ်နေပြီဖြစ်ပါတယ်။

လူဆိုတာက ဖောက်ပြန်တတ်တဲ့အမျိုးပါ။ သူ့ကို စနစ်ကောင်းနဲ့ ထိန်းကျောင်းပေးရပါတယ်။ စနစ်ကောင်းနဲ့ ထိန်းချုပ်ရပါတယ်။ စနစ်ကောင်းသွားတဲ့အခါမှာ ခေါင်းဆောင်မှုအခန်းကဏ္ဍ ကောင်းမွန်ရေး အဆင့်မီရေးဆိုတာ ကျွဲကူးရေပါကိစ္စပါပဲ။ သိပ်ပြဿနာမရှိတော့ပါ။ စနစ်ကောင်းတဲ့အခါ နိုင်ငံရေး၊ စီးပွားရေး၊ ပညာရေးနဲ့ ဘက်စုံကဏ္ဍအားလုံးဟာ စနစ်ကောင်းနဲ့အတူ ရေမြင့်ကြာမြင့် တင့်တယ်မြင့်မားလာစမြဲမို့ ခေါင်းဆောင်ကောင်းများ ပေါ်ထွန်းရေးဆိုတာဟာ သိပ်ခက်ခဲတဲ့ ပြဿနာ မဟုတ်တော့ပါ။

ဒါကြောင့် စနစ်နဲ့ ခေါင်းဆောင်မှု အခန်းကဏ္ဍဟာ နှစ်ခုစလုံး အရေးပါပေမယ့် စနစ်ကောင်းကို မတည်ဆောက်နိုင်သေးခင်မှာ ခေါင်းဆောင်မှု အခန်းကဏ္ဍကောင်းဖို့ကို ပိုပြီး လေးလေးနက်နက် စဉ်းစားလုပ်ကိုင်ကြဖို့ပါ။ ဒီလိုမလုပ်နိုင်ရင် စနစ်ကောင်းတစ်ရပ် ထူထောင်နိုင်ရေးသည်လည်း အိပ်မက်သက်သက်သာ ဖြစ်နေဦးမှာဖြစ်သလို နိုင်ငံတော်တည်ဆောက်ရေးလုပ်ငန်းစဉ်ကြီး ချောချောမွေ့မွေ့ မြန်မြန်ဆန်ဆန် အောင်မြင်ရေးသည်လည်း အလွယ်တကူ အကောင်အထည်ပေါ်လာဖို့ ခက်ခဲပါလိမ့်မယ်။ ပန်းတိုင်နဲ့ ဝေးကွာသွားနိုင်တဲ့ အန္တရာယ်ကိုလည်း ကြုံတွေ့ကြရနိုင်ပါကြောင်း။ 

မင်းနွယ်

  • TAGS