News

POST TYPE

OPINION

စတုတ္ထ စက်မှုတော်လှန်ရေးမှာ အသင့်ဖြစ်ပြီလား
19-Sep-2018

စတုတ္ထ စက်မှုတော်လှန်ရေးမှာ အသင့်ဖြစ်ပြီလား

ASEAN 4.0

ပြီးခဲ့သည့် စက်တင်ဘာလ ၁၁ ရက်မှ ၁၃ ရက်နေ့အထိ ဗီယက်နမ်နိုင်ငံ ဟနွိုင်းမြို့တွင် World Economic Forum on ASEAN အစည်းအဝေးတစ်ရပ်ကို ကျင်းပပြုလုပ်သွားခဲ့သည်။ အာဆီယံထိပ်သီးအစည်းအဝေး မဟုတ်သော်လည်း ထိုစီးပွားရေးဖိုရမ်သို့ အာဆီယံ ၁၀ နိုင်ငံမှ ခေါင်းဆောင်အားလုံး တက်ရောက်ခဲ့ပြီး အသီးသီး မိန့်ခွန်းများပြောကြားသွားခဲ့သည်။ မြန်မာနိုင်ငံကိုယ်စားပြု၍ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်လည်း တက်ရောက်ပြီး မိန့်ခွန်းပြောကြားသွားသည်ကို တွေ့ရသည်။

World Economic Forum က ကမ္ဘာတွင် အလွန်ဩဇာရှိသော အစိုးရမဟုတ်သည့် နိုင်ငံတကာအဖွဲ့အစည်းတစ်ခုဖြစ်သည်။ ဆွစ်ဇာလန်နိုင်ငံတွင် အခြေစိုက်ပြီး နှစ်စဉ်ကျင်းပသော ဒါးဗို့စ်ညီလာခံက ထင်ရှားသည်။ ဒါးဗို့စ်ညီလာခံသို့ နိုင်ငံတကာထိပ်သီးခေါင်းဆောင်များ၊ စီးပွားရေးပညာရှင်များ၊ လူမှုရေး၊ သဘာဝပတ်ဝန်းကျင်၊ မီဒီယာနယ်ပယ်အသီးသီးမှ ခေါင်းဆောင်များ တက်ရောက်ပြီး မျက်မှောက်ကမ္ဘာ့ရေးရာများကို ဆွေးနွေးသုံးသပ်လေ့ရှိကြသည်။ World Economic Forum အနေနှင့် နှစ်စဉ်ညီလာခံများကျင်းပသလို ဒေသဆိုင်ရာညီလာခံ (Regional Conference) တွေကိုလည်း ကျင်းပလေ့ရှိရာ ဟနွိုင်းမြို့တွင် ကျင်းပသည့် ညီလာခံက ASEAN ဆိုင်ရာ ညီလာခံဖြစ်သည်။ 

ယခုနှစ် အစည်းအဝေးအတွက် အိမ်ရှင်နိုင်ငံအဖြစ် “ဗီယက်နမ်” ကို ရွေးချယ်ခဲ့သည်မှာ ထူးခြားသည်။ ဗီယက်နမ်က အာဆီယံတွင် တစ်ဟုန်ထိုး စီးပွားရေးဖွံ့ဖြိုးအားကောင်းလာနေသည့် နိုင်ငံဖြစ်သည်။ ထိုအချက်က “အာဆီယံဆိုင်ရာ ကမ္ဘာ့စီးပွားရေးဖိုရမ်” ကို ဗီယက်နမ်တွင် ကျင်းပဖို့ ဖြစ်စေခဲ့သလား မပြောတတ်ပါ။ သူတို့ပေးထားသည့်ခေါင်းစဉ်က ASEAN 4.0 ဖြစ်သည်။ ကမ္ဘာတွင် နည်းပညာဆိုင်ရာ အခေါ်အဝေါ်တွေက တစ်နေ့တစ်မျိုး ဆန်းသစ်နေသည်။ 4.0 ဆိုသော ဝေါဟာရက အသစ်ဖြစ်သည်။ စတင်သုံးနှုန်းလာသည်မှာ သိပ်မကြာသေး။ နည်းပညာအပြောင်းအလဲ၊ နည်းပညာတော်လှန်ရေးအဆင့်များကို အလွယ်ကူဆုံး သုံးနှုန်းလိုက်သည့် ဝေါဟာရ။ ၂၀၁၆ ခုနှစ် ဒါးဗို့စ် WEF ညီလာခံမှာ ထိုဝေါဟာရက တွင်ကျယ်လာသည်။ WEF ကို စတင်ထူထောင်ခဲ့သူ “ကလော့စ် ရှဝက်ဘ်” က ယနေ့ခေတ် နည်းပညာတော်လှန်ရေးကို “စတုတ္ထ စက်မှုတော်လှန်ရေး” (Fourth Industrial Revolution) ဟု ခေါ်ဝေါ်သုံးစွဲလိုက်သည်။ Industrial Revolution 4.0 ဟု အတိုကောက်ခေါ်ဝေါ်သည့် နည်းပညာတော်လှန်ရေးက ယနေ့ကမ္ဘာကြီးကို အကြီးအကျယ် ရိုက်ခတ်နေပြီဖြစ်ရာ အကောင်းအဆိုးတွေကလည်း ရောပြွမ်းနေသည်။ ကမ္ဘာ့စီးပွားရေးအကြောင်း ပြောတော့မည်ဆိုလျှင် Industrial 4.0 ဝေါဟာရက မပါမဖြစ် ပါလာရသည်။ အာဆီယံဆိုင်ရာ ကမ္ဘာ့စီးပွားရေးဖိုရမ် ကျင်းပသောအခါ ထိုအရေး (Issues) ကို အဓိကထားဆွေးနွေးကြသည်။ ထို့ကြောင့် အတိုကောက်အားဖြင့် ASEAN 4.0 ဟု ခေါင်းစဉ်တပ်လိုက်ကြခြင်းဖြစ်သည်။

Industry 4.0 က တစ်ကမ္ဘာလုံးအတိုင်းအတာအားဖြင့် ရိုက်ခတ်မှုရှိပြီး ဒေသအားလုံးနှင့် သက်ဆိုင်သော်လည်း အာဆီယံနိုင်ငံတွေအနေနှင့်တော့ အားလုံးအဆင်သင့်မဖြစ်ကြသေးပါ။ စတုတ္ထစက်မှုတော်လှန်ရေးကြောင့် ဖြစ်ပေါ်လာနိုင်သည့် အကျိုးအပြစ်များကို ဆွေးနွေးကြရာတွင် ခေါင်းဆောင်အချို့က ထဲထဲဝင်ဝင် မတီးခေါက်နိုင်သေးသည့် အနေအထားတွေကိုလည်း တွေ့ရသည်။ အာဆီယံနိုင်ငံများအနက် ဖွံ့ဖြိုးမှုအနိမ့်ဆုံး မြန်မာနိုင်ငံအတွက် Industry 4.0 က အသစ်အဆန်းဖြစ်နေသည်။ နောက်ကျသည်ဖြစ်စေ၊ ရှေ့ရောက်သည်ဖြစ်စေ Industry 4.0 ကတော့ အာဆီယံအသိုက်အဝန်းထဲ ဝင်ရောက်လာမှာပဲဖြစ်သည်။ ထိုအတွက် ကောင်းကျိုးဆိုးပြစ်တွေကို ကြိုတင်ပြင်ဆင်ထားဖို့လိုသည်။ အာဆီယံထဲမှာ အဖွံ့ဖြိုးဆုံး စင်ကာပူ၊ မလေးရှား၊ ထိုင်း၊ အင်ဒိုနီးရှားတို့ကိုအသာထား၍ ယနေ့ ဗီယက်နမ်၏ အခင်းအကျင်းကပင်လျှင် Industry 4.0 အတွက် စဉ်းစားစရာတွေ ရှိနေပြီဖြစ်သည်။

ဗီယက်နမ်သတင်းစာတစ်စောင်၏ အဆိုအရအနာဂတ်တွင် ဆက်သွယ်ရေးနည်းပညာ အဖွံ့ဖြိုးဆုံး ထိပ်တန်း ၁၀ နိုင်ငံစာရင်း၌ ဗီယက်နမ်ပါဝင်လာရန် ရည်မှန်းထားသည်ဟုဆို၏။ ဗီယက်နမ်တစ်နိုင်ငံလုံးကို ဖိုင်ဘာကြိုးမျှင်ဆက်သွယ်မှု ကီလိုမီတာ ၁ သန်း ပြုလုပ်ထားပြီး ဖိုင်ဘာဆက်ကြောင်းအများဆုံး ထိပ်တန်းနိုင်ငံစာရင်းဝင် ဖြစ်လာသလို မိုဘိုင်းလ်လွှမ်းခြုံမှုကလည်း ၉၉ ဒသမ ၅ ရာခိုင်နှုန်း ရှိနေပြီဖြစ်သည်။ လက်ရှိတွင် ဗီယက်နမ်အိုင်တီလုပ်ငန်းပေါင်း ၂၈,၀၀၀ က အိုင်တီလုပ်သား ၉၀၀,၀၀၀ ကို အလုပ်ပေးထားသည်။ လွန်ခဲ့သည့် ၁၀ နှစ်အတွင်း အိုင်တီ (သတင်းအချက်အလက်နည်းပညာ) စက်မှုလုပ်ငန်းက နှစ်စဉ် ၂၀ ရာခိုင်နှုန်း ပုံမှန်တိုးတက်နေပြီး ဝင်ငွေအနေနှင့် ဒေါ်လာ ၉၁ ဒသမ ၆ ဘီလီယံ ရှိခဲ့သည် ဆို၏။ ထိုအခြေအနေမျိုးတွင် Industry 4.0 အတွက် ဗီယက်နမ်က ပြင်ဆင်နေသည်မှာ မဆန်းပါ။ မြန်မာအစိုးရ ခေါင်းဆောင်များအနေနှင့်ရော အိုင်တီနှင့် ဆက်သွယ်ရေးနည်းပညာဖွံ့ဖြိုးရေး ဘယ်လောက်အထိ ပြင်ဆင်ထားပြီလဲ။ အနာဂတ်နည်းပညာစိန်ခေါ်မှုများအတွက်ရော ဘယ်လိုပြင်ဆင်ထားပြီလဲ။ 

လက်ခံသည်ဖြစ်စေ။ လက်မခံသည်ဖြစ်စေ နည်းပညာတော်လှန်ရေးလှိုင်းက မိမိတို့ နယ်နိမိတ်မျဉ်းထဲ ဝင်လာကြမှာပဲ ဖြစ်သည်။ စတုတ္ထ စက်မှုတော်လှန်ရေးက လူသားတို့၏ သမားရိုးကျ အစဉ်အလာလုပ်နည်းလုပ်ဟန်တွေကို ပြောင်းလဲပစ်သလို လူနေမှုပုံသဏ္ဌာန်ကိုလည်း ပြောင်းလဲပစ်သည်။ အေအိုင်ဟုခေါ်သည့် (Artificial Intelligence) အသုံးတွင်ကျယ်လာမှု၊ လူသားအရင်းအမြစ်အစား စက်ရုပ် (Robots) များ သုံးစွဲလာမှု၊ အရာအားလုံးနှင့် အင်တာနက်ချိတ်ဆက်မှု (Internet of Things) အလိုအလျောက် မောင်းနှင်သောယာဉ်များ (Autonomous Vehicles) သုံးဖက်မြင်ပုံနှိပ်နည်းပညာ (3D printing) နာနိုနည်းပညာ (Nano-technology)၊ ဇီဝနည်းပညာ (Biotechnology) ကွမ်တမ်ကွန်ပျူတာနည်းပညာ အစရှိသည့် နည်းပညာအစုအပေါင်းက နယ်မြေအပိုင်းအခြားမရှိ ထိုးဖောက်ဝင်ရောက်လာသည်။ WEF အမှုဆောင်ချုပ် ကလော့စ် ရှဝက်ဘ်ကတော့ “ဒုတိယစက်မှုခေတ်” ဟု အမည်ပေးသည်။ နည်းပညာ အပြောင်းအလဲက လက်ရှိစီးပွားရေးလုပ်ငန်းအားလုံးအပေါ် ရိုက်ခတ်ပြီး ပိုမိုကောင်းမွန်သော အရည်အသွေးများနှင့် လူနေမှုပုံသဏ္ဌာန်များ ဖြစ်ပေါ်နိုင်သလို စီးပွားရေးလုပ်ငန်းများ၊ အလုပ်အကိုင်အခွင့်အလမ်းများကိုလည်း အကြီးအကျယ်ဖျက်ဆီးပစ်နိုင်သည်။ 

ASEAN 4.0 က စတင်ဝင်ရောက်လာပြီဖြစ်သည့် စတုတ္ထစက်မှုတော်လှန်ရေးကို အကောင်းဆုံး ဘယ်လိုအသုံးချကြမလဲ။ ဘယ်လိုတုံ့ပြန်ကြမလဲ ဝိုင်းဝန်းဆွေးနွေးကြသည့် အစည်းအဝေးဖြစ်သည်။ နည်းပညာ အပြောင်းအလဲက ယနေ့လူမှုဘဝကို အကြီးအကျယ် ရိုက်ခတ်နေတာ သိသာထင်ရှားနေပြီဖြစ်သည်။ တတိယစက်မှုတော်လှန်ရေးက ဒစ်ဂျစ်တယ် နည်းပညာတော်လှန်ရေးကို အခြေခံသော်လည်း စတုတ္ထစက်မှုတော်လှန်ရေးကတော့ ဒစ်ဂျစ်တယ်နည်းပညာမှတစ်ဆင့် ပေါက်ဖွားလာသည့် ဉာဏ်ရည်တု (AI) နည်းပညာ၊ အလိုအလျောက်စွမ်းဆောင်လာနိုင်သည့် (Automation) နည်းပညာ၊ အရာဝတ္ထုများ၊ လူများနှင့် အင်တာနက်ချိတ်ဆက်မှု၊ နာနိုနည်းပညာ၊ သုံးဖက်မြင်ပုံနှိပ်ခြင်းနည်းပညာ စသည့် နည်းပညာအစုအပေါင်းဖြစ်လာသည်။ 

မီဒီယာပလက်ဖောင်းများ ပြောင်းလဲသွားရာမှ သမားရိုးကျမီဒီယာ (Traditional Media) များ မှေးမှိန်လာသည်။ အလုပ်ပုံသဏ္ဌာန်များ ပြောင်းလဲသွားသည်။ သမားရိုးကျပုံသဏ္ဌာန်လုပ်ငန်းများ ကျဆုံးသွားသည်။ ပျောက်ကွယ်သွားသည်။ ငွေကြေးအရောင်းအဝယ်စနစ်၊ ကုန်သွယ်ရေးပုံသဏ္ဌာန် ပြောင်းလဲသွားသည်။ ဆိုင်ဘာကမ္ဘာထဲမှာ ဝန်ဆောင်မှုလုပ်ငန်းတွေလုပ်ကြသည်။ ထိုင်ရာမထ အလိုရှိရာမှာနိုင်သည်။ အမိန့်ပေး စေခိုင်းနိုင်သည်။ ကွပ်ကဲ ညွှန်ကြားနိုင်သည်။ Industry 4.0 က လူသားတွေ၏ လူနေမှုဘဝကို ဘယ်လိုပြောင်းလဲပြီး ဘယ်လိုရိုက်ခတ်နိုင်သည်ကို ကြိုတင်လေ့လာသုံးသပ်ထားဖို့ လိုသည်။ နိုင်ငံက နောက်ကျနေသည်ဖြစ်စေ၊ ရှေ့ရောက်နေသည်ဖြစ်စေ ရောက်လာနေပြီဖြစ်သည့် စတုတ္ထစက်မှုတော်လှန်ရေးကိုတော့ မျက်ခြည်မပြတ်ဖို့ လိုအပ်နေကြောင်းပါ...။

ချစ်ဝင်းမောင်