News

POST TYPE

OPINION

ကျွန်တော်နှင့် လွှတ်တော် (၂)
28-Jul-2018

ဇွန် ၁၅ သောကြာနေ့တွင်လည်း ရခိုင်အရေးနှင့်ဆိုင်သော အဆိုတစ်ခုတက်လာသည်။ ပျော်ဘွယ်မဲဆန္ဒနယ်မှ ဦးသောင်းအေးက တင်သွင်းခဲ့သည်။ နိုင်ငံတော်တည်ငြိမ်အေးချမ်းရေး၊ တရားဥပဒေစိုးမိုးရေးနှင့် အချုပ်အခြာအာဏာတည်တံ့ခိုင်မြဲရေးအတွက် နိုင်ငံတော်တွင် အကြမ်းဖက်တိုက်ခိုက်မှုများ ထပ်မံမဖြစ်ပွားစေရန် အထူးသဖြင့် ရခိုင်ပြည်နယ်တွင် ထပ်မံမဖြစ်စေရန် ရခိုင်မြောက်ပိုင်းဒေသတွင် ၂၀၁၆ နှင့် ၂၀၁၇ အတွင်း ARSA အကြမ်းဖက်သောင်းကျန်းသူအဖွဲ့က ကျူးလွန်ခဲ့သည့် အကြမ်းဖက်ဖြစ်စဉ်များအပေါ် အကြမ်းဖက်တိုက်ဖျက်ရေး ဥပဒေနှင့်အညီ နိုင်ငံတကာအဖွဲ့အစည်းများနှင့်ပူးပေါင်း၍ ထိရောက်စွာ ပူးပေါင်းဖော်ထုတ်တိုက်ဖျက်ပြီး လုံလောက်သည့်ကာကွယ်မှုများ ပြုလုပ်ပေးပါရန်ဖြစ်သည်။ အားလုံးနီးပါးသော ကိုယ်စားလှယ်များက အပြုသဘောဆောင်ဆွေးနွေးခဲ့ကြသည်။ မိမိအနေနှင့် NHK သတင်းဌာနနှင့် တွေ့ဆုံမေးမြန်းခန်းတွင် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ပြောကြားချက်ကို ကိုးကားခဲ့သည်။ ရခိုင့်အရေးကို နိုင်ငံတကာတွင် နှံ့စပ်နားလည်သူ နည်းပါးသည်။ ထို့အတူ ပြည်တွင်းမှာလည်း အလေးအနက်ထားနားလည်သူ နည်းပါးသည်။ လွှတ်တော်ကိုယ်စားလှယ်များသည် ပြောကြဆိုကြဆွေးနွေးငြင်းခုံကြနှင့် ရေခံမြေခံအကြောင်းတရားများကို အနည်းငယ်တီးမိခေါက်မိဖြစ်လာပြီဟု မြင်မိသည်။ မြေပြင်အနေအထားနှင့် ပကတိအရှိတရားကို သိရှိနားလည်နိုင်စေရန် လွှတ်တော်ကိုယ်စားလှယ်ကြီးများကို ဘူးသီးတောင်မောင်တောဒေသသို့ လေ့လာရေးအဖွဲ့များ စေလွှတ်သင့်ကြောင်း လွှတ်တော်ဥက္ကဋ္ဌကြီးထံ အကြံပြုခဲ့သည်။ ထူးထူးခြားခြားအမျိုးသမီးတစ်ဦး (ရခိုင်) က အဆိုရှင်အား အရင်က နိုင်ငံခြားသားတစ်ဦး ကော်မရှင်တွင်ပါဝင်ရာတွင် ကန့်ကွက်ပြီး ယခုအခါ နိုင်ငံတကာအဖွဲ့အစည်းများနှင့် ပူးပေါင်းဖို့ အဆိုတင်သည်မျိုး ပြောကြားလာသဖြင့် လွှတ်တော်ဥက္ကဋ္ဌမှ အချိန်မီသတိပေးဟန့်တားရခြင်းသာ အနည်းငယ်အရုပ်ဆိုးသွားသည်။ တစ်မျိုးသားလုံး၊ တစ်နိုင်ငံလုံးအရေးတွင် မိမိ၏ပါတီအတ္တနှင့် ရပ်ခံပြောဆိုဝေဖန်ခြင်းများသည် ဖြစ်သင့်သောအရာ မဟုတ်ပါချေ။ သို့သော်ဖြစ်နေသည်ကား အမှန်ပင်။ 

လွှတ်တော်သည် အစိုးရအဖွဲ့မှဝန်ကြီးဌာန၏ လုပ်ရပ်များကို စောင့်ကြည့်ရသည့်မေးခွန်းများ မေးရမည်။ ဝန်ကြီးဌာန လုပ်ထုံးလုပ်နည်းနှင့်အညီ ဥပဒေနှင့်အညီ ဖြေကြားပေးရမည်။ လွှတ်တော်ကိုယ်စားလှယ်တစ်ဦးက လျှပ်စစ်ဝန်ကြီးဌာန၏ တင်ဒါမခေါ်ယူဘဲ ဆောင်ရွက်ခွင့်ရထားသောလုပ်ငန်းကြီး ၄ ခုကို သက်ဆိုင်ရာကုမ္ပဏီများနှင့် ဆက်စပ်ပြီးမေးသည်။ ဥပဒေအကိုးအကား လုပ်ထုံးလုပ်နည်းများနှင့်မေးသည်။ ဒေါ်လာသန်းချီသော လုပ်ငန်းကြီး ၄ ခု ဖြစ်သည်။ မေးခွန်းရှင်က ဒေါနှင့်မာန်နှင့်ပြောသည်။ ပြည်ထောင်စုဝန်ကြီးက မာမာတင်းတင်းတုံ့ပြန်သည်။ တိုင်းပြည်အကျိုးရှိဖို့ ဝန်ကြီးတစ်ဦးအနေနှင့် လုပ်သင့်လုပ်ထိုက်တာကို လုပ်သည်။ ပြည်သူ့ လွှတ်တော်ကိုယ်စားလှယ်များက လက်ခုပ်ဩဘာတီး၍ဝန်ကြီးကို ချီးကျူးလိုက်ကြလေသည်။ 

ရခိုင်မှ ဒေါ်ခင်စောဝေတင်သွင်းသည့် သက်ငယ်မုဒိမ်းများကို ပြင်းထန်သောပြစ်ဒဏ် သေဒဏ်အထိပေးမည့်အဆိုကား ရှုံးနိမ့်သွားခဲ့ရသည်။ မြန်မာလူ့အဖွဲ့အစည်းအတွင်း ကိုယ်ကျင့်တရား သွက်ချာပါဒလိုက်ကာ မကြားဝံ့မနာသာကိစ္စရပ်များတိုးပွားလာနေသဖြင့် သက်ငယ်မုဒိမ်းသေဒဏ်ပေးရေးလှုပ်ရှားမှုများ ဆက်တိုက်ပေါ်ပေါက်ခဲ့သော်လည်း ပြည်သူ့အသံလွှတ်တော်အသံ ဖြစ်မလာခဲ့ပါချေ။ 

ဇွန်လ ၁၉ ရက်နေ့သည် နိုင်ငံတော်အတိုင်ပင်ခံ၏ မွေးနေ့ဖြစ်၍ လွှတ်တော်များကို နေ့ထက်ဝက်နားပြီး မွေးနေ့ပွဲကျင်းပခဲ့သည်။ ညနေပိုင်းတွင် ပင်လုံညီလာခံအကြိုအစိုးရ၊ လွှတ်တော်၊ တပ်မတော်အစုအဖွဲ့အစည်းအဝေးကို အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန၌ ပြုလုပ်ခဲ့သည်။ လွှတ်တော်ကိုယ်စားလှယ်များ၊ တိုင်းရင်းသားအစုအဖွဲ့များ အပါအဝင်လူဦးရေ ၁၀၀ ကျော် တက်ရောက်ခဲ့ကြသည်။ ပြည်သူ့လွှတ်တော်၏ တိုင်းရင်းသားရေးရာနှင့် ပြည်တွင်းငြိမ်းချမ်းရေးကော်မတီ ဥက္ကဋ္ဌပင် မသိ။ သူကပအိုဝ်းပါတီမှ ဖြစ်သည်။ လွှတ်တော်ထဲရှိ ရှမ်း၊ ရခိုင်၊ ဇိုမီး၊ ပအိုဝ်း၊ ပလောင်ကိုယ်စားလှယ်များ တစ်ဦးမှမပါဝင်။ မည်သည့်စံနှုန်းဖြင့် မည်သူက ရွေးချယ်သနည်း။ ကျွန်တော်မသိ။ တိုင်းရင်းသားပါတီများအပေါ် တန်းတူမဆက်ဆံဟုပြောလျှင် ရိုင်းအံ့မထင်။ သည်လိုပြည်ထောင်စုစိတ်ဓာတ်မျိုးနှင့် လွှတ်တော်အတွင်း အမျိုးသားပြန်လည် သင့်မြတ်ရေးကို ဖော်ဆောင်နိုင်ပါ့မလား။ အစည်းအဝေး ၃ ရက် ကျင်းပခဲ့သည်။ နောက်ဆုံးနေ့တွင် လွှတ်တော်ကြီးလည်း ရပ်နားလိုက်တော့သည်။ 

ဒုတိယအကြိမ် ပြည်သူ့လွှတ်တော်အဋ္ဌမ ပုံမှန်အစည်းအဝေး၏ ဇွန်လ ၁ ရက်နေ့တွင်ကျွန်တော်၏ မေးခွန်းတစ်ခုကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဒုဝန်ကြီးမှ ဖြေကြားခဲ့သည်။ အိန္ဒိယအစိုးရထံမှ ရခိုင်ပြည်နယ်ဖွံ့ဖြိုးရေးအတွက် အမေရိကန်ဒေါ်လာ ၂၅ သန်းထောက်ပံ့ငွေများကို ပြည်နယ်အစိုးရနှင့် ပြည်ထောင်စုအစိုးရကြားတွင် မည်သို့စီမံခန့်ခွဲမည်၊ မည်သည့်ဒေသများတွင် သုံးစွဲမည်။ ဒေသရွေးချယ်ရာတွင် မည်သည့်စံနှုန်းများနှင့် သတ်မှတ်မည်ကို မေးခြင်းဖြစ်သည်။ ဝန်ကြီးကဌာနအလိုက် လျာထားချက်များကို ဖော်ပြခဲ့သည်။ တစ်ဆက်တစ်စပ်တည်းမေးခွန်းတွင် ကျွန်တော်က ဝန်ကြီးဌာနများအနေနှင့် ပြည်သူ့ကိုယ်စားလှယ်များနှင့်ညှိနှိုင်းပြီးလုပ်ဆောင်ရန်၊ အတည်ပြုရန် မေးမြန်းခဲ့သည်။ လွှတ်တော်ကိုယ်စားလှယ်များကို ဖိတ်ကြားပြီး သက်ဆိုင်ရာဝန်ကြီးဌာနများအနေနှင့် လုပ်ငန်းများသည် ပြည်သူအပေါ် အကျိုးရှိ၊ မရှိ ကောင်းမွန်သောအစီအစဉ် ဖြစ်၊ မဖြစ် ညှိနှိုင်းပြီး ဆွေးနွေးပြီးမှ ဆုံးဖြတ်ဆောင်ရွက်သွားမှာဖြစ်သည်ဟု ဝန်ကြီးမှဖြေကြားသွားခဲ့သည်။ လွှတ်တော်၏ ကတိကဝတ်ပင်ဖြစ်သည်။ 

အိန္ဒိယထောက်ပံ့ငွေကိစ္စ ဆွေးနွေးရန် ပြည်နယ်လွှတ်တော်မှ ကိုယ်စားလှယ်နှစ်ဦးလာနေသည်ဟု လွှတ်တော်နောက်ဆုံးနေ့တွင် သိရသည်။ ကျွန်တော်တို့ ဘာမှမသိ။ ဝန်ကြီးဌာနသို့ စုံစမ်းကြည့်ရာ လွှတ်တော်သို့ စာပို့ထားသည်ဟုဖြေသည်။ လွှတ်တော်ရုံးမှ ပြည်သူ့လွှတ်တော်ကိုယ်စားလှယ် ၂ ဦးကို ရွေးချယ်ကြောင်း သိရပြန်သည်။ မေးခွန်းရှင်ကျွန်တော့်ကို မဖိတ်။ ကျောက်ခင်းလမ်းတစ်ထွာ၊ တံတားတို တစ်စင်းကိစ္စမဟုတ်ပါ။ ဖိတ်ကြားခံရသူများမှာလည်း အကြောင်းအရာနှံ့စပ်သူများမဟုတ်။ ဖိတ်ကြားခံရသူ ရခိုင်ပါတီမှ တစ်ဦးက သူ့ထက် မေးခွန်းရှင်အားဖိတ်ပါဟု ဖုန်းဖြင့်ပြောခဲ့သေးသည်။ နောက်ပိုင်းမှ ကိုယ်စားလှယ်များကို ဖိတ်ကြားပါသည်ဟု နှုတ်ဖြင့်အကြောင်းပြန်သည်။ ရုံးစာထဲတွင်တော့ ၂ ဦးမျှသာ။ ပေါ့ပေါ့တွေး ပေါ့ပေါ့လုပ်သည်လား။ စီမံခန့်ခွဲမှုညံ့သည်လား။ အင်စတီကျူးရှင်းများ မခိုင်မာလို့လား။ အလွဲကတော့ အလွဲဖြစ်သည်။ ပေါ့သေးသေးမှ နားလည်မှုလွဲသည့် အကြီးကြီးဖြစ်သွားနိုင်သည်။

လွှတ်တော်နားပြီဖြစ်သဖြင့် ကျွန်တော်တို့ဘက်မှ လူပြည့်မတက်နိုင်။ ဆွေးနွေးညှိနှိုင်းမှုမှာ ပွင့်လင်းပြီးချောမွေ့သည်။ ဝန်ကြီးဌာနမှ လျာထားချက်များကို စိစစ်ဖြတ်တောက်အတည်ပြုသင့်သည်ကိုပြုကြနှင့် သတ်မှတ်ချိန်ထက် ကျော်လွန်ပြောဖြစ်ပြီး နားလည်တန်ဖိုးထားမှုများနှင့် အောင်မြင်စွာပြီးစီးခဲ့ပါသည်။ 

လွှတ်တော်မစမီက အပြောင်းအလဲများဖြစ်မည်ဟု သတင်းထွက်နေသော ဝန်ကြီးနေရာများမှာ ငြိမ်သက်လျက်။ အဂတိတိုက်ဖျက်မှု ကော်မရှင်က ခေါ်ယူစစ်ဆေးနေသည်ဟု ပျံ့နှံ့နေသောသတင်းမှာ အမှန်အကန်ဖြစ်လာပြီး နုတ်ထွက်စာတင်သွားသည်။ ထိုပုဂ္ဂိုလ်မှာ ဝန်ကြီးမခန့်မီကတည်းက အငြင်းပွားဖွယ်ရာများနှင့်ဖြစ်သည်။ လေယာဉ်ကြီးပြေးလမ်းပေါ်မှ ပျံတက်တော့မည်ဟု မတိုးမကျယ်အော်ခဲ့ပြီး အခု အသံတိတ်သွားခဲ့လေပြီ။ သွက်လက်ထက်မြက်သော နိုင်ငံတကာစံချိန်မီ တက်ကနိုကရက်တစ်ဦးများ ပေါ်လာလေမလားလို့ မျှော်လင့်နေကြစဉ် ငါမအိုသေးဆိုသော အလောင်းစည်သူမင်းကြီးစိတ်ဓာတ်နှင့် ပြည်တွင်းပညာသည်တစ်ဦး ပေါ်ထွက်လာခဲ့သည်။ 

နိုင်ငံတော်သံသမန် မိုးကောင်းကင်တွင်ကား မီးရှူးမီးပန်းများ၊ သင်္ကြန်အမြောက်များသည် အနုပညာမဆန်ဘဲ မျက်စိနောက်စရာဖြစ်နေသည်။ ICC မှ အာရေဗျကျိန်စာလွှတ်နေသည်။ သဲကန္တာရကုလားအုတ်ကြီး၏ လည်ပင်းရှည်ရှည်နှင့် ဦးခေါင်းသည် အိမ်အိုကြီး၏အပေါ်ထပ် ပြတင်းပေါက်ထဲဝင်နေသည်။ 

ကုလသမဂ္ဂအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ်အမျိုးသမီးသည် ဆယ်ရက်ခန့်နေထိုင်ကာ လွှတ်တော်နောက်ဆုံးနေ့တွင် ပြန်လည်ထွက်ခွာသွားသည်။ နေပြည်တော်တွင် အထောက်အကူပြုရုံးဖွင့်မည်။ လူ့အခွင့်အရေးချန်ပီယံ အမေရိကသည် ကုလသမဂ္ဂလူ့အခွင့်အရေးကောင်စီမှ ရုတ်တရက် နုတ်ထွက်လိုက်သည်။ 

ငြိမ်းချမ်းရေးမြတ်နိုးသူများအားလုံး မျှော်လင့်နေကြသော ပင်လုံညီလာခံကြီး ပြန်လည်ရှင်သန်လာပေပြီ။ ဤကား မင်္ဂလာသတင်းပေတည်း။ 

ပြီးခဲ့သောညီလာခံမှ အချက် ၃၇ ချက်ကို ပြည်ထောင်စုသဘောတူစာချုပ်အဖြစ် အတည်ပြုလက်မှတ်ရေးထိုးနိုင်ခဲ့ကြသည်။ ဤတစ်ကြိမ်တွင် ပိုမိုထိရောက်အောင်မြင်စေလိုသောဆန္ဒ လူတိုင်းကိုယ်စီရှိကြပေလိမ့်မည်။ 

မြောက်ပိုင်းမှ ညီနောင်ခုနစ်ဖွဲ့ကို ဖိတ်သည်။ စုံစုံညီညီလာကြမည်ဟု ကြားနေရသည်။ 

အာဏာရပါတီနှင့် အစိုးရ၏ ပုံရိပ်များမှုန်ဝါးလာနေပြီး အဆိုးမြင်ဝါဒ လွှမ်းမိုးနေသော ယနေ့ကာလတွင် ခေတ်မီလှပသောမှတ်တိုင်ကို ယခုညီလာခံသည် အကောင်းမြင်ဝါဒနှင့် စိုက်ထူနိုင်ပါမည်လား။ မြင့်မြတ်သော စိတ်ထားများဖြင့် အမျိုးသားပြန်လည်သင့်မြတ်ရေးမူကို ကိုင်စွဲကာ ကောင်းမွန်သောရလဒ်များ ချောချောမွေ့မွေ့ရပါစေကြောင်း ဆုတောင်းမိပါသည်။ 

ကျွန်တော်တို့ရခိုင်ပါတီမှလည်း မိန့်ခွန်းအလှည့်ကြုံသဖြင့် ပြည်တွင်းငြိမ်းချမ်းရေး၊ ဖက်ဒရယ်အရေးနှင့် နယ်လုမြေလုစစ်ပွဲသစ်ဖန်တီးကာ အချုပ်အခြာအာဏာကို ထိပါးနေသော ရခိုင်အရေးတို့ကို တင်ပြခွင့်ရပေလိမ့်မည်။ 

ညီလာခံမှ ရလဒ်ကောင်းများကို လွှတ်တော်မှ လက်ခံကြိုဆိုကာ ဖွဲ့စည်းပုံပြင်ဆင်ရေးကို ဦးတည်လှမ်းရပေဦးမည်။ ညီလာခံပြီးမြောက်၍ တစ်ပတ်အကြာတွင် ပြည်ထောင်စုလွှတ်တော်၏ နဝမအကြိမ် ပုံမှန်အစည်းအဝေးများ စတင်မည်။ လေးလံသောဝန်ထုပ်ဝန်ပိုးများ၊ ကတိကဝတ်များနှင့် ဖြည်းဖြည်းချင်းရွေ့နေရသော ဒီမိုကရေစီအစိုးရသစ်၏ ကက်ဘိနက်ကားတန်းကြီးကို စေတနာမှန်မှန်နှင့် ရင်မောစွာ စောင့်ကြည့်နေရပေသည်။ 

ရွှေပြည်တော်ခရီးကား မနီးသေးပါ။ ဘေးဘယာမငြိ ခလုတ်မထိ မိုင်းမမိပါစေကြောင်း ဆုတောင်းလိုက်ပါရစေ။ ။ 

မောင်ခိုင်အောင် (စစ်တွေ)
၆. ဇွန် ၂၀၁၈