News

POST TYPE

OPINION

စာဖတ်နာသည့် လူ့အဖွဲ့အစည်း (Daily, Vol-5/No-55)
14-Jun-2017
လူသားများအနေနှင့် ပထဝီနယ်နိမိတ် ကန့်သတ်ချက်ကို ကျော်လွန်ပြီး တစ်ဦးနှင့်တစ်ဦး စက္ကန့်မခြား အဆက်အသွယ် ရရှိစေရေး၊ ပိုမိုပွင့်လင်းမှုရှိပြီး သတင်းဖြန့်ဝေနိုင်မှု အားကောင်းသော ကမ္ဘာကြီး ဖြစ်လာစေရေး စသော ဦးတည်ချက်များဖြင့် ၂၀ဝ၄ ခုနှစ်က စတင်ထူထောင်ခဲ့သည့် Facebook ဟူသော လူမှုကွန်ယက် အသုံးပြုမှုမှာ မြန်မာနိုင်ငံ၌ ၂၀ဝ၈ ခုနှစ်ကုန်ပိုင်းလောက်တွင် စတင် ရေပန်းစားခဲ့သည်။ ယနေ့ အချိန်တွင်မူ မြန်မာပြည်သူ အများစု တစ်နေ့မတွေ့၊ မမြင်ရလျှင် မမြင်နိုင်လောက်အောင် ဖြစ်ရသည့် မျက်နှာကို ပြောပါဆိုလျှင် Facebook စာမျက်နှာသာ ဖြစ်လိမ့်မည်ဟု ထင်ပါသည်။ မိမိ၏ စိတ်ခံစားချက်၊ အတွေ့အကြုံနှင့် အမှတ်တရများကို အခြားသူများသိအောင် ထုတ်ဖော်ပြောဆိုလိုသည့် လူသားတို့၏သဘာဝကို ကောင်းစွာ ရိပ်စားမိသော Facebook ၏ တစ်နေ့ထက် တစ်နေ့ပို၍ ဆန်းသစ်လာသော Application များကြောင့် ကမ္ဘာပေါ်တွင် သာမက မြန်မာနိုင်ငံတွင်ပါ လူတိုင်းအတွက် မရှိမဖြစ် အရာတစ်ခုသဖွယ် ဖြစ်လာပါသည်။ လူတစ်ဦး၏ Facebook အကောင့်သည် ၎င်းအတွက် တစ်ကိုယ်ရေထုတ် သတင်းစာ(Personal Newspaper) ဟု ဆို၍ရလာပြီဖြစ်သလို နိုင်ငံရေး၊ စီးပွားရေး၊ လူမှုရေး အစရှိသည့် အဖွဲ့အစည်းများနှင့် ဌာနဆိုင်ရာတို့အတွက် အဆိုပါ အကောင့်သည် ပြန်ကြားရေး ဌာနစိတ် တစ်ခုအဖြစ် သတ်မှတ်နိုင်ပြီဖြစ်ပါသည်။

အမှန်တကယ်လည်း အဆိုပါ လူမှုကွန်ရက် အသုံးပြုခြင်းသည် အတိုင်းအတာ တစ်ခုကျော်လောက်သည်အထိ အသုံးဝင်လျက်ရှိသည်။ ဗြိတိန်နိုင်ငံ၊ လန်ဒန်မြို့ အနောက်ပိုင်းတွင်ရှိသော ၂၄ ထပ်မြင့်သည့် လူနေ အဆောက်အအုံတစ်လုံး မီးလောင်နေသည့် အခြေအနေကို ယင်းလူမှုကွန်ရက်သုံးသူ တစ်ဦးအနေနှင့် အခြားနိုင်ငံမှနေကာ တိုက်ရိုက်ကြည့်ရှုခွင့် ရနေခြင်းသည် ရှေးခေတ်ကာလက စကားဖြင့်ဆိုပါက နတ်မျက်စိတစ်စုံ ရထားသည့်အလားဟုပင် ဆိုရပေမည်။ အမေရိကန် သမ္မတဟောင်း ဘားရက်အိုဘားမားသည်ပင် ဒုတိယ သက်တမ်းအတွက် မဲဆွယ်စည်းရုံးရာ၌ လူမှုကွန်ရက်များကို ငွေကြေး အမြောက်အမြား အကုန်အကျခံကာ အသုံးချသွားခြင်းကြောင့် ထပ်မံ ရွေးကောက် တင်မြှောက်ခံခဲ့ရသည်မှာ လူမှုကွန်ရက် အသုံးပြုခြင်းနှင့် ပတ်သက်၍ ထူးခြားသော သာဓကတစ်ရပ် ဖြစ်ခဲ့ပါသည်။ ထို့အတူ လူမှုကွန်ရက် အသုံးပြုခြင်းကြောင့် အကျိုးကျေးဇူးများရရှိသည့် သာဓကပေါင်း များစွာလည်း မလွဲမသွေ ရှိနေပါလိမ့်မည်။ သို့အတွက်ကြောင့် Facebook အပါအဝင် လူမှုကွန်ရက်များ အသုံးပြုခြင်းကြောင့်ရသည့် အကျိုးအမြတ်များ အကြောင်းကို အထူးအထွေ ပြောနေရန် မလိုဟုထင်မြင်မိသည်။

နောက်ဆုံးရထားသည့် စာရင်းဇယားများအရ Facebook အသုံးပြုသူ ၁၀ သန်းကျော် ရှိသွားပြီဖြစ်သည့် မြန်မာနိုင်ငံတွင် အဆိုပါ လူမှုကွန်ရက် အသုံးပြုမှုကြောင့် တစ်နည်းအားဖြင့် Facebook စွဲသည့်စိတ်ကြောင့် မည်သည့်အရာများ နစ်နာဆုံးရှုံးသွားပါသနည်းဟု မေးလျှင် “စာဖတ်သည့် အလေ့အထ”ဟု ပင်ဖြေရပါလိမ့်မည်။ ရန်ကုန်တွင်မက မြို့ကြီး အတော်များများတွင် စာအုပ်ဈေးရောင်းပွဲကြီးများ မည်သို့ပင် ကျင်းပသော်လည်း အဖြစ်သဘောမျှသာ ရောင်းချကြရခြင်း၊ စာကောင်းပေကောင်းများ မည်မျှပင် ပုံနှိပ်ထုတ်ဝေသော်လည်း လူဦးရေနှင့် အချိုးချကြည့်ပါက အုပ်ရေ ၅၀ဝ နှင့် ၁၀ဝ၀ ရောင်းရအောင်ပင် မနည်းကြိုးပမ်းနေကြရခြင်း စသည်တို့မှာ မြန်မာ့ လူ့အဖွဲ့အစည်း၌ ပုံနှိပ်ထုတ်ဝေသည့် စာအုပ်ဖတ်ရှုသော အလေ့အထ ကြောက်ခမန်းလိလိ ကျဆင်းသွားခြင်းကြောင့်သာ ဖြစ်ပေသည်။ ယနေ့အတွက် အခြား သတင်းဖြစ်ရပ်များ ကိစ္စမပြောဘဲ စာဖတ်သည့် ကိစ္စဘက်သို့ ဦးတည်ပြောရခြင်းမှာ မြန်မာ့လူ့အဖွဲ့အစည်းတွင် စာတတ်မြောက်သူဦးရေ မြင့်တက်လာသော်လည်း စာဖတ်သည့် အလေ့အထမှာ ဆိုးရွားစွာ ကျဆင်းနေသည်၊ တစ်နည်းအားဖြင့် စာဖတ်နာသူဦးရေ လွန်စွာ နည်းပါးလျက်ရှိသည်ဟု ယုံကြည်သောကြောင့်ဖြစ်သည်။ ယဉ်ကျေးမှု မြင့်မားပြီး ဖွံ့ဖြိုးတိုးတက်သည့် နိုင်ငံများတွင် လူအတော်များများ ကော်ဖီနှင့်လက်ဖက်ရည်ဆိုင်များတွင် သာမက ဘတ်စကားပေါ်၊ ရထားပေါ်တွင်ပါ စာအုပ်တစ်အုပ် ဖတ်လေ့ရှိပြီး “သွားလေရာစာအုပ်ပါ” အကျင့်စရိုက်ကိုယ်စီ ရှိကြသည်ကို ယင်းနိုင်ငံများသို့ ရောက်ဖူးသူတိုင်း သတိပြုမိလိမ့်မည်ဟု ထင်ပါသည်။ ထပ်မံ၍ တိုက်တွန်းလိုသည့်အချက်မှာ ယနေ့ ခေါင်းဆောင်များ ထပ်ခါတလဲလဲ ပြောလေ့ရှိသည့် ရင့်ကျက်သည့် ဒီမိုကရေစီ၊ စည်းကမ်းပြည့်ဝသည့် လူ့အဖွဲ့အစည်းဟူသည်မှာ စာတတ်မြောက်သူဦးရေချည်းသာ များပြားနေခြင်း မဟုတ်ဘဲ စာဖတ်နာ သူဦးရေပါ ဆတူနီးပါးရှိမှ ရရှိနိုင်သည်ဖြစ်ရာ တိုးတက်ဖွံ့ဖြိုးပြီးသော အခြားနိုင်ငံများကို အားကျကာအမီ လိုက်လိုပါက ဦးစွာပြုကျင့်ရမည်မှာ “သွားလေရာ စာအုပ်ပါ”ဟူသည့် အလေ့အထပင် ဖြစ်သည်ဟု ဆိုလိုရင်းဖြစ်ပေသည်။ 

အယ်ဒီတာ (၁၄-၆-၂၀၁၇)


  • VIA