News

POST TYPE

OPINION

ပဋိပက္ခ သတိ၊ ငြိမ်းချမ်းရေး အသိ (Daily, Vol-5/No-30)
16-May-2017 tagged as

ယခုရက်ပိုင်းအတွင်း မွတ်ဆလင် ဘာသာဝင်များနှင့် ပတ်သက်သော ကိစ္စရပ်များ သာမက ခရစ်ယာန် ဘာသာဝင်အချို့နှင့်လည်း ထိပ်တိုက် တွေ့လိုသည့်  လက္ခဏာအချို့ ရန်ကုန် အပါအဝင် နယ်ဒေ သအချို့တွင် သိသိသာသာ တစ်မျိုး၊ မသိမသာ တစ်မျိုး ပြဿနာ အစရှာနေသော ဖြစ်ရပ်အချို့ ပေါ်ပေါက်နေခြင်းမှာ များစွာ သံသယဖြစ်စရာ ကောင်းလှသည်။

ဗုဒ္ဓဘာသာ အမည်ခံထားသူ အချို့၏ ဗုဒ္ဓ အဆုံးအမနှင့်မညီသည့် ဒေါသသင့် ရန်လိုသော ပြုမူ၊ ပြောဆိုမှုများက လူနည်းစု ဘာသာဝင် အချို့နှင့် စစ်မှန်သော ဗုဒ္ဓဘာသာအကြား အထင်အမြင် လွဲမှားမှုများ ဖြစ်ပေါ်လာနိုင်သောကြောင့် အချိန်မီ မြန်ဆန်စွာ ထိန်းသိမ်းရန်လည်း လိုပေသည်။

ပုံမှန်အားဖြင့် မွတ်ဆလင်များနှင့် ပဋိပက္ခ ဖြစ်ပေါ်ရန် လှုံ့ဆော်၊ ဖန်တီးမှုများ မကြာခဏ ဖြစ်လာသောကြောင့် တမင်ပြဿနာ ဖြစ်စေလိုသော ရည်ရွယ်ချက် ရှိနေကြောင်း ပြည်သူ အများစုက သဘောပေါက်လာသည့်အတွက် ယခုနောက်ပိုင်း အစွန်းရောက်များ၏ ရည်ရွယ်ချက် အထမမြောက်တော့ပေ။

ထို့ကြောင့် ခေါင်းစဉ် အမျိုးမျိုးပြောင်း၍ ပြဿနာ ဖန်တီးရန် ကြိုးပမ်းလာရာ အုပ်ချုပ်ရေး တာဝန်ရှိသူများ စီမံခန့်ခွဲရမည့် လုပ်ငန်းများကိုပါ စွက်ဖက် ဖိအားပေးလာပြီး လူစု၊ လူဝေး ဖြစ်ပေါ်စေရန် ကြိုးစားလာသည့် သဘော တွေ့မြင်ရသည်။

မြန်မာနိုင်ငံသမိုင်းတွင် ဗြိတိသျှ ကိုလိုနီအစိုးရ အပါအဝင် လက်ယာစွန်းပါတီများ၊ အာဏာရှင် အစိုးရများက တမင်ဖန်တီးသော ဘာသာရေး၊ လူမျိုးရေး ပဋိပက္ခ၊ အဓိကရုဏ်းများသာ ရှိခဲ့ပြီး ပြည်သူလူထု အကြားတွင်မူ မျိုးဆက် သုံးဆက်ကျော် လေးဆက်တိုင် ငြိမ်းချမ်းစွာ အတူယှဉ်တွဲ နေထိုင်လာကြသူများ အချင်းချင်း အပြန်အလှန် ချစ်ခင်ရင်းနှီးမှု၊ နားလည် ယုံကြည်မှု ရှိနှင့်ပြီးဖြစ်သည်။

ယင်းအချက်ကို ထင်ရှားစေသည်မှာ ရန်ကုန်မြို့လယ် ဆူးလေစေတီတော်၏ တစ်ဖက်တစ်ချက်တွင် နှစ်ခြင်းခရစ်ယာန် ဘုရားကျောင်းနှင့် ဆွန်နီ မွတ်ဆလင်ဗလီတို့ တည်ရှိနေခြင်းနှင့် ထိုနေရာမှ မလှမ်းမကမ်း ပန်းဆိုးတန်း လမ်းမပေါ်တွင် ဟိန္ဒူဘုရားကျောင်း တည်ရှိနေခြင်းပင်ဖြစ်သည်။

ထို့အတူ လွန်ခဲ့သည့် နှစ်ပေါင်း တစ်ရာကျော်ကပင် နိုင်ငံတစ်ဝန်း ပျံ့နှံ့နေထိုင်နေကြသည့် ခရစ်ယာန်၊ မွတ်ဆလင်၊ ဟိန္ဒူဘာသာဝင်များနှင့် ဗုဒ္ဓဘာသာဝင် နိုင်ငံသားများအကြား ချစ်ကြည်ရင်းနှီးစိတ်ဖြင့် ငြိမ်းငြိမ်းချမ်းချမ်း ရှိနေခဲ့ပြီးဖြစ်သည်။

လူနည်းစု ဘာသာဝင်များ အနေနှင့်လည်း ၎င်းတို့ကိုယ်ကို လူနည်းစုမှန်း သိသာစေမည့် လွန်လွန်ကဲကဲ ဆင်ယင်ချယ်သ၊ ဝတ်စားဆင်ယင်မှုမျိုး မရှိခဲ့ဘဲ အခြားသော မြန်မာနိုင်ငံသားများ နည်းတူ သာမန်အတိုင်း ဝတ်စားဆင်ယင်မှုမျိုးသာ ရှိခဲ့သည့်အတွက် ဘာသာအလိုက် သတ်မှတ်ထားသော ဘုရားဝတ်ပြုချိန်မျိုးမှအပ ကျန်အချိန် အားလုံးတွင် အများနည်းတူ မြန်မာနိုင်ငံသားများ အဖြစ်သာ ရှိနေခဲ့သည်။

မျိုးဆက် လေးဆက်တိုင် မြန်မာနိုင်ငံတွင် မွေးဖွား၊ ကြီးပြင်း၊ ပညာသင်၊ စီးပွားရှာ နေထိုင်လာခဲ့သော လူနည်းစုများမှာလည်း ၎င်းတို့ကိုယ်၎င်းတို့ မြန်မာနိုင်ငံသားများအဖြစ် အသားကျလာခဲ့သော်လည်း ၎င်းတို့အနက် အချို့မှာ ဗုဒ္ဓဘာသာအမည်ခံ နိုင်ငံရေး ဦးတည်ချက်ပါသော အစွန်းရောက် လှုပ်ရှားမှုများကြောင့် အိမ်နီးချင်း နိုင်ငံအချို့မှ အစ္စလာမ္မစ် အယူသီးဝါဒီ ဗလီဆရာများ၏ အယူအဆ၊ အတွေးအခေါ် အချို့အပေါ် စိတ်ယိုင်၊ သက်ဝင်မှုများ ရှိလာစေခဲ့သည်။

မည်သို့ပင်ဖြစ်စေ နှစ်ပေါင်းများစွာ ငြိမ်းချမ်းစွာ အတူယှဉ်တွဲ နေထိုင်လာခဲ့ကြသည့် မြန်မာနိုင်ငံသားများ အကြားတွင် ယဉ်ကျေးမှုအဆင့် နိမ့်ပါးသော၊ အစွန်းရောက်၊ အယူသီးသော၊ ခွဲခြားနှိမ်ချ ဆက်ဆံသော၊ သွေးခွဲ ရန်လိုသော အတွေးအခေါ်၊ အပြုအမူ၊ အပြောအဆို၊ ဟန်ပန်အမူအရာ၊ ဝတ်စားဆင်ယင်မှုများ၊ ပြန်ကြား ထုတ်ဝေဖြန့်ချိမှုများကို သတိဖြင့် ဆင်ခြင် ရှောင်ရှားနိုင်ကြစေကြောင်း၊ ဘာသာတရားတိုင်း၏ စစ်မှန်သော အဆုံးအမ တန်ဖိုးများကိုသာ လက်ခံ ကျင့်သုံးကြစေကြောင်းနှင့် အစိုးရအနေနှင့်လည်း ဥပဒေနှင့်အညီ အရေးယူ ထိန်းသိမ်းပေးရန် တာဝန်အပြည့်အဝ ရှိကြောင်း အကြံပြု၊ တိုက်တွန်းလိုရင်း ဖြစ်သည်။

အယ်ဒီတာ (၁၆-၅-၂၀၁၇)

  • TAGS