News

POST TYPE

OPINION

ဝေဖန်မှုများကို ခွဲခြားတတ်ပါစေ (Daily, Vol-5/No-13)
27-Apr-2017
တစ်နှစ်သက်တမ်း ကျော်လွန်လာပြီးနောက် ယခင်ထက်စာလျှင် အစိုးရအပေါ် ဝေဖန်ထောက်ပြမှုများ တဖြည်းဖြည်း တိုးလာပြီး ၂၀၁၇ ဧပြီလ ၁ ရက်နေ့တွင် ပြုလုပ်သော ကြားဖြတ်ရွေးကောက်ပွဲအပြီးနောက်ပိုင်း ဝေဖန်မှု အရှိန်သိသိသာသာ မြင့်တက်သွားသည်ကို တွေ့ရသည်။

ဝေဖန်မှုဆိုရာတွင် သာမန် ဝေဖန်ခြင်းမျိုးသာမက အစိုးရဆောင်ရွက်၊လုပ်ကိုင်မှုများအပေါ် အားမလို အားမရဖြစ်ခြင်း၊ လိုအပ်ချက်များကို ထောက်ပြ၊ အကြံပြုလိုခြင်းများနှင့် မလိုတမာစိတ်၊ အမုန်းစိတ်တို့ဖြင့် အပြစ်တင်၊ အဆိုးပြော၊ ပုတ်ခတ်၊ တိုက်ခိုက်ခြင်းများလည်း ရှိတတ်သည်။

ထိုသို့ ဝေဖန်မှတ်ချက်ပေးသူများကို လေ့လာကြည့်ရာတွင် အုပ်စု လေးစု တွေ့မြင်ရမည်ဖြစ်သည်။ ပထမအုပ်စုမှာ ဆန့်ကျင်ဘက် အင်အားစု သို့မဟုတ် ပြိုင်ဘက်ပါတီ၊ အဖွဲ့အစည်းများက တစ်ဆိတ်ကို တစ်အိတ် လုပ်၍ ပုတ်ခတ်၊ တိုက်ခိုက်မှု ဆန်သော ဝေဖန်မှတ်ချက်များ၊ အဆင့်အတန်းနိမ့်၊ မယဉ်ကျေးသော အသုံးအနှုန်းများဖြင့် အစွန်းရောက်ရောက် လှုံ့ဆော်၊ သွေးထိုးမှု အလေးကဲသည့် မှတ်ချက်ပေးသူများဖြစ်သည်။

ဒုတိယအုပ်စုမှာ မည်သည့် အစိုးရတက်တက် အမြဲလိုလို အပြစ်ရှာ၊ ကန့်လန့်တိုက်၊ ဘေးထိုင်၊ ဘုပြောနေမည့်အပြင် အခွင့်အရေး ရပါက ဆန္ဒပြ သပိတ်မှောက်မှုများ၊ မြေလှန်ပြောင်းလဲမှု ဖြစ်စဉ်များကို မျှော်ကိုးကာ အရာရာကို တော်လှန်ရေးစိတ်ကဲသော အမြင်ဖြင့် မှတ်ချက်ပေးသူများ ဖြစ်သည်။

တတိယအုပ်စုမှာ အစိုးရအဖွဲ့ကိုသာမက ယင်းနောက်ရှိ နိုင်ငံရေးပါတီ၏ အဆင့်အတန်း၊ ဂုဏ်သိက္ခာကို ရည်မျှော်၍သော်လည်းကောင်း၊ ဒေသနှင့် နိုင်ငံဖွံ့ဖြိုးရေး၊ ဒေသခံများနှင့် ပြည်သူလူထု အကျိုးစီးပွားကို ဦးတည်၍သော်လည်းကောင်း ပညာရှင်ဆန်ဆန် စနစ်တကျ အသေးစိတ်၊ အကြံပြု၊ ထောက်ပြနေကြသူများဖြစ်သည်။

စတုတ္ထအုပ်စုမှာမူ ပရော်ဖက်ရှင်နယ် ရပ်တည်ချက်တစ်ခုဖြင့် မည်သည့် လူပုဂ္ဂိုလ်၊ အစိုးရ၊ ပါတီ၊ အဖွဲ့အစည်း၊ လက်နက်ကိုင်ကိုမဆို သီအိုရီသဘော၊ ကျင့်ဝတ်အမြင်၊ ဥပဒေ ရှုထောင့်၊ ပညာရပ်ဆိုင်ရာ ချိန်ထိုးမှုတို့ဖြင့် စောင့်ကြည့်ကာ ဝေဖန်၊ ဆန်းစစ်၊ သုံးသပ်၊ မှတ်ချက်ပေးနေသော အုပ်စုဖြစ်သည်။

ထိုအုပ်စု လေးစုသည် လက်ရှိ အစိုးရသစ်ကာလ မတိုင်မီ ယခင်အရပ်သား တစ်ပိုင်း အစိုးရလက်ထက်က သိသာစွာ မြင်တွေ့ခဲ့ရပြီး လက်ရှိအစိုးရ လက်ထက်တွင်သာမက နိုင်ငံ၏ စီးပွာရေးဖွံ့ဖြိုးမှုနှင့် အခြေခံပညာရေး မူဝါဒများ လက်တွေ့ကျကျ မပြောင်းလဲနိုင်သေးသရွေ့ နောင်အစိုးရ အဆက်ဆက်တွင်လည်း ရှိနေဦးမည်ဖြစ်သည်။

များစွာ အရေးကြီးသည်မှာ နိုင်ငံတော်၏ အချုပ်အခြာ အာဏာအရပ်ရပ်ကို ဥပဒေအရ၊ တာဝန်အရ လက်တွေ့ ကိုင်တွယ် စီမံခန့်ခွဲနေသူများနှင့် တပ်မတော်တို့ အနေနှင့် အဆိုပါ အုပ်စုလေးစုကို ခွဲခွဲခြားခြား ရှုမြင်တတ်ရန်နှင့် မိမိတို့အတွက် အကျိုးရှိနိုင်၊ မရှိနိုင်မည့် အကြံပြု၊ ထောက်ပြ၊ ဝေဖန်၊ မှတ်ချက်များဖြစ်ပါက မည်သည့် အုပ်စုထံကမဆို ယူတတ်၊ သုံးတတ်၊ ပယ်တတ်၊ လျစ်လျူရှုတတ်ရန်သာ ဖြစ်သည်။

သို့မဟုတ်ပါက ဝေဖန်မှုမှန်သမျှကို ဆန့်ကျင်ဘက်အုပ်စုနှင့် တစ်ဖွဲ့တည်း ဖြစ်ကြောင်း စွပ်စွဲ တံဆိပ်ကပ်ခြင်း၊ မိမိတို့ကို ဂုဏ်သိက္ခာ ညှိုးနွမ်းစေရန် တမင်ရည်ရွယ် လုပ်ဆောင်ခြင်းဟု ရှုမြင်ကာ ဩဇာရှိလျှင် ရှိသလို၊ အာဏာရှိလျှင် ရှိသလို လုပ်ပိုင်ခွင့်ရှိလျှင် ရှိသလောက် တုံ့ပြန် အရေးယူနေပါက သဘောထား သေးနုပ်ရာ ရောက်သည့်အပြင် မိမိအင်အားကို မိမိဘာသာ ဖြုန်းတီးကာ မိတ်ဆွေဖြစ်နိုင်သူများကို ရန်သူစာရင်း သွင်းလိုက်သကဲ့သို့ဖြစ်ပြီး အပြန်အလှန် ယုံကြည်မှု ပျောက်ဆုံးသွားနိုင်ကြောင်း သတိပေး ထောက်ပြလိုရင်း ဖြစ်သည်။

အယ်ဒီတာ (၂၆-၄-၂၀၁၇)


  • VIA