News

POST TYPE

OPINION

ပညာရေးဌာနရဲ့ ထူးခြားတဲ့အရွေ့များ
05-Jul-2017
တက္ကသိုလ်ဝင်ခွင့် (၁၀ တန်း) စာမေးပွဲမေးခွန်းပုံစံ ပြောင်းလဲခြင်းနှင့် တက္ကသိုလ်ဝင်ခွင့်စနစ် ပြောင်းလဲခြင်း

၂၀၁၇ ခုနှစ် ဆယ်တန်းအောင်စာရင်းမှာ ဖြေဆိုသူ ခုနစ်သိန်းကျော်အနက် နှစ်သိန်းလေးသောင်း အောင်ကြတဲ့အတွက် ၃၃ ရာခိုင်နှုန်း အောင်ချက်ရှိပါတယ်။ ဒီနှစ် ပြောစမှတ်ပြုလောက်အောင် ထူးခြားပုံက မလှိုင်မြို့နယ် အောင်ချက်ဖြစ်ပါတယ်။ အောင်စာရင်းစာရွက်ကို ကြည့်ပြီး ဖြေဆိုကြသူများမှာ သာမန်လူမှ ဟုတ်ပါလေစလို့ အာမေဍိတ်သံများ ထွက်ပေါ်လာပါတယ်။အောင်စာရင်း စာရွက်ပေါ်မှာ ဂုဏ်ထူးရသူ အရေအတွက်ဟာ ပြွတ်သိပ်ကျပ်ညပ်နေပါတော့တယ်။ ၉၉ ရာခိုင်နှုန်းလောက် ဂုဏ်ထူးရမယ် ထင်ပါတယ်။ ရှေးရှေးဘဝက ပညာပါရမီကို မချိမဆံ့ ဖြည့်ဆည်းဖူးခဲ့သူများ ဖြစ်ပုံရပါတယ်။ ဒါကြောင့် ထူးခြားဖြစ်စဉ် တစ်ခုအနေနဲ့ လေ့လာ သုံးသပ်သင့်ပါတယ်။ မလှိုင်ကိုယ်ပိုင် အထက်တန်းကျောင်းဟာ ဘာကြောင့် အောင်မြင်တာလဲဆိုရင် ကျောင်းသားကို သာမက ဆရာကိုရော မိဘကိုပါ စည်းကမ်း တင်းတင်းကျပ်ကျပ် ထိန်းသိမ်းတဲ့မူကို အဓိက ကျင့်သုံးလို့ပါ။ ဒီအချက်ဟာ အချက်များစွာအနက် အရေးအကြီးဆုံးအချက်လို့ ဆိုပါတယ်။ အဓိကကတော့ စည်းကမ်းနဲ့ အုပ်ချုပ်ရေးကို အထူးအားပြုကြောင်း တွေ့ရတာပါ။ ဒါကို အလွန် တင်းကျပ်လွန်းတယ်။ ပြင်းထန်လွန်းတယ်။ ကျောင်းနဲ့မတူဘဲ ထောင်နဲ့တူတယ်လို့ ဝေဖန်ကြသူတွေလည်း များစွာ ရှိပါတယ်။

ဒီနေ့ခေတ် ၁၀ တန်း ပညာရေးစနစ်လို့ ဆိုရမယ့် ဒါသင်၊ ဒါကျက်၊ ဒါမေး၊ ဒါဖြေ၊ (ဒလေးလုံး) ပညာရေးအတွက် မလှိုင်ကျောင်းနည်းဖြစ်တဲ့ တုတ်နဲ့မိုးပြီး အုပ်ချုပ်တဲ့နည်းက အကောင်းဆုံးအဖြေကို ထွက်စေတယ်ဆိုတာ လက်တွေ့ သက်သေပြနေပါပြီ။ မိဘများစွာတို့ဆိုရင် သူတို့ရဲ့ ခုနစ်တန်း၊ ရှစ်တန်း ကလေးငယ်များကို လက်ဆွဲပြီး စိတ်ဝင်စားကြေး ကျပ်ငွေ နှစ်သိန်း ပေးသွင်းကာ မလှိုင်ကျောင်းဝင်ခွင့် စာမေးပွဲ သွားဖြေကြဖို့ ခတ် ကွင်းပြင်နေကြပါပြီ။ ဒါပေမဲ့ မိဘများ စဉ်းစားစရာ ဖြစ်လာတာက ပညာရေးဌာန သတင်းအရ နောင်နှစ်အတွက် မေးခွန်းပုံစံပြောင်းမယ်၊ တက္ကသိုလ်ဝင်ခွင့်ကိုလည်း အမှတ်တစ်ခုတည်းနဲ့ မဆုံးဖြတ်ဘူး ဆိုတော့ ချီတုံချတုံ သို့လော သို့လော စဉ်းစားဖွယ် ဖြစ်လာပါတယ်။

၁၉၉၀ လောက်က စခဲ့တဲ့ ယနေ့ ဆယ်တန်းပညာရေးရဲ့ လုပ်ငန်းစဉ်ကို ဆစ်ပိုင်းကြည့်တဲ့အခါ အဓိက အစိတ်အပိုင်း သုံးပိုင်း တွေ့ပါတယ်။ ဒါတွေကတော့ (၁) ကျူရှင်၊ (၂) စာကျက်ဝိုင်းနဲ့ (၃) ဂိုက်တို့ဖြစ်ကြပါ တယ်။ ဒီနေ့ခေတ်ရဲ့ နောက်ဆုံးပေါ် စာသင်ကြားပုံက ပထမအဆင့် မေးခွန်းပုံစံ အံကိုက်ဖြစ်အောင် ကျက်မှတ်ပုံ နည်းလမ်းကို အတန်းထဲမှာ ကျူရှင်ပုံစံနဲ့ သင်ပါတယ်။ နောက်တစ်ဆင့်ကတော့ ကြပ်မတ်ပြီး နှုတ်တိုက် အလွတ်ကျက်ခိုင်းပါတယ်။ ဒါက စာကျက်ဝိုင်းအဆင့်ပါ။ နောက်ဆုံးအဆင့် တကယ်ရ၊ မရ စစ်ဆေးခြင်း၊ ရရင်တောင်မှ ကျေညက်သည်အထိ လိုအပ်သလို တစ်ယောက်ချင်းစီ ကြပ်မတ် အချော သတ်ပေးရပါတယ်။ ဒါကိုတော့ ဂိုက်က တာဝန်ယူရပါတယ်။ ဒီလို အချိန်များစွာပေးရာမှာ ငယ်ရွယ်သူများကို ကျား၊ မ အချိန်ရှည်ကြာစွာ ရောနှောထိန်းသိမ်းတာဖြစ်လို့ ပြဿနာ မတက်စေဖို့ စည်းကမ်း တင်းကျပ်ဖို့ လိုလာပြီး တစ်ဆက်တည်းမှာလည်း စာမရရင် ရိုက်နှက် အပြစ်ပေးတာတွေ ပါလာပါတော့တယ်။

ဒါတွေအားလုံးကို တစုတစည်းတည်း ပေါင်းစပ်လိုက်တဲ့အခါမှာ တပ်မတော် အစိုးရခေတ် ပညာရေး ပုံစံသစ်တစ်ခု ထွက်ပေါ်လာပါတယ်။ ဒီပုံစံသစ်ဟာ နောက်ဆုံးပိတ် သတ္တုချလိုက်တော့ စည်းကမ်းတင်းကျပ်သော ကိုယ်ပိုင်ကျောင်းများ ဖြစ်တယ်လို့ ဆိုရမှာပါ။ ဒါကို မလှိုင်ကိုယ်ပိုင်ကျောင်းက သက်သေပြသလို ဖြစ်နေပါတယ်။ (ဒ) လေးလုံး လက်ရှိ ၁၀ တန်း ပညာရေးစနစ်အတွက် တုတ်နှင့်ရိုက်သော မလှိုင်ကျောင်းပုံစံက အဖြေ ထုတ်ပေးနေချိန်မှာ လက်ရှိ ပညာရေး ပြုပြင်မှုအတွက် ၂၀၁၈ မေးခွန်းမှာ အင်္ဂလိပ်စာကို စတင် ပြင်ဆင်မယ်လို့ သိလိုက်ရပြီး နောက်ပိုင်းမှာ ဘာသာစုံကိုပါ လိုအပ်သလို ပြင်ဆင်မယ်ဆိုတော့ အလွန်အားပါသော အရွေ့တစ်ခုအဖြစ် ကြိုဆိုလိုက်ပါတယ်။ ပညာရေးဝန်ကြီးရဲ့ မိန့်ခွန်းမှာ ပညာရေး ကောလိပ်၊ တက္ကသိုလ်များသို့ ကျောင်းဆရာ၊ ဆရာမ လုပ်ရန် လူငါးသောင်းကျော် လျှောက်ထားကြလို့ မနိုင်မနင်း ဖြစ်လာကြောင်း သိရပါတယ်။ ဒီအတွက် ဆောင်းပါး တစ်ပုဒ်ထဲမှာ အကြံပေးချက် တစ်ခုကတော့ အသက် ၆၀ ကျော် အငြိမ်းစား ဝန်ထမ်းများထဲက ကျန်းမာပြီး ဆက်လက် လုပ်နိုင်စွမ်းသော လူကြီးများကို အချိန်ပိုင်း ပြန်လည်ခန့်ခြင်းဖြင့် ရှားပါးနေတဲ့ ပညာရှင်ပိုင်း အားဖြည့်ဖို့ တိုက်တွန်းချက်ကလည်း စိတ်ဝင်စားစရာပါ။
 
၂၀၁၈ မေးခွန်းပုံစံနဲ့ ပတ်သက်လို့ ဆွေးနွေးရရင် မေးခွန်းပုံစံများကို မြန်မာစာ အပါအဝင် ဘာသာစုံ မေးခွန်း ပုံစံသစ် ပြောင်းဖို့ အထူး လိုအပ်ပါတယ်။ အလွတ်ရဖို့ထက် နားလည်ခြင်းနဲ့ တွေးခေါ်ခြင်းကို စစ်ဆေးသော မေးခွန်းပုံစံများ ဖြစ်သင့်ပါတယ်။ မေးခွန်းပုံစံများ အနေနဲ့ နမူနာတစ်ခုကို တင်ပြပါရစေ။ နယူးယောက် ပြည်နယ်ဆိုင်ရာ အထက်တန်းဆင့် မေးခွန်းပုံစံ နမူနာများကို Website မှာ nys regents exam ကို Search လုပ်ပြီးရှာပါက အင်္ဂလိပ်စာ၊ သင်္ချာ၊ ဓာတု၊ ရူပ၊ ဇီဝ၊ ကမ္ဘာ့သမိုင်း စတဲ့ ဘာသာများအတွက် နိုင်ငံတကာ အဆင့်မီ မေးခွန်းများစွာကို ရှာနိုင်ပါကြောင်း နမူနာအနေနဲ့ သုံးနိုင်ပါရန် ကိုးကားမှီငြမ်းနိုင်ပါရန် သက်ဆိုင်ရာသို့ သတင်းပါးပါတယ်။ အမေရိကန်မှာက ကိုယ့်ပြည်နယ်နဲ့ ကိုယ့်စိတ်ကြိုက် ပြဋ္ဌာန်းကြတာဖြစ်တော့ ပုံစံမျိုးစုံ အနေအထားမျိုးစုံ တွေ့နိုင်မှာဖြစ်ပါတယ်။ အမေရိကန် အထက်တန်းကျောင်းများ သာမက အင်္ဂလန်၊ ဥရောပ နိုင်ငံတကာ အထက်တန်းကျောင်းများ Website ထဲ ဝင်ကြည့်ပြီး နမူနာမေးခွန်းများ လေ့လာကာ မေးခွန်းများကို ပြင်ဆင်ရာမှာ လိုသလို ကိုးကားစေချင်ပါတယ်။
 
မြန်မာစာနဲ့ ပတ်သက်လို့ နယူးယောက်နေ ဆရာဦးစွမ်းရည်က ဒီလိုမှတ်ချက်ပေးတာပါ။ “မြန်မာစာ ဂုဏ်ထူးရဖို့ စာစီစာကုံးကအစ အလွတ်ကျက်တယ်ဆိုတာ ကြားလို့ မကောင်းပါဘူး။ အလွတ် ကျက်မှတ်တဲ့ဘေးမှ ကင်းဝေးစေချင်လှပါပြီ”လို့ ဆိုပါတယ်။ ဆရာ့အနေနဲ့ မြန်မာစာ မေးခွန်းပုံစံကို ပြောင်းဖို့ အထူး တွန်းအားပေးနေပါတယ်။ ဆရာဟာ အထက်တန်းကျောင်း မြန်မာစာပြဆရာအဖြစ် တာဝန်ထမ်းဆောင်ခဲ့သူပါ။ ဒါ့အပြင် ပညာရေးတက္ကသိုလ် ပညာရေး သုတေသနဌာနမှာလည်း သုတေသန လက်ထောက်အဖြစ် ကျောင်းသုံးစာအုပ်ပြုစုရေး ကော်မတီဆိုင်ရာ တာဝန်ယူဖူးလေတော့ မြန်မာစာ စာမေးပွဲ မေးခွန်းပုံစံအပြောင်း ကိစ္စတွေအပေါ် သံယောဇဉ် လွန်စွာကြီးသူ ဖြစ်ပါတယ်။ ဖြစ်နိုင်ပါက ဆရာတို့လိုသူတွေရဲ့ အကြံဉာဏ်ကို ယူဖို့လိုပါမယ်။ 

၂၀၁၈ စာမေးပွဲ မေးခွန်းပုံစံကို ခေတ်မီအောင် မွမ်းမံရာမှာ ပြဋ္ဌာန်းစာအုပ်ကိုပါ ပြောင်းနိုင်ရင်တော့ ပိုကောင်းပါမယ်။ သို့သော် မလုပ်နိုင်သေးရင်လည်း လက်ရှိ ပြဋ္ဌာန်းစာအုပ်နဲ့တင် ပြောင်းလို့ရနိုင်ပါမယ်။ နမူနာပုံစံများကို ကြိုတင် ထုတ်ပေးရမှာဖြစ်လို့ အလုပ်တော့ ပိုရှုပ်ပါမယ်။ ဇူလိုင်လထဲမှာ တချို့ကိစ္စတွေ ချပြမယ်လို့ သိရပါတယ်။ ဝိုင်းဝန်း ဝေဖန်ကြပြီး အကောင်းဆုံး ရလဒ်ကိုလည်း မျှော်လင့်နိုင်ပါမယ်။ မလွဲမသွေ ရင်ဆိုင်ရမယ့် အဆိုးဆုံးများကတော့ တစ်ယောက်တစ်ပေါက် ပြစ်တင် ဝေဖန်သံများ ဖြစ်ပါမယ်။ ဒါပေမဲ့ ကြိုတင်ချပြထားခြင်းဖြင့် ဘေးထွက်ဆိုးကျိုး အနည်းဆုံး အဖြစ်သင့်ဆုံး မေးခွန်းပုံစံတော့ ဖြစ်လာမှာမလွဲပါဘူး။ ကျူရှင်၊ စာကျက်ဝိုင်း၊ ဂိုက် အားလုံးဟာလည်း မတတ် တတ်အောင် သင်ရတော့မှာမို့ အနေအထား တစ်မျိုးသို့ ပြောင်းသွားပါမယ်။ မဝေးတော့တဲ့ အနာဂတ်ကာလမှာ တုတ်မိုးသင်တဲ့ စနစ်ကနေပြီး ဆရာတပည့် ယဉ်ကျေးစွာ ပြန်လှန်ငြင်းခုံသော ကာလသို့ ရောက်လာဖို့ မျှော်လင့်နိုင်ပါမယ်။ ဖြစ်နိုင်ရင် မြန်မာစာနဲ့ အင်္ဂလိပ်စာမှအပ ကျန်ဘာသာများ အားလုံးကို မေးခွန်းထုတ်ရာမှာ မြန်မာလိုနဲ့ အင်္ဂလိပ်လို နှစ်မျိုးရောထွေးလို့ဖြစ်စေ၊ အင်္ဂလိပ် မြန်မာသီးသန့်စီဖြစ်စေ၊ မေးခွန်းများကို ယခု မထုတ်ပေးနိုင်သေးသော်လည်း နောင်မကြာမီ ထုတ်ပေးသင့်တယ်လို့ ထင်ပါတယ်။ ဖြေရာမှာလည်း အင်္ဂလိပ် မြန်မာ နှစ်ဘာသာ ရောထွေးသော်လည်းကောင်း၊ အင်္ဂလိပ်လိုပဲ ဖြေလိုပါကလည်း ကြိုက်သလို ဖြေခွင့်ပြုစေချင်ပါတယ်။ နောက်ပိုင်းမှာ တိုင်းရင်းသားဘာသာတွေ ကိစ္စကိုပါ ထည့်သွင်း စဉ်းစားစရာအနေနဲ့ ကျယ်ပြန့်လာမယ် ထင်ပါတယ်။

၂၀၁၈ ဆယ်တန်း အောင်စာရင်းကတော့ မျှော်လင့်ချက် ရောင်ခြည်များ အတိပြည့်ဝပြီး ရင်ခုန်စရာ အပြည့် ဖြစ်လာတော့မှာပါ။ တက္ကသိုလ်ကြီး လေးခုကိုလည်း အမှတ်နဲ့တင် မဆုံးဖြတ်ဘဲ ဝင်ခွင့်ပါ ဖြေရမယ်ဆိုတော့ တစ်ပွဲတိုးခေတ် ကုန်သွားပြီ ဆိုရမှာပါ။ မိမိစိတ်ဝင်စားတဲ့ တက္ကသိုလ်ကို ထိုက်တန်တဲ့ အရည်အချင်း ပြည့်မီသည်အထိ ကြိုးစားခွင့်များလည်း ရလာဖို့ ရှိပါမယ်။ ဒါ့အပြင် ဖြစ်နိုင်ခြေရှိတာက ၁၀ တန်း အောင်ချက်များစွာ မြင့်တက် ပြောင်းလဲသွားနိုင်ပါတယ်။ ၁၀ တန်းဟာ အရင်ကလို ကျရှုံးသူတို့အဖို့ ထွက်ပေါက်ပိတ်တဲ့ခေတ် မဟုတ်နိုင်တော့ပါ။ အမှတ်နည်းသူများ တက္ကသိုလ် မတက်နိုင်သေးပေမယ့် အခွင့်အရေးများ မဆုံးရှုံးသေးပါ။ စိတ်ဝင်စားရာ ပညာရပ်ကို တက်နိုင်ဖို့ ပညာရေး ပေါင်းကူးနည်းလမ်းများလည်း ပေါ်လာဖို့ ရှိပါမယ်။ တက္ကသိုလ် ပညာရေးကို စိတ်မဝင်စားဘဲ အသက်မွေးဝမ်းကျောင်း ဘာသာရပ် ကောလိပ် တက္ကသိုလ်များကို တက်လိုပါကလည်း တက်နိုင်တဲ့ လမ်းကြောင်းများစွာ ပွင့်လာဖို့ ရှိပါတယ်။ ဒါဆိုရင် (ဒ) လေးလုံးစနစ်ကြီးလည်း အတော် ယိမ်းယိုင်ချည့်နဲ့သွားမှာ ဖြစ်သလို ကျူရှင်စနစ်လည်း ပြောင်းလဲလာဖို့ ဖြစ်ပါတယ်။ လူတိုင်း တက္ကသိုလ်တက်ဖို့ မလိုတော့ဘဲ သက်မွေးပညာကို အရင်သင်မယ်၊ မိမိတက်လိုတဲ့ တက္ကသိုလ် သင်လိုတဲ့ဘာသာကို ယခုအဆင့် မမီသေးပေမယ့်လည်း နောင်တက်ချင်ရင် ကြိုးစားခွင့်ရပြီး ဆက်တက်လို့ရမယ် စသည်ဖြင့် ပြည်သူတို့ လိုလား တောင့်တသော အဓိပ္ပာယ် ရှိသော ပညာရေးစနစ်ကြီးကို မကြာတော့တဲ့ကာလမှာ အကောင်အထည် ဖော်နိုင်တော့မယ်လို့ ယူဆပါကြောင်း တင်ပြပါတယ်။

တင်ဝင်းသိန်း 
(စက်မှုတက္ကသိုလ် ၁၉၇၇)


  • VIA