News

POST TYPE

PERSPECTIVE

ကျောင်းသားတွေ များလာရင် ထောင်သားတွေ နည်းသွားလိမ့်မယ်
19-Aug-2017
ပြီးခဲ့သည့် ၂၀၁၆/၁၇ ပညာသင်နှစ်၊ တက္ကသိုလ်ဝင်တန်း စာမေးပွဲတွင် မန္တလေးအကျဉ်းထောင်မှ ဂုဏ်ထူးဖြင့် အောင်မြင်သူ ငါးဦးနှင့် အင်းစိန်အကျဉ်းထောင်မှ ဂုဏ်ထူးဖြင့် အောင်မြင်သူ နှစ်ဦးတို့ကို နိုင်ငံတော်သမ္မတ၏ လွတ်ငြိမ်းချမ်းသာခွင့်အမိန့်ဖြင့် လွှတ်ပေးခဲ့သည့်အတွက် များစွာနှစ်ထောင်းအားရ ဖြစ်ရပါကြောင်း ပထမဦးစွာ ဖော်ပြလိုပါသည်။

ကျောင်းတော်ကြီးလား အကျဉ်းထောင်လား

ယနေ့မြန်မာနိုင်ငံရှိ အကျဉ်းထောင်များတွင် အကြောင်းအမျိုးမျိုးကြောင့် အကျဉ်းကျခံနေရသူ များစွာရှိပါသည်။ အကြောင်းအမျိုးမျိုး ဆိုသည်မှာ နိုင်ငံတော်က ပြဋ္ဌာန်းထားသော ဥပဒေတစ်ရပ်ရပ်ကို တမင်သက်သက် ကျူးလွန်ဖောက်ဖျက်ပြီး ပြစ်မှုထင်ရှားသဖြင့် ထောင်ဒဏ်ကျနေရသူများ၊ တမင်သက်သက် ရည်ရွယ်ချက်ဖြင့် မဟုတ်သော်လည်း ဒေါသအလျောက်သော် လည်းကောင်း မတော်တဆပြုမူ ဆောင်ရွက်မိရာမှ လည်းကောင်း ဥပဒေတစ်ရပ်ရပ်ဖြင့် ငြိစွန်းပြီး ပြစ်ဒဏ်ချမှတ်ခံရသူများ၊ ဥပဒေကို မသိနားမလည်ပါဟူ၍ ရှောင်တိမ်းမရသော်လည်း အမှန်တကယ်ပင် ဥပဒေကို နားမလည်သဖြင့် ပြုမူဆောင်ရွက်မိရာမှ ပြစ်မှုတစ်ခုခုကို ကျူးလွန်မိပြီး ပြစ်ဒဏ်ကျခံနေရသူများနှင့် အမှန်တကယ် ပြစ်မှုမကျူးလွန်ဘဲနှင့် မတရားစွပ်စွဲခံရခြင်း သို့မဟုတ် မှားယွင်း၍ ပြစ်ဒဏ်ကျခံရခြင်း စသည့် စသည့် အကြောင်းအမျိုးမျိုးကို ဆိုလိုခြင်း ဖြစ်ပါသည်။

မည်သည့်အကြောင်းကြောင့်ပင် ဖြစ်ပါစေ အကျဉ်းထောင် ဆိုသည်မှာ မနေသင့် မနေအပ်သောအရပ် ဖြစ်သလို မည်သူကမှလည်း မနေလိုသော နေရာတစ်ခု ဖြစ်ပါသည်။ ထို့ကြောင့် ပြစ်ဒဏ်တစ်ခုခုကို ကျခံခဲ့ဖူးကြသူများ အားလုံး မည်သူမျှ အကျဉ်းထောင်သို့ တစ်ကျော့ပြန် ပြန်လာလိုကြသည် မဟုတ်ပေ။ သို့သော် အချို့သော ပြစ်ဒဏ်ကျခံဖူးသူများသည် မည်သည့်အတွက်ကြောင့် ပြစ်မှုများကို ထပ်မံကျူးလွန်နေကြပါသနည်း။ ဆိုရလျှင် ပြင်ပတွင် ဘဝရပ်တည်မှုအတွက် လုပ်ကိုင်ရှာဖွေ စားသောက်ရန် အသက်မွေးဝမ်းကျောင်းပညာ တစ်ခုခုကို မတတ်မြောက်ကြခြင်းနှင့် တတ်မြောက်သော်လည်း အလုပ်အကိုင်ရရှိရန် ခက်ခဲခြင်း၊ ပတ်ဝန်းကျင်က လက်မခံ/ လူရာမသွင်းကြခြင်း စသည့် အကြောင်းများကြောင့်လည်း ဖြစ်ပါသည်။ (အချို့မှာ ပြစ်မှုကျူးလွန်ပြီးနောက် ထွက်ပြေးတိမ်းရှောင်ရန် လွယ်ကူခြင်း စသည့် အကြောင်းများကြောင့်လည်း အပါအဝင် ဖြစ်ပါသည်)။

ကမ္ဘာပေါ်ရှိ အကျဉ်းထောင်များ၏ ရည်ရွယ်ချက်များတွင် ပြစ်ဒဏ်တစ်ခုခု ကျခံနေရသူအား နောင်ကြဉ်စေရန်နှင့် ထောင်မှလွတ်မြောက်သွားပါက လူကောင်းသူကောင်းတစ်ယောက် ဖြစ်လာပြီး လူရာဝင်စေရန်အတွက် ပြုပြင်ပြောင်းလဲပေးရန် ဆိုသည့် ရည်ရွယ်ချက်လည်း ပါရှိပါသည်။ 

မြန်မာနိုင်ငံ၏ အကျဉ်းထောင်များသည်လည်း ယနေ့တိုင် အင်္ဂလိပ်တို့ ပြဋ္ဌာန်းခဲ့သည့် အကျဉ်းထောင်လက်စွဲနှင့်အညီ ဆောင်ရွက်လုပ်ကိုင်နေရသည် ဖြစ်ရာ အဆိုပါ ပြဋ္ဌာန်းချက်မှာ အသက်ဝင်လျက် ရှိနေပါသည်။ ထို့ကြောင့်ပင် တစ်ချိန်က အကျဉ်းထောင်များတွင် ထောင်ကျအကျဉ်းသားများအား လက်သမားပညာ၊ ကြိမ်ထိုး၊ ကြိုးထိုးပညာ၊ စက်ချုပ်ပညာနှင့် အခြားလက်မှုပညာတို့ကို အသက်မွေးဝမ်းကျောင်းလုပ်ငန်း တစ်ခု အဖြစ် ကျွမ်းကျင်စွာ လုပ်ကိုင်နိုင်ရန် အလို့ငှာ စနစ်တကျ သင်ကြား လေ့ကျင့်ပေးခဲ့ကြပါသည်။ ထို့ကြောင့်ပင် တစ်ချိန်က အကျဉ်းထောင်တွင်းမှ ထွက်ရှိသည့် ကြိမ်ကုလားထိုင်များ၊ ကြိုးပုတီးများနှင့် အိမ်ထောင်ပရိဘောဂ ပစ္စည်းများသည် လက်ရာမြောက်လှသည်ကို တွေ့ရှိရပါသည်။ အထူးသဖြင့် စားပွဲ၊ ကုလားထိုင်၊ ဗီရို စသည့် ရုံးသုံးပရိဘောဂ ပစ္စည်းများကို သတ်မှတ်ချက်နှင့်အညီ စနစ်တကျ လုပ်ကိုင်နိုင်သဖြင့် အစိုးရဌာနများ အနေနှင့် ရုံးသုံးပရိဘောဂ ပစ္စည်းများကို အကျဉ်းထောင်များမှသာ မှာယူသုံးစွဲကြ ရပါသည်။ သို့သော် ယခုအခါ အဆိုပါ သတင်းများကို မကြားသိရတော့သဖြင့် ယနေ့အကျဉ်းထောင်များတွင် အသက်မွေးဝမ်းကျောင်းပညာများ သင်ကြားပေးလျက်ရှိ၊ မရှိကို မသိရတော့ပါ။ တရားဝင် အသက်မွေးပညာများ သင်ကြားပေး၊ မပေးမသိရသော်လည်း တရားမဝင် အသက်မွေးပညာများ ဖြစ်သည့် ခိုး-ဆိုး-လု-နှိုက် စသည့် မတတ်ကောင်းသည့် အတတ်ကောင်းများကို တတ်မြောက်လာစေသည့် ကျောင်းတော်ကြီးအဖြစ် ပြင်ပတွင် ကျော်ကြားလျက် ရှိသည်မှာကား အမှန်ပင် ဖြစ်ပါသည်။

တစ်ခေတ်ဆန်းလာသည့် မြန်မာ့အကျဉ်းထောင် 

ဤကဲ့သို့သော အခြေအနေမျိုးတွင် ယခုထွက်ပေါ်လာသော သတင်းမှာ အကျဉ်းထောင်လောက အတွက် လည်းကောင်း၊ ပြစ်ဒဏ်ကျခံနေရသူများအတွက် လည်းကောင်း၊ ၎င်းတို့၏ မိသားစုများအတွက် လည်းကောင်း မင်္ဂလာရှိသော သတင်းကောင်း တစ်ခုပင် ဖြစ်ပါသည်။ နောက်ဆက်တွဲသတင်းအဖြစ် တက္ကသိုလ်ဝင်တန်းကို ရိုးရိုးအောင်မြင်သူများအားလည်း လျှော့ရက်များပေးကြောင်း သိရှိရသဖြင့် အကျဉ်းသားများ အနေနှင့် ကြိုးစားချင်စိတ်များ ဖြစ်ပေါ်လာမည် ဖြစ်ပါသည်။ 

တစ်ဆက်တည်း ဆက်လက်သိရှိရသည်မှာ အင်းစိန်အကျဉ်းထောင် အတွင်းတွင် အကျဉ်းဦးစီးဌာန ဘတ်ဂျက်ဖြင့် တည်ဆောက်ထားသော အခြေခံပညာ အလယ်တန်းကျောင်းခွဲတစ်ကျောင်း ရှိကြောင်းနှင့် ယင်းကျောင်းတွင် အကျဉ်းသား ၁၀၀ ကျော် ပညာသင်ကြားနေကြောင်း သိရှိရပြီး လာမည့် ၂၀၁၇/၂၀၁၈ ပညာသင်နှစ်တွင်လည်း တက္ကသိုလ်ဝင်တန်း ဖြေဆိုမည့် ကျောင်းသား ၃၃ ဦး ရှိကြောင်း သိရှိရပါသည်။ (The Voice Daily 13.8.2017)။ ဤကဲ့သို့ ဖြစ်မြောက်အောင် စီစဉ်ဆောင်ရွက်ပေးသူများနှင့် တာဝန်ရှိသူများ အားလုံးကို အမှန်တကယ်ပင် ချီးကျူးဂုဏ်ပြုလိုက်ပါသည်။

ထောင်ကျသော်လည်း ဘဝမဆုံးပါ

လူသားတစ်ယောက် ပြစ်မှုကျူးလွန်၍ ပြစ်ဒဏ်ချမှတ်ရာတွင် ၎င်းကျူးလွန်ခဲ့သည့် ပြစ်မှု၏ အတိုင်းအတာအလျောက်သာ တရားဥပဒေက အပြစ်ပေးခြင်း ဖြစ်ပါသည်။ အကျဉ်းထောင်များကလည်း ထိုနည်းအတူသာလျှင် ဖြစ်ပါသည်။ တရားရုံးက ချမှတ်သည့် ပြစ်ဒဏ်ကာလအတိုင်း ကျခံပြီးပါက ထိုသူအား ထောင်မှလွှတ်ပေးလိုက်ရုံသာ ဖြစ်ပါသည်။ သို့သော် အမှန်တကယ် လက်ရှိဖြစ်ပျက်နေသည်ကား ထိုသို့မဟုတ်ပါ။ ထောင်ဒဏ်ကျခံရသူတစ်ဦးသည် တရားရုံးကချမှတ်သည့် ပြစ်ဒဏ်မျှသာမက တစ်ဘဝလုံး ပြစ်ဒဏ်ချမှတ်ခံလိုက်ရသည့်သဖွယ် လူလုံးမလှ ဖြစ်သွားပြီး လူတောသူတော မတိုးသည့် ဘဝမျိုးသို့ ရောက်ရှိကာ ဘဝပျက်သွားသည်အထိ ဖြစ်သွားကြရပါသည်။

ဆိုလိုသည်မှာ ဝန်ထမ်းတစ်ယောက် ထောင်ဒဏ်ချမှတ်ခံရပါက ၎င်း၏အလုပ်ပါ ပြုတ်သွားပြီး မိသားစု စားဝတ်နေရေးနှင့် သားသမီးများ၏ ပညာရေးပါ ဒုက္ခရောက်ကြရသည်။ ထောင်မှလွတ်ပါကလည်း အများတကာက အဖက်မလုပ် မခေါ်မပြောဘဝဖြင့် ဘဝပျက်ကြရရှာသည်။ ကျောင်းသားတစ်ယောက် ထောင်ကျသွားပါကလည်း ၎င်း၏ ပညာရေး ဆုံးခန်းတိုင် မရောက်တော့ဘဲ ထောင်မှလွတ်ပါက ပညာမတတ်ဘဝဖြင့် အလုပ်အကိုင် အခွင့်အလမ်းများ လက်လွတ်ဆုံးရှုံးရပြန်သည်။ အလုပ်အကိုင်လည်း မရှိသဖြင့် စားဝတ်နေရေးခက်ခဲပြီး ပြစ်မှုများ ထပ်ကာထပ်ကာ ကျူးလွန်ကာ တစ်သက်တာ ရာဇဝတ်သားဘဝဖြင့် အရိုးထုတ်သွားရနိုင်ပါသည်။

ယခုမူ ထိုသို့ မဟုတ်တော့ပါ။ အမြော်အမြင်ကြီးမားသော တာဝန်ရှိသူတို့၏ ကောင်းမြတ်သော အစဉ်အလာ မင်္ဂလာတစ်ပါး ဖြစ်သည့် ထောင်တွင်း ကျောင်းဖွင့်လှစ် သင်ကြားပေးခြင်းဖြင့် ထောင်ဒဏ်ကျခံသူတို့သည် မိမိကျူးလွန်သည့် ပြစ်ဒဏ်ပမာဏ အတိုင်းအတာအရသာ ပြစ်ဒဏ်ကျခံရမည် ဖြစ်ပြီး တစ်သက်တာဘဝ ဆုံးရမည့်အရေးမှ ကင်းလွတ်ကြတော့မည် ဖြစ်ပါသည်။ ထို့အပြင် ယခုကဲ့သို့ ပညာထူးချွန်သူများအား လွှတ်ပေးခြင်းအားဖြင့်လည်း ထောင်တွင်းသို့ ပညာတစ်ပိုင်းတစ်စဖြင့် ရောက်လာသူများ အနေနှင့် ကြိုးစားလိုစိတ်များ တိုးပွားလာကြမည် ဖြစ်ကာ ၎င်းတို့အတွက် ထောင်တံခါး ပိတ်သွားတော့မည် ဖြစ်ပါသည်။

 ‘ကျောင်းတံခါးများ ဖွင့်ထားလျှင် ထောင်တံခါးများ ပိတ်သွားလိမ့်မည်’ ဟူသော အဆိုအမိန့်တစ်ခု ရှိပါသည်။ ယခုကဲ့သို့ ဆောင်ရွက်သည့် အစီအမံသည် ပုဂ္ဂိုလ်တစ်ဦးချင်းစီ၏ ပညာရေး၊ လူမှုစီးပွားဘဝ ရပ်တည်ရေးအတွက် အရေးပါ အရာရောက်သလို နိုင်ငံတော်အတွက်လည်း များစွာ အရေးပါသည့် လုပ်ငန်းစဉ်တစ်ရပ် ဖြစ်ပါသည်။ ပညာရေးကို အကြောင်းပြု၍ ထောင်မှလွတ်လာသူများသည် ၎င်းတို့၏ ပညာရေးလမ်းခရီးကို ရှေ့ဆက်လျှောက်လှမ်းကြမည် ဖြစ်သလို နောက်ထပ်လည်း မည်သည့်ရာဇဝတ်မှုကိုမျှ ကျူးလွန်ကြတော့မည် မဟုတ်ကြတော့ပါ။ ရပ်ရွာလူမှုအဖွဲ့အစည်းများကလည်း ထိုသူတို့၏ ပညာရေးခရီး ဆုံးခန်းတိုင်အောင် လျှောက်လှမ်းနိုင်ရေးအတွက် ဝိုင်းဝန်းကူညီ ဆောင်ရွက်ပေးကြရန် လိုအပ်ပါသည်။

ပညာရေးမှသည် ရာဇဝတ် မှုခင်းကျဆင်းရေးသို့ 

ယခုအခါတွင် အတန်းပညာရေးနှင့် အသိပညာရေးကို ခွဲခြားပြောဆိုနေမှုများအား တွေ့မြင်ကြားသိနေရပါသည်။ “ပညာရေး ဆိုသည်မှာ အတန်းပညာရေးထက် လုပ်သင့်မလုပ်သင့် အမှားအမှန်ကို ခွဲခြားသိမြင်ခြင်းကို ဆိုလိုကြောင်း” ပညာရှင်များက ပြောဆိုနေမှုများ ရှိပါသည်။ မှန်သင့်သလောက်မှန်သည် ဖြစ်သော်ငြားလည်း အတန်းပညာရေး လုံးဝမရှိဘဲနှင့်လည်း အသိပညာကို ရရှိလာမည် မဟုတ်ပါ။ ယုတ်စွအဆုံး ဘုန်းကြီးကျောင်းသားဘဝကို မဖြတ်သန်းဖူးဘဲနှင့်လည်း အသိပညာကို အလိုအလျောက် ရရှိလာမည် မဟုတ်ပါ။ ဖိုးရာဇာလို ပါရမီရှင် ပညာရှိမျိုး ဆိုသည်ကလည်း လူသိန်းပေါင်းများစွာတွင် တစ်ဦးရှိဖို့ မလွယ်ပါ။ ဖိုးရာဇာသည်ပင်လျှင် စာပေပညာများကို လေ့လာဖတ်ရှု (Self-Study) နိုင်ရန်အတွက် ဘုန်းကြီးကျောင်းသားဘဝကိုတော့ ဖြတ်သန်းရဦးမည် ဖြစ်ပါသည်။

ထို့ကြောင့် လူတစ်ယောက်အတွက် အမှားအမှန် ဝေဖန်ပိုင်းခြားတတ်သည့် အသိပညာကို ရရှိစေရန် အခြေခံပညာ မူလတန်းအဆင့် အတန်းပညာကိုတော့ လူတိုင်းတတ်မြောက်သင့်သည်ဟု ထင်မြင်ယူဆပါသည်။ ယခုအခါ နိုင်ငံတော်အစိုးရ အနေနှင့် မသင်မနေရ ပညာရေးစနစ်ကို ကလေးသူငယ် ဥပဒေတွင် ပြဋ္ဌာန်းထားသည်ထက် ပိုမို၍ အခြေခံပညာမူလတန်းမှသည် အလယ်တန်း၊ အထက်တန်း ပညာရေးအထိ တိုးမြှင့်ဆောင်ရွက်နေသည်ကို တွေ့ရှိရပါသည်။ သို့ရာတွင် အစိုးရတစ်ရပ်တည်းက ဆောင်ရွက်နေရုံမျှဖြင့် ဤကိစ္စက အောင်မြင်လိမ့်မည် မဟုတ်ပါ။

အဓိက လိုအပ်သည်မှာ မိဘပင် ဖြစ်ပါသည်။ မိဘများသည် စားဝတ်နေရေး ကျပ်တည်း၍ လည်းကောင်း၊ မိမိ၏ စီးပွားရေးလုပ်ငန်းတွင် ပါဝင် ကူညီဆောင်ရွက်ပေးရန်အတွက် လည်းကောင်း မိမိတို့၏ သား/သမီးများကို ကျောင်းမထားကြခြင်းဖြစ်ရာ၊ ကလေးသူငယ် ဥပဒေတွင် ပြဋ္ဌာန်းထားသည့် ‘ကလေးသူငယ်၏ အခွင့်အရေးများကို ယင်းတို့၏ မိဘ၊ အုပ်ထိန်းသူများ သိရှိနားလည် သဘောပေါက်စေရန် ပြန်ကြားရေး ဝန်ကြီးဌာန၊ ပြန်ကြားရေးနှင့် ပြည်သူ့ဆက်ဆံရေး ဦးစီးဌာနက ပညာပေး/ဖြန့်ဖြူးခြင်း ပြုရမည်’ ဆိုသည့် အချက်ကို အကောင်အထည်ဖော်ရန် လိုအပ်ပါသည်။ ဤတာဝန်ကို အကောင်အထည်ဖော်ရာတွင် ရပ်ရွာလူမှုအဖွဲ့အစည်းများ၏အားကို ရယူ၍ ပြည်သူတို့နှင့်အတူ ဖြေရှင်းဆောင်ရွက်ရန် လိုအပ်ပါသည်။

ထို့အပြင် ရပ်ကွက်/ကျေးရွာအုပ်စု အုပ်ချုပ်ရေး ဥပဒေပါ ရပ်/ကျေးဥက္ကဋ္ဌ၏ တာဝန်များ၌ ‘မိမိရပ်ကွက်/ကျေးရွာများအတွင်း ကျောင်းနေအရွယ် ကလေးများ ကျောင်းနေရေးနှင့် အနည်းဆုံး အခြေခံပညာ မူလတန်းအဆင့် ဆုံးခန်းတိုင်သည်အထိ ကျောင်းတက်ရေးအတွက် စည်းရုံးဆောင်ရွက်ရမည် သို့မဟုတ် တာဝန်ရှိစေရမည်’ ဟူ၍ ထည့်သွင်းပြဋ္ဌာန်းသင့်ပါသည်။ ကျောင်းပညာမှသည် အသိပညာရှိသူများ တစ်စတစ်စများ ပြားလာခြင်းဖြင့် ရာဇဝတ်မှုခင်းများ တဖြည်းဖြည်း ကျဆင်းလာမည် ဖြစ်ရာ ရပ်ရွာအေးချမ်းသာယာရေး ကိစ္စမှာလည်း ကျွဲကူးရေပါ ဖြစ်လာမည် ဖြစ်ပါသည်။

နိဂုံး

အချုပ်ဆိုရလျှင် ပြည်ထောင်စုအစိုးရ၊ ပြည်ထဲရေး ဝန်ကြီးဌာန၊ အကျဉ်းဦးစီးဌာန၏ ထောင်တွင်းကျောင်း(ခွဲ) ဖွင့်လှစ်ခြင်းနှင့် တက္ကသိုလ်ဝင်တန်း စာမေးပွဲကို ဖြေဆိုခွင့်ပြုသည့် အစီအစဉ်သည် နိုင်ငံ၏ တန်ဖိုးရှိသော လူ့စွမ်းအားအရင်းအမြစ် (အကျဉ်းကျ) များကို လူ့အခွင့်အရေး မဆုံးရှုံးစေရန် စီစဉ်ဆောင်ရွက်ခြင်းဖြစ်၍ အလွန်ပင်ကောင်းမွန် သင့်မြတ်သော အစီအစဉ် ဖြစ်ပါသည်။ ထို့ထက်ပို၍ တက္ကသိုလ်ဝင်တန်းကို ထူးချွန်စွာ အောင်မြင်သူများအား လွတ်ငြိမ်းချမ်းသာခွင့် ပြုလိုက်သော နိုင်ငံတော်သမ္မတကြီး၏ ဆောင်ရွက်ချက်သည်လည်း ထူးချွန်သူများအား အသိအမှတ်ပြု ဂုဏ်ပြုခြင်း ဖြစ်သလို နောက်လူများ ကြိုးစားအားထုတ်ချင်စိတ် ဖြစ်ပေါ်အောင် တွန်းအားပေးလိုက်ခြင်းလည်း ဖြစ်ရာ အတိုင်းမသိ ဝမ်းမြောက်ဝမ်းသာ ဖြစ်ရပါသည်။

ထို့ထက်ပို၍ ထောင်တံခါးများ ပိတ်သွားစေရေးအတွက် ကျောင်းတံခါးများကို ကျယ်ကျယ်ဖွင့်ပေးရန် အုပ်ချုပ်သူအစိုးရအပြင် မိဘ၊ ဆရာနှင့် ပြည်သူများအားလုံးတွင် တာဝန်ရှိကြပါသည်...။

သိန်းထက်အောင်