News

POST TYPE

OPINION

ဒီမိုကရေစီ ရေခံမြေခံများ မတည်ဆောက်နိုင်လျှင် (Daily, Vol-6/ No-161)
16-Oct-2018
မြန်မာနိုင်ငံ၏ လက်ရှိအခြေအနေသည် အာဏာရှင်စနစ်ထက်စာလျှင် ဒီမိုကရေစီ အသွင်ကူးပြောင်းရေးလုပ်ငန်းစဉ်များ ထိုက်သင့်သလောက် အကောင်အထည်ဖော်လာနိုင်ခဲ့ပြီဟု ဆိုနိုင်လင့်ကစား အများမျှော်လင့်ထားသည်နှင့် ကွာဟချက်များ ရှိနေပေသည်။

အတိတ်က ဒီမိုကရေစီလှုပ်ရှားတောင်းဆိုမှုများတွင် ဦးဆောင်ခဲ့သည့် အာဏာရပါတီကိုယ်၌သည်ပင်လျှင် ပါတီတွင်း ဒီမိုကရေစီနှင့်ပတ်သက်၍သော်လည်းကောင်း၊ ပါတီဝင် လွှတ်တော်ကိုယ်စားလှယ်များအပေါ် ပါတီ၏ထိန်းကျောင်းမှု နှင့်ပတ်သက်၍သော်လည်းကောင်း ရှိသင့်သည်ထက်ပိုများ၊ ပိုထိန်းချုပ်နေကြောင်း ဝေဖန်မှုများရှိနေပေသည်။

ထို့အပြင် ယခင်က ၎င်းတို့ အပြင်းအထန် ကန့်ကွက်ဆန့်ကျင်ခဲ့သော ဖွဲ့စည်းပုံအခြေခံဥပဒေ၏ ပေးထားချက်အရ ပြည်နယ်နှင့် တိုင်းဒေသကြီးလွှတ်တော်များ၊ အစိုးရများ၏ လုပ်ပိုင်ခွင့်များကိုပင် လွတ်လပ်စွာ လှုပ်ရှားဆောင်ရွက်ခွင့်မရသည့်အပြင် ယခင်အစိုးရထက်ပင် ပို၍ ဗဟိုထိန်းချုပ်မှုတင်းကျပ်လာသည့် သဘောတွေ့ရသည်။

ဥပမာအားဖြင့် ပြည်သူလူထုက တိုက်ရိုက်ရွေးကောက်တင်မြှောက်ခွင့်ကို ကန့်သတ်မထားသည့် မြို့တော်ဝန်နှင့် မြို့တော်စည်ပင်သာယာရေးကော်မတီဝင်များကိုပင် ယနေ့အချိန်အထိ နိုင်ငံတော်သမ္မတက တိုက်ရိုက်ခန့်ထားနေဆဲအခြေအနေမှာ မည်သည့်အာဏာကိုမျှ ခွဲဝေမပေးချင်သည့် သက်သေဖြစ်သည်။

မြန်မာနိုင်ငံတွင် မဏ္ဍိုင်သုံးခုသာရှိကြောင်း၊ အခြားမဏ္ဍိုင်များနှင့် တန်းမညှိစေလိုကြောင်း အစရှိသော မှတ်ချက်စကားများကို နိုင်ငံတော်အတိုင်ပင်ခံကိုယ်တိုင်နှင့် ပြည်နယ်၊ တိုင်းဒေသကြီးဝန်ကြီးချုပ်အချို့ကိုယ်တိုင် တရားဝင်ထုတ်ဖော်မှတ်ချက်ပြုခြင်း၊ ပြည်သူ့ဘဏ္ဍာ၊ ရိက္ခာအသုံးပြုထားသည့် နိုင်ငံပိုင်အစိုးရအာဘော် မီဒီယာများ ဆက်လက်ထားရှိခြင်းတို့သည်လည်း စတုတ္ထမဏ္ဍိုင်ကို အသိအမှတ်မပြုသည့်သဘောဖြစ်သည်။

ယခင် ဒီမိုကရေစီအရေး လှုပ်ရှားတိုက်ပွဲဝင်ခဲ့စဉ်က ၎င်းတို့အပေါ် အာဏာရှင် အစိုးရများက ဖိနှိပ်ကန့်သတ်လိုသောကြောင့် အသုံးပြုခဲ့သော ခေတ်နှင့် မလျော်၊ မတရားသည့် ဥပဒေဆိုး၊ ပုဒ်မဆိုးများကိုလည်း ယနေ့ ၎င်းတို့ကိုယ်တိုင် အစိုးရဖြစ်လာချိန်တွင် ၎င်းတို့အား ဝေဖန်ထောက်ပြသူ၊ ၎င်းတို့နှင့် အမြင်သဘောထားမတူညီသူများအပေါ် ဖိနှိပ်ကန့်သတ်ရန် ပြန်အသုံးချနေခြင်းမှာလည်း နားလည်နိုင်စရာမရှိပေ။

စင်စစ်အားဖြင့် လက်ရှိအာဏာရပါတီကို မြန်မာပြည်သူလူထုက တစ်ခဲတနက်မဲပေးထောက်ခံခဲ့ခြင်းသည် ယခင်အာဏာရှင်ဟောင်းများဖြင့် ဖွဲ့စည်းထားသည့် ပါတီအပေါ် အမုန်းစိတ်၊ လက်ရှိအာဏာရပါတီခေါင်းဆောင်အပေါ် ချစ်ခင်စိတ်နှင့် ဒီမိုကရေစီမျှော်လင့်ချက် အိပ်မက်များကြောင့်သာဖြစ်သည်။

နှစ်ပေါင်းများစွာ အာဏာရှင်စနစ်နှင့် ယင်းစနစ်၏ ဖွားဖက်တော် အကျင့်ပျက်ခြစားမှုများစွာကြောင့် နိုင်ငံကို နေချင်းညချင်း စံနှုန်းဒီမိုကရေစီနိုင်ငံအဖြစ် အသွင်မပြောင်းနိုင်ကြောင်း အားလုံးက နားလည်ထားကြသည်။ ထို့ကြောင့်ပင် အစိုးရလုပ်ကိုင်ဆောင်ရွက်သမျှ မည်မျှမှားယွင်းလွဲချော်မှုများ ရှိနေစေကာမူ လူအချို့က နည်းမျိုးစုံဖြင့် နားလည်ပေးကာ၊ ဝေဖန်ထောက်ပြမှုများကိုပင် ကိုယ့်ထမင်းကိုယ်စား အခမဲ့ကာကွယ်ဖေးမပေးနေကြခြင်းဖြစ်သည်။

သို့သော် ဒီမိုကရေစီခေါင်းစဉ်ဖြင့် အာဏာရလာသော လက်ရှိအစိုးရနှင့် လွှတ်တော်တို့ထံမှ အနိမ့်ဆုံးအဆင့်လုပ်ပေးသင့်သည့် ဒီမိုကရေစီ ရေခံမြေခံများကိုပင် မရရှိဘဲ အာဏာရှင်ဆန်သည့် စဉ်းစား၊ ပြောဆို၊ ချဉ်းကပ်၊ ကောက်ချက်ချ၊ လုပ်ကိုင်မှုများသာရှိနေပြီး အခြေခံဥပဒေက ခွင့်ပြုထားသော ဘောင်အတွင်းမှပင် ဒီမိုကရေစီဆန်သော အခြေခံမူဘောင်များ အစပျိုးတည်ဆောက်ရန်နှင့် အနိမ့်ဆုံးအဆင့် အာဏာရှင်ဆန်သော တင်းကျပ်၊ ကန့်သတ်မှုများကို ဖြေလျှော့ပေးရန်ပင် အရိပ်အယောင်မမြင်ရပေ။

ထိုအခြေအနေအတိုင်း ရှိနေသည်မှာ အချိန်ကြာလာသည်နှင့်အမျှ မြန်မာပြည်သူအများစုထံတွင် ဒီမိုကရေစီကိုပင် မယုံကြည်စိတ်၊ စိတ်ပျက်အားငယ်စိတ်၊ အားကိုးရာမဲ့စိတ်များဖြစ်ပေါ်ပြီး မိမိတို့ကျရာကဏ္ဍနယ်ပယ်အသီးသီးတွင် ပူးပေါင်းပါဝင်ကူညီဆောင်ရွက်မှုများ ကျဆင်းသွားကာ နိုင်ငံအတွက် များစွာရင်လေးစရာကောင်းလှကြောင်း သတိပြုစေလိုရင်းဖြစ်သည်။

အယ်ဒီတာ (၁၅ - ၁၀ -၂၀၁၈)