News

POST TYPE

OPINION

ဆိုခဲစေ၊ မြဲစေ (Daily, Vol-6/No-114)
21-Aug-2018 tagged as

အဖွဲ့အစည်းတစ်ရပ်တွင် ခေါင်းဆောင် သို့မဟုတ် အကြီးအကဲအဖြစ် တာဝန်ယူထားသူဖြစ်ပါက လက်အောက်ငယ်သား သို့မဟုတ် အဖွဲ့အစည်းတွင် အဆင့်ဆင့်လိုက် တာဝန်ယူထားသူများအပေါ် အဖွဲ့အစည်း၏ ရည်မှန်းချက်၊ ရည်ရွယ်ချက်များနှင့် မျက်မှောက် အခြေအနေတို့ကို အခြေခံ၍ မှန်ကန် ပြတ်သားသည့် အမိန့်မျိုး ပေးရခြင်းကို အများ နားလည်ထားပြီးဖြစ်သည်။

ခေါင်းဆောင်များ၏ မှန်ကန်၊ ပြတ်သားသည့် အမိန့်၊ ညွှန်ကြားချက်တို့ကြောင့် အနိုင်ရရန် ဖြစ်နိုင်ဖွယ် မရှိသော တိုက်ပွဲမျိုးကို အနိုင် ရရှိသွားစေနိုင်ကြောင်း ဘုရင့်နောင် ကျော်ထင်နော်ရထာ၏ နာမည်ကျော် နောင်ရိုးတိုက်ပွဲက အကောင်းဆုံး ဥပမာဖြစ်သည်။

“ဘဝဟူသည် တိုက်ပွဲ”ဆိုသကဲ့သို့ လူသားအားလုံး နေ့စဉ်နှင့်အမျှ ရင်ဆိုင်နေရသော စား၊ ဝတ်၊ နေရေး အပါအဝင် ဩဇာ၊ အာဏာ၊ စည်းစိမ်ဥစ္စာ၊ ထင်ပေါ်ကျော်ကြားမှုကဲ့သို့ လောကီလူ့ဘုံ၏ ရုပ်ပိုင်း၊ စိတ်ပိုင်းဆိုင်ရာ လိုအပ်ဆန္ဒများ ရယူပိုင်ဆိုင်နိုင်ရေးအတွက် တိုက်ပွဲများ ဆင်နွှဲနေရပေသည်။

ထိုတိုက်ပွဲများကို တစ်ဦးချင်း ရင်ဆိုင် တိုက်ခိုက်ရာတွင်လည်း ဆန္ဒနှင့် ထပ်တူကျသည့် စိတ်ဓာတ်၊ ဇွဲ၊ လုံ့လဝီရိယ၊ ကြိုးစား အားထုတ်မှု၊ လေ့လာဆည်းပူး သင်ယူမှု၊ ဝေဖန်ဆန်းစစ် သုံးသပ်နိုင်မှု၊ ဆင်ခြင်စဉ်းစားနိုင်မှု အနည်း၊ အများ အတိုင်းအတာအပေါ် မူတည်ကာ အနိုင်ရရှိခြင်း၊ အရှုံးတွေ့ခြင်းရလဒ်များ ပိုင်ဆိုင်ကြခြင်း ဖြစ်သည်။

နိုင်ငံရေး၊ စီးပွားရေး၊ လူမှုရေး နယ်ပယ်တို့တွင်လည်း ထိုကဲ့သို့ လူသား တစ်ဦးချင်းစီဖြင့် ဖွဲ့စည်းထားသည့် နိုင်ငံရေး ပါတီများ၊ ကုမ္ပဏီ ကော်ပိုရိတ်များ၊ အသင်းအဖွဲ့များ၏ အောင်မြင်မှု၊ ကျရှုံးမှုတို့သည်လည်း သက်ဆိုင်ရာ အဖွဲ့အစည်းအလိုက် ခေါင်းဆောင်မှုပေးသူ တစ်ဦး၊ တစ်ဖွဲ့ချင်း၏ အရည်အချင်းနှင့် စွမ်းဆောင်ရည်အပေါ် မူတည်နေပေသည်။

နိုင်ငံတစ်ခုကို အုပ်ချုပ် စီမံခန့်ခွဲရသည့် အစိုးရတာဝန်ကို ယူထားသည်နှင့်တစ်ပြိုင်နက် နယ်ပယ် အသီးသီးကို ဘက်စုံ၊ ထောင့်စုံမှနေ၍ သုတေသနပြု၊ စစ်တမ်းကောက်ကာ နိုင်ငံအဝန်း ခြုံလွှမ်း စဉ်းစားထားသည့် ရေတို၊ ရေရှည် စီမံကိန်း၊ စီမံချက်များ ကြိုတင်ပြင်ဆင် ရေးဆွဲထားရသည်။ 

စီမံခန့်ခွဲမှု သဘောအရ ထိုသို့ ပြင်ဆင်ရေးဆွဲရာတွင်လည်း ဖြစ်ပေါ်လာနိုင်သော အားနည်းချက်၊ လစ်ဟာချက်၊ အခက်အခဲ၊ ပြဿနာနှင့် စိန်ခေါ်မှုများကို ကြိုတင်မျှော်မှန်း ထည့်သွင်း တွက်ချက်ထားရပြီး၊ မျှော်မှန်းထားသည့်အတိုင်း ကြုံတွေ့လာရပါက မည်သို့ အဆင့်လိုက် ရင်ဆိုင် ကျော်လွှားမည်ဆိုသည့် ဖြေရှင်းနည်းများ အရန်သင့် ပြင်ဆင်ထားရသည်။

စီမံခန့်ခွဲမှု အတတ်ပညာသည် မူဝါဒများ၊ စီမံကိန်း၊ စီမံချက်များကို စိတ်ကူးတည့်လျှင် တည့်သလို၊ စိတ်ကူး မတည့်လျှင် မတည့်သလို ချမှတ်ခြင်း၊ ဖျက်သိမ်းခြင်း၊ ပြင်ဆင် ပြောင်းလဲခြင်းမျိုး၊ ကြုံလာသမျှ အခက်အခဲ၊ ပြဿနာများကို စိတ်ကူးရသလို၊ ကြုံသလို ဖုတ်ပူမီးတိုက် ဖြေရှင်းရခြင်းမျိုး မဟုတ်ဘဲ ကြိုတင် သုတေသနပြု၊ နည်းလမ်းရှာ၊ လူမှန် နေရာမှန် တာဝန်ပေးကာ စမ်းသပ်ကာလအလိုက်၊ အဆင့်လိုက် အကောင်အထည် ဖော်ရခြင်းမျိုး ဖြစ်သည်။

ခေါင်းဆောင်ကောင်းတို့မည်သည်၊ အစိုးရကောင်းတို့မည်သည် မည်သည့်ကိစ္စ၊ မည်သည့်မူဝါဒ၊ စီမံကိန်း၊ စီမံချက်မျိုးကိုမဆို မပြောခင်၊ မချမှတ်ခင်၊ အကောင်အထည် မဖော်ခင် ဘက်စုံ၊ ထောင့်စုံမှ ကြိုတင်တွက်ချက် စဉ်းစားရပြီး ပြောပြီး၊ ဆိုပြီး၊ ချမှတ်ပြီးပြီဆိုပါက မဖြစ်ဖြစ်သည့်နည်းဖြင့် ခိုင်မာမြဲမြံစေရန်၊ အောင်မြင်စေရန် မဆုတ်မနစ် ထိန်းသိမ်း ဆောင်ရွက်ရသည်။ 

ထိုသို့ မဟုတ်ပါက အဖွဲ့အစည်းအတွင်း၊ အုပ်ချုပ်ရေး ယန္တရားအတွင်းတွင် သာမက ချစ်ခင်၊ အားကိုး၊ ထောက်ခံနေသော ပြည်သူလူထု၏ ကြည်ညို လေးစားမှု၊ ယုံကြည်စိတ်ချမှု၊ အထင်ကြီး တန်ဖိုးထားမှုတို့ ယုတ်လျော့ ကျဆင်း သွားတတ်သည်။

ဤနေရာတွင် ရှေးပညာရှိများက များစွာ တိုကျစ်ရှင်းလင်း၍ အဓိပ္ပာယ် ပြည့်ဝပျော်ဝင်နေသော၊ ဆင့်ပွားတွေးတော ဆင်ခြင်စရာများ ပြည့်လျှမ်းနေသော ဆိုရိုးစကား၊ ဆုံးမစကားများဖြင့် ဘုရင်၊ မှူးမတ်၊ သေနာပတိများ၊ ပြည်သူများကို ဆုံးမခဲ့သော “ဆိုခဲစေ၊ မြဲစေ”  စကားတစ်ခွန်းကို သတိပြုမိစေလိုရင်းဖြစ်သည်။

အယ်ဒီတာ (၂၁-၈-၂၀၁၈)

(လက်ရှိဖြစ်ပေါ်နေသော အခြေအနေနှင့် ကိုက်ညီနေသောကြောင့် ၂၃ -၃-၂၀၁၇ နေ့ထုတ် The Voice Daily  သတင်းစာတွင် ဖော်ပြခဲ့ပြီးသော အယ်ဒီတာ့အာဘော်ကို ပြန်လည်ဖော်ပြခြင်း ဖြစ်ပါသည်။)

  • TAGS