News

POST TYPE

OPINION

မြို့မေတ္တာ ခံယူခြင်း၊ မခံယူခြင်း ( Daily, Vol-6/No-126)
04-Sep-2018 tagged as

အွန်လိုင်းလူမှုကွန်ရက်ပေါ်တွင် ရိုက်တာသတင်းထောက်နှစ်ဦးကို ထောင်ဒဏ် ၇ နှစ်ချမှတ်လိုက်ကြောင်း သတင်းဖော်ပြချက်ပို့စ်အောက်တွင် များစွာ တစ်ဖက်သတ်ဆန်သော မှတ်ချက်များ ဝင်ရောက်နေရာယူလာခြင်းမှာ ကောင်းသည့်လက္ခဏာ မဟုတ်ပေ။

အဆိုပါ မှတ်ချက်များကို လေ့လာကြည့်သည့်အခါ ပြင်းထန်အစွန်းရောက်သည့် စွပ်စွဲမှုများ ပါဝင်ခြင်း၊ အမျိုးသားရေးအမြင်များ လွန်ကဲခြင်း၊ သံတူကြောင်းကွဲ အဓိပ္ပာယ်များသာ ဖြစ်နေခြင်း၊ အုပ်စုလိုက် ရည်ရွယ်ချက်ရှိရှိ ငြာသံပေးသည့်သဘော ဆန်နေခြင်း စသည့်အချက်များကို တွေ့ရပေရာ စနစ်တကျ ဇာတ်တိုက် လေ့ကျင့်ထားသည့် စစ်ဆင်ရေးတစ်ခု ဆင်နွှဲနေခြင်းနှင့် တူလှသည်။

၂၀၁၂ ခုနှစ်နောက်ပိုင်း ဘာသာရေး၊ လူမျိုးရေးဗန်းတင်အစွန်းရောက် လှုပ်ရှားမှု၊ အကြမ်းဖက်၊ သတ်ဖြတ်၊ မီးရှို့မှုများ နိုင်ငံတစ်ဝန်းရှိ မြို့ကြီးများတွင် ချိန်ကိုက်ထားသည့်အလား ဆက်တိုက်ဆိုသလို ပေါ်ပေါက်ခဲ့ပြီးနောက် အွန်လိုင်း လူမှုကွန်ရက်ပေါ်တွင် အမုန်းစကားများ အင်နှင့်အားနှင့် နေရာယူလာခဲ့သည်။

ထိုအမုန်းစကားများကိုလည်း စနစ်တကျ လေ့ကျင့်ဖွဲ့စည်းထားပုံရသော အဖွဲ့တစ်ခုက သံတူကြောင်းကွဲ လေသံများ၊ စကားလုံးများ အသုံးပြုကာ ၎င်းတို့နှင့် ဆန့်ကျင်ဘက်အမြင်ရှိသူများအား ရင့်သီးရိုင်းပျစွာ တိုက်ခိုက်ခဲ့ကြသည်။

အမုန်းစကားအများစုကို လေ့လာကြည့်သည့်အခါ အာဏာအဝန်းအဝိုင်းနှင့် ပါဝါအမာကို အထိုင်ပြုထားသူများဘက်က ရပ်တည်ပြီး စနစ်တကျ အကွက်ဆင်ထားသော တစ်ဖက်သတ်ဇာတ်လမ်းများ၊ ဟုတ်ယောင်ယောင် လုပ်ကြံဖန်တီးထားသော အတုအယောင်များဖြင့် တစ်ဖက်အင်အားစုများ၊ လူပုဂ္ဂိုလ်များကို တိုက်ခိုက်၊ လုပ်ကြံလေ့ရှိသည်ကို တွေ့ရသည်။

ရခိုင်ပြဿနာနှင့်ပတ်သက်၍ လက်ရှိအစိုးရနှင့် တပ်မတော်တို့အပေါ် အိုအိုင်စီနှင့် နိုင်ငံတကာက ဖိအားပေး၊ အကျပ်ကိုင်လာသည့်ပုံစံသည် စင်စစ်အားဖြင့် ယခင်က ပြည်တွင်းရှိ ဘာသာရေး၊ လူမျိုးရေးနှင့် အာဏာရှင်အလိုကျ ဖွဲ့စည်းထားသော အစွန်းရောက်အုပ်စုများ ကျင့်သုံးခဲ့သည့် ပုံစံအတိုင်းဖြစ်နေသည်။

များစွာဝမ်းနည်းဖွယ်ကောင်းသည်မှာ လူမျိုး၊ ကိုးကွယ်ယုံကြည်မှု၊ နေထိုင်ရာ ဒေသ၊ အသားအရောင်မည်မျှ ကွဲပြားခြားနားသည်ဖြစ်စေ ငြိမ်းချမ်းစွာ အတူယှဉ်တွဲ နေထိုင်လာခဲ့သည့် သမိုင်းအစဉ်အလာကောင်းရှိခဲ့သည့် မြန်မာနိုင်ငံတွင် လူတစ်ဦး၊ တစ်ယောက်၊ တစ်ဖွဲ့ ဒုက္ခရောက်၊ အဆိုးကြုံနေခြင်းကို ရေနစ်သူ ဝါးကူထိုးသကဲ့သို့ ဖြစ်စေသော အားရကျေနပ်မှုများ၊ အဆုံးစွန် တွန်းအားပေးခြင်းများ၊ ပုဂ္ဂိုလ်ရေး လုပ်ကြံမှုများ၊ ပရော်ဖက်ရှင်နယ်တစ်ရပ်အပေါ် နာမည်ဖျက်သိက္ခာချမှုများ ကြီးထွားလာခြင်းဖြစ်သည်။

အာဏာနှင့် ကိုယ်ကျိုးစီးပွားကို အထိုင်ပြုထားသော အဆိုးမြင်ဝါဒီများ၊ အလွန်အကျွံ ပုဂ္ဂိုလ်ရေး အမွှမ်းတင်မှုနှင့် လွန်ကဲသော အချစ်၊ အမုန်းရောပြွမ်း ထောက်ခံမှု ကြီးစိုးနေသော အကောင်းမြင်လွန်သမားများအကြား အပြန်အလှန် အပြစ်ဖို့၊ အမှားရှာ၊ စွပ်စွဲ၊ ပုတ်ခတ်၊ ချောက်တွန်း၊ လုပ်ကြံမှုတိုက်ပွဲများ ပြင်းထန်လာသည်နှင့်အမျှ တိုက်ပွဲကြားက မြေစာပင်ဖြစ်သော နိုင်ငံသားများနှင့် နိုင်ငံ၏ ပုံရိပ်ကျဆင်းလာမည်ဖြစ်သည်။

သမိုင်းတစ်လျှောက် နိုင်ငံတကာအသိုင်းအဝိုင်း၏ မမျှတသော ဖိအားများနှင့် ရင်ဆိုင်နေရချိန်မျိုးတွင် အချင်းချင်းအကြား မတူညီသော ရပ်တည်ချက်၊ ခံယူချက်၊ သဘောထားများကို ခေတ္တဘေးဖယ်ထားပြီး အနိမ့်ဆုံးအဆင့် အပစ်အခတ် ရပ်စဲကာ ဖိအားများ၊ စိန်ခေါ်မှု အခက်အခဲများကို စုပေါင်းရင်ဆိုင် တွန်းလှန်ရမည့်အစား ရန်လိုအစွန်းရောက်သော တုံ့ပြန်မှုများ၊ အပေါစားလော်ဘီများ၏ သိမ်သိမ်ဖျင်းဖျင်း စကားလုံးများဖြင့် ရန်လိုနေပါက မည်သည့်အခါမျှ ပြည်သူ့မေတ္တာ၊ လေးစားအထင်ကြီးမှုနှင့် စစ်မှန်သော ငြိမ်းချမ်းရေးတို့ မရနိုင်ကြောင်း သတိပြုမိစေလိုရင်းဖြစ်သည်။

အယ်ဒီတာ (၄-၉-၂၀၁၈)

  • TAGS