News

POST TYPE

OPINION

ပထမ ရက်တစ်ရာအတွက် စဉ်းစားစရာ (Daily Vol-4/No-76)
08-Jul-2016
အစိုးရသစ် စတင်တာဝန်ယူသည့် ၂၀၁၆ ခုနှစ် ဧပြီလ ၁ ရက်နေ့မှ ရေတွက်လျှင် လာမည့် ဇူလိုင်လ ၉ ရက်နေ့ဆိုလျှင် အမျိုးသားဒီမိုကရေစီအဖွဲ့ချုပ် (NLD) ပါတီ ဦးဆောင်သော အစိုးရအဖွဲ့၏ ဟန်းနီးမွန်း ကာလခေါ် ရက်တစ်ရာ ပြည့်တော့မည် ဖြစ်သည်။

ရက်တစ်ရာ ဆိုသည်မှာလည်း အစိုးရသစ်အတွက် ကနဦး ခြေလှမ်းအစ ပထမ ရက်တစ်ရာသာ ဖြစ်သည့်အတွက် အရာရာကို ပထမ လှေကားတစ်ထစ်စီမျှသာ တက်နိုင်ဦးမည် ဖြစ်သည်။

ဦးသိန်းစိန်အစိုးရ ငါးနှစ်ကာလအတွင်း ဆောင်ရွက်သွားခဲ့သော အခြေအနေများကို တစ်စချင်း ပြန်ကိုင်ရသောကြောင့် အချို့နယ်ပယ်များတွင် လစ်ဟင်းမှု ရှိနိုင်သော်လည်း ဒေါ်အောင်ဆန်းစုကြည်၏ ညွှန်ကြားချက်ကြောင့် ဝန်ကြီးဌာနတိုင်း ရက်တစ်ရာ စီမံချက်များ ရေးဆွဲပြီး အကောင်အထည် ဖော်နေကြရသည်။

အစိုးရတစ်ရပ်၏ အဓိကတာဝန်မှာ အချုပ်အားဖြင့် ပြောရလျှင် နိုင်ငံတည်ဆောက်ရေးပင် ဖြစ်သည်။ နိုင်ငံတည်ဆောက်ရေးကို အများပြည်သူ နားလည်အောင် ပြောရလျှင် နိုင်ငံကို ဖွံ့ဖြိုးတိုးတက်စေခြင်းပင် ဖြစ်သည်။

စင်စစ်အားဖြင့် NLD အစိုးရသည် ဦးသိန်းစိန် ခေါင်းဆောင်သော ကြံ့ခိုင်ရေးပါတီ အစိုးရထံမှ အာဏာလွှဲပြောင်းလက်ခံသည် ဆိုခြင်းထက် နှစ်ငါးဆယ်ကြာ အုပ်ချုပ်လာခဲ့သော စစ်အာဏာရှင်များထံမှ လေးပုံသုံးပုံသော အာဏာသုံးရပ်ကို ပြည်သူ့ဆန္ဒမဲများဖြင့် လွှဲပြောင်းရယူခြင်းဟု ဆိုနိုင်သည်။

ထိုအတွက် NLD အစိုးရထံတွင် ကနဦး ပထမ ရက်တစ်ရာအတွင်း အားနည်းချက်များ မည်မျှရှိနေစေကာမူ ပြည်သူလူထုက အာဏာရှင်ကို မုန်းတီးစိတ်၊ ဒေါ်အောင်ဆန်းစုကြည်အပေါ် ချစ်ခင်စိတ်ဖြင့် အရာရာကို ခွင့်လွှတ်နားလည်ပေးကြမည် ဖြစ်သည်။

သို့သော် ပုဂ္ဂိုလ်ရေးကို အားပြုလွန်း၊ အဖွဲ့အစည်းတစ်ရပ်ကို အမွှမ်းတင်လွန်းသော ပကတိ နိုင်ငံရေး အခြေအနေများက ထိုမျှလောက် မရိုးစင်းလှပေ။ စနစ်ဆိုးနှင့် ဝါဒဆိုး၏ ရိုက်ခတ်မှုကြောင့် ရန်ငါစည်း ခြားလွန်းအမြင်ဖြင့် အရာရာ ကြည့်မြင်တိုင်းတာတတ်သော လက်ရှိ နိုင်ငံရေးလောကနှင့် အငြိုး၊ အာဃာတများ၊ တစ်ဖက်သတ် ဦးနှောက်ဆေး ရိုက်သွင်းမှုများဖြင့် ဝင်ရိုးတန်း တစ်ဖက်စီကဲ့သို့ ဖြစ်နေသော အင်အားစုများ အကြားနှင့် အင်အားစု အချင်းချင်းအကြား အာဏာ၊ နေရာ၊ သြဇာ၊ စည်းစိမ်ဥစ္စာ အလို့ငှာ သူသေ၊ ကိုယ်သေ တိုက်ပွဲများက ရှုပ်ထွေးပွေလီလွန်းလှသည်။

ထို့အပြင် အချိန်မရွေး ထပေါက်ကွဲနိုင်သည့် ယမ်းအိုးနှင့်တူသော ပြဿနာ ကြိုးစများကလည်း မာန်ဖီ၊ ရန်စောင်နေပြီး အကြောင်းရှာ၊ ရမည်ရှာ ဇာတ်လမ်းဆင်၊ ကကြိုး ဆင်နေပေသည်။

အဓိက စိန်ခေါ်လာနိုင်သည့် ပြဿနာမှာ နိုင်ငံတည်ဆောက်ရေးတွင် အရေးအကြီးဆုံး စီးပွားရေး ဖွံ့ဖြိုးမှုအတွက် ကာလအလိုက်၊ နှစ်အလိုက်၊ နယ်ပယ်အလိုက် တိကျရေရာသော စီးပွားရေး မူဝါဒများ မထုတ်ပြန်နိုင်သေးခြင်း ဖြစ်သည်။

ရွေးကောက်ပွဲ မတိုင်ခင်က အမျိုးသားဒီမိုကရေစီအဖွဲ့ချုပ်ပါတီ၏ ရွေးကောက်ပွဲ ကြေညာစာတမ်းတွင် ဘဏ္ဍာငွေ သုံးစွဲမှု၊ ကျစ်လျစ်သော အစိုးရအဖွဲ့၊ လယ်ယာကဏ္ဍ ခေတ်မီရေး၊ ဘဏ္ဍာရေးနှင့် ငွေကြေးစနစ် တည်ငြိမ်ရေးနှင့် အခြေခံအဆောက်အဦ ဖွံ့ဖြိုးရေးဟူသည့် အချက်ငါးချက်ကို စီးပွားရေး မူဝါဒအဖြစ် သတ်မှတ်ထားသည်ကို တွေ့ရ၍ ထိုအချက်များနှင့် ရက်တစ်ရာကို တိုင်းတာရမည့် သဘော ဖြစ်သည်။

သို့သော် ပြည်တွင်းစစ်သည် စီးပွားရေး ဖွံ့ဖြိုးတိုးတက်မှုကို အဟန့်အတား ဖြစ်စေနိုင်သောကြောင့် ငြိမ်းချမ်းရေးကိစ္စကို အမျိုးသားပြန်လည်သင့်မြတ်ရေး ခေါင်းစဉ်ဖြင့် ပထမ ဦးစားပေးအဖြစ် ကိုင်တွယ်ဆောင်ရွက်နေပုံရပြီး ယင်းနောက်တွင်မှ စီးပွားရေးကို ကိုင်တွယ်မည့် သဘောဟု ခန့်မှန်းရသည်။

မည်သို့ပင်ဖြစ်စေ လူပုဂ္ဂိုလ်ကို အခြေခံသော လွန်ကဲသည့် ချစ်ခင်စိတ်၊ မုန်းတီးစိတ်တို့ဖြင့် အစိုးရသစ်၏ ရက်တစ်ရာ ကာလကို ပြည်သူအများစုက နားလည်လက်ခံကြမည် ဖြစ်သော်လည်း နိုင်ငံခြားရင်းနှီးမြှုပ်နံှမှုများ၊ စီးပွားရေး အခွင့်အလမ်းများ၊ အိမ်နီးချင်း၊ ဒေသတွင်းနှင့် နိုင်ငံတကာ ဆက်ဆံရေး ပဲ့တင်သံများကမူ ဝန်ကြီးဌာန အသီးသီး၊ နယ်ပယ်အသီးသီး၏ လက်တွေ့ထွက်ပေါ်လာသော ဖွံ့ဖြိုးရေး ကိန်းဂဏန်းများကို အခြေခံကာ အရှုံးအမြတ် တွက်ကြမည်ကို သတိချပ်သင့်ကြောင်း အကြံပြုအပ်ပေသည်။

အယ်ဒီတာ (၇-၇-၂၀၁၆)