News

POST TYPE

OPINION

ကျူးကျော်၊ အောက်ခြေအဆင့် လူလတ်တန်းစားများနှင့် အငှားအိမ်ရာ (Daily, Vol-4/No-73)
05-Jul-2016 tagged as အိမ် ခြံ

လက်ရှိအစိုးရ စတင်တာဝန်ယူသည့် အချိန်မှစ၍ ဦးစွာကိုင်တွယ်ဖြေရှင်းရန် ကြိုးစားသည့် ပြဿနာအချို့အနက် အများပိုင် သို့မဟုတ် နိုင်ငံပိုင် သို့မဟုတ် ပုဂ္ဂလိကပိုင် မြေနေရာများတွင် ကျူးကျော်နေထိုင်သူများ ပြဿနာတစ်ခု အပါအဝင် ဖြစ်သည်။

တစ်ဆက်တည်းတွင် ယင်းကျူးကျော်နေထိုင်သူများ အိုးပိုင်၊ အိမ်ပိုင် ရရှိရေးအတွက် တန်ဖိုးနည်း အိမ်ရာများ ဆောက်လုပ်ရေးမှာလည်း ကျွဲကူးရေပါ ဆိုသကဲ့သို့ အကောင်အထည်ဖော် ဖြေရှင်းလာရသည်။

ကျူးကျော်အများစုမှာ မြန်မာနိုင်ငံတွင် အလုပ်အကိုင် အခွင့်အလမ်း အများဆုံး တည်ရှိနေသော ရန်ကုန်မြို့တော်နှင့် မန္တလေးမြို့တော်တို့တွင် တွေ့မြင်ရသည့်အတွက် ကျူးကျော်ပြဿနာ အများစုအတွက် တန်ဖိုးနည်းအိမ်ရာ စီမံကိန်းများကိုလည်း ယင်းနှစ်မြို့တွင် တွေ့မြင်ရသည်။

ထိုသို့ ဖြေရှင်းရာတွင် အားလုံးသိကြသည့်အတိုင်း နှစ်ပေါင်းများစွာ အိမ်ပိုင်၊ ရာပိုင် မရှိသဖြင့် ကျူးကျော်တဲထိုး နေသူများရှိသကဲ့သို့ ကျူးကျော်များကို အစားထိုး မြေကွက်များပေး၍ ဖြေရှင်းတတ်သည်ကို သိရှိထားသဖြင့် ခါတော်မီ ကျူးကျော်တဲ ထိုးသူများနှင့် ကုမ္ပဏီကြီး တစ်ခုခု၏ ပံ့ပိုးမှုဖြင့် ကျူးတဲဆောက် နေရာဦးသူများ ဟူ၍ သုံးမျိုး ရှုပ်ထွေးနေခြင်းကို ရင်ဆိုင်ကြရသည်။

ယခင်အစိုးရ လက်ထက်တွင်လည်း ကျူးကျော်ပြဿနာများကို ရွှေပြည်သာ၊ ပုလဲမြို့သစ်၊ ထောက်ကြန့်၊ လှည်းကူး အစရှိသည့် မြို့သစ်များ၊ မြို့များတွင် အစားထိုးမြေကွက်များ ပေး၍ ဖြေရှင်းခဲ့သော်လည်း ကျူးကျော်အများစုမှာ ရရှိသော မြေကွက်များကို အငှားချခြင်း၊ ရောင်းစားခြင်းတို့ဖြင့် ငွေဖော်ကာ မူလကျူးကျော်နေရာများတွင် ပြန်လည်တဲထိုးနေခြင်းဖြင့် ကျူးသံသရာ လည်နေခဲ့သည်။

ယနေ့ အစိုးရသစ် လက်ထက်တွင် ကျူးကျော်များကို အမြစ်ပြတ် ဖြေရှင်းရန် ကြိုးစားလာသော်လည်း ယင်းကဲ့သို့ ကျူးပြီးရင်းကျူးကာ ကျူးသံသရာ လည်နေသူများနှင့် အမှန်တကယ် ကျူးကျော်များကို ခွဲခြားရန် ဦးစွာကြိုးစားနေရခြင်းက ပြဿနာကို ပြဿနာအသစ် တစ်ခုဖြင့် ဖြေရှင်းနေရသကဲ့သို့ ဖြစ်နေပေသည်။

အခြားတစ်ဖက်တွင် ထိုသို့ အခွင့်အရေးအလို့ငှာ ကျူးကျော်သူများအရေး ကိစ္စကို တန်ဖိုးနည်း အိမ်ရာများဖြင့် ဖြေရှင်းပေးနေသော်လည်း ရန်ကုန်မြို့တော်နှင့် မန္တလေးမြို့တော်တို့တွင် နယ်ဒေသမှ ရောက်ရှိလာပြီး သမ္မာအာဇီဝ အလုပ်မျိုးစုံဖြင့် အသက်မွေးဝမ်းကျောင်းပြုကာ ယနေ့အချိန်အထိ အိမ်ငှားဘဝဖြင့် ရှိနေသော အခွန်ပုံမှန် ပေးဆောင်နေထိုင်ကြသူ အစိုးရဝန်ထမ်းများ၊ အခြေခံလူတန်းစားနှင့် အောက်ခြေပိုင်း လူလတ်တန်းစားများ ဘဝကိုမူ ကျူးကျော်များကဲ့သို့ အစီအစဉ် မရှိသေးပေ။

နိုင်ငံတော်၏ လုပ်အားစွမ်းရည် အမြင့်ဆုံး ပေးဆပ်နေကြသည့် အခြေခံ လူတန်းစားများ၊ အောက်ခြေအဆင့် လူလတ်တန်းစားများသည် နေ့စဉ်ဝင်ငွေ စုစုပေါင်း၏ သုံးပုံနှစ်ပုံကို စားရေးနှင့် နေရေးတွင် အသုံးပြုနေသည့်အတွက် ကျန်းမာရေး၊ ပညာရေး၊ ဖျော်ဖြေရေး၊ လူမှုရေးကိစ္စများနှင့် အခြားသော လူ့ဘဝ၊ လူ့ဂုဏ်သိက္ခာဆိုင်ရာ ကိစ္စများတွင် သုံးစွဲရန် ငွေကြေးမလုံမလောက် ဖြစ်နေပေသည်။

ထိုကဲ့သို့ နိုင်ငံတော်ကို အောက်ခြေမှ မောင်းနှင်နေသော အင်ဂျင်နေရာတွင် ရှိနေကြသူများအတွက် စရိတ်သက်သာသော အငှားအိမ်ရာများစွာ တည်ဆောက်ဖြေရှင်းပေးရန် အထူးလိုအပ်နေပြီး ငွေကြေးတတ်နိုင်သူများနှင့် အိမ်၊ ခြံ၊ မြေ ဈေးကစားသူများသာ ဝယ်ယူနိုင်သည့် တန်ဖိုးကြီး ဇိမ်ခံအိမ်ရာများ ဆောက်လုပ်မှုကို လတ်တလောတွင် အထူးကြပ်မတ် ကန့်သတ်ရန် လိုအပ်ပေသည်။

အငှားအိမ်ရာများ ဆောက်လုပ်ဖြေရှင်းပေးခြင်းဖြင့် နိုင်ငံ၏ အခြေအနေနှင့်မမျှ ဖြစ်ပေါ်နေသော အိမ်၊ ခြံ၊ မြေဈေးများ သင့်တင့်လျောက်ပတ်သည့် ဈေးနှုန်းသို့ ကျဆင်းသွားခြင်း၊ တန်ဖိုးမြင့် အိုးပိုင်၊ အိမ်ပိုင် ရှိနေသူများသာ ဝယ်နိုင်သည့် တန်ဖိုးကြီး၊ အဆင့်မြင့်၊ ဇိမ်ခံအိမ်ရာများ ဆောက်လုပ်မှု ကျဆင်းသွားခြင်း၊ ဈေးကွက်အတွင်းသို့ တန်ဖိုးနည်း အိုးပိုင်အိမ်ပိုင် ရှိသူများ၏ ငွေကြေးလည်ပတ် သုံးစွဲငွေ မြင့်တက်လာခြင်းကဲ့သို့ အကျိုးကျေးဇူးများ ရရှိလာနိုင်သည့်အပြင် ဈေးကွက်အတွင်းသို့ နေရေးအတွက် စရိတ်သက်သာသွားသူများ၏ သုံးစွဲငွေများ မြင့်တက်ကာ ငွေကြေးလည်ပတ်မှု မြန်ဆန်လာသော အကျိုးကျေးဇူးများ ရရှိနိုင်ကြောင်း သိစေလိုရင်းဖြစ်သည်။

အယ်ဒီတာ (၄-၇-၂၀၁၆)