News

POST TYPE

OPINION

အပြောင်းအလဲအတွက် အုပ်ချုပ်ရေး ဝန်ထမ်းကောင်းများ လိုပါသည်
01-Jul-2016

နိုင်ငံတစ်နိုင်ငံ ဖွံ့ဖြိုးတိုးတက်ရေး အတွက် ကောင်းမွန်တဲ့ အုပ်ချုပ်ရေးစနစ် လိုအပ်ပါတယ်။ အခုအချိန်က ဒီမိုကရေစီစနစ်လို့သာ ပြောရတာပါ တကယ်ကို ပျိုမျစ် နုနယ်ငယ်ရွယ်တဲ့ အချိန်အခါပဲ ရှိပါသေးတယ်။ ထို့ကြောင့် နုနယ်တဲ့ ဒီမိုကရေစီစနစ်ကို ရင့်ကျက်တည်ငြိမ်ပြီး ဖွံ့ဖြိုးတိုးတက် စေဖို့အတွက် ကောင်းမွန်ထက်မြက် သွက်လက်ပြီး တာဝန်ယူ တာဝန်ခံမယ့် ဝန်ထမ်းတွေ လိုအပ်ပါတယ်။ ဒီမိုကရေစီစနစ် ကျင့်သုံးနေသည့်အတွက် စနစ်နဲ့ကိုက်ညီတဲ့ ခိုင်မာ ကောင်းမွန်တဲ့ ဗျူရိုကရေစီ ယန္တရားလည်း လိုအပ်ပါတယ်ဗျာ။

မြန်မာနိုင်ငံမှာက စနစ်အမျိုးမျိုး၊ ခေတ်အမျိုးမျိုးနဲ့ အုပ်စိုးသူအမျိုးမျိုးတို့ကို ကြုံတွေ့ခဲ့ရပါတယ်။ မြန်မာဘုရင်တွေ အုပ်စိုးခဲ့စဉ်ကတော့ ဝန်ထမ်းအဖွဲ့အစည်းလို့ ပြောရမယ့် မင်းမှုထမ်း အရာရှိတွေကို စာတော်ပြန်ပွဲလို့ခေါ်တဲ့ စာမေးပွဲတွေ ဖြေစေကာ ရွေးချယ် ခန့်အပ်ခဲ့ပါတယ်။ သူတို့တွေက ဥပဒေကျမ်းတွေ၊ လျှောက်ထုံးတွေ၊ ဖြတ်ထုံးတွေ၊ စာပေ၊ ဂီတ၊ ဗေဒင် စတဲ့ ပညာတွေသာ မက မြင်းစီးအတတ်၊ လက်ဝှေ့အတတ်၊ သိုင်းအတတ်၊ ဓားခုတ်လှံထိုး စတဲ့ အတတ်တွေပါ ထူးချွန်သူတွေ ဖြစ်ခဲ့ပါတယ်။

အင်္ဂလိပ်ကိုလိုနီခေတ်ကို ရောက်တဲ့ အခါကျတော့လည်း အင်္ဂလိပ်တို့ရဲ့အုပ်ချုပ်မှုပုံစံဖြင့် ဝန်ထမ်း အဖွဲ့အစည်းတွေကို ဗျူရိုကရက်အုပ်ချုပ်ရေးပုံစံ သွတ်သွင်းခဲ့ပါတယ်။ တက္ကသိုလ်မှ ဘွဲ့ရထူးချွန်သူတွေ ကို ICS (India Civil Service) အိန္ဒိယ ပဋိညာဉ်ခံဝန်ထမ်းလို့ ခေါ်ရမယ့် စာမေးပွဲတွေ ဝင်ရောက်ဖြေဆိုစေပြီး အောင်မြင်သူများကို အင်္ဂလန်အောက်စဖို့စ်တက္ကသိုလ်သို့ ၂နှစ်တက်ရောက်စေပြီး ဝန်ထမ်းအဖြစ် ခန့်အပ် တာဝန်ပေးခဲ့ကြပါတယ်။ မြန်မာ့ နယ်ပယ်မှာ ထင်ရှားခဲ့တဲ့ စာရေးဆရာ သိပ္ပံမောင်ဝတို့၊ ICS ဦးတင်ထွဋ်တို့ ဖြစ်ကြပါတယ်ဗျာ။

လွတ်လပ်ရေးရပြီးနောက် ၁၉၇၂ ခုနှစ်လောက်အထိကို အဆိုပါဝန်ထမ်း တွေနဲ့ပဲ တိုင်းပြည်ကို အုပ်ချုပ်ခဲ့ကြပါတယ်။ ဒါပေမဲ့ ၁၉၇၂ ခုနှစ် မဆလလို့ ခေါ်တဲ့ မြန်မာ့ဆိုရှယ်လစ် လမ်းစဉ်ပါတီခေတ်မှာ ကျတော့ အဆိုပါဝန်ထမ်းတွေကို ဗျူရိုကရက်တွေ ဟုဆိုကာ ပြည်သူ့အုပ်ချုပ်ရေး အမည်ခံ ပါတီကောင်စီတွေနဲ့ အစားထိုးခဲ့ကြပါတယ်။ တကယ်တော့ ထိုပြည်သူ့အုပ်ချုပ်ရေး အမည်ခံ ပြည်သူ့ကောင်စီက ပုဂ္ဂိုလ်တို့သည် လုပ်ငန်းကျွမ်းကျင်မှု မရှိဘူး၊ တာဝန်ယူ တာဝန်ခံနိုင်သည့် အနေအထား မရှိခဲ့ဘူးဆိုတာ အားလုံးအသိပါပဲဗျာ။

၁၉၈၈ နောက်ပိုင်း စစ်တပ်မှ အာဏာ သိမ်းပြီးသည့်နောက်ပိုင်း ဝန်ထမ်းအဖွဲ့အစည်း တော်တော်များများမှာ တပ်က အရာရှိတွေ ဝင်ရောက်လာကြပါတယ်။ ဒေသန္တရ အုပ်ချုပ်ရေးယန္တရားမှာ အဓိက နေရာယူထားတဲ့ ထွေ/အုပ်လို့ခေါ်တဲ့ အထွေထွေအုပ်ချုပ်ရေး ဦးစီးဌာနရဲ့ အရာထမ်း အဆင့်ဆင့်က တပ်မတော်အရာရှိတွေ ဖြစ်လာကြပါတယ်။ သူတို့တွေရဲ့ နယ်ဘက် အုပ်ချုပ်ရေးလုပ်ငန်းမှာ မကျွမ်းကျင်မှု Rules and Regulations လို့ခေါ်ရမယ့် ဥပဒေတွေ၊ စည်းမျဉ်းတွေနဲ့ လုပ်ရမယ်နေရာတွေမှာ Command တွေ၊ Order တွေ စတဲ့ အမိန့်ပေးစနစ်တွေကြောင့် အစိုးရရဲ့ အုပ်ချုပ်ရေးယန္တရားကြီးက ပြည်သူတွေကြားထဲမှာ နာမည်ပျက် နာမည်ဆိုးတွေနဲ့ လက်ညှိုးထိုးစရာ ဖြစ်လာပါတယ်။ အထူးသဖြင့် အုပ်ချုပ်ရေးအဖွဲ့ဖြစ်တဲ့ အထွေထွေအုပ်ချုပ်ရေး ဦးစီးဌာန ဖြစ်ပါတယ်။

တကယ်တော့ ခိုင်မာတောင့်တင်းတဲ့ ဝန်ထမ်းအဖွဲ့အစည်း၊ အရည်အချင်းပြည့်ဝတဲ့ ဝန်ထမ်းအဖွဲ့အစည်း ရှိနေမယ်ဆိုရင် အစိုးရ အဆက်ဆက်အတွက် အထောက်အကူ ဖြစ်စေမှာပါ။ အခုလို ပါတီစုံဒီမိုကရေစီစနစ်မှာ ဆိုရင် ပိုပြီးလိုအပ်ပါတယ်။ ဘာဖြစ်လို့လဲ ဆိုတော့ အစိုးရဆိုတာ အရင်လို တစ်ဦးတစ်ယောက် တစ်ပါတီအာဏာရှင် မဟုတ်ဘဲ ပြောင်းလဲနေမှာ ဖြစ်လို့ပါ။ ဒါကြောင့် အုပ်ချုပ်ရေးအဖွဲ့ အဆင့်ဆင့်က ဝန်ထမ်းတွေ အနေနဲ့ အရည်အချင်းပြည့်ဝပြီး မိမိတာဝန် တွေကို ကျေပွန်ဖို့ လိုပါတယ်။ ပြည်သူတွေ အပေါ်လည်း အရင်ခေတ်တွေကလို ဆက်ဆံလို့ မရတော့ဘူးဆိုတာ နားလည်ဖို့လည်း လိုပါတယ်။

နောက်အခြေခံအကျဆုံး အုပ်ချုပ်ရေးအဖွဲ့အစည်းတွေ ဖြစ်တဲ့ ရပ်ကွက်/ ကျေးရွာ အုပ်ချုပ်ရေးအဖွဲ့တွေပါ။ ရပ်ကွက်/ကျေးရွာ အုပ်ချုပ်ရေးမှူးတွေကို ပြည်သူတွေက ရွေးချယ်တဲ့စနစ် ဖြစ်ပါတယ်။ ဒါပေမဲ့ အခုအချိန်အထိ ပြဿနာတွေရှိနေဆဲပါ။ နောက်ပြီး ရပ်ကွက်/ကျေးရွာ အုပ်ချုပ်ရေးမှူးတွေ အနေနဲ့ သူတို့ရဲ့ အဓိကလုပ်ငန်း တာဝန်တွေကို လေ့လာထားသင့်ပါတယ်။ ရပ်ရွာနေပြည်သူတွေရဲ့ အကျိုးကို ဖော်ဆောင်ဖို့ ရွေးချယ်ထားတယ် ဆိုတာကို သိဖို့လိုပါတယ်။ ဒါပေမဲ့ အခုအချိန်ထိ ရပ်ကွက်နဲ့ ကျေးရွာအုပ်ချုပ်ရေးမှူး တော်တော်များများက ပြည်သူနဲ့ သဟဇာတမဖြစ်သေးဘူး ဆိုတဲ့သတင်းတွေသာ ကြားနေရပါတယ်ဗျာ။

တကယ်တော့ အစိုးရဘယ်လောက် ကောင်းကောင်း တကယ့်တာဝန်ယူ အကောင် အထည်ဖော်နေရတဲ့ ဝန်ထမ်းအဆင့်ဆင့် တွေက မိမိတို့ထမ်းဆောင်ရမယ့် တာဝန် ဝတ္တရားတွေ၊ လိုက်နာရမယ့် ဥပဒေ၊ နည်းဥပဒေတွေ၊ စည်းမျဉ်းစည်းကမ်း တွေကို သိရှိလိုက်နာမှ အစိုးရရဲ့ ရည်ရွယ်ချက်တွေ၊ ရည်မှန်းချက်တွေ အောင်မြင်နိုင်မှာ ဖြစ်ပါတယ်။ ဒါကြောင့် ဗျူရိုကရေစီယန္တရားမှာ အဓိက တာဝန်ရှိတဲ့သူတွေကတော့ ဝန်ထမ်းတွေပဲ ဖြစ်ပါတယ်။

အပြောင်းအလဲ အချိန်အခါလို့ပြောရမယ့် အခုလို ပြည်သူက အမှန်တကယ်ရွေး ချယ်ထားတဲ့ အစိုးရအတွက် အဓိက တာဝန်ရှိတဲ့ အဖွဲ့အစည်းကတော့ အစိုးရရဲ့ အုပ်ချုပ်ရေးစနစ်ကို အကောင်အထည်ဖော်မယ့် အထွေထွေအုပ်ချုပ်ရေး ဦးစီးဌာနရဲ့ အဆင့်ဆင့်သော ဝန်ထမ်းတွေနဲ့ ရပ်ကွက်/ ကျေးရွာ အုပ်ချုပ်ရေးမှူးတွေရဲ့ အရည်အချင်းတွေနဲ့ ပြည်သူတွေအပေါ်ထားတဲ့ စေတနာတွေသာ မှန်ကန်မယ်ဆိုရင် မြန်မာနိုင်ငံ သည်လည်း ပြည်သူအားလုံး မျှော်လင့် တောင်းတနေသလို တိုးတက်သာယာတဲ့ တိုင်းပြည် ဖြစ်လာမှာ ဖြစ်ပါတယ်ဗျာ။

ထွဏ်းထွဏ်း (သင်္ဃန်းကျွန်း)