News

POST TYPE

PERSPECTIVE

ရခိုင်ပြည်နယ်အရေးကိစ္စနှင့် (၂၁)ရာစု အမျိုးသားလုံခြုံရေးအမြင် (၂)
18-Aug-2017
(မှူးဇော်)

ခြုံငုံသုံးသပ်ချက်

(၁) ပြည်တွင်းနေဘာသာတူများ ။ ထိလွယ်ရှလွယ် ဘာသာရေးတင်းမာမှု အခြေအနေတွေမှာ ပြည်တွင်းနေဘာသာတူတွေအနေနဲ့ အစွန်းရောက်အကြမ်းဖက်မှု အဝင်မခံတဲ့ အစဉ်အလာ အတိုင်း ဆက်လက်ပြီး ရပ်တည်ကြဖို့ အရေးကြီးပါတယ်။ တစ်ချိန်တည်းမှာပဲ ဘာသာရေးခေါင်း ဆောင်တွေအနေနဲ့ အမုန်းတရားထက် မေတ္တာတရားကို အလေးပေး ဟောပြောပေးဖို့ အထူးပဲ လိုအပ်လှပါတယ်။ တစ်ဖက်မှာလည်း ရခိုင်ပြည်နယ်က မူဆလင်တွေနဲ့ ပတ်သက်လို့လည်း လူဝင်မှုကြီးကြပ်ရေး ပြဿနာ၊ နိုင်ငံသားစိစစ်ရေးပြဿနာနဲ့ နယ်စပ်လုံခြုံရေးပြဿနာ ဖြစ်တယ် ဆိုတာကို လက်ခံထားဖို့ လိုပါတယ်။ ဒီနေရာမှာ နိုင်ငံသားစိစစ်ရေးလုပ်ငန်းစဉ်အောင်မြင်ဖို့ ဝိုင်း ဝန်းကူညီ ပံ့ပိုးပေးနိုင်ရင် ပြဿနာဖြေရှင်းရေးကို များစွာ အထောက်အကူ ဖြစ်စေမှာ ဖြစ်ပါတယ်။

(၂) မောင်တော ခရိုင်အုပ်ချုပ်ရေး ။ ခရိုင်အုပ်ချုပ်ရေးဟာ လတ်တလောမှာ ဖရိုဖရဲ ဖြစ်နေပြီးတော့ အစိုးရရဲ့ အုပ်ချုပ်မှုအာဏာ မစီးဆင်းနိုင်တော့တဲ့အနေအထားကို ရောက်နေပြီ လို့ ဆိုနိုင်ပါတယ်။ လုံခြုံရေးအရ အထူးအရေးကြီးဒေသအဖြစ် သတ်မှတ်ပြီး အုပ်ချုပ်ရေးစနစ်တစ်ရပ် အထူးအလေး ထားဆောင်ရွက်နိုင်မှ ရမှာ ဖြစ်ပါတယ်။ အုပ်ချုပ်ရေးမဏ္ဍိုင်ပြန်ပြီး ပုံမှန်လည်ပတ်လာနိုင်ဖို့ ဆိုတာ ကလည်း လုံခြုံရေးနဲ့ တည်ငြိမ်ရေးပေါ်မှာ မူတည်နေပြန်ပါတယ်။ အုပ်ချုပ်ရေးပြန်လည်ထူထောင်မှု ကို လုံခြုံရေးဖြန့်ကျက်ချထားမှုနဲ့ တစ်စုံလုံးစဉ်းစားဆောင်ရွက်ဖို့ လိုမှာ ဖြစ်ပါတယ်။

(၃) နယ်ခြားစောင့်ရဲတပ်ဖွဲ့ ။ ဘင်္ဂလားဒေ့ရှ်ဘက်မှာ နယ်ခြားစောင့်တပ် Border Guard Forces ဖြစ်ပြီး မြန်မာနိုင်ငံဘက်မှာ Border Guard Police ဖြစ်ပါတယ်။ အစွန်းရောက်အကြမ်းဖက် နှိမ်နင်းရေးကို အထူးလေ့ကျင့်ထားတဲ့ တပ်ဖွဲ့တွေက ကောင်းကောင်းမွန်မွန် ကိုင်တွယ်ဆောင်ရွက်နိုင်မှာ ဖြစ်တဲ့ အတွက် မြန်မာဘက်က ရဲတပ်ဖွဲ့ ဖြစ်နေပြီး ဘင်္ဂလားဘက်က တပ် ဖြစ်နေတာကို ပြန်ပြီး လေ့လာ သုံးသပ်ဖို့ လိုပါတယ်။ ရခိုင်ပြည်နယ် မြောက်ပိုင်းမှာ ဖြန့်ကျက်ထားတဲ့ စခန်းရဲ တွေဟာ ပြစ်မှုဆိုင် ရာ ကိစ္စရပ်တွေကိုသာ အဓိက ဆောင်ရွက်ကြသူတွေ ဖြစ်တာကိုလည်း သတိပြုဖို့ လိုပါတယ်။ လူရိုက်မှု၊ ခိုးမှု၊ လူသတ်မှုတွေကို စစ်ဆေးဖော်ထုတ်ရတဲ့ အမှုလိုက်ရဲတွေ ဖြစ်နေတဲ့အတွက် အစွန်း ရောက်အကြမ်းဖက်တွေကို နှိမ်နင်းနိုင်ဖို့ လေ့ကျင့်ပေးထာခြင်း မရှိတာကိုလည်း သတိပြုဖို့ လိုအပ် မှာ ဖြစ်ပါတယ်။ နယ်စပ်မျဉ်းလုံခြုံရေးနဲ့ အကြမ်းဖက်နှိမ်နင်းရေးက တာဝန်တစ်ခု၊ တရားဥပဒေစိုးမိုး ရေးက တာဝန်တစ်ခု သဘောသဘာဝ မတူညီတဲ့အတွက် ခွဲခြားပြီး စဉ်းစားသင့်ကြောင်း တွေ့ရှိရ ပါတယ်။ 

(၄) ရခိုင်မြောက်ပိုင်း အစွန်းရောက်ဝါဒီများ လျော့နည်းရေး ။ အစွန်းရောက်တွေ လျော့နည်းသွားဖို့ ရန်ကုန်က ဘာသာရေးခေါင်းဆောင်တွေ အဓိက ပံ့ပိုးကူညီနိုင်ပါတယ်။ သို့မဟုတ်ရင် အရှေ့ အလယ်ပိုင်းက အစွန်းရောက်အယူအဆတွေ လွှမ်းမိုးလာနိုင်ပါတယ်။ ဒီအလားအလာက ဒေသ တွင်းမှာ ရှိတဲ့ အခြေအနေတွေနဲ့ ဆက်စပ်နေပြန်ပါတယ်။ ပညာရေး၊ ကျန်းမာရေး၊ လမ်းပန်း စတဲ့ ဒေသဖွံ့ဖြိုးရေးဟာ အစွန်းရောက် လျော့နည်းရေးနဲ့ သွယ်ဝိုက်ပြီး ဆက်စပ်နေပါတယ်။ မွန်းကျပ်လှောင်ပိတ်နေတဲ့ မူဆလင်လူ့အဖွဲ့ အစည်းကို လင်းပွင့်သွားအောင် ဘက်စုံဆောင်ရွက်ချက်တွေနဲ့ ဆက်စပ်ဆောင်ရွက်ရန် ဖြစ်ပါတယ်။ 

(၅) နိုင်ငံသားစိစစ်ရေးလုပ်ငန်းစဉ် ပြီးစီးအောင်မြင်ရေး ။  အဓိက လုပ်ငန်းစဉ်ဖြစ်ပါတယ်။ ကာလ ရှည်ကြာ အငြင်းပွားလာတဲ့ ခိုးဝင်လား၊ ဌာနေဖွားလား ဆိုတာကို ဖြေရှင်းပေးနိုင်မယ့် တစ်ခုတည်း သော လုပ်ငန်းစဉ် ဖြစ်ပါတယ်။ ဒီလုပ်ငန်းစဉ်ကို ပီပီပြင်ပြင်ဆောင်ရွက်ဖို့ ရခိုင်တိုင်းရင်းသားများ သာမက တစ်နိုင်ငံလုံးက၊ တစ်ကမ္ဘာလုံးက လိုလားနေကြတာ ဖြစ်ပါတယ်။ ဒီလုပ်ငန်းစဉ်ကို အစွန်း ရောက်တွေရဲ့ လှုံ့ဆော်သွေးထိုးမှုကြောင့် ကန့်ကွက်ငြင်းဆန်နေကြတာက ပြဿနာဖြေရှင်းရေး အတွက် ကြီးမားတဲ့ အခက်အခဲ ဖြစ်နေပါတယ်။ ယုံကြည်စိတ်ချပြီး ပွင့်လင်းမြင်သာမှုရှိတဲ့ နိုင်ငံသား စိစစ်မှုလုပ်ငန်းစဉ် အမြန်ဆုံး ပြီးစီးအောင် ဆောင်ရွက်နိုင်မယ် ဆိုရင် ကျန်တာတွေ ဖြေရှင်းရ လွယ် ကူသွားပြီ ဖြစ်ပါတယ်။ နိုင်ငံသားဥပဒေနဲ့ညီရင် နိုင်ငံသားပေးရမှာ ဖြစ်ပါတယ်။ နိုင်ငံသား ဥပဒေနဲ့ မညီတဲ့သူတွေကို အရေအတွက်တစ်ခု တိတိကျကျ ထွက်လာပြီဆိုရင် ဘယ်လိုဆက်လုပ်ကြမလဲ ဆိုတာကို ဆက်ပြီး စဉ်းစားကြရမှာပဲ ဖြစ်ပါတယ်။ 

(၆) ဘင်္ဂလားဒေ့ရှ်နိုင်ငံနဲ့ ပူးပေါင်းဆောင်ရွက်မှု မြှင့်တင်ရေး ။  နယ်စပ်မှာရှိတဲ့ ဒုက္ခသည်စခန်း တွေဟာ အစွန်းရောက် အကြမ်းဖက်တွေရဲ့ Safe House ဖြစ်နေတာကို ဘင်္ဂလားဒေ့ရှ်နိုင်ငံက သိမြင်နား လည်ပြီး မြန်မာနိုင်ငံနဲ့ ပူးပေါင်းဆောင်ရွက်ဖို့ အင်မတန် အရေးကြီးပါတယ်။ နယ်စပ်ကုန်သွယ်ရေး နဲ့ ထောက်လှမ်းရေးသတင်းအချက်အလက် ဖလှယ်ရေးဟာ မလုံမခြုံဖြစ်နေတဲ့ နှစ်နိုင်ငံ နယ်စပ် ဒေသကို တည်ငြိမ်လာစေမှာ ဖြစ်ပါတယ်။ အစွန်းရောက်အကြမ်းဖက်တွေဟာ ဘင်္ဂလားမှာရှိနေတဲ့ ဒုက္ခသည်စခန်းတွေကို ခိုလှုံပြီး အင်အားမွေး လူသစ်စုနေကြတာ ဖြစ်တဲ့အတွက် နှစ်နိုင်ငံ နားလည်မှု ရှိရှိ ပူးပေါင်းဆောင်ရွက်မှုတွေ ဘက်စုံ မြှင့်တင်ဖို့ လိုပါတယ်။ တစ်ချိန်တည်းမှာ တရုတ် နိုင်ငံရဲ့ One Belt One Road ကို ချိတ်ဆက်ရမယ့် BCIM စီးပွားရေးစြင်္ကန်အတွက် လုံခြုံမှုကို စဉ်းစားကြဖို့ လိုပါတယ်။ အိမ်နီးချင်းဆိုတာ လှဲလှယ်လို့မရ၊ အစားထိုးလို့လည်း မရတဲ့ အတွက် ဘုံအကျိုးစီးပွားကို ဝေမျှနိုင်ဖို့ အာရုံစိုက်သင့်ပါတယ်။

(၇) ရခိုင်ပြည်နယ်လုံခြုံရေး မဟာဗျူဟာ ။ ရခိုင်ပြည်နယ်လုံခြုံရေးအတွက် စဉ်းစားတဲ့အခါမှာ သမား ရိုးကျ စစ်ဆင်ရေးအသွင် စဉ်းစားလို့ မရနိုင်တော့ပါဘူး။ ရေတို၊ ရေရှည် စဉ်းစားတဲ့အခါ ထူးခြားတဲ့ လုံခြုံရေးဆိုင်ရာ အကဲဆတ်မှုကို အခြေခံပြီး အစ္စရေးနည်းနာ၊ အမေရိကန်နည်းနာ၊ အိန္ဒိယနည်းနာ စသဖြင့် ဘက်စုံ ထည့်သွင်းစဉ်းစားဖို့ လိုပါတယ်။ အထူးသဖြင့် နယ်စပ်တစ်လျှောက် ရေလမ်း ကြောင်းဝင်ပေါက်တွေရဲ့ ဆိုးကျိုးသက်ရောက်မှုနဲ့အတူ ခိုင်မာတဲ့ နယ်စပ်မျဉ်းကို တည်ဆောက်နိုင် ဖို့ လိုပါတယ်။ နှစ်နိုင်ငံ ပူးတွဲပြီး နယ်စပ်လုံခြုံရေး ဆောင်ရွက်တဲ့အခါ ခေတ်မီနည်းပညာတွေအပြင် ရေကြောင်းလုံခြုံရေးမြှင့်တင်ဖို့လည်း အရေးကြီးမှာ ဖြစ်ပါတယ်။ သမုဒ္ဒရာ၊ ပင်လယ်ပြင်တွေမှာ ပင်လယ်ဓါးပြတွေ သောင်းကျန်းလွန်းတဲ့အခါ နိုင်ငံစုံ ပူးတွဲပြီး ရေပြင်လုံခြုံရေးဆောင်ရွက်တဲ့ သာဓက မျိုးကိုလည်း နှစ်နိုင်ငံ ဆွေးနွေးညှိနှိုင်းတိုင်ပင်ပြီး ရယူဆောင်ရွက်ကြဖို့ လိုအပ်မှာ ဖြစ်ပါတယ်။ 

(၈) ဘက်စုံ ဖွံ့ဖြိုးရေးမဟာဗျူဟာ ။ ဘာသာရေးအစွန်းရောက် အယူဝါဒ မှိုင်းသွင်းနိုင်တဲ့ လူ့အဖွဲ့ အစည်းတွေရဲ့ သဘောသဘာဝကို ကြည့်ရင် အရပ်ရပ်အထွေထွေ ကျပ်တည်းခြင်းနဲ့အတူ နိမ့်ပါး တဲ့ ပညာရေးရေချိန်၊ ဘေးဘီဝန်းကျင် ဆက်သွယ်ဆက်ဆံမှုတွေက အခြေခံဖြစ်နေတာ တွေ့ရှိနိုင်ပါ တယ်။ Master Plan or Blue Print တစ်ခု ရေးဆွဲပြီးရင် နိုင်ငံတကာအသိုင်းအဝိုင်းကို ချပြပြီး သူတို့ရဲ့ အကြံပြုချက်တွေ ရယူ၊ ပြန်လည်ပြင်ဆင်ပြီး လက်တွေ့အကောင်အထည်ဖော်နိုင်ဖို့ အရေးကြီးပါတယ်။ မြန်မာတစ်နိုင်ငံလုံးအနေနဲ့ ဘက်စုံဖွံ့ြုဖိုးရေးမဟာဗျူဟာကို အလေးပေး ဆောင်ရွက်နေချိန်မှာ ရခိုင်ပြည်နယ်ကို ထူးကဲတဲ့အခြေအနေအရ ထူးထူးခြားခြား စဉ်းစားသုံးသပ် ပေးဖို့ လိုအပ်မှာ ဖြစ်ပါတယ်။  လူသားချင်းစာနာလှပါတယ်၊ ကူညီချင်လှပါတယ် ဆိုတဲ့ အလှူရှင် တွေလည်း ဒီBlue Print ဆွေးနွေးရာမှာ ပါဝင်ပြီး လှူနိုင်တဲ့ကဏ္ဍကို တစ်ခါတည်း တာဝန်ယူနိုင်ကြ မှာ ဖြစ်ပါတယ်။ 

(၉) အောက်ခြေလူထုနှင့် ဆက်သွယ်ဆက်ဆံရေး ။ အဓိကအခက်အခဲက ဘာသာစကား ဖြစ်နေပါတယ်။ အစွန်းရောက်မူဆလင်တွေဟာ ဗလီဆရာတွေကတစ်ဆင့် သူတို့လိုချင်တဲ့ အမုန်းတရားနဲ့ အစွန်း ရောက်တရားတွေ သွတ်သွင်းနေတာ ဖြစ်ပါတယ်။ ဒီလူတွေ အမှန်ကိုသိလာအောင် ကြိုးပမ်းရာမှာ လက်ရှိအစိုးရအနေနဲ့ (ရခိုင်၊ ဗမာ၊ ဘင်္ဂလီ သုံးဘာသာနဲ့) မေယုအက်ဖ်အမ် ထုတ်လွှင့်နေပေမယ့် လည်း ကျယ်ကျယ်ပြန့်ပြန့် ထိထိရောက်ရောက် မလုပ်နိုင်သေးပါဘူး။ သတင်းမှားတွေ၊ သတင်း အတုတွေ ဒင်းကြမ်း ရိုက်သွင်းနေတဲ့ ဒီနယ်မြေတွေမှာ အစွန်းရောက်တွေက အစိုးရနဲ့ ပူးပေါင်းသူ တွေကို သတ်ဖြတ်နေလေတော့ အစွန်းတစ်ဖက်ဆီ ဦးတည်နေတဲ့ လူ့အဖွဲ့အစည်း ဖြစ်လာတာ မဆန်းပါဘူး။ ဒီအောက်ခြေလူထုတွေဆီကို သတင်းမှန်တွေ ရောက်ရှိဖို့၊ မေတ္တာတရားတွေ ရောက်ရှိဖို့ အထူးအစီအစဉ်နဲ့ ကွင်းဆင်းဆောင်ရွက်ဖို့ လိုပါတယ်။ 

ပြောရရင်တော့ ရခိုင်ပြည်နယ် အရေးကိစ္စနဲ့ (၂၁)ရာစုအမျိုးသားလုံခြုံရေးအတွက် ဆောင်ရွက်ရ မယ့် ကိစ္စရပ်တွေ၊ လုပ်ငန်းစဉ်တွေကတော့ ဆုံးနိုင်မှာ မဟုတ်ပါဘူး။ တစ်ဖက်မှာလည်း ဒေါက်တာကိုဖီအာ နန်အနေနဲ့ ရေရှည်ငြိမ်းချမ်း ဖွံ့ဖြိုးရေးအတွက် အကြံဉာဏ်ကောင်းတွေ အကြံပြုလာဦးမှာ ဖြစ်ပါတယ်။ ဒုတိယသမ္မတ ဦးမြင့်ဆွေရဲ့ စုံစမ်းစစ်ဆေးရေးကော်မရှင်ရဲ့ အကြံပြုချက်တွေသာမက ပြီးခဲ့တဲ့ အစိုးရလက်ထက်က ရခိုင်ပြည်နယ်စုံစမ်းစစ်ဆေးရေးကော်မရှင်ရဲ့ အကြံပြုချက်တွေလည်း ရှိနေပါတယ်။ ဒီအကြံပြုချက်တွေ၊ ဒီလိုအပ်ချက်တွေ၊ မဟာဗျူဟာတွေကို အကောင်အထည်ဖော်ရာမှာ လက်ရှိ ဖော်ဆောင်နေတဲ့ ဝန်ကြီးဌာနတွေရဲ့ ပူးတွဲအလုပ်အနေနဲ့တော့ ထိထိရောက်ရောက် ဖြစ်နိုင်ဖို့ နည်းပါတယ်။ ဘာကြောင့်လဲ ဆိုတော့ ဝန်ကြီးဌာနတွေအနေနဲ့ မိမိတို့ရဲ့ မူလ ပင်မတာဝန်တွေ ပြည့်နေတာမို့ ဒီပြည်နယ်၊ ဒီလုပ်ငန်းစဉ်တစ်ခု တည်းကို အလေးပေး ဆောင်ရွက်နိုင်မယ့် Mechanism တစ်ခုကတော့ မလွဲမသွေ လိုအပ်မှာ ဖြစ်တယ်။

ဘာ့ကြောင့် ဒီရခိုင်ပြည်နယ်အရေးကိစ္စကို အလေးပေးပြီး ပြောနေရသလဲ မေးစရာ ရှိပါလိမ့်မယ်။ မြန်မာနိုင်ငံနဲ့ မြန်မာနိုင်ငံခေါင်းဆောင်တွေအနေနဲ့ ရခိုင်ပြည်နယ်အရေးကိစ္စကြောင့်ပဲ ကျန်တာတွေကို လှည့်မကြည့်နိုင်အားတဲ့နေ့ရက်တွေ ရှိနေသလို မြန်မာ့ငြိမ်းချမ်းရေး၊ မြန်မာ့စီးပွားရေး၊ မြန်မာ့ဒီမိုကရေစီ အရေးတွေဟာ ဒီကိစ္စတစ်ခုကြောင့်ပဲ အရေးမပါသလို ဖြစ်နေရတာကြောင့်ပဲ ဖြစ်ပါတယ်။ နိုင်ငံတကာက လာပြီဆိုရင် ရခိုင်ပြည်နယ်အရေး၊ နိုင်ငံတကာအစည်းအဝေးတွေမှာ ဆွေးနွေးပြီဆိုရင် ရခိုင်ပြည်နယ်အရေး၊ ဒီလိုမျိုး ဖြစ်နေတဲ့အတွက် ရင်းနှီးမြုပ်နှံမှု၊ ကုန်သွယ်မှု၊ ဆင်းရဲနွမ်းပါးမှုလျှော့ချရေး၊ အမျိုးသားပြန်လည် သင့်မြတ်ရေးနဲ့ ငြိမ်းချမ်းရေး စတဲ့ အရေးကြီးလှတဲ့ အရေးကိစ္စတွေ မှေးမှိန်နေတာ အားလုံးအသိပဲ ဖြစ်ပါ တယ်။ ဆိုရရင် ရခိုင်ပြည်နယ်အရေးကိစ္စဟာ အမျိုးသားအကျိုးစီးပွားကိစ္စ၊ အမျိုးသားလုံခြုံရေးကိစ္စ ဖြစ်နေ တဲ့ အတွက် တိုင်းပြည်ရှေ့ကို တည်တည့် ဆက်လျှောက်ဖို့ အဟန့်အတား ဖြစ်နေတဲ့ ရခိုင်ပြည်နယ် အရေးကိစ္စကို လှည့်ကြည့်စရာမလိုလောက်အောင် တာဝန်ဆောင်ရွက်ပေးမယ့်၊ တာဝန်ယူဆောင်ရွက်နိုင် မယ့် Mechanism တစ်ခု ထွက်ပေါ်လာရေးကို ဆော်သြလိုခြင်း ဖြစ်ပါကြောင်း တိုက်တွန်းရေးသား တင်ပြ လိုက်ရပါတယ်။