News

POST TYPE

OPINION

နိုင်ငံတစ်နိုင်ငံ ပြန်လည်ထူထောင်ရာဝယ်
04-Jul-2017
စာရေးသူသည် လွန်ခဲ့သော နှစ်ပေါင်း ၂၀ ခန့်ကပင် အောက်တွင် ဖော်ပြမည့် အမေရိကန်နိုင်ငံ ဖွဲ့စည်းပုံအခြေခံ ဥပဒေ၏ Preamble အား လွန်စွာမှ နှစ်သက် သဘောကျခဲ့ပါသည်။ သို့ဖြစ်၍ အထက်ပါစာပိုဒ်အား အကြိမ်ကြိမ် အထပ်ထပ် ဖတ်၏။ ဖတ်ရာမှ ထိုစာပိုဒ်တွင် ပါရှိသည့် စာလုံးများ၏ အဓိပ္ပာယ်ကို အကြိမ်ကြိမ် အထပ်ထပ် စဉ်းစား၏။ ထိုသို့ စဉ်းစားရာတွင် နိုင်ငံတစ်နိုင်ငံ၏ စီးပွားရေး၊ လူမှုရေး၊ နိုင်ငံရေးတို့အား မည်သို ဆောင်ရွက်ရမည်ကို အမေရိကန်နိုင်ငံ ဖွဲ့စည်းပုံအခြေခံ ဥပဒေ၏ Preamble တွင် တွေ့ရှိခဲ့ရပါသည်။
အမေရိကန်နိုင်ငံ ဖွဲ့စည်းပုံ အခြေခံဥပဒေ၏ နိဒါန်း (Preamble) တွင် ပါရှိသည်မှာ အောက်ပါအတိုင်း ဖြစ်ပါသည်။

“We, the people of the United States, in Order to form a more perfect Union, establish Justice, insure domestic Tranquility, provide for the common defence, promote the general Welfare, and secure the Blessings of Liberty to ourselves and our Posterity, do ordain and establish this Constitution for the United States of America” ဟူ၍ဖြစ်ပြီး ထိုစာပိုဒ်တွင် စာလုံးရေပေါင်း ၅၂ လုံးတွင် ကော်မာ ၈ ခု၊ Fullstop ၁ ခုသာ ပါရှိသည်ကို ထူးခြားစွာ တွေ့မြင်နိုင်မည် ဖြစ်ပါသည်။

“We, the People of the United States, in Order to form a more prefect Union, အမေရိကန်နိုင်ငံသူ၊ နိုင်ငံသား ငါတို့သည် ပိုမိုကောင်းမွန် ပြည့်စုံသော နိုင်ငံတစ်နိုင်ငံ ထူထောင်နိုင်ရန်အလို့ငှာ Establish Justice, တရားမျှတမှု ရရှိစေရေး၊ Insure domestic tranquility, ပြည်တွင်း ငြိမ်းချမ်းရေး ရရှိစေရေး၊ Provide for the common defence, ပြည်ထောင်စု တစ်ခုလုံးဆိုင်ရာ ခုခံကာကွယ်ရေးအတွက် ဥပဒေပြဋ္ဌာန်းထားရှိရေး၊ Promote the general welfare, အများပြည်သူ ဖွံ့ဖြိုးတိုးတက်ရေးအတွက် ဆောင်ရွက်ပေးရေး၊ Secure the blessings of liberty to ourselves and our posterity, (နိုင်ငံသား အားလုံး၏ လွတ်လပ်ခွင့်နှင့် နိုင်ငံသားများ၏ နောင်လာ နောင်သားများအတွက်ပါ လွတ်လပ်ခွင့် အကျိုးကျေးဇူး ရရှိစေရေး၊ Do ordain and establish this constitution for the United States of America အမေရိကန် ပြည်ထောင်စုအတွက် ဤအခြေခံဥပဒေကို အမေရိကန် ပြည်ထောင်စုသား ငါတို့သည် ပြဋ္ဌာန်း၍ တည်ဆောက်ကြအံ့”ဟူပင် ဖြစ်ပါသည်။

ထိုစာပိုဒ်တွင် ပါရှိသည့်အချက်များမှာ -

(၁) Establish justice (တရားမျှတမှု ရရှိစေရေး)

(၂) Insure domestic tranquility (ပြည်တွင်း ငြိမ်းချမ်းရေး ရရှိစေရေး)

(၃) Provide for the common defence (ပြည်ထောင်စု တစ်ခုလုံးဆိုင်ရာ ခုခံကာကွယ်ရေးအတွက် ဥပဒေပြဋ္ဌာန်းထားရှိရေး)

(၄) Promote the general welfare (အများပြည်သူ ဖွံ့ဖြိုးတိုးတက်ရန်အတွက် ဆောင်ရွက်ပေးရေး)

 (၅) Secure the blessings of liberty to ourselves and our posterity, (နိုင်ငံသားအားလုံး၏ လွတ်လပ်ခွင့်နှင့် နိုင်ငံသားများ၏ နောင်လာနောင်သားများ အတွက်ပါ လွတ်လပ်ခွင့် အကျိုးကျေးဇူး ရရှိစေရေး) ဟူသော အချက်များကို ၎င်းနိဒါန်း စာပိုဒ်အတွင်းတွင် အစဉ်အတိုင်း တွေ့ရှိရမည် ဖြစ်ပါသည်။

၎င်းစာပိုဒ်နှင့် ဖွဲ့စည်းပုံအခြေခံ ဥပဒေ မရေးဆွဲမီက အမေရိကန်နိုင်ငံသည် ၁၇၇၆ ခုနှစ်တွင် လွတ်လပ်ရေး ရရှိခဲ့ပါသည်။ ထိုသို့ လွတ်လပ်ရေး ရရှိပြီးနောက် အမေရိကန်နိုင်ငံ၏ အခြေအနေမှာ ပြည်နယ်များ၊ ခွဲထွက်မည့်ပုံစံဖြစ်လာပြီး အမေရိကန် ပြည်ထောင်စုသည် ပြိုကွဲသွားမည့် အန္တရာယ် ဖြစ်ပေါ်လာခဲ့ပေရာ အမျိုးသား ခေါင်းဆောင်များသည် ပြည်နယ်အသီးသီးမှ ခေါင်းဆောင်များအား ခေါ်ယူ၍ ညီလာခံတစ်ရပ် ကျင်းပခဲ့ကြပါသည်။ ၎င်းညီလာခံအား ဖီလာဒယ်လ်ဖီးယား လွတ်လပ်ရေး ခန်းမဆောင်၌ ၁၇၈၇ ခုနှစ်၊ မေလတွင် အစည်းအဝေးကို စတင် ကျင်းပခဲ့ပါသည်။

၎င်းအစည်းအဝေးတွင် တက်ရောက်သူများမှာ ဂျော့ဝါရှင်တန်၊ ဘင်ဂျမင်ဖရန်ကလင်၊ ဂျိမ်းမဲ့ဒဆင်၊ သောမတ်ဂျက်ဖာဆင်၊ အန်ဒါဆင်နှင့် ဟဲလ်တန် စသော ထင်ရှား ကျော်ကြားသည့် ပုဂ္ဂိုလ်များ အပါအဝင် ၅၅ ဦး တက်ရောက်ပြီး ထိုဖွဲ့စည်းပုံအခြေခံ ဥပဒေကို လက်မှတ်ရေးထိုးခဲ့ကြပါသည်။

သို့ဖြစ်ရာ အမေရိကန်နိုင်ငံ ဖွဲ့စည်းပုံအခြေခံ ဥပဒေ၏ နိဒါန်းတွင်ပါရှိသော စာပိုဒ်သည်ပင် မည်မျှ တန်ဖိုးကြီးသည်ကို သိရှိနိုင်စေရန် အကျဉ်းမျှ တင်ပြခြင်းသာဖြစ်ရာ နိုင်ငံတစ်နိုင်ငံအား ပြန်လည် ထူထောင်ရာတွင် အထက်၌ ဖော်ပြသကဲ့သို့ အမှတ်စဉ် (၁) Establish justice အား ဦးစွာ ဆောင်ရွက်ပြီးမှ ကျန်အမှတ်စဉ်များကို ဆောင်ရွက်ခြင်းအားဖြင့် ကျွနု်ပ်တို့နိုင်ငံ၏ ကောင်းကျိုးအတွက် ဆောင်ရွက်နေသော အစိုးရအဖွဲ့အနေနှင့် အထစ်အငေါ့များ အတန်ငယ် ပြေပျောက်နိုင်သည်ဟု စာရေးသူက ယုံကြည်မိပါသည်။

စာရေးသူက ထိုအယူအဆအား ယုံကြည်ရသည့် အဓိက အကြောင်းရင်းမှာလည်း နိုင်ငံတွင် တရားဥပဒေ စိုးမိုးမှုရှိမှသာ အစိုးရတစ်ရပ်အနေနှင့် မိမိတို့ မျှော်မှန်းသည့် ငြိမ်းချမ်းရေးလမ်းစဉ်ကို လွယ်ကူစွာ လျှောက်လှမ်းနိုင်မည့်အတွက် ဖြစ်ပါသည်။

တရားဥပဒေ စိုးမိုးရေးဟူသည်မှာ (All men are equality before the law) ဖြစ်ရန် လိုပါသည်။ သို့မဟုတ်မူဘဲ ရာထူးကြီးသူ၊ ငွေကြေးချမ်းသာသူ၊ အာဏာရှိသူများ အပေါ်တွင် ဥပဒေသက်ရောက်မှု မရှိပါက နိုင်ငံတော်မှာလည်း တည်ငြိမ်အေးချမ်းမှု ရနိုင်မည်မဟုတ်ပါ။

အုပ်ချုပ်ရေးအပိုင်းဘက်မှ ငြိမ်းချမ်းရေးအား ဆောင်ရွက်နေဆဲ၊ ဆွေးနွေးနေဆဲ ကာလအတွင်းမှာပင် တိုက်ပွဲများ မကြာခဏ ဖြစ်ပွားနေရခြင်းမှာ တရားဥပဒေ စိုးမိုးမှု တစ်နည်းအားဖြင့် (Binding Force) မရှိ၍သာဖြစ်ကြောင်း မြင်သာမှု ရှိနေပါသည်။

ဤသို့ (Binding Force) ဖြစ်ရန်အတွက် လူတိုင်းသည် ဥပဒေ၏ ရှေ့မှောက်တွင် တစ်တန်းစားတည်းဖြစ်ရန် လိုအပ်ပြီး ဥပဒေသည် တည်သည့်နေရာတွင် တည်ပြီး၊ မတည်သည့်နေရာတွင် မတည်ပါက တရားဥပဒေ စိုးမိုးမှုမှာလည်း ရှိနိုင်မည်မဟုတ်ပါ။

နှစ်ပေါင်း ၂၀ဝ ကျော်ခန့်က ရေးသားထားခဲ့သော အမေရိကန်နိုင်ငံ၏ ဖွဲ့စည်းပုံအခြေခံ ဥပဒေတွင်ပါရှိသော နိဒါန်းစာပိုဒ်ကို လိုက်နာကျင့်သုံးခြင်းအားဖြင့် ယနေ့ ကမ္ဘာပေါ်တွင် အမေရိကန်နိုင်ငံသည် စည်းလုံးညီညွတ်သော၊ စီးပွားရေးအင်အား ကောင်းမွန်သော နိုင်ငံဖြစ်သည်ဟူသော အချက်အား မည်သူမှ ငြင်းဆိုနိုင်မည် မဟုတ်ပါ။

သို့ဖြစ်ခြင်းကြောင့် အထက်တွင် ဖော်ပြခဲ့သည့် စာပိုဒ်ပါ အမှတ်စဉ်အတိုင်း အမှတ်စဉ် (၁) Establish justice ကို တည်ဆောက်ပြီးမှသာ အမှတ်စဉ် (၂) Insure domestic tranquility, အမှတ်စဉ် (၃) Provide for the common defence ၊ အမှတ်စဉ် (၄) Promote the general welfare ၊ အမှတ်စဉ် (၅) Secure the blessings of liberty to ourselves and our posterity ဟူသော အချက်များအတိုင်း ဆောင်ရွက်ခြင်းအားဖြင့် မြန်မာနိုင်ငံ၏ နိုင်ငံရေး၊ စီးပွားရေး၊ လူမှုရေး စသည်တို့မှာ ကောင်းမွန်လာမည်ဖြစ်ကြောင်း ရေးသားဖော်ပြလိုက်ရပါသည်။

ဦးရီစိန် (တရားလွှတ်တော်ရှေ့နေ)


  • VIA