News

POST TYPE

OPINION

ရေတွင်းကောင်းနှင့် ရေကြည်တစ်ပေါက် (Daily, Vol-5/No-53)
13-Jun-2017
ရန်ကုန်မြို့၏ သယ်ယူပို့ဆောင်ရေး အခန်းကဏ္ဍအတွက် လွန်စွာအရေးပါသော YBS ဘတ်စကားများ၏ ဝန်ဆောင်မှုပိုင်းနှင့် ပတ်သက်၍ ခရီးသွား  ပြည်သူများ အများစုအကြား တူညီသည့် မှတ်ချက်မှာ YBS ယာဉ်မောင်းများနှင့် ယာဉ်နောက်လိုက်များ၏ အကျင့်စရိုက် ပြောင်းလဲသွားမှု မရှိခြင်းပင်ဖြစ်သည်။ ယခင် မ.ထ.သ ဟုခေါ်သော မော်တော်ယာဉ်လိုင်းပေါင်းစုံ ထိန်းသိမ်းရေး ကော်မတီကို ဖျက်သိမ်းကာ ရန်ကုန် တိုင်းဒေသကြီး သယ်ယူပို့ဆောင်ရေး အာဏာပိုင်အဖွဲ့(YRTA) အဖြစ်ပြောင်းလဲ ဖွဲ့စည်းခဲ့ပြီးနောက် တံဆိပ်ပြောင်းကာ ပေါ်ထွက်လာသော YBS ယာဉ် လိုင်းများနှင့် YBS ခရီးစဉ် လမ်းကြောင်းသစ်များနှင့် ပတ်သက်၍ ရန်ကုန် တိုင်းဒေသကြီး အစိုးရအဖွဲ့အပေါ် ရန်ကုန်နေ ပြည်သူများ ဝေဖန်မှုမျိုးစုံ ပေးခဲ့ကြသည်ကိုလည်း မှတ်မိကြပါဦးမည်။ YBS နှင့်ပတ်သက်၍ ဝေဖန်မှုမျိုးစုံ ထွက်ပေါ်ခဲ့သည့်အနက် ခရီးသွား ပြည်သူများအနေနှင့် အဓိက ပြောစရာ ဖြစ်နေသည်မှာ ပြောင်းလဲသွားသော ခရီးစဉ် လမ်းကြောင်းများနှင့် ယာဉ်မောင်း၊ ယာဉ်နောက်လိုက်များ၏ မပြောင်းလဲသေးသော အကျင့်စရိုက်ပိုင်း ဖြစ်ပေသည်။ သို့သော်လည်း ယခင်ခေတ် အဆက်ဆက်က နိစ္စဓူဝ ခါးသီးဆိုးရွားလှသည့် အခြေအနေမျိုးစုံနှင့် အသားကျခဲ့ပြီး လက်ရှိအစိုးရအဖွဲ့၏ လုပ်ဆောင်ချက်များအပေါ် အပြုသဘောဖြင့်ကြိုးပမ်း ကြည့်ရှုကြသော ရန်ကုန်နေ ခရီးသွားပြည်သူများမှာ ယခုထက်ပို၍ အဆင်ပြေ ချောမွေ့သော သယ်ယူ ပို့ဆောင်ရေးစနစ်တစ်ခု ထွက်ပေါ်လာလိမ့်မည်ဟု မျှော်လင့်လျက်ရှိသည်။ မိမိတို့စိတ်ကြိုက် ရွေးချယ်တင်မြှောက်ထားသော အစိုးရလက်ထက်တွင် ယခင်ထက် ပိုကောင်းသည့် အရာတစ်ခု မလွဲမသွေ ပေါ်ပေါက်လာမည်ဟူသော စိတ်ဖြင့် မျှော်လင့်ချက် ထားကြခြင်းလည်း ဖြစ်နိုင်ပါသည်။ 

ဤနေရာတွင် YBS ကိစ္စကို စကားပလ္လင်ခံနေရခြင်းမှာ YBS အကြောင်းကိစ္စတစ်ခုတည်းကို ပြောလို၍ မဟုတ်ပေ။ အများပြည်သူတို့နှင့် သက်ဆိုင်သော မူဝါဒများ ချမှတ်ခြင်း၊ ယင်းမူဝါဒများကို အကောင်အထည်ဖော်ခြင်း စသည်တို့၌ မလွဲမသွေ ကြုံတွေ့နိုင်သော ပြဿနာများနှင့် စိန်ခေါ်မှုများ ကိစ္စပင်ဖြစ်ပါသည်။ အားလုံး သိထားပြီးသည့်အတိုင်း လူအများနှင့် သက်ဆိုင်သောအရေး ကိစ္စများကို ကိုင်တွယ်ဖြေရှင်းခြင်း၊ တစ်နည်းအားဖြင့် အများပြည်သူများ အဆင်ပြေချောမွေ့မှုရှိအောင် ကိုင်တွယ်ဖြေရှင်းခြင်း ဟူသော စီမံခန့်ခွဲမှုအလုပ်မှာ အများပြည်သူ၏ ဝေဖန်ရှုတ်ချမှုများနှင့် ကြုံတွေ့ရနိုင်သလို အခန့်  မသင့်လျှင် ဆဲရေးတိုင်းထွာမှုများနှင့်ပါ ကြုံတွေ့နိုင်သည်မှာ ဓမ္မတာပင်ဖြစ်သည်။ အဆိုပါ အများပြည်သူနှင့်ဆိုင်သော ပြဿနာကြီးများ ဖြစ်လာတိုင်း အဓိက ဝေဖန်ခံရသည်မှာ စီမံအုပ်ချုပ်သူ အစိုးရဖြစ်သလို ယင်းအစိုးရကပင် ပြဿနာများ ဖြေရှင်းရာ၌ ကြီးမားသည့် နေရာမှ ပါဝင်ရပေသည်။ အစိုးရ၏အလုပ်မှာ ပြီးပြည့်စုံသည့် Public Policy တစ်ရပ်ရေးဆွဲကာ အကောင်အထည်ဖော်ပြီး သက်ဆိုင်သူအားလုံး၏ ပြဿနာ ပြေလည်သွားနိုင်ခြင်း ရှိ၊ မရှိ ပြန်လည် ဆန်းစစ်ရေးပင်ဖြစ်သည်။ ထိုသို့ အများအကျိုးကို အမှန်တကယ် ဖြစ်ထွန်းစေနိုင်မည့် Public Policy ကောင်းတစ်ရပ် ထွက်ပေါ်အောင် ကြိုးပမ်းရာတွင် မူလရှိရင်းစွဲ အခြေအနေကောင်းများ မပျက်ယွင်းစေရေးနှင့် ပိုမိုအဆင်ပြေ ချောမွေ့စေမည့် အခြေအနေကောင်းများ ပေါ်ထွန်းလာရေးသည် အရေးအကြီးဆုံး ဖြစ်ပေရာ မူဝါဒမရေးဆွဲမီ သုတေသန အမျိုးမျိုး၊ စစ်တမ်းအဖုံဖုံဖြင့် ချဉ်းကပ် လေ့လာခြင်းသည် အခြေခံအကျဆုံးသော အလုပ်ဖြစ်ပေသည်။ သို့မှသာ လူတိုင်းအတွက် ပိုမိုတိုးတက်ကောင်းမွန်သော လူနေမှုဘဝ ပုံစံသစ်တစ်ခုကို ဖန်တီး ပေးနိုင်မည်သာပင်ဖြစ်ပါသည်။ 

ယခုအခါ YBS သာမက Water Taxi ပြေးဆွဲမည့်ကိစ္စအပါအဝင် အများပြည်သူများ သွားလာရေး အဆင်ပြေချောမွေ့စေရေးအတွက် အစီအစဉ် အမျိုးမျိုး ရေးဆွဲနေချိန်တွင် အထူးသတိပေးလိုသည်မှာ Public Policy ကောင်းတစ်ရပ်ဟူသည် ရေထွက်ကောင်းသည့် ရေတွင်းတစ်ခုကဲ့သို့ အများ ပြည်သူများ ကာလကြာရှည်စွာ အားကိုးအားထား ပြုနိုင်မည့်အရာဖြစ်ပေရာ ယခုတူးပြီး ယခုထွက်သောရေကို အများပြည်သူများအား ချက်ချင်း သောက်ခိုင်းသည့် အခြေအနေမျိုး မဖြစ်စေရန် အရေးကြီးလွန်းလှသည်။ အကြောင်းမှာ မူဝါဒချမှတ်သူများ အပ်ကြောင်းထပ်အောင် ပြောလေ့ရှိကြသည့် ယခုရေတွင်းတူပြီး ယခုရေကြည်သောက်၍မရ ဟူသောကိစ္စကို အများပြည်သူက ကောင်းစွာ နားလည်သဘောပေါက်သော်လည်း အုပ်ချုပ်ရေးယန္တရား အဆက်ဆက် အပြောင်းအလဲ လုပ်နိုင်စွမ်းရှိသည် သို့မဟုတ် လူစွမ်းကောင်း ဖြစ်သည်ဟူသော အချက်ကို ပြချင်ရုံမျှဖြင့် အလျင်အမြန် ဖော်ဆောင်လိုက်သော မူဝါဒများ၏ ခါးသီးနောက်ကျိသော အရသာကို ယင်းမူဝါဒချမှတ်သူများ မည်သည့်အခါကမျှ ခံစားနိုင်ခြင်း မရှိခဲ့ခြင်းကြောင့်ပင် ဖြစ်ပေသည်။ 

အယ်ဒီတာ (၁၂-၆-၂၀၁၇)


  • VIA