News

POST TYPE

OPINION

ဟောင်ကောင် ဒီမိုကရေစီသင်ခန်းစာ (Daily, Vol-7/No-113)
20-Aug-2019
မြန်မာနိုင်ငံသားများ သွားရောက်လည်ပတ်ကြသလို မြန်မာကျောင်းသားအချို့ သွားရောက်ပညာလေ့လာ ဆည်းပူးရာလည်းဖြစ်သည့် ဟောင်ကောင်ကျွန်းတွင် လတ်တလော ဖြစ်ပေါ်နေသည့် ဆန္ဒပြပွဲများ အတောမသတ်နိုင်ဘဲ ဖြစ်နေရုံမျှမက ဟောင်ကောင်၏ တည်ငြိမ်အေးချမ်းမှုကိုပါ ခြိမ်းခြောက်သည့်အနေအထားသို့ ရောက်ရှိနေသည်ကို နိုင်ငံတကာသတင်း စိတ်ဝင်စားသော စာဖတ်သူများ သိကြလိမ့်မည်ဟု ထင်ပါသည်။

တရားခံလွှဲပြောင်းရေး ဥပဒေကြမ်းတစ်ရပ်ဖျက်သိမ်းရန် အစချီခဲ့ရာမှ ယခုအခါ ဟောင်ကောင်ပြည်သူများ မနှစ်မြို့သည့် ယင်းဥပဒေကိစ္စမရှိတော့သော်လည်း ဆန္ဒပြမှုများမှာ အဆုံးမသတ်နိုင်သေး။

အများပြည်သူဆိုင်ရာ သယ်ယူပို့ဆောင်ရေးနှင့်ဆိုင်သော မီးရထား၊ ဘတ်စ်ကားသာမက လေယာဉ်ပျံများပါ ပြေးဆွဲမရနိုင်သည်အထိ ကားလမ်း၊ ဘူတာရုံနှင့် လေဆိပ်များကိုပါ ပိတ်ဆို့ဆန္ဒပြခဲ့ကြရာ နောက်ဆုံးတွင် အဆိုပါ သမိုင်းဝင်ဆန္ဒပြမှုကြီးနှင့်ပတ်သက်၍ ပြည်သူများအကြား သဘောထားကွဲလွဲသည်အထိ ဖြစ်သွားပေသည်။

ပိုဆိုးသည်မှာ အစပိုင်းတွင် ငြိမ်းချမ်းစွာ ချီတက်ဆန္ဒပြခြင်းဟု စတင်ခဲ့သော်လည်း နောက်ပိုင်းတွင် ရဲများကို ဆန္ဒပြမှုတွင် ပူးပေါင်းပါဝင်လိုသည့်ဆန္ဒမရှိသော အခြား ဟောင်ကောင်မြို့တွင်း သွားလာသူများနှင့် တိုက်ခိုက်ရန်ဖြစ်ကြ၊ ရဲများနှင့် ထိပ်တိုက် ပဋိပက္ခဖြစ်ကြရာမှ ဆူပူအကြမ်းဖက်သည့် ပုံစံမျိုးကြီးဖြစ်လာခြင်းပင်။ ဟောင်ကောင်ရဲတပ်ဖွဲ့၏ တုံ့ပြန်ပုံများကို ထောက်ခံအားပေးသည့် ပြည်သူများပင် အမြောက်အမြား ရှိလာပေသည်။

ဟောင်ကောင်သည် တရုတ်ပြည်မကြီးလက်အောက်တွင်ရှိသော်လည်း တရုတ်ပြည်မကြီးနှင့်နှိုင်းယှဉ်ပါက ဒီမိုကရေစီနှင့် လွတ်လပ်မှုများ ပိုမိုရရှိထားသည်မှာ အားလုံးအသိပင်ဖြစ်သော်လည်း ယခုလို တည်ငြိမ်အေးချမ်းမှုကို ပျက်ပြားစေမည့်ပုံစံမျိုးဖြစ်လာသည်အထိ ဆန္ဒပြလာကြသည်ကို အခြားဒီမိုကရေစီနိုင်ငံများနှင့် လွတ်လပ်ခွင့်ရှိသော လူ့အဖွဲ့အစည်းများကပင် အံ့ဩကြရသည်မှာ အမှန်ပင် ဖြစ်ပေသည်။

လူထုအကျိုးစီးပွားနှင့် လူထုဆန္ဒကိုသာ ရှေ့တန်းတင် ဦးစားပေးသည့်စနစ်မှာ ဒီမိုကရေစီဖြစ်သည်ဟု ဆိုနိုင်သော်လည်း သမိုင်းစာအုပ်ထဲရေးထားသလို ဒီမိုကရေစီစနစ် စတင်ပေါ်ထွန်းခါစကလို ပြည်သူ၏ဆန္ဒသဘောထားကို ပြည်သူက တိုက်ရိုက်ဖော်ပြခွင့်ရှိသည့် Direct Democracy (တိုက်ရိုက်ဒီမိုကရေစီ)မျိုး မဟုတ်ဘဲ ပြည်သူ့လွှတ်တော်ကိုယ်စားလှယ်များမှတစ်ဆင့် ဆန္ဒထုတ်ဖော်ကြရသည့် ကိုယ်စားပြု ဒီမိုကရေစီမျိုးဖြစ်သည်ကို ယနေ့ခေတ် ဒီမိုကရေစီဖော်ဆောင်နေသော နိုင်ငံများမှ ပြည်သူများ နားလည်ရန် အထူးအရေးကြီးသည်ဟု ထင်ပါသည်။

နိုင်ငံရေးတွင် “ပြည်သူ အမြဲမှန်သည်၊ ပြည်သူ့ဘက်က ရပ်တည်”ဆိုသည့် သတိပေးစကားတစ်ခွန်းရှိသည်ကို နိုင်ငံရေးစိတ်ဝင်စားသူများ မကြားချင်မှ အဆုံးဖြစ်ပေလိမ့်မည်။ သို့သော် ပြည်သူ့ (လူထု)ဆန္ဒများ အကောင်အထည်ဖော်ရေးအတွက် ဖွဲ့စည်းထားသော လွှတ်တော်များ ကွန်ဂရက်များကို အသုံးမပြုဘဲ လွှတ်တော်ပြင်ပမှ တကယ့်ပြည်သူများ၏ အင်အားကိုချည်း တရားလွန်အားကိုးနေမည်ဆိုပါက ပြည်သူသာ တန်ပြန် အခက်တွေ့နိုင်သည် ဆိုသောအချက်မှာ သတိပြုစရာ ကောင်းလှပေသည်။

ဒီမိုကရေစီနိုင်ငံရေးစနစ်နှင့် သူစိမ်းသဖွယ်ဖြစ်ခဲ့သော မြန်မာနိုင်ငံအနေနှင့်မူ အသွင်ကူးပြောင်းရေးဟူသည့် လမ်းမပေါ်သို့ တက်ရောက်သွားနိုင်ပြီဖြစ်သော်လည်း ဒီမိုကရေစီ စံချိန်စံနှုန်းများ ထွန်းကားသည့် လူ့အဖွဲ့အစည်းနှင့် နိုင်ငံတစ်ရပ်သို့ ရောက်ရှိရန် ခရီးရှည်ကြီး မောင်းနှင်ကြရဦးမည်ဖြစ်ရာ ရှေ့ကသွားနေသည့် ဒီမိုကရေစီနိုင်ငံများနှင့် လူ့အဖွဲ့အစည်းများ၏ အဖြစ်သနစ်များကို ကောင်းစွာ သင်ခန်းစာယူကာ လမ်းမချော်သွားအောင် သတိကြီးစွာဖြင့် မောင်းနှင်ကြရမည်ဖြစ်ကြောင်း သတိပေးလိုရင်းဖြစ်ပေသည်။

အယ်ဒီတာ (၂၀-၈-၂၀၁၉)