News

POST TYPE

OPINION

တရားရေးမဏ္ဍိုင် ပြုပြင်ပြောင်းလဲချိန်တန် (Daily, Vol-6/No-98)
02-Aug-2018

အွန်လိုင်းသရုပ်ဆောင် အောင်ရဲထွေးသေဆုံးမှုနှင့်ပတ်သက်၍ နိုင်ငံတော်သမ္မတက သက်ဆိုင်ရာတာဝန်ရှိသူများကို ခေါ်ယူသတိပေးပြီးနောက် ပြစ်မှုကျူးလွန်ကြောင်း အစွပ်စွဲခံရသူများထက် ယင်းအမှုကို ကျေအေးရုပ်သိမ်းခွင့်ပြုသူများအပေါ် ပြည်သူလူထုက ပို၍သတိပြုမိစရာ ဖြစ်သွားခဲ့သည်။

ဇူလိုင်လ ၃၁ ရက်နေ့တွင် နိုင်ငံတော်သမ္မတက ပြည်ထောင်စုတရားသူကြီးချုပ်၊ ပြည်ထောင်စုရှေ့နေချုပ်နှင့် အဂတိလိုက်စားမှု တိုက်ဖျက်ရေးကော်မရှင်ဥက္ကဋ္ဌတို့ကို ခေါ်ယူတွေ့ဆုံကာ အဆိုပါအမှု ရုပ်သိမ်းခြင်းနှင့်ပတ်သက်သော နောက်ခံအကြောင်းအရင်းများ၊ အခြားဆက်နွှယ်ပတ်သက်မှုများနှင့်ပတ်သက်၍ တိတိကျကျ စိစစ်ပြီး ဥပဒေနှင့်အညီ မှန်မှန်ကန်ကန်ဆောင်ရွက်ရေး လမ်းညွှန်ပြောဆိုခဲ့ပြီးနောက် ထိုသို့သတိပြုမိလာကြခြင်းဖြစ်သည်။

အခြားတစ်ဖက်တွင်လည်း အွန်လိုင်းလူမှုကွန်ရက်တွင် အစွပ်စွဲခံရသူ သုံးဦးနှင့် ပတ်သက်သော အကြောင်းအရာများ၊ ၎င်းတို့၏ ပတ်သက်ဆက်စပ်မှုများကို ဓာတ်ပုံများနှင့်တကွ တာဝန်သိပြည်သူအချို့က ဖော်ထုတ်ဖွင့်ချထားပြီး အမှုရုပ်သိမ်းမှု၏ အဓိကတာဝန်ရှိသူ ရန်ကုန်တိုင်းဥပဒေချုပ်၊ အရှေ့ပိုင်းခရိုင် တရားသူကြီးတို့ကို သိန်းထောင်ချီ လာဘ်ငွေလက်ခံရယူခဲ့ကြောင်း စွပ်စွဲမှုများလည်း ထွက်ပေါ်လျက်ရှိသည်။

ထိုသို့ ရုပ်သိမ်းကျေအေးခွင့်ပြုသည့်အပေါ် သက်ဆိုင်ရာ ခရိုင်ရဲတပ်ဖွဲ့က သဘောမတူကန့်ကွက်ကြောင်း တရားဝင် ထုတ်ပြန်ချက်ကိုလည်း အွန်လိုင်းလူမှုကွန်ရက်တွင် ပျံ့နှံ့လျက်ရှိသည့်အပြင် တရားခံများဘက်ကလည်း ၎င်းတို့အမှုကို ပြန်လည်ပြင်ဆင်ချက်တင်ပြီး စစ်ဆေးမည်ကို မကျေနပ်သောကြောင့် ၎င်းတို့ မည်သူ့ထံ မည်မျှ လာဘ်ငွေပေးခဲ့ကြောင်း တရားဝင် ဖွင့်ချမည်ဟုလည်း သတင်းများ ထွက်ပေါ်လျက်ရှိသည်။

အထက်ဆိုခဲ့ပါ သတင်းများကြောင့် ပြည်သူလူထုအမြင်တွင် အောင်ရဲထွေး သေဆုံးရခြင်း၊ အစွပ်စွဲခံရသူများ၏ မိဘများကိုယ်တိုင် ရဲစခန်းတွင် လာရောက်အပ်နှံကာ အစွပ်စွဲခံရသူများ ဖမ်းဆီးထိန်းသိမ်းခံရပြီး တရားရင်ဆိုင်နေရခြင်း၊ တရားဥပဒေချုပ်၏အမိန့်ဖြင့် ရာဇဝတ်ကျင့်ထုံး ၄၉၄ အရ ကျေအေးရုပ်သိမ်းခွင့်ပြုလိုက်ခြင်းတို့ထက် ဥပဒေချုပ်နှင့် တရားသူကြီးတို့ အကျင့်ပျက်ခြစားမှု ရှိသလောဆိုသည့် သံသယများ ပိုကြီးထွားလာခဲ့သည်။

ပြည်သူများ သံသယဖြစ်စရာ ကောင်းလောက်အောင်ပင် ရန်ကုန်တိုင်းဒေသကြီးအတွင်း တရားစီရင်ရေးလောကအတွင်း အငြင်းပွားဖွယ်ရာ တရားစီရင်မှု အများအပြားရှိနေကြောင်း ရှေ့နေလောကအတွင်းမှ ဝေဖန်သုံးသပ်မှုများလည်း ရှိသည်။ အောင်ရဲထွေးသေဆုံးမှုကဲ့သို့ အများပြည်သူ စိတ်ဝင်စားနေသော အမှုအခင်းမျိုးဖြစ်၍သာ အွန်လိုင်းလူမှုကွန်ရက်တွင် ပြစ်တင်၊ ဝေဖန်ပြောဆိုမှု ပြင်းထန်ကျယ်ပြန့်နေခြင်းဖြစ်ပြီး အောင်ရဲထွေးအမှုကဲ့သို့ ထင်ပေါ်ကျော်ကြားမှု မရှိသောကြောင့် တစ်ဖက်သတ် နစ်နာခဲ့သော အမှုအခင်းများ မြန်မာနိုင်ငံတစ်ဝန်းတွင် ရာထောင်ချီ ရှိနေခဲ့သည်။

မည်သို့ပင်ဖြစ်စေ လက်ရှိ အောင်ရဲထွေးသေဆုံးမှုနှင့်ပတ်သက်၍ အွန်လိုင်းလူမှုကွန်ရက်ကို အသုံးပြုကာ နိုင်ငံတစ်ဝန်းမှ အမှန်တရားကို မြတ်နိုးသူ တာဝန်သိပြည်သူများက မိမိတို့ တတ်နိုင်သည့်နေရာမှ ဝိုင်းဝန်းကူညီခဲ့ခြင်းကြောင့် နိုင်ငံတော်သမ္မတကိုယ်တိုင် လက်ပိုက်ကြည့်မနေနိုင်တော့ဘဲ တာဝန်ရှိသူများကို သတိပေး၊ လမ်းညွှန်လာခြင်းဖြစ်သည်။

ထို့အပြင် များစွာ စိုးရိမ်ဖွယ်အခြေအနေ ရောက်ရှိနေသော တရားရေးမဏ္ဍိုင်ကို ပို၍သိက္ခာကျ အရှက်ရစေသူ မည်သူကိုမဆို ကျောသား၊ ရင်သား မခွဲခြားဘဲ ပြတ်သားစွာ ကိုင်တွယ် အရေးယူခြင်းဖြင့် ပြည်သူလူထုက ယုံကြည်မှု မရှိသလောက် နီးပါးဖြစ်နေသော တရားစီရင်ရေးလောကကို ပြုပြင်ပြောင်းလဲပါမည့်အကြောင်း တိုက်တွန်းအကြံပြုအပ်ပေသည်။

အယ်ဒီတာ (၂-၈-၂၀၁၈)