News

POST TYPE

OPINION

ရန်ကုန်လမ်းမများ၊ အခန့်ထားခံ မြို့တော်ဝန်နှင့် အထူးပြင်ဆင်သင့်သော စည်ပင်ဥပဒေ (Daily, Vol-6/No-90)
24-Jul-2018
နိုင်ငံတော် အတိုင်ပင်ခံပုဂ္ဂိုလ်၏ ကော့မှူးခရီးစဉ်တွင် ကော့မှူးလမ်းများသည် ရန်ကုန်လမ်းများထက် ပိုကောင်းကြောင်း မှတ်ချက်ပေးအပြီးနောက် ရန်ကုန်မြို့တော်တစ်ဝန်းရှိ လမ်းများပျက်စီးခြင်းနှင့်ပတ်သက်၍ ရန်ကုန်နေထိုင်သူများ၏ အွန်လိုင်းလူမှုကွန်ရက်ပေါ်မှတစ်ဆင့် ဝေဖန်မှတ်ချက်ပေးမှု အရှိန် ပိုတက်သွားခဲ့သည်။

ယခင်က လမ်းပြင်ဆင်စရိတ်သည် မြို့တော်ဝန် အပါအဝင် မြို့တော်စည်ပင်ရှိ သက်ဆိုင်ရာဌာနမှ တာဝန်ရှိသူများအတွက် အပိုဝင်ငွေကောင်းစွာ ရှာဖွေပေးနေသော အဓိက ငွေပင်ငွေရင်းဟု ဝေဖန်ပြောဆိုမှုများရှိရာ လမ်းများကို နှစ်အတန်ကြာ ပြင်စရာ မလိုသည်အထိ အရည်အသွေး ကောင်းသွားစေရန် မကြိုးစားခြင်းဖြစ်သည်ဟု အများက မှတ်ချက်ပြုကြသည်။

ယင်းသို့ မှတ်ချက်ပြုရလောက်အောင်ပင် ရန်ကုန်လမ်းများသည်လည်း ဝေဖန်စရာ ကောင်းလောက်အောင်ပင် မိုးရာသီရောက်တိုင်း ပျက်စီးယိုယွင်းလေ့ ရှိသည်။ ယခုနှစ်တွင် ယခင့်ယခင်နှစ်များထက် အပျက်အစီးများခြင်းမှာ မိုးပိုရွာခြင်းကြောင့်ဖြစ်သည်။ 

သို့သော် မြို့တော်စည်ပင်သည် နည်းပညာချို့တဲ့ ခေတ်နောက်ကျမှု၊ နိုင်ငံတကာ စံနှုန်းများနှင့် ကွာဟမှု၊ စနစ်ဟောင်းနှင့် ခေါက်ရိုးကျိုးနေသော လုပ်ငန်း အကောင်အထည်ဖော်မှုတို့ ရှိနေလင့်ကစား လက်ရှိအစိုးရ တက်လာပြီးနောက် ယခင်အစိုးရလက်ထက်များထက် ပို၍အလုပ်လုပ်လာခြင်း၊ လမ်းပေါက်များ လျင်လျင်မြန်မြန် ပြင်ဆင်လာ၊ ဖာထေးလာခြင်းမှာမူ မငြင်းနိုင်သောအချက်ဖြစ်သည်။ 

သို့သော် ခေတ်မီပြောင်းလဲနေသော လမ်းပြင်ဆင်ဖာထေးခြင်းလုပ်ငန်း၊ လမ်းခင်းလုပ်ငန်းများနှင့် နှစ်များစွာ အဆက်ပြတ်ကျန်နေခဲ့သည့်အပြင် ခေါက်ရိုးကျိုးနေသော အကျင့်ပျက်ခြစားမှုတို့ကြောင့် လမ်းများ နှစ်စဉ် မိုးရာသီရောက်တိုင်း လမ်းပြင်သံသရာ လည်နေခြင်းဖြစ်သည်။

ယခုနှစ်မိုးရာသီသည် ယခင်နှစ်ထက် မိုးပိုသည့်အပြင် ရက်ဆက်ရွာသွန်းနေသောကြောင့် မည်မျှ ပြင်ဆင်ဖာထေးလိုသည်ဖြစ်စေ ဖြစ်နိုင်ခြေနည်းလှပြီး မိုးတိတ်သည့် အခိုက်အတန့် ဖာထေးထားသော လမ်းပေါက်သည်လည်း မည်သို့မျှ ကြာရှည်ကြံ့ခိုင်နိုင်မည်မဟုတ်ဆိုသောအချက်ကိုမူ လမ်းခင်းခြင်းဆိုင်ရာ နည်းပညာ အခြေခံသဘော နားလည်ထားသူများမှ သိနိုင်ပေသည်။

ထိုအချက်ကို မသိရှိသူများက ယခင်ထက် အလုပ်ပိုလုပ်လာသော မြို့တော်စည်ပင်ကို ပုတ်ခတ်ဝေဖန်နေခြင်းမှာလည်း မသင့်တော်လှပေ။ ဤသို့ဆိုခြင်းအားဖြင့် အခြားဝေဖန်ထောက်ပြစရာ များစွာရှိနေသော မြို့တော်စည်ပင်ကို စင်းလုံးချောဟု ပြောလိုခြင်းမဟုတ်ပေ။ မြို့တော်စည်ပင်၏ အဓိက လိုအပ်ချက်မှာ ပြည်ထောင်စုအစိုးရ သို့မဟုတ် နိုင်ငံတော်သမ္မတက တိုက်ရိုက်ခန့်ထားသော မြို့တော်ဝန်နှင့် မြို့တော်စည်ပင်သာယာရေး ကော်မတီဝင်များ ဖြစ်နေခြင်းကို ပြုပြင်ပြောင်းလဲရေးဖြစ်သည်။

ပြည်သူကို တိုက်ရိုက် တာဝန်ခံသည့်သူများကို မြို့တော်ဝန်နှင့် ကော်မတီဝင်များအဖြစ် ငါးနှစ်တစ်ကြိမ် ရွေးကောက် တင်မြှောက်ခြင်းအားဖြင့် အကျင့်ပျက် ခြစားမှုများကို ပြည်သူနှင့် မီဒီယာများက ယခုထက်ပို၍ ပွင့်လင်းလွတ်လပ်စွာ ဝေဖန်ထောက်ပြ အကြံပြု၊ ထိန်းညှိလာနိုင်သည့်အပြင် ဒီမိုကရေစီနည်းကျ ရွေးကောက်တင်မြှောက်ခံရသော်လည်း ဗဟိုချုပ်ကိုင်မှုကို တင်းကျပ်စွာ ကျင့်သုံးနေကြောင်း လက်ရှိအစိုးရအပေါ် ဝေဖန်ပြောဆိုမှုများကိုလည်း ချေဖျက်ရာ ရောက်မည်ဖြစ်သည်။

ထို့ကြောင့် လက်ရှိ ဖွဲ့စည်းပုံအခြေခံဥပဒေအရပင် ပြည်နယ်နှင့် တိုင်းဒေသကြီး လွှတ်တော်များကို လုပ်ပိုင်ခွင့် အပြည့်အဝ ပေးထားသည့် စည်ပင်သာယာဥပဒေကို ဒီမိုကရေစီနည်းကျ ပြင်ဆင်ပြောင်းလဲရန်ကိုပင် ဗဟိုက ချုပ်ကိုင်ပိတ်ပင်ထားခြင်းကိုလျှော့ပေးကာ ပြည်သူက တိုက်ရိုက်ရွေးကောက် တင်မြှောက်သူများကို သက်ဆိုင်ရာ မြို့တော်များအလိုက် လွတ်လပ်စွာ နိုင်ငံတကာနှင့် ချိတ်ဆက် ဆောင်ရွက်ခွင့်ပြုခြင်းအားဖြင့် ဖွံ့ဖြိုးတိုးတက်သော၊ ခေတ်မီခံ့ညားသော၊ လုံခြုံစိတ်ချရသော၊ သန့်ရှင်းသာယာသော မြို့တော်များအဖြစ် ပြောင်းလဲစေကြောင်း တိုက်တွန်း အကြံပြုအပ်ပေသည်။

အယ်ဒီတာ (၂၄-၇-၂၀၁၈)