News

POST TYPE

OPINION

အတိုက်အခံ ပါတီကောင်း လိုသည် (Daily, Vol-6/No-121)
29-Aug-2018 tagged as

မြန်မာနိုင်ငံသည် လက်ရှိ ကျင့်သုံးနေသော Fast Past The Post (FPTP) နိုင်သူ အကုန်ယူ မဲပေး ရွေးကောက်သည့်ပုံစံ တစ်နည်းအားဖြင့် ပါတီတစ်ခုက ပြိုင်ဘက် ပါတီများအပေါ် တစ်မဲအသာရရုံဖြင့် ရွေးကောက်ပွဲ အနိုင်ရသည့်စနစ် ဖြစ်သည့်အပြင် လက်ရှိ မြန်မာ ပြည်သူလူထု၏ ချစ်လုံးလုံး၊ မုန်းလျားလျားစိတ်ကြောင့် ပါတီတစ်ခုတည်းက အာဏာကို ရေရှည် ရယူသွားနိုင်သည့် အလားအလာများ ရှိနေပေသည်။

တင်းကျပ်စွာ ဖိနှိပ်အုပ်ချုပ်ခဲ့သော အာဏာရှင်စနစ်အောက်တွင် အချိန်များစွာ နေခဲ့ရသော မြန်မာပြည်သူလူထုသည် ၎င်းတို့နည်းတူ အာဏာရှင်၏ဒဏ်ကို ခါးစည်းခံခဲ့ရသော လူပုဂ္ဂိုလ်နှင့် ပါတီတို့အပေါ် အာဏာရှင်ကို တူးတူးခါးခါး မုန်းတီးသော စိတ်ဖြင့် များစွာ အားကိုးထောက်ခံလေ့ ရှိသည်။

တင်းကျပ် ရက်စက်သော အာဏာရှင်စနစ်၏ အုပ်ချုပ်မှုပုံစံများကြောင့်ပင် သူရဲကောင်းများနှင့် လူထုခေါင်းဆောင်များ ပေါ်ထွက်လာတတ်သည်။ ထိုသို့ ပေါ်ထွက်လာသော လူပုဂ္ဂိုလ်နှင့် အဖွဲ့အစည်း အပေါ်တွင်လည်း လူထုက အမုန်းနှင့် အချစ် နှစ်ခုပေါင်းကာ လွန်ကဲစွာ ထောက်ခံအားပေးလေ့ ရှိသည်။

မြန်မာနိုင်ငံတွင် စစ်အာဏာရှင် အစိုးရ၏ ဖိနှိပ်မှုခံခဲ့ရသော ဒေါ်အောင်ဆန်းစုကြည် ခေါင်းဆောင်သည့် အမျိုးသား ဒီမိုကရေစီ အဖွဲ့ချုပ် (NLD) ပါတီအပေါ် ပြည်သူလူထု၏ ချစ်ခင်၊ အားကိုး၊ ယုံကြည်၊ ထောက်ခံမှုမှာ မည်သည့်ခေတ်နှင့်မျှ မတူအောင် အားကောင်းခဲ့ခြင်း ဖြစ်သည်။

ထို့ကြောင့် မူလကပင် အာဏာ သုံးရပ်ကို တာဝန်ယူ စီမံခန့်ခွဲရန် ရည်ရွယ်ချက်၊ ရည်မှန်းချက် ရှိစေကာမူ ကြိုတင်ပြင်ဆင် လေ့လာထားသည့် အိမ်စာ အားနည်းချက်ကြောင့် လက်ရှိ လုပ်ကိုင် ဆောင်ရွက်သမျှ ကိစ္စရပ်များတွင် အားနည်း ချို့ယွင်းချက်များ ရှိနေသော်ငြား မြန်မာပြည်သူလူထုက နားလည်တွေး၊ ဖြည့်တွေးပေးနေကြခြင်း ဖြစ်သည်။

သို့သော် အခြားတစ်ဖက်တွင်လည်း အစိုးရ လုပ်ကိုင်ဆောင်ရွက်သမျှ လွန်လွန်ကဲကဲ ထောက်ခံ၊ ချီးပ၊ မြှောက်စားနေကြခြင်းနှင့် ဝေဖန်ထောက်ပြမှုများကိုလည်း အကဲဆတ်ဆတ် အဓိပ္ပာယ် ကောက်ကာ ပြင်းပြင်းထန်ထန် နှုတ်လှန်ထိုး၊ ရန်ထောင်၊ တံဆိပ်ကပ်နေကြခြင်းတို့ကြောင့် စေတနာဖြင့် ဝေဖန်၊ အကြံပြု၊ ထောက်ပြလိုသူများပင် နှုတ်ဆွံ့သွားစေပြီး အနုတ် လက္ခဏာ ဆောင်သော အကျိုးဆက်များ ရှိလာနိုင်ပေသည်။

အထူးသဖြင့် ပါတီတစ်ခုတည်းက ရွေးကောက်ပွဲများတွင် အပြတ်အသတ် အနိုင်ရရှိပြီး အတိုက်အခံပါတီ ကောင်းကောင်း မရှိဘဲ နိုင်ငံကို နှစ်ရှည် အုပ်ချုပ်ခွင့် ရရှိသွားခြင်းဖြင့် ကမ္ဘာပေါ်ရှိ အခြားသောနိုင်ငံမှ ဥပမာများ မဆိုထားနှင့် သီအိုရီ သဘောအရပင် အာဏာရှင်ဆန်သွားနိုင်သော အန္တရာယ် ရှိနေပေသည်။

အတိုက်အခံဟု ဆိုရာတွင်လည်း အာဏာလက်လွှတ်လိုက်ရသော မချင့်မရဲစိတ်ဖြင့် အစိုးရ လုပ်ကိုင်ဆောင်ရွက်သမျှ မူလကပင် ရည်ရွယ်ချက်ဖြင့် တိတ်တဆိတ် ဖွဲ့စည်းထားသော ကိုယ်ပွားအဖွဲ့အစည်းများ၊ သွယ်ဝိုက်၍ ထောက်ပံ့ပေးထားသော အဖွဲ့အစည်းများ နာမည်မျိုးစုံ၊ နည်းလမ်းမျိုးစုံသုံးကာ အပြစ်တင်၊ အဆိုးပြောနေခြင်း၊ လက်ရှိအစိုးရ နာမည်ပျက်စေရန် အောက်လမ်းနည်းဖြင့် တိုက်ခိုက်ခြင်းတို့မှာလည်း အတိုက်အခံကောင်းဟု မခေါ်ဆိုထိုက်ပေ။

အတိုက်အခံကောင်းတို့ မည်သည် ပြဿနာ၊ အခက်အခဲများ အထူးသဖြင့် နိုင်ငံတော် တည်ငြိမ်အေးချမ်းရေးနှင့် အချုပ်အခြာ အာဏာဆိုင်ရာ ကိစ္စရပ်များကို ဝိုင်းဝန်း အဖြေရှာပေးခြင်း၊ အကြံပေး ထောက်ပြခြင်း၊ မလွှဲမရှောင်သာ အခြေအနေတစ်ခု ကြုံလာပါက သို့မဟုတ် လိုအပ်ပါက အစိုးရကို နည်းလမ်းတကျ စေတနာပါပါ ဝေဖန်ထောက်ပြ အကြံပြုခြင်းတို့ဖြင့် ပူးပေါင်း ဆောင်ရွက်ရန် မဲဆန္ဒရှင် ပြည်သူများ ကိုယ်စား တာဝန်ရှိပေသည်။
 
ထိုအတွက် နောက်လာမည့် သက်တမ်းအသစ်တွင် စိတ်ဓာတ်နှင့် လက်တွေ့ ဆောင်ရွက်ချက် နှစ်မျိုးစလုံး ခေါက်ရိုးကျိုးကာ အာဏာရှင်စရိုက် အကင်းမသေသေးသော ပါတီမျိုးထက် ပြည်သူလူထုက လေးစားကြည်ညိုရင်း စွဲရှိပြီး ပြည်သူလူထု အကျိုးကို အမှန်တကယ် ထမ်းဆောင်ပေးမည့် ထက်မြက် ထူးချွန်သော အတိုက်အခံပါတီတစ်ရပ် ပေါ်ပေါက်လာစေကြောင်း မျှော်လင့်အပ်ပေသည်။

အယ်ဒီတာ (၂၉-၈-၂၀၁၈)

  • TAGS