POST TYPE

OPINION

မြန်မာ့ဆန် ရွှေပေါ် မြတင်အဆင့် ရောက်ရှိရေး (Daily, Vol-7/No-10)
23-Apr-2019

မကြာသေးခင်က အာဖရိကဒေသမှ အိုင်ဗရီကို့စ်နိုင်ငံက မြန်မာနိုင်ငံက တင်ပို့သော ဆန်တန်ချိန် သောင်းဂဏန်းကို အန္တရာယ်ရှိသည့် စားသောက်ကုန်အဖြစ်သတ်မှတ်ကာ လူသိရှင်ကြား ဖျက်ဆီးပြလိုက်မှုကြောင့် မြန်မာ့ဆန်လောက တိုးတက်ဖွံ့ဖြိုးရေးနှင့်ပတ်သက်၍ မေးခွန်းထုတ်စရာ၊ စောဒကတက်စရာ အမြောက်အမြား ဖြစ်ပေါ်သွားခဲ့ရပေသည်။

ယင်းသတင်း မှန်သည် မှားသည်၊ ဖြစ်နိုင် မဖြစ်နိုင် စသည်ဖြင့် ထင်ကြေးပေး ပြောဆိုမှုအမျိုးမျိုး မည်သို့ပင်ထွက်ပေါ်နေစေကာမူ အဆိုပါဆန်များကို ချောက်တစ်ခုထဲသို့သွန်ချပြီး မြေကြီးထိုးကားကြီးဖြင့် ဖုံးပြလိုက်သော သတင်းနှင့်ဓာတ်ပုံများသည် စိုက်ပျိုးထုတ်လုပ်ခဲ့သည့် မြန်မာနိုင်ငံမှ တောင်သူကြီးများနှင့် ဆန်လုပ်ငန်းရှင်များကို ဂုဏ်သိက္ခာပိုင်း ရိုက်ချိုးလိုက်သလိုမျိုး ဖြစ်သွားစေခဲ့သည်။ 

ယခင် ပြည်ပသို့ ဆန်တင်ပို့ခဲ့သည့် သမိုင်းတစ်လျှောက်တွင် အရည်အသွေးကိစ္စနှင့်ပတ်သက်၍ ပြဿနာများရှိခဲ့သော်လည်း ယခုကဲ့သို့ ဘိန်းနှင့် မူးယစ်ဆေးဝါးများ ဖျက်ဆီးပြသလို မြန်မာ့ဆန်များအား ဖျက်ဆီးပြခြင်းမျိုးသည် ကြုံတောင့်ကြုံခဲကိစ္စပင်ဖြစ်သည်။

အဆိုပါကိစ္စနှင့်တစ်ဆက်တည်းပင် ဆန်ကုန်သည်ကြီးများ၏ ဆုံးရှုံးနစ်နာမှု၊ ပို့ကုန်ဈေးကွက် အလားအလာ၊ ပြည်တွင်း ဆန်စပါးဈေး အတက်အကျ၊ စပါးစိုက်တောင်သူကြီးများ၏ အနာဂတ် အစရှိသည်တို့မှာ အစိုးရရော၊ ဆန်စပါးလုပ်ငန်းနှင့် သက်ဆိုင်သည့်အသင်းအဖွဲ့များမှ တာဝန်ရှိသူများအနေနှင့် မဖြစ်မနေ လေ့လာဆန်းစစ်ကြည့်ကြရမည်ဖြစ်ပေသည်။

ယခုဖြစ်ရပ်ကို ဆန်စပါးကုန်သည်ကြီးအချို့က “ဂိမ်းတစ်ခု”သာဖြစ်သည်ဟု မည်သို့ပင် သတ်မှတ်ပြောဆိုနေစေကာမူ နောက်နောင် ယင်းဂိမ်းမျိုးထဲတွင် မြန်မာ့ဆန်လောက မရှုံးနိမ့်စေရန် ဝိုင်းဝန်းကြံဆကြရမည်သာ ဖြစ်သည်။ အကြောင်းမှာ လယ်ယာစိုက်ပျိုးရေးနိုင်ငံဖြစ်သည့် မြန်မာပြည်တွင် မြန်မာ့ဆန်ဟူသည် နိုင်ငံစီးပွားရေးအတွက်ရော အမျိုးသားရေး ဂုဏ်သိက္ခာပိုင်းအတွက်ပါ အရေးကြီးသည့် ထုတ်ကုန်တစ်ခု ဖြစ်နေသောကြောင့်ပင်။

ထို့ပြင် ယခုကိစ္စသည် သာမန် သွေးရိုးသားရိုး ဖြစ်လေ့ဖြစ်ထရှိသည့် ပြဿနာမျိုးလော၊ သို့မဟုတ် ဆန်အရည်အသွေး ကိစ္စတစ်ခုတည်းသာမက နိုင်ငံရေး၊ စီးပွားရေးဆိုင်ရာ အမြတ်ထုတ်လိုမှုများကြောင့်လောဆိုသည်ကို အစိုးရကိုယ်တိုင် ဦးဆောင်ကာ ဝင်ရောက်ဖြေရှင်းပေးသင့်ပေသည်။

လက်ရှိ အနေအထားတွင် ဆန်တင်ပို့သည့် နိုင်ငံများအချင်းချင်း ဈေးကွက်ချင်းချဲ့ထွင်ရန် အပြိုင်အဆိုင် ကြိုးပမ်းလျက်ရှိသလို ကုန်သွယ်ရေး လက်တံရှည်သည့် နိုင်ငံအချို့နှင့် ကုန်သည်အသင်းအဖွဲ့ကြီးအချို့က ဈေးကွက်ကို စိတ်ကြိုက်ခြယ်လှယ်ရန် နည်းမျိုးစုံနှင့် ကြိုးပမ်းနေကြသည်ကိုလည်း အထူးသတိပြုကြရမည်ဖြစ်ပေသည်။

ထို့အတူ တစ်ဖက်တွင် မြန်မာနိုင်ငံ ဆန်စပါး သုတေသနအဖွဲ့ အပါအဝင် ဆန်စပါး စိုက်ပျိုးရေး ပညာရှင်များအနေနှင့် မြန်မာ့ဆန် အရည်အသွေး ကိစ္စအတွက် သုတေသနလုပ်ငန်းများကို အရှိန်မြှင့်တင်သင့်လှပေသည်။

မည်သို့ပင်ဖြစ်စေ ၂၀၁၅ ခုနှစ်နောက်ပိုင်းမှစ၍ ပြည်ပတင်ပို့မှုတွင် ပြန်လည်ဦးမော့လာသော မြန်မာ့ဆန်လောက ရေရှည်ဖွံ့ဖြိုးတိုးတက်ရေး၊ ဆန်စပါးစိုက်ပျိုးသူ တောင်သူကြီးများ အသက်ရှူချောင်နိုင်ရေး၊ ပြည်ပ တင်ပို့မှုလမ်းကြောင်းသစ်များ ထပ်မံ ပေါ်ပေါက်ရေးအတွက် ဝိုင်းဝန်းကြိုးပမ်းကြပါမည့်အကြောင်း ဖော်ပြလိုရင်းဖြစ်ပေသည်။

အယ်ဒီတာ (၂၂-၄-၂၀၁၉)