News

POST TYPE

OPINION

တရားဥပဒေ စိုးမိုးရေးကို စိန်ခေါ်ခြင်း (Daily, Vol-6/No-107)
13-Aug-2018
မန္တလေးမြို့တော်တွင် နေ့ခင်းလူမြင်ကွင်း၌ သေနတ်ဖြင့် လုပ်ကြံသတ်ဖြတ်မှုကျူးလွန်သွားခြင်းမှာ မန္တလေးမြို့တော်နေ ပြည်သူများ၏ လုံခြုံရေးအတွက်သာမက မြန်မာနိုင်ငံသားအားလုံး၏ လုံခြုံရေးကိုပါ စိုးရိမ်ဖွယ်ရှိနေကြောင်း သတိပေးလိုက်ခြင်းဖြစ်သည်။

ယခင်က သေနတ်ဆိုသော လူသတ်လက်နက်မှာ ပြည်တွင်းစစ် တိုက်ပွဲများတွင်သာ အသုံးပြုနေပြီး သာမန်ပြည်သူများနှင့် များစွာ အလှမ်းဝေးလွန်းလှသော်လည်း ယခုနောက်ပိုင်း သေနတ်ဖြင့်ပစ်ခတ်သတ်ဖြတ်မှု၊ လုပ်ကြံမှုသတင်းများ အတွေ့ရများလာခြင်းမှာ ကောင်းသည့်လက္ခဏာ မဟုတ်သည့်အပြင် နောက်ဆက်တွဲ သံသယဖြစ်စရာ၊ စဉ်းစားစရာများလည်း ဖြစ်သွားစေခဲ့သည်။

ထိုင်းနယ်စပ်နှင့် တရုတ်နယ်စပ်ရှိ မူးယစ်ဆေးဝါး မှောင်ခိုထုတ်လုပ်၊ ရောင်းဝယ်ဖောက်ကားမှုများနှင့် ချိတ်ဆက်နေသော သေနတ်ပစ်ခတ် လုပ်ကြံမှုများ၊ ဓားပြတိုက်၊ လုယက်မှုသတင်းများ မကြာခဏကြားရခြင်းမှာ မဖြစ်သင့်သော်ငြား ဖြစ်နိုင်ခြေရှိသည်ဟုဆိုနိုင်သည်။

ရန်ကုန်နှင့် မန္တလေးမြို့တော်ကဲ့သို့ နေရာမျိုးရှိ လူစည်ကားသည့်နေရာမျိုးတွင် သေနတ်ပြ ခြိမ်းခြောက် အနုကြမ်းစီးခြင်း၊ ပြန်ပေးဆွဲခြင်း၊ ပစ်ခတ်လုပ်ကြံခြင်းတို့မှာမူ မြို့တော်နှင့် မြို့တော်နေပြည်သူများ၏ အေးချမ်းလုံခြုံရေးကို တာဝန်ယူထားသူများ၏ အခန်းကဏ္ဍကို မေးခွန်းထုတ်စရာ ဖြစ်သွားခဲ့သည်။

ပြည်သူအများစု၏အမြင်တွင် လုံခြုံရေးတာဝန်ရှိသူများအပေါ် ယုံကြည်အားကိုးစိတ် နည်းရခြင်းအကြောင်းအရင်းများစွာအနက် သေနတ်ကိုင် ရမ်းကား ပစ်ခတ်၊ လုပ်ကြံမှုအများစုကို အဓိက ဝိုင်းဝန်းဖမ်းဆီးပေးသူများမှာ အခင်းဖြစ်ပွားရာ နေရာအနီးပတ်ဝန်းကျင်ရှိ တာဝန်သိ ပြည်သူလူထုဖြစ်နေခြင်းက အချက်တစ်ချက်အဖြစ် ပါဝင်သည်။

အထူးသဖြင့် နာမည်ကျော် ရှေ့နေကြီး ဦးကိုနီကို ရန်ကုန်အပြည်ပြည်ဆိုင်ရာ လေဆိပ်ကဲ့သို့ လူစည်ကားသည့် နေရာမျိုးတွင် သေနတ်ဖြင့် ပစ်ခတ်လုပ်ကြံခံရခြင်းနှင့် ယနေ့ မန္တလေးမြို့တွင် ဖြစ်ပွားခဲ့သော ပစ်ခတ်လုပ်ကြံမှုကို ပြည်သူများကပင် အသက်ကိုပဓာနမထားဘဲ သတ္တိရှိရှိ ဝိုင်းဝန်းဖမ်းဆီးပေးခဲ့ခြင်းမှာ အထင်ရှားဆုံး သက်သေဖြစ်သည်။

ပြည်သူလူထု၏ အသက်အန္တရာယ် အကာအကွယ်ပေးရန်၊ ပြစ်မှုကျူးလွန်သူကို အလျင်အမြန် နှိမ်နင်းဖမ်းဆီးရန် တစ်နည်းအားဖြင့် ပြည်သူအများစုက အပူတပြင်း လိုအပ်နေချိန်မျိုးတွင် လုံခြုံရေးတာဝန်ရှိသူများ အချိန်မီ ရောက်ရှိပြီး ကာကွယ်နှိမ်နင်းပေးရန် နှောင့်နှေးနေတတ်သည်။

သို့သော် မှုခင်းကျူးလွန်ခြင်းမရှိသည့်အပြင် ကိုယ်တိုင် ရန်စစော်ကားခံရသူကိုပင် လုံခြုံရေးတာဝန်ရှိသူများက တရားခံကဲ့သို့ ဆက်ဆံကာ၊ ကိုယ်ထိ လက်ရောက်ပါ စော်ကားနှိပ်စက်ခံရသည့် အဖြစ်အပျက် မကြာသေးခင်က ပေါ်ပေါက်ခဲ့သည်။

လုံခြုံရေးတာဝန်ရှိသူများကို အရပ်သားအစိုးရ တာဝန်စတင်ထမ်းဆောင်ချိန်မှစ၍ စွမ်းရည်မြှင့်သင်တန်းများစွာ သင်ကြားပို့ချပေးနေခြင်းကြောင့် စွမ်းဆောင်ရည်တက်လာသည့် သဘောမျိုးတွေ့ရသော်လည်း အထက်ဆိုခဲ့ပါ အဖြစ်အပျက်များကိုကြည့်လျှင်မှု အာဏာရှင်စနစ်၏ အသုံးချခံနေရသော အရိပ်ဆိုးမှ မလွတ်သေးသည့် စရိုက်လက္ခဏာများ စွဲကျန်နေသေးကြောင်း သတိပြုနိုင်သည်။

သေနတ်ကဲ့သို့ တင်းကျပ်စွာ ကန့်သတ်ထားသော လူသတ်လက်နက်မျိုးဖြင့် နေ့ခင်းကြောင်တောင် လူစည်ကားရာနေရာမျိုးတွင် လုပ်ကြံသတ်ဖြတ်ခြင်းသည် လုံခြုံရေးတာဝန်ရှိသူများ၏ နားရွက်ကို တံတွေးဆွတ်လိုက်ခြင်းဖြစ်သလို နိုင်ငံတစ်ခုလုံး၏ တရားဥပဒေစိုးမိုးရေးကိုလည်း စိန်ခေါ်လိုက်ခြင်းဖြစ်ကြောင်း သတိပြုမိစေလိုရင်းဖြစ်သည်။

အယ်ဒီတာ (၁၃-၈-၂၀၁၈)