News

POST TYPE

OPINION

မန်းသင်္ကြန် သင်ခန်းစာ
22-Apr-2017

မန္တလေးသင်္ကြန်သည် သင်္ကြန်ထက် ကျော်လွန်သော အကြောင်းအရာများကို ပြောပြနေသည်။

Federalism ဟုပြောပြော Decentralization ဟုပင်ဆိုဆို ပြည်ထောင်စုအဆင့်က တိုက်ရိုက်ဝင်မပါဘဲ လွှဲပေးထားလိုက်သော သင်္ကြန်လိုကိစ္စမျိုးတွင် ပြည်နယ်/တိုင်း အစိုးရများအကြား အယူအဆ၊ စီမံခန့်ခွဲမှုစွမ်းရည်၊ တီထွင်ဖန်တီးနိုင်စွမ်းသည် လယ်ပြင်ဆင်သွားသလို ထင်ရှားသွားသည်။ အထူးသဖြင့် မြို့တော်ဟောင်း နှစ်မြို့ကို အခြေခံထားသည့် ရန်ကုန်နှင့် မန္တလေးတို့တွင် မြင်ရသည်။ 

မြန်မာ့ရိုးရာသင်္ကြန်ကို ရိုးရာလည်းမပျက် ခေတ်နှင့်လည်း ညီစေဟု အစွန်းမလွတ်၊ ချမ်းသာဆင်းရဲမရွေး စုံစုံလင်လင်ပျော်နိုင်၊ တီထွင်ဖန်တီးမှုများနှင့် စည်စည်ကားကား သိုက်သိုက်မြိုက်မြိုက် ဖြစ်စေပြီး မန္တလေး၏ဂုဏ်နှင့် မြန်မာ့သင်္ကြန်၏ ဂုဏ်ကိုလည်း မြင့်တက်အောင် ငွေကုန်ကြေးကျလည်း သိပ်မများစေဘဲ စီမံခန့်ခွဲပေးနိုင်သော မန္တလေးတိုင်းဒေသကြီး အစိုးရနှင့် မန္တလေးမြို့တော် စည်ပင်သာယာရေးကော်မတီတို့၏ စွမ်းဆောင်ရည်ကို ဂုဏ်ပြုပါသည်။ အကယ်၍ ပြည်ထောင်စုအဆင့်ကသာ တိုက်ရိုက်ကွပ်ကဲလျှင် ယခုလိုမျိုး လှလှပပ ထွက်ပါ့မည်လား ဆိုသည် မတွေးချင်ဘဲ တွေးရသည်။ 

ရိုးရာသင်္ကြန်ရသလည်း မပျောက်၊ ၂၁ ရာစု ခေတ်သဘောလည်းပါစေ တွေ့ရသည်။ အစိုးရက ကိုယ်တိုင်လုပ်ခြင်းထက် မြို့သူမြို့သားများကို ဖန်တီးခွင့်များ ပေးလိုက်သည့်အခါ ပန်းရောင်စုံ ပွင့်သလို အဖူးအပွင့်များ မြင်ရသည်။ မန္တလေးသင်္ကြန်တွင် သင်္ကြန်ပွဲတော် ကျင်းပရုံသာမက မြန်မာ့ယဉ်ကျေးမှု၊ မန္တလေးမှသည် ကမ္ဘာပတ်ရန် ကြိုးစားနေသည့်  မန္တလေးအခြေစိုက် လုပ်ငန်းအချို့တို့ကိုပါ စင်တင်ခဲ့သည်ကို တွေ့ရသည်။ အဖုအထစ်အချို့ ထွက်ပေါ်လာခဲ့သော်လည်း အချိန်မီ ပြင်လိုက်နိုင်သည့်အတွက် မန္တလေးသင်္ကြန်ပွဲတော်ကို ချီးကျူးမိသည်။ မန္တလေးအစိုးရ ထိပ်ပိုင်းခေါင်းဆောင်များသည် သူတို့ကိုယ်တိုင် ဦးနှောက်ကောင်းခြင်းက တစ်ပိုင်း၊ ဦးနှောက်ကောင်းသူများကို ရဲရဲခေါ်သုံးဝံ့၊ ခေါ်သုံးနိုင်ခြင်းကြောင့်တစ်ဖုံ၊ ပြည်သူလူထု စီးပွားရေး လုပ်ငန်းရှင် အကြံဉာဏ် အမျိုးမျိုးကို နားထောင်ဆောင်ရွက်နိုင်ခြင်းကြောင့် တစ်နည်း ယခုရလဒ်မျိုး ဖော်ထုတ်နိုင်ခြင်းဟု တွက်မိသည်။  

ယဉ်ကျေးမှု ဆိုသည် အစိုးရကိုယ်တိုင်က ‘တဟဲ့ဟဲ့’ နှင့် ထိန်းကြသိမ်းကြဟု ပြောနေရလျှင် မည်သို့မျှ မရှင်သန်နိုင်။ တစ်ဖန် ယဉ်ကျေးမှု ဆိုသည် အသေမဟုတ်၊ ရှင်သန်ပြောင်းလဲနေသည်။ ထို့ကြောင့် လူတွေကိုယ်တိုင် တကူးတက မဟုတ်ဘဲ အလိုလိုထိန်းသိမ်း ဖြစ်အောင် လမ်းကြောင်းပေးနိုင်လျှင် အကောင်းဆုံး။ မန္တလေးသင်္ကြန်သည် ထိုလမ်းကြောင်းကို သွားနေသည်။ လူအများ၏ စိတ်ကောင်းစေတနာ၊ မြန်မာ့ဟန်ပန်နှင့် ကုန်ကျစရိတ် သိပ်မများဘဲ အယုတ်၊ အလတ်၊ အမြတ်မရွေး ပျော်နိုင်အောင် ဖန်တီးပေးထားခြင်း တွေ့ရသည်။ မန္တလေးသာ ယခုအရှိန်အတိုင်း ဆက်သွားလျှင် သိပ်မကြာသော ကာလအတွင်း မန်းသင်္ကြန်ဆိုပြီး နိုင်ငံတကာတွင် ကျော်ကြားလာနိုင်သည်။ 

တစ်ဖက်တွင် ရန်ကုန်သည် မြန်မာတစ်နိုင်ငံလုံးမှ အရင်းအမြစ်များ လာစုနေသည့် မြို့ဖြစ်သော်လည်း မန္တလေးကဲ့သို့ ‘ဟာခနဲ၊ ဟင်ခနဲ’ ဖြစ်အောင် မဖန်တီးနိုင်ခဲ့။ အရင်းအမြစ် အဓိကလား၊ ရှိသမျှကို စုစည်းပြီး လမ်းကြောင်းဖော်ပေးနိုင်ခြင်းက အဓိကလား ဆိုသည် ရန်ကုန်နှင့် မန္တလေးက သက်သေဖြစ်သည်။ ယင်းသည် သင်္ကြန်ဆိုသော သုံးလေးရက်စာသာ ရှိသည်။ နိုင်ငံကို ပြောင်းသွားစေမယ့် မူဝါဒများဆိုလျှင် မည်သို့ရှိမလဲ။ မေးစရာ။ သင်္ကြန်လိုလည်း မျက်မြင်တွေ့ရန် ခက်သည်။ 

မန္တလေးသင်္ကြန်တွင် မြို့တော်ဝန်၏ အခန်းကဏ္ဍကို မြင်ရသည်။ ယင်းသို့ မြင်ရခြင်းသည် မြို့တော်ဝန်၏ လုပ်ရည်ကိုင်ရည်ကြောင့် သာမက မန္တလေး ဝန်ကြီးချုပ်၏ အမြော်အမြင်ကြီးခြင်းကြောင့် ဖြစ်သည်။ မြို့တော်ဝန်နှင့် ယှဉ်ပြိုင်ရန် မလိုကြောင်း ဝန်ကြီးချုပ် သိသည်။ မြို့တော်ဝန် ဆောင်ရွက်၍ မန္တလေးမြို့ အောင်မြင်လျှင် ဝန်ကြီးချုပ်၏ အောင်မြင်မှုပင် ဖြစ်နေသည် မဟုတ်ပါလား။

မန္တလေးသင်္ကြန်ကိုကြည့်ရင်း နိုင်ငံအုပ်ချုပ်ရေး ရှုထောင့်မှ တွေးမိပြန်သည်။ ရန်ကုန်နှင့် မန္တလေးသည် ရန်ကုန်သား၊ မန္တလေးသားများနှင့်သာ ဆိုင်သည်မဟုတ်။ တစ်နိုင်ငံလုံးနှင့် ဆိုင်သည်။ ထိုမြို့ကြီးနှစ်မြို့ မှန်မှန်ကန်ကန် ဖွံ့ဖြိုးပါမှ မြန်မာတစ်နိုင်ငံလုံး ဖွံ့ဖြိုးရေးကို တွန်းအားပေးနိုင်မည်။ နောင်တက်မည့် ပြည်ထောင်စုအစိုးရ အဆက်ဆက်သည် တိုင်းဒေသကြီး ဝန်ကြီးချုပ်များကို တိုက်ရိုက်ရွေးချယ်ခန့်ထားရာ တော်လည်းတော်၊ ကောင်းလည်းကောင်းသော သူများကို ရန်ကုန်နှင့် မန္တလေးတွင် ဝန်ကြီးချုပ်အဖြစ် ခန့်အပ်ရန် အရေးကြီးလှသည်။ တော်သူကောင်းသူ ဆိုရာတွင်လည်း သာမန်အဆင့်တော်သူ ကောင်းသူ မဟုတ်ဘဲ ပညာရည်မြင့် ၂၁ ရာစုအမြင် ရှိပြီး အကျင့်သိက္ခာထိပ်တန်း ဆိုသော သူများကို ရွေးချယ်ရန် အရေးကြီးလှသည်။ 

နောက်တစ်ခု ရှိသေးသည်။ မြို့တော်ဝန်များသည် ရန်ကုန်၊ မန္တလေး မြို့ကြီးနှစ်မြို့အတွက် အရေးပါလှသောပုဂ္ဂိုလ်များ ဖြစ်ရာ မြို့တော်ဝန်ကို ပြည်သူက တိုက်ရိုက်ရွေးကောက်ပြီး ဝန်ကြီးချုပ်ကိုသာ သမ္မတက တိုက်ရိုက်ခန့်ခြင်းမျိုးဆို ပိုကောင်းမည်။ သို့မှ တစ်ယောက်မဟန်လျှင် တစ်ယောက်ကျန်မည်ဟု ထင်မိသည်။ နောင်အလျဉ်းသင့်လျှင် အကျယ်ရေးပါဦးမည်။

“ဆိုင်ရာမြို့သူ မြို့သားများ အကျိုးသာမက ပြည်ထောင်စုတစ်ခုလုံး အကျိုးကို ရန်ကုန်နှင့် မန္တလေးတို့ ဆောင်နိုင်ပါစေ” ဟု မြန်မာ့ နှစ်သစ်တွင် ဆုမွန်ကောင်း တောင်းလိုက်ရပါသည်။ 

ဇေယျသူ

ABOUT AUTHOR

(ဇေယျသူ)