News

POST TYPE

OPINION

ငွေ ငွေ ငွေ လောကမှာ ငွေဟာလေ
ငွေ ငွေ လောကမှာငွေဟာလေ...လူတန်းစားမခွဲခြားဘဲ ပျက်စီးတတ်ကြပေ...၊ အပေါင်းအသင်းဖျက်တာငွေ...မကောင်းသတင်းထွက်တာငွေ... အကျင့်စာရိတ္တပျက်စီးအောင်လည်း...သူပဲ လုပ်တတ်ပေ...ဟူသည့် တစ်ချိန်က နာမည်ကြီးအဆိုတော် ရဲဘော်ခင်မောင်လှ၏ သီချင်းမှာ လူတော်တော်များများ၏နှုတ်ဝယ် ရေပန်းစားခဲ့သည်။ ငွေရှိလျှင် လိုချင်တာတွေ ဝယ်လို့ရသည်။ စား၊ ဝတ်၊ နေရေး အဆင်ပြေသည်။ သားသမီးတွေ ကျောင်းထား၍ရသည်။ ငွေများများရှိလျှင် မိမိစိတ်ကြိုက် ကျောင်းကောင်းကောင်းထား၍ရသည်။ ကားကောင်းကောင်းဖြင့် ကျောင်းပို့နိုင်သည်။ ထို့ထက်ပို၍ နိုင်ငံခြားသို့ပို့လွှတ်ကာ ပညာသင်ကြားစေနိုင်သည်။ ကျန်းမာရေးချို့တဲ့လျှင်လည်း ဆေးရုံကောင်းကောင်း၌ နာမည်ကြီးဆရာဝန်နှင့် ပြနိုင်သည်။ ထို့ကြောင့် အချို့က ငွေရှိလျှင် ဘာမဆိုလုပ်၍ရသည်ဟု ခံယူထားကြသည်။

ထို့ကြောင့် လူတို့သည် ငွေကိုရှာကြသည်။ အချို့က အသည်းအသန် ကြိုးစားရှာကြသည်။ အချို့က မရရသည့်နည်းဖြင့် ရှာကြသည်။ တရားနည်းလမ်းကျသည့်နည်းရော၊ တရားနည်းလမ်းမကျသည့်နည်းနှင့်ပါ နည်းမျိုးစုံသုံး၍ ငွေရှာကြသည်။ မြန်မာနိုင်ငံတွင် ကျပ်ငွေတန်ဖိုးကလည်း ကျသည်ထက် ကျလာသည်ဖြစ်ရာ ငွေကိုရနိုင်သလောက်တိုး၍ရှာကြသည်။ အလုပ်အကိုင်မည်မည်ရရမရှိ၊ တရားသောဝင်ငွေရလမ်းမရှိသူတို့က အခြားသူများ ရှာထားသောငွေကို လိုချင်ရမက်ဖြစ်လာသည်။ ထိုအခါ ခိုးဆိုးလုယက်မှုတွေ ကျူးလွန်လာသည်။ အခန့်မသင့်လျှင် လူပါသတ်သည်။ သည်တော့ ရာဇဝတ်မှုတွေ ထူပြောလာသည်။ လုပ်ပိုင်ခွင့်ရှိသောသူများက မိမိလုပ်ပိုင်ခွင့်ကို အလွဲသုံး၍ငွေရှာကြသည်။ ထိုအခါ လာဘ်ပေးလာဘ်ယူမှုတွေ၊ အဂတိလိုက်စားမှုတွေ ကျူးလွန်လာကြသည်။ နိုင်ငံတော်ဘဏ္ဍာငွေကြေးကို စီမံပိုင်ခွင့်ရှိသူများက မိမိကိုယ်ကျိုးအတွက်ပါရည်ရွယ်၍ စီမံခန့်ခွဲသည်။ ငွေကြေးကိုင်တွယ်သုံးစွဲသူများကလည်း ငွေသုံးစွဲရာတွင် ဖိတ်တစ်ဝက် စဉ်တစ်ဝက်၊ အထဲတစ်ဝက် အပြင်တစ်ဝက် အိတ်ထဲထည့်သည့်ငွေက ပမာဏများလာသည်။

တကယ်တမ်းပြောရမည်ဆိုလျှင် အစိုးရဌာန အဖွဲ့အစည်းများမှ နိုင်ငံ့ဝန်ထမ်းများကိုသာမက ပုဂ္ဂလိကအဖွဲ့အစည်းများမှ ဝန်ထမ်းများကိုလည်း ပြောရမည်ဖြစ်သည်။ ယနေ့ ပုဂ္ဂလိကအဖွဲ့အစည်းများသည်လည်း လုပ်ငန်းရှင်၏ အကျိုးစီးပွားဆိုသည်ထက် အများပြည်သူနှင့်ဆက်စပ်သော လုပ်ငန်းများကို လုပ်ကိုင်ဆောင်ရွက်နေကြခြင်းဖြစ်သည်။ အထူးသဖြင့် ငွေရေးကြေးရေးလုပ်ငန်းကို လုပ်ကိုင်ဆောင်ရွက်နေသော ပုဂ္ဂလိကဘဏ်များသည် ပြည်သူတို့၏အကျိုးကို သယ်ပိုးဆောင်ရွက်ပေးနေခြင်းဖြစ်သည်။ ပြည်သူတို့၏ငွေကြေးများကို မပျောက်ပျက် မပျက်စီး မဆုံးရှုံးရအောင် ထိန်းသိမ်းပေးထားသည်။ ပြည်သူတို့၏ငွေကို တိုးပွားအောင် အကျိုးဆောင်ပေးသည်။ ပုဂ္ဂလိကဘဏ်များရှိ ငွေကြေးတို့သည် ပြည်သူတို့ကအပ်နှံထားသော ပြည်သူ့ငွေကြေးများဖြစ်ရာ ဘဏ်တစ်ခု၏အကျိုးစီးပွားသည် ပြည်သူတို့၏ အကျိုးစီးပွားပင်ဖြစ်သည်။ ဘဏ်တစ်ခုပြိုလဲသွားလျှင် ပြည်သူတို့၏ငွေကြေးများ ဆုံးရှုံးမည်ဖြစ်သည်။

ထိုကဲ့သို့ အပြန်အလှန် အမှီသဟဲပြုနေရသည်ဖြစ်ရာ ဘဏ်များအပေါ်တွင် ပြည်သူတို့ တစ်နည်း Customer များက ယုံကြည်မှုရှိရန်မှာ များစွာ အရေးကြီးသည်။ ထိုကဲ့သို့ ဘဏ်များအပေါ်တွင် ပြည်သူတို့က ယုံကြည်မှုရှိရန်အတွက် ဘဏ်ဝန်ထမ်းတို့၏ အခန်းကဏ္ဍသည် များစွာအရေးကြီးသည်။ ဘဏ်ဝန်ထမ်းတို့၏ သစ္စာရှိမှု၊ လုပ်ငန်းကျွမ်းကျင်မှု၊ စည်းမျဉ်းစည်းကမ်းလိုက်နာမှု၊ ရိုးသားဖြောင့်မတ်မှုတို့သည် ဘဏ်တစ်ခု ရေရှည်တည်တံ့ခိုင်မြဲရန်အတွက်၏ အဓိကကျသည့် အသက်သွေးကြောပင်ဖြစ်သည်။

ပြီးခဲ့သည့် ဇူလိုင်လဒုတိယပတ်ခန့်က မန္တလေးမြို့ရှိ ပုဂ္ဂလိကဘဏ်တစ်ခုမှ အမျိုးသမီးဘဏ်ဝန်ထမ်းတစ်ဦးသည် ၎င်း၏ရည်းစားဖြစ်သူနှင့် ပူးပေါင်းကာ ချက်လက်မှတ်အတုဖြင့် ငွေကျပ်သိန်းပေါင်း ၂၇၀၀ ကျော်ကို လိမ်လည်ထုတ်ယူမှုဖြစ်ခဲ့သည်။ ဖြစ်စဉ်မှာ “ဘဏ်ဝန်ထမ်းဖြစ်သူ အမျိုးသမီးက ၎င်း၏ချစ်သူအမျိုးသားအား ဘဏ်တွင် အကောင့်တစ်ခုဖွင့်လှစ်စေခဲ့ပြီး ချက်လက်မှတ် ၁၀ စောင် ပြုလုပ်ပေးခဲ့ကြောင်း၊ ထို့နောက် အဆိုပါချက်လက်မှတ်များပေါ်တွင် ရန်ကုန်မြို့ရှိ ပန်းဆိုးတန်းဘဏ်ခွဲ၌ စာရင်းဖွင့်လှစ်ထားသည့် အမျိုးသမီးတစ်ဦး၏စာရင်းအမှတ်ကို ရိုက်နှိပ်ကာ ၎င်း၏ချစ်သူကိုပေးခဲ့ကြောင်း၊ ရည်းစားဖြစ်သူက ၎င်းချက်လက်မှတ်များကိုအသုံးပြု၍ လက်မှတ်အတုထိုးကာ ဇူလိုင်လ ၉ ရက် တစ်ရက်တည်းတွင် လှည်းတန်းဈေးဘဏ်ခွဲမှ ငွေကျပ်သိန်း ၈၀၀၊ မင်္ဂလာဒုံဘဏ်ခွဲမှ ငွေကျပ်သိန်း ၉၅၀၊ မြောက်ဥက္ကလာဘဏ်ခွဲမှ ငွေကျပ် ၉၇၅ သိန်းတို့ကိုထုတ်ယူသွားကြောင်း” စသည်ဖြင့် သိရသည်။

ထို့အတူပင် အထက်ပါအလွဲသုံးစားမှုဖြစ်ပေါ်ခဲ့သော ပုဂ္ဂလိကဘဏ်၏ ရန်ကင်းဘဏ်ခွဲမှ အကြီးတန်းလက်ထောက်တစ်ဦးသည် အဆိုပါဘဏ်၏ အကောင့်ပိုင်ရှင်တစ်ဦး၏ အကောင့်အတွင်းမှ ငွေကျပ်သိန်းပေါင်း ၅၂၅ သိန်းကို ထုတ်ယူခဲ့ကြောင်း အကောင့်ပိုင်ရှင်က တိုင်ကြားသဖြင့် စစ်ဆေးခဲ့ရာ၊ ၎င်းဝန်ထမ်းသည် Mobile Banking ဖြင့် ဆက်သွယ်ရေးကွန်ရက် အားအသုံးပြု၍ ၃၅ ကြိမ်အထိ အလီလီထုတ်ယူခဲ့ကြောင်း စစ်ဆေးပေါ်ပေါက်ခဲ့ပါသည်။ အဆိုပါကိစ္စကိုသုံးသပ်ရသည်ရှိသော် ဝန်ထမ်းဖြစ်သူ၏ မရိုးသားမှု၊ သစ္စာမရှိမှုဆိုသည်ထက် ကြီးကြပ်သူအဆင့်ဆင့်၏ ပေါ့ဆမှု၊ ကွပ်ကဲမှုလျော့ရဲခြင်းသည်လည်း အကြောင်းတစ်ရပ်ဖြစ်သလို၊ ဘဏ်တွင်း ငွေကြေးစနစ်၊ စာရင်းစနစ်နှင့် စစ်ဆေးရေးစနစ်တို့၏ အားနည်းချက်သည်လည်း အကြောင်းတစ်ရပ်ဖြစ်ပါသည်။ အများအားဖြင့် ဘဏ်အုပ်ချုပ်သူ အကြီးအကဲတို့သည် မိမိတို့၏ဝန်ထမ်းများအပေါ် ယုံကြည်ကြသည်။ ထိုမှသည် ယုံကြည်မှုလွန်ကဲလာသည့်အခါ နေ့စဉ်ပုံမှန်စစ်ဆေးရသည့်လုပ်ငန်းများအပေါ် စစ်ဆေးမှုများ၌ ပေါ့ဆလာကြသည်။

ယခင်က နိုင်ငံပိုင်ဘဏ်များတွင် ဝန်ထမ်းများခန့်ထားရာ၌ ဘဏ်ဝန်ထမ်းသားသမီး၊ တူ၊ တူမ စသည့် ဆွေမျိုးသားချင်းများကိုသာ တာဝန်ယူ၊ တာဝန်ခံစနစ်မျိုးဖြင့် ခန့်ထားကြသော်လည်း နောက်ပိုင်းတွင် ပုဂ္ဂလိကဘဏ်များအပါအဝင် ဘဏ်များပေါများလာသဖြင့် ထိုကဲ့သို့ ဆောင်ရွက်နိုင်ကြမည် မဟုတ်တော့ပါ။ ဘဏ်ဆိုသည်မှာ လူတကာတို့သည်းခြေကြိုက် ပစ္စည်းဖြစ်သော ငွေကြေးကိုကိုင်တွယ်သုံးစွဲရခြင်း၊ ထိန်းသိမ်းစောင့်ရှောက်ရခြင်း၊ စုဆောင်းငွေများကို လက်ခံထိန်းသိမ်း၍ ထုတ်ယူလိုသောအချိန်တွင် ထုတ်ပေးရခြင်း၊ အတိုးများတွက်ချက်ပေးရခြင်း၊ ချေးငွေများကို စိစစ်၍ ထုတ်ချေးပေးရခြင်း၊ ကျသင့်အတိုးများကိုတွက်ချက်၍ အတိုး၊ အရင်းများ လစဉ်မှန်မှန်ပေးသွင်းမှု ရှိ၊ မရှိ စိစစ်ရခြင်း စသည်တို့ကို ဘဏ်ကိုအသုံးပြုသူ Customer များစိတ်ကျေနပ်မှုရှိစေရန် အစဉ်တစိုက် အလေးထားဆောင်ရွက်ပေးနေရသော အဖွဲ့အစည်းကြီးတစ်ခုဖြစ်ပါသည်။

ထို့ကြောင့် ဘဏ်စနစ်သည် ရှုပ်ထွေးခက်ခဲ၍ လူတိုင်းကျွမ်းကျင်ရန် မလွယ်ကူသဖြင့် ကျွမ်းကျင်ဝန်ထမ်းရရှိရန် ခက်ခဲပါသည်။ ကျွမ်းကျင်ဝန်ထမ်းရရှိသော်လည်း ရိုးသားမှုရှိရန်လည်း လိုအပ်သဖြင့် ဝန်ထမ်းရွေးချယ် တာဝန်ပေးအပ်မှုအပိုင်းတွင် များစွာတာဝန်ကြီးလာပြီဖြစ်ပါသည်။ ဝန်ထမ်းဆိုသည်ကလည်း လူသားများသာဖြစ်၍ “စိန်ကဲ ရွှေကဲ ထိုနှစ်ကဲထက် လူကဲခတ်ရန် ခက်ခဲသည်” ဆိုသကဲ့သို့ ကြိုတင်အကဲခတ်ရန် ခက်ခဲလှပါသည်။ ဝန်ထမ်းအချို့သည် စတင်ခန့်ထားစဉ်က ရိုးသားသော်လည်း မြောက်မြားလှစွာသောငွေကြေးများကို နေ့စဉ်မြင်တွေ့၊ ကိုင်တွယ်နေရသည့်အခါ လိုချင်တပ်မက် လောဘတက်လာတတ်သလို၊ ဘဝတွင် တစ်ခါတစ်ရံ ကြုံတွေ့ရတတ်သည့် မမျှော်မှန်းနိုင်သော ငွေကြေးအခက်အခဲတစ်စုံတစ်ရာ ကြုံတွေ့လာရသည့်အခါ မစဉ်းစားမဆင်ခြင်နိုင်တော့ဘဲ လုပ်မိလုပ်ရာလုပ်မိတတ်သော သဘောလည်း ရှိနိုင်ပါသည်။

ထို့ကြောင့် တာဝန်ရှိသူတို့သည် ဝန်ထမ်းတို့၏ စိတ်နေသဘာဝ၊ မိသားစုအခက်အခဲ စသည်တို့ကို ပစ်ပယ်မထားဘဲ ၎င်းတို့နှင့် ထိတွေ့ဆက်ဆံကာ အခက်အခဲများကို မိသားစုစိတ်ဓာတ်ဖြင့် ဝိုင်းဝန်းကူညီဖြေရှင်းပေးဖို့ လိုပါသည်။ ဘဏ်ဝန်ထမ်းများသည် အခြားဝန်ထမ်းများနှင့် မတူညီသောအချက်မှာ ဘဏ်လုပ်ငန်းချိန်အတွင်း နားချိန်စားချိန်မရှိသလောက်ဖြစ်ပြီး အခြားဌာန၊ အဖွဲ့အစည်းမှဝန်ထမ်းများကဲ့သို့ ထမင်းအတူထိုင်စားခြင်း၊ စကားဝိုင်းဖွဲ့ပြောဆိုခြင်း စသည် မရှိသလောက်ဖြစ်ရာ တစ်ဦးနှင့်တစ်ဦး ရင်းနှီးကျွမ်းဝင်မှု၊ တစ်ဦး၏အခက်အခဲကိုတစ်ဦးက သိရှိပြီး ဝိုင်းဝန်းကူညီ ဖြေရှင်းပေးနိုင်မှု အားနည်းခြင်းပင် ဖြစ်ပါသည်။ ဤသည်ကို ဘဏ်လုပ်ငန်းရှင်များနှင့် ဘဏ်အကြီးအကဲများ၊ တာဝန်ရှိသူများအနေနှင့် ဝန်ထမ်းများအား လစာကောင်းကောင်းပေးထားရုံမျှမကဘဲ ဝန်ထမ်းများ၏ စိတ်ချမ်းမြေ့ပျော်ရွှင်သာယာရေး၊ မိသားစုဘဝ အဆင်ပြေချောမွေ့ရေးအတွက် အစီအမံများ ချမှတ်ဆောင်ရွက်သင့်ပါသည်။

နောက်ဆုံးတင်ပြလိုသည့်အချက်မှာ ယခုအခါ မြန်မာ့ပုဂ္ဂလိက ဘဏ်များသည်လည်း နည်းပညာများအသုံးပြုကာ ATM စနစ်၊ Online Banking စနစ်များကို အသုံးပြုနေပြီဖြစ်ရာ နည်းပညာကျွမ်းကျင်သည့် မသမာသူတို့၏ရန်မှ ကာကွယ်သည့်အစီအမံများ ချမှတ်ဆောင်ရွက်ရန် လိုအပ်နေပြီဖြစ်ပါသည်။ ပြီးခဲ့သည့် ဇွန်၊ ဇူလိုင်လများအတွင်းမှာပင် နိုင်ဂျီးရီးယားနိုင်ငံသားတစ်ဦးက မြန်မာအမျိုးသမီးငယ်များကို စည်းရုံး၍ ထိုအမျိုးသမီးတို့၏အမည်ဖြင့် ဘဏ်အကောင့်ဖွင့်ခိုင်းကာ အောင်ဆန်းကွင်း ဘဏ်ခွဲရှိ အခြားသူတစ်ယောက်၏အကောင့်မှ ငွေကျပ် သိန်း ၁၈၀ ကိုလည်းကောင်း၊ ကမာရွတ်မြို့နယ်ဘဏ်ခွဲမှ ငွေကျပ် သိန်း ၄၀၀ ကို လည်းကောင်း၊ လမ်းမတော်မြို့နယ်ဘဏ်ခွဲရှိ ငွေကျပ် သိန်း ၃၀၀ ကိုလည်းကောင်း အသီးသီး ထုတ်ယူသွားခဲ့သည့် ဖြစ်စဉ်ပေါ်ပေါက်ခဲ့ပါသည်။

ထို့ကြောင့် ပုဂ္ဂလိကဘဏ်များအနေနှင့် မိမိတို့၏ဘဏ်များအပေါ်တွင် ပြည်သူတို့က ပိုမိုယုံကြည်မှုရရှိရေးနှင့် ရှိရင်းစွဲယုံကြည်မှု မကျဆင်းစေရေးအတွက် ဘဏ်ဝန်ထမ်းများနှင့် ပတ်သက်သော အတွင်းစည်း၊ Customer များနှင့်ပတ်သက်သော အပြင်စည်းနှင့် လေလှိုင်းထဲမှဖောက်ထွင်းဝင်ရောက်လာမည့် နည်းပညာစည်းတို့ကို ဘက်စုံထောင့်စုံမှ ကာကွယ်နိုင်မည့် အစီအမံများကို ချမှတ်လုပ်ဆောင်ရန် လိုအပ်နေပြီဖြစ်ပါကြောင်း စေတနာကောင်းဖြင့် မီးမောင်းထိုးပြလိုက်ရပါသည် ...။

သိန်းထက်အောင်